Doktrinal nga Kahanas: Juan 3:16

Ang Pag-ula ni Jesukristo

Jesus Christ kneeling as He prays and atones in the Garden of Gethsemane. Christ is depicted wearing red and blue robes. He has His hands clasped and is resting them on a large rock. A small stream of light coming through the darkened and cloudy background shines on the face of Christ. Light emanates around Christ’s head.

Sa miaging leksiyon, nakakat-on ka mahitungod sa lawom nga gugma nga gipakita sa Langitnong Amahan kanato sa pagpadala sa Iyang Anak aron mahimong atong Manluluwas ug Manunubos. Kini nga leksiyon maghatag kanimo og oportunidad aron dugangan ang imong kahanas niini nga doktrina pinaagi sa pagmemorya sa pakisayran ug importante nga hugpong sa pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo diha sa sitwasyon sa tinuod nga kinabuhi.

Pag-andam sa estudyante: Dapita ang mga estudyante nga maghunahuna mahitungod sa kon unsaon nila pagtudlo ang usa ka tawo mahitungod kang Jesukristo ug sa Iyang Pag-ula kon sila full-time nga mga misyonaryo.

Posible nga mga Kalihokan sa Pagkat-on

Gidisenyo kini nga leksiyon aron itudlo pagkahuman sa pangkontekstong leksiyon para niini nga tudling sa doktrinal nga kahanas (“Juan 3:14–17”). Kon kinahanglang ibalhin kini nga leksiyon sa doktrinal nga kahanas ngadto sa laing semana aron motukma sa mga eskedyul sa eskuwelahan, siguroha nga itudlo ang leksiyon sa “Juan 3:14–17” para niini nga tudling sa kasulatan niana gihapon nga semana.

Imemorya ug ipasabot

Sa atubangan sa klase, isulat ang mga pulong para sa importante nga hugpong sa mga pulong sa kasulatan para sa Juan 3:16 sa nagsagol-sagol nga paagi diha sa pisara, nga pareho sa mosunod nga nagsagol-sagol nga bersyon. Ipahan-ay sa mga estudyante ang bersikulo diha sa ilang mga journal sa pagtuon, o paghangyo og boluntaryo nga moadto sa pisara ug isulat ang mga pulong sa saktong pagkahan-ay kauban ang saktong pakisayran sa kasulatan. Kon gikinahanglan, awhaga ang mga miyembro sa klase nga motabang.

Ang mosunod usa ka gisagol-sagol nga bersyon sa pakisayran sa kasulatan ug importante nga hugpong sa mga pulong sa kasulatan para sa Juan 3:16 . Ihan-ay ang mga pulong pinaagi sa pagsulat sa saktong pakisayran sa kasulatan ug importante nga hugpong sa mga pulong sa kasulatan diha sa imong journal sa pagtuon.

Dios Anak ug tungod niini gihatag gihigugma pag-ayo sa ang iyang bugtong 16 Kay Juan Niya ang kalibotan 3

Kon mahuman na ka sa paghan-ay sa hugpong sa mga pulong, pagtagana og panahon aron imemorya ang pakisayran sa kasulatan ug importante nga hugpong sa mga pulong sa kasulatan.

Paghatag og oportunidad aron ipasabot sa mga estudyante ang doktrina nga gitudlo sa tudling sa doktrinal nga kahanas. Ang mosunod mao ang usa ka ehemplo sa kon unsaon kini pagbuhat.

Hunahunaa kadali nga ikaw usa ka full-time nga misyonaryo. Gidapit ka sa usa ka balay sa mahigalaong magtiayon nga wala pa gayod makadungog mahitungod sa Pag-ula ni Jesukristo. Gikan sa imong nakat-onan sa miaging leksiyon mahitungod sa gugma sa Dios sa pagpadala sa Iyang Anak, unsa ang imong ipaambit niini nga magtiayon?

Ikonsiderar ang pag-awhag sa mga estudyante nga i-role play kini nga sitwasyon nga magkapares, o pagdapit og pipila ka mga estudyante nga mag-role play sa atubangan sa klase.

Pagbansay sa paggamit

Pagtagana og panahon aron susihon ang mga baroganan sa pag-angkon og espirituhanong kahibalo sa mosunod nga kalihokan.

Ikonsiderar ang pagsulat niini nga mga pamahayag sa pisara ug paghangyo sa mga estudyante nga moadto ug isulat ang kulang nga mga pulong.

Tubagi ang mga blangko para sa kada usa sa mosunod nga mga hugpong sa mga pulong.

Lihokon inubanan sa hugot nga p____.

Susihon ang mga konsepto ug mga p________ inubanan sa m______ p__________.

Tinguhaon ang dugang nga panabot pinaagi sa b_______ g________________ nga mga tinubdan.

Para sa kada usa niini nga mga baroganan, pagdapit og boluntaryo aron maghatag og 30 ka segundo nga pagpasabot sa buot ipasabot sa baroganan.

Ikonsiderar ang mosunod nga sitwasyon.

Pagkahuman nga dugay nga nakauli sa ikaduha ka nagsunod- sunod nga higayon, naglisod si Sarai sa pagpakig-istorya sa iyang mga ginikanan. Nakahibalo siya nga lisod nang mosalig kaniya ang iyang mga ginikanan. Nakahibalo usab siya nga nagbuhat siya og mga desisyon nga, kon makahibalo niini ang iyang mga ginikanan, mosamot nga dili na mosalig kaniya ang iyang mga ginikanan. Nakonsensya si Sarai, pero morag mas sayon karon nga balewalaon kini nga mga problema. Dugang pa niini, mas naglisod siya sa pagbuhat ug pagbati sa espirituhanong mga butang, nga hinungdan nga naghunahuna siya nga dili tinuod ang Langitnong Amanahan o mitalikod Siya kaniya tungod sa iyang mga desisyon. Niini nga punto, wala nakahibalo si Sarai kon unsa ang buhaton o asa siya moduol.”

• Unsa ang hinungdan nga nahimong lisod kini nga sitwasyon para kang Sarai?

• Kon anaa ka sa posisyon ni Sarai, unsa ang pipila sa imong dagkong mga pangutana o mga kabalaka?

Ikonsiderar kon sa unsang paagi nga makatabang kang Sarai sa pagtubag sa iyang sitwasyon ang mga baroganan sa pag-angkon og espirituhanong kahibalo. Kon gikinahanglan, pagtagana og panahon aron rebyohon ang parapo [paragraph] 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022) aron makakat-on pa og dugang mahitungod niini nga mga baroganan.

Lihokon inubanan sa hugot nga pagtuo

Pagdesisyon kon pinakamaayo bang ipabuhat sa mga estudyante ang mosunod nga mga kalihokan kauban ang usa ka pares, diha sa gagmay nga mga grupo, o isip usa ka klase.

• Unsa kaha ang angay buhaton ni Sarai aron makalihok siya inubanan sa hugot nga pagtuo niini nga sitwasyon?

• Unsay imong isulti aron matabangan siya kon gibati niya nga lisod kaayo lihokon inubanan sa hugot nga pagtuo?

Susihon ang mga konsepto ug mga pangutana inubanan sa mahangturong panglantaw

Gibati na ni Sarai nga adunay problema ang iyang mga relasyon sa iyang mga ginikanan ug sa Dios tungod sa mga desisyon nga iyang gibuhat. Morag mas mograbe ang sitwasyon kon mosulti siya sa iyang mga ginikanan ug sa Dios.

• Sa unsa nga mga paagi nga dili tukma o dili kompleto ang panglantaw ni Sarai?

• Unsa ang imong nahibaloan mahitungod sa Langitnong Amahan, ni Jesukristo, o sa plano sa kaluwasan nga makatabang aron makahinumdom si Sarai?

• Kon ikaw ang inahan o amahan ni Sarai, sa imong hunahuna unsa ang imong bation ngadto kaniya? Unsa ang gusto nimong masabtan sa imong problemadong anak mahitungod sa imong gibati?

Tinguhaon ang dugang nga panabot pinaagi sa balaanong gipili nga mga tinubdan

Paggahin og pipila ka minuto sa pagpangita sa mga tudling sa kasulatan o mga pamahayag gikan sa mga lider sa Simbahan nga makatabang kang Sarai. Kon gikinahanglan, ikonsiderar ang paggamit sa mga kapanguhaan sama sa Giya ngadto sa mga Kasulatan o Gospel Topics aron matabangan ka (tan-awa sa ChurchofJesusChrist.org). Mahimong makatabang usab ang paggamit sa pipila sa mga kasulatan nga imong gitun-an sa miaging leksiyon, sama sa Juan 3:14–17 o Doktrina ug mga Pakigsaad 18:10–11 .

Kon gikinahanglan, tabangi ang mga estudyante nga makahibalo kon asa makita ang mga kasulatan nga may kalabotan niini nga sitwasyon. Mahimong makatabang kon ipakita ang listahan sa mga tudling sa kasulatan gikan sa handout sa miaging leksiyon.

Kon mahuman na ang mga estudyante, dapita ang mga estudyante sa pagpakigbahin sa unsay ilang nakita. Ikonsiderar ang paggamit og mga pangutana sama sa mosunod aron mapausbaw ang panaghisgotanan diha sa klase.

• Unsay imong nakat-onan mahitungod ni Jesukristo gikan sa imong pagtuon nga makatabang kang Sarai?

• Unsa ang dili mominos sa duha ka partikular nga hugpong sa mga pulong gikan sa imong pagtuon nga makatabang kang Sarai? Ngano man?

Ikonsiderar ang pagdapit sa mga estudyante nga ipaambit ang ilang nakat-onan niini nga leksiyon nga makatabang kanila sa ilang personal nga kinabuhi. Pagpamatuod sa mga kamatuoran nga gihisgotan.

Pagrebyo

Kinahanglang gamiton ang mosunod nga kalihokan sa pagrebyo sa umaabot nga leksiyon.

Ang importante nga hugpong sa mga pulong sa kasulatan para sa Juan 3:16 mao ang “Kay gihigugma pag-ayo sa Dios ang kalibotan ug tungod niini gihatag niya ang Iyang bugtong Anak.”Tabangi ang mga estudyante sa pgrebyo niining pakisayran sa kasulatan ug importante nga hugpong sa mga pulong sa kasulatan pinaagi sa pagdapit kanila nga balikon kini isip usa ka klase. Pagkahuman sa pagbuhat niini sa pipila ka higayon, mahimo usab nga balikon sa mga estudyante ang pakisayran sa kasulatan ug importante nga hugpong sa mga pulong sa kasulatan para sa mga tudling sa doktrinal nga kahanas nga ilang gitun-an.