“He Comes Again to Rule and Reign” by Mary R. Sauer.
Gitudloan ni Jesus ang usa ka babayeng Samaryanhon sa atabay mahitungod sa buhing tubig nga Iyang gitanyag. Tinguha niini nga leksiyon nga tabangan ka nga mas makasabot mahitungod sa buhi nga tubig nga gitanyag sa Manluluwas: kon unsa kini, kon nganong gikinahanglan nimo kini, ug kon sa unsang paagi nga ikaw makadawat niini.
Pagpahiangay sa mga kalihokan aron matubag ang mga panginahanglan. Kini nga mga outline dili script nga kinahanglan nimong sundon. Hinoon, gamita kini isip tinubdan sa mga ideya aron sa pagdapit sa imong kaugalingong inspirasyon. Samtang namalandong ka sa mga panginahanglan sa imong mga estudyante ug nag-ampo para sa giya gikan sa imong Amahan sa Langit, giyahan ka aron ipahiangay ang mga ideya o mga sugyot niini nga mga kapanguhaan aron mahimong mas motukma niana nga mga panginahanglan.
Pag-andam sa estudyante: Dapita ang mga estudyante nga ikompara ang mga panahon nga mibati sila og espirituhanong kahaw-ang ngadto sa mga panahon nga mibati sila og espirituhanong katagbawan. Unsay nakahimo og kalainan?
Posible nga mga Kalihokan sa Pagkat-on
Ang dalan sa kalipay ug katumanan
Sugdi ang klase pinaagi sa pagpaambit sa mosunod nga pamahayag ni Elder Corbridge ug paghisgot sa sunod nga mga pangutana. Ikonsiderar ang paghimo og listahan diha sa pisara sa mga tubag sa mga estudyante sa unang pangutana.
Si Elder Lawrence E. Corbridge sa Seventy mitudlo:
Imahe
Official Portrait of Elder Lawrence E. Corbridge. Photographed March 2017.
May usa lamang ka dalan sa kalipay ug sa katumanan. Si [Jesukristo] mao ang Dalan. Ang uban nga dalan, bisan unsang lahi nga dalan, mga kabuang.
Siya mitanyag sa atabay sa buhing tubig. Mahimo kitang moinom ug dili na gayud uhawon, o dili kita moinom ug binuang kaayong magpabiling giuhaw.
(Lawrence E. Corbridge, “Ang Dalan,” Liahona, Nob. 2008, 34)
Asa usahay modangop ang mga tawo para sa kalipay ug katumanan nga makahatag kanila og pamati nga espirituhanong giuhaw o wala matagbaw?
Ngano kaha nga ang mga tawo usahay mogamit sa mga butang nga dili makahatag og malungtarong katagbawan?
Unsa ang gitanyag ni Jesukristo nga naghatag og malungtarong kalipay ug katumanan?
Dapita ang mga estudyante nga susihon ang ilang kaugalingong kinabuhi pinaagi sa paghatag kanila og oportunidad nga maghunahuna mahitungod sa mosunod.
Paghunahuna kon sa unsang paagi nga may kalabotan sa imong kaugalingong kinabuhi kini nga mga pangutana. Aduna bay mga butang diin midangop ka para sa kalipay ug katumanan nga sa pagkatinuod wala gayod makatagbaw niadto nga mga tinguha? Unsa nga mga kasinatian ang imong nasinati sa dihang imong gibati ang malungtarong kalinaw ug kalipay nga nagagikan lamang ni Jesukristo?
Buhi nga tubig
Imahe
Jesus Christ depicted teaching a Samaritan woman at a well. Christ is portrayed sitting on the edge of the well. The woman is seated on the ground before Him.
Hinumdomi ang imong pagtuon sa Juan 4 sa miaging leksiyon nga gitudloan ni Jesus ang usa ka babayeng Samaryanhon mahitungod sa buhi nga tubig, nga “usa ka simbolo ni Ginoong Jesukristo ug sa Iyang mga pagtulon-an” (Giya ngadto sa mga Kasulatan, “ Buhi nga Tubig ,” scriptures.ChurchofJesusChrist.org).
Hunahunaa nga gihangyo ka nga mag-andam og pakigpulong para sa panagtigom alang sa sakramento mahitungod sa buhi nga tubig nga gitanyag ni Jesukristo. Isip bahin sa imong pakigpulong, gihangyo ka nga tukion (1) kon unsa ang buhi nga tubig, (2) kon nganong gikinahanglan nato kini, ug (3) kon sa unsang paagi nga kita makadawat niini gikan sa Manluluwas. Gamit ang mosunod nga mga kasulatan, mga pamahayag, ug mga pangutana, ingon man ang bisan unsang dugang pa nga tabang nga lagmit nga makita nimo mismo, andama ang imong mga hunahuna ug ihan-ay ang imong pakigpulong.
Ipakita o ihatag ang mosunod nga handout para sa mga estudyante aron himoon nga pakisayran samtang nag-andam sila sa ilang pakigpulong.
Buhi nga Tubig
Basaha ang mosunod nga mga tudling sa kasulatan ug mga pamahayag, nga mangita og mga ideya mahitungod sa buhi nga tubig nga gitanyag ni Jesukristo.
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar, Quorum of the Twelve Apostles official portrait. 2020.
Ang buhi nga tubig nga gipasabot sa [ Juan 4:10 ] usa ka representasyon sa Ginoo nga si Jesukristo ug sa Iyang ebanghelyo. Ug sama nga ang tubig gikinahanglan sa pagpatunhay sa pisikal nga kinabuhi, ang Manluluwas ug ang Iyang mga doktrina, mga baroganan, ug mga ordinansa mahinungdanon para sa kinabuhing dayon. Ikaw ug ako nanginahanglan sa Iyang buhi nga tubig sa kada adlaw ug sa igong suplay aron sa pagpatunhay sa atong nagpadayon nga espirituhanong pagtubo ug paglambo.Ang mga kasulatan naglakip sa mga pulong ni Kristo ug tinubdan sa buhi nga tubig nga atong magamit ug diin kita makainom og daghan ug dugay. Ikaw ug ako kinahanglang motan-aw ug moduol ngadto kang Kristo, kinsa mao “ang tuburan sa buhi nga tubig” ( 1 Nephi 11:25 ; ikompara ang Ether 8:26 ; 12:28), pinaagi sa pagbasa (tan-awa sa Mosiah 1:5), pagtuon [tan-awa sa Doktrina ug mga Pakigsaad 26:1] , pagpangita (tan-awa sa Juan 5:39 ; Alma 17:2), ug pagbusog (tan-awa sa 2 Nephi 32:3) sa mga pulong ni Kristo nga anaa sa balaang mga kasulatan. Pinaagi sa pagbuhat niini, madawat nato ang espirituhanong giya ug proteksyon sa panahon sa atong mortal nga panaw.
(David A. Bednar, “A Reservoir of Living Water” [fireside sa Church Educational System para sa mga young adult, Peb. 4, 2007], 1, broadcasts.ChurchofJesusChrist.org)
Si Elder Joseph B. Wirthlin (1917–2008) sa Korum sa Napulog Duha ka Apostoles mipasabot:
Imahe
Last official portrait of Elder Joseph B. Wirthlin of the Quorum of the Twelve Apostles, 2004. Died December 1, 2008.
Daghan ang nanglingkod sa lamesang kan-anan sa ebanghelyo ni Jesukristo ug igo lang motilaw sa mga pagkaon nga gisukad alang kanila. Ilang gibuhat ang angay nga buhaton—nagtambong sa ilang mga miting, nagpakli-pakli sa mga kasulatan, nagbalik-balik sa sinati nga mga pag-ampo—apan walay hustong katuyoan. Kon sila matinud-anon, moangkon sila nga mas interesado sa mga pinakabag-ong panghitabo sa ilang kasilinganan, mga kalihokan sa stock market, ug sa ilang paboritong salida sa TV kaysa mga katingalahang gahom ug sa matam-is nga pagpangalagad sa Espiritu Santo.Buot ba kamong moambit niining buhing tubig ug mosinati nianang balaang atabay nga nagtubod diha sa sulod ninyo ngadto sa mahangturong kinabuhi?Busa ayaw kahadlok. Pagtuo sa tibuok ninyong kasingkasing. Palamboa ang dili matarog nga hugot nga pagtuo sa Anak sa Dios. Himoa nga ang inyong mga kasingkasing mopadangat og hugot nga pag-ampo. Pun-a ang inyong mga hunahuna sa kahibalo mahitungod Kaniya. Isalikway ang inyong mga kahuyang. Paglakaw sa pagkabalaan ug pakig-uyon sa mga sugo.
(Joseph B. Wirthlin, “Ang Buhong nga Kinabuhi,” Liahona, Mayo 2006, 100)
Base sa imong nakat-onan gikan sa pagtuon niini nga mga kapanguhaan o uban pa, sugdi ang paghimo og outline para sa imong pakigpulong. Seguroha nga ang imong outline nagtubag sa mosunod nga mga pangutana. Hunahunaa usab ang mahitungod sa kon unsaon nimo pagpahayag ang imong mga gibati mahitungod kang Jesukristo sa imong pakigpulong. Ikonsiderar ang pagpaambit og personal nga mga kasinatian nga nasinati nimo sa pag-ambit sa buhi nga tubig sa Manluluwas ug kon unsa ang epekto kanimo niadto nga mga kasinatian.
Unsa ang buhi nga tubig nga gitanyag ni Jesukristo?
Nganong nanginahanglan man kita sa buhi nga tubig sa Manluluwas?
Unsa ang atong mahimo aron madawat ang buhi nga tubig gikan sa Manluluwas?
Sa unsang paagi nga ang pagkahibalo nga gusto sa Manluluwas nga moambit ang tanan sa Iyang buhi nga tubig nakaapekto sa imong gibati mahitungod Kaniya?
Ikonsiderar ang pagtugot sa pipila ka boluntaryo nga ipaambit ang mga pakigpulong nga ilang giandam.
Kon mahuman na ang mga boluntaryo sa pagpaambit sa ilang mga pakigpulong, hatagi ang uban pa sa klase og mga oportunidad aron ipaambit ug hisgotan ang bisan unsang mga ideya ug mga impresyon nga ilang nadawat gikan sa Espiritu Santo samtang nagtuon sila. Ikonsiderar ang paggiya sa pakighisgot pinaagi sa pagsukna og mga pangutana sama sa “Unsa ang labing tataw nga patulon-an nga mipatigbabaw sa imong hunahuna gikan sa imong pagtuon?” ug “Unsa kaha ang ipabuhat kanimo sa Manluluwas aron makainom og dugang gikan sa buhi nga tubig nga Iyang gitanyag?”
Komentaryo ug Background nga Impormasyon
Sa unsang paagi nga may kalabotan sa sakramento ang buhi nga tubig nga gitanyag ni Jesukristo?
Samtang nagserbisyo isip Ikaduhang Magtatambag sa Kinatibuk-ang Kapangulohan sa Primary, si Sister Cheryl A. Esplin nagtudlo:
Imahe
Final official portrait of Cheryl A. Esplin, second counselor in the Primary general presidency, 2011. Released as second counselor and sustained as first counselor at the April 2015 general conference. Released at the April 2016 general conference.
Ang atong samaran nga mga kalag mamaayo ug mabag-o dili lang tungod kay ang pan ug tubig nagpahinumdom nato sa sakripisyo sa Manluluwas sa Iyang unod ug dugo pero ang mga simbolo nagpahinumdom nga Siya ang kanunay natong “pan nga nagahatag og kinabuhi” [ Juan 6:48 ] ug “buhi nga tubig” [ Juan 4:10 ].
Human sa pagpangalagad sa sakramento ngadto sa mga Nephite, si Jesus miingon:
“Siya nga mokaon niini nga pan mokaon sa akong lawas ngadto sa iyang kalag; ug siya nga moinom niini nga bino moinom sa akong dugo ngadto sa iyang kalag; ug ang iyang kalag dili gayud gutumon o uhawon, pero pagatagbawon.
“Karon, sa diha nga ang tanan nga pundok sa mga katawhan nakakaon ug nakainom, tan-awa, sila napuno sa Espiritu” [ 3 Nephi 20:8–9 ].
Niining mga pulonga, si Kristo nagtudlo nato nga ang Espiritu moayo ug mobag-o sa atong kalag. Ang gisaad nga panalangin sa sakramento mao nga kita “kanunay nga makabaton sa iyang Espiritu uban [kanato]” [ Doktrina ug mga Pakigsaad 20:77 ].
Sa unsang paagi kaha nga ang buhi nga tubig sa Manluluwas makatabang kanako sa pagbuntog sa mga impluwensya sa daotan sa kalibotan?
Si Presidente James E. Faust (1920–2007) sa Unang Kapangulohan mitudlo:
Imahe
Last official portrait of President James E. Faust, Second Counselor in the First Presidency, 2001. Died 10 August 2007.
Kadaghanan sa espirituhanon nga polusyon nga moabot sa atong mga kinabuhi moabot pinaagi sa Internet, mga dula sa kompyuter, mga salida sa telebisyon ug mga sine nga hilabihan nga makapaaghat o tataw kaayo nga naghulagway sa malaw-ay nga mga kinaiya sa mga tawo. Tungod kay nagpuyo kita sa sama nga palibot, kinahanglan nga dugangan nato ang atong espirituhanon nga kalig-on.
Si Enos nagsulti kabahin sa iyang espirituhanong pagkagutom ug nag-ampo sa tibuok adlaw ug usab hangtod sa gabii agi og pangamuyo alang sa iyang kalag [tan-awa sa Enos 1:4 ]. Gihidlaw siya sa espirituhanon nga sustansya nga nakapatagbaw sa iyang kauhaw alang sa espirituhanon nga kamatuoran. Ingon nga ang Manluluwas sa kalibotan misulti sa babaye sa atabay didto sa Samaria, “Apan bisan kinsa nga magainom sa tubig nga akong igahatag kaniya dili na gayud pagauhawon; kay ang tubig nga akong igahatag kaniya mahimong diha sa sulod niya usa ka tubod sa tubig nga magatubo ngadto sa pagkakinabuhing dayon” [ Juan 4:14 ].
(James E. Faust, “Espirituhanon nga mga Sustansya,” Liahona, Nob. 2006, 54-55)
Dugang nga Kalihokan sa Pagkat-on
Usa ka alternatibong paagi sa pagsugod sa leksiyon
Imbes nga gamiton ang pamahayag ni Elder Corbridge sa sinugdanan sa leksiyon, ikonsiderar ang pagpaambit sa mga estudyante og sitwasyon, sama sa mosunod, nga nagpakita sa pagkahaw-ang nga mahimong mabati sa mga tawo kon mogamit sila og uban pang butang pwera kang Jesukristo para sa kalipay ug katumanan.
Ikonsiderar ang mosunod nga sitwasyon:Si Scott kasagarang modangop ngadto sa kalingawan, mga kalibotanong kabtangan, ug gani usahay sa makasasala nga pamatasan agi og pagsulay nga makasinati og katagbawan ug katumanan. Bisan pa kon mibati si Scott usahay og temporaryong katagbawan pinaagi niini nga mga butang, pagkahuman niini kanunay siyang mobati og kahaw-ang ug mangita og laing butang.
Unsa nga tambag ang imong mahatag kang Scott aron tabangan siya sa pagbuntog sa iyang mga pamati nga pagkahaw-ang ug pagka-walay katagbawan?
Unsa ang imong nakat-onan gikan sa asoy ni Jesus nga nagtudlo sa babayeng Samaryanhon sa atabay nga makatabang kang Scott?