Juan 3:14–17

“Kay Gihigugma Pag-ayo sa Dios ang Kalibotan”

Jesus returns to the garden again to continue to pray and suffers great pain.

Sama sa girekord sa Juan 3, gitudloan ni Jesus si Nicodemo mahitungod sa Iyang maulaong sakripisyo sa dihang miingon Siya nga “ang Anak sa Tawo kinahanglan nga iisa: aron ang tanan nga motuo kaniya dili malaglag, kondili makabaton og kinabuhing dayon” (Juan 3:14–15). Gitudlo ni Presidente Russell M. Nelson, “Samtang kita mopundar og panahon sa pagkat-on mahitungod sa Manluluwas ug sa Iyang maulaong sakripisyo, maagni kita sa pag-apil sa laing importanting elemento sa pag-access sa Iyang gahom: mopili kita sa pagbaton og pagtuo diha Kaniya ug mosunod Kaniya” (“Pagdawat sa Gah[o]m ni Jesukristo diha sa Atong Kinabuhi,” Liahona, Mayo 2017, 40). Kini nga leksiyon maghatag kanimo og mga oportunidad aron mapalig-on ang imong pagtuo diha kang Jesukristo samtang nagkat-on ka og dugang mahitungod sa Iyang Pag-ula.

Ang Pag-ula ni Jesukristo. Gitudlo ni Presidente Russell M. Nelson: “Dili kompletong doktrina kon maghisgot sa maulaong sakripisyo sa Ginoo gamit ang minubong mga pulong, sama sa ‘ang Pag-ula’ o ‘ang makaabag nga gahom sa Pag-ula’ o ‘paggamit sa Pag-ula’ o ‘gipalig-on pinaagi sa Pag-ula.’  …“Walay hanap nga binuhat nga gitawag og ‘ang Pag-ula’ diin mahimo kitang makapangayo og tabang, pagkaayo, kapasayloan, o gahom. … Ang maulaong sakripisyo sa Manluluwas—ang labing importanting buhat sa tibuok tawhanong kasaysayan—labing masabtan ug mapasalamatan kon piho ug klaro natong ikonektar ngadto Kaniya” (“Pagdawat sa Gah[o]m ni Jesukristo diha sa Atong Kinabuhi,” Liahona, Mayo 2017, 40).

Pag-andam sa Estudyante: Dapita ang mga estudyante nga mangita og tudling sa kasulatan o pamahayag gikan sa kinatibuk-ang komperensiya nga nagtudlo kanila og butang nga makahuluganon mahitungod sa Pag-ula ni Jesukristo.

Posible nga mga Kalihokan sa Pagkat-on

Unsa ang Pag-ula ni Jesukristo?

Ikonsiderar ang pagpakita sa mga mosunod nga hulagway sa Manluluwas ug ang mga mosunod nga dili kompleto nga pamahayag. Dapita ang mga estudyante nga kompletohon ang mga pamahayag diha sa ilang mga journal sa pagtuon o hisgotan sa mga managpares kon unsaon nila pagkompleto ang kada pamahayag. Pagkahuman niini, paghatag og panahon para sa estudyante nga andam mopaambit sa ilang mga nakompletong pamahayag diha sa klase.

Jesus Christ depicted kneeling at the base of a tree in the Garden of Gethsemane during the Atonement. Christ has His hands clasped as He prays.

Christ hanging on a cross at Calvary. Two thieves, also hanging on crosses are at the left and right of Christ. Numerous observers, including Mary, the mother of Christ, Mary Magdalene, other mourners and Roman soldiers are gathered around the crosses. Thunder clouds are gathering in the sky.

Tan-awa ang mga hulagway ni Jesus didto sa Getsemani ug didto sa krus ug hunahunaa kon unsa ang imong nahibaloan mahitungod sa Pag-ula ni Jesukristo.

Kompletoha ang mosunod nga mga pamahayag diha sa imong journal sa pagtuon.

Ang Langitnong Amahan mipadala ni Jesukristo dinhi sa yuta aron sa pag-ula para kanato aron …
Ang pipila ka butang nga nasinati ni Jesus didto sa Getsemani naglakip sa …
Namatay si Jesus didto sa krus tungod sa …
Kon wala nag-antos si Jesus didto sa Getsemani ug namatay sa didto krus, dayon …

Niini nga leksiyon, makakat-on ka og dugang mahitungod sa Pag-ula ni Jesukristo ug sa gugma nga gipakita sa Langitnong Amahan sa dihang Iyang gipadala ang Iyang Anak nganhi sa kalibotan. Samtang nagtuon ka, paghatag og pagtagad sa mga pag-aghat sa Espiritu Santo nga makatabang kanimo nga mas makadayeg sa sakripisyo ni Jesus para kanimo ug madugangan ang imong hugot nga pagtuo diha Kaniya.

Ang Pag-ula sa Manluluwas

Ang mosunod nga mga tudling sa kasulatan ug pamahayag nagtudlo mahitungod sa Pag-ula ni Jesukristo. Pagtagana og 10 hangtod sa 15 ka minuto sa pagbasa og tarong niini nga mga tinubdan (o uban pang mga tinubdan mahitungod sa Pag-ula sa Manluluwas nga interesado kang makakat-on o imong nakit-an sa wala pa kini nga leksiyon). Samtang nagbasa ka, hunahunaa ang kada usa niini nga mga tinubdan nga makatabang kanimo nga mas masabtan kon unsa ang gibuhat sa Langitnong Amahan ug ni Jesukristo para kanimo ug ngano.

Si Elder Tad R. Callister sa Seventy nagtudlo:

Kon mao unsa ang Pag-ula ni Jesukristo? Sa usa ka pagsabot, kini usa sa daghang balaan nga mga panghitabo nga nagsugod sa Tanaman sa Getsemani, nagpadayon sa krus, ug nahuman sa Pagkabanhaw sa Manluluwas gikan sa lubnganan. Kini nadasig sa usa ka dili matugkad nga gugma para sa matag usa kanato. Nagkinahanglan kini og tawo nga walay sala; kinsa adunay walay kinutuban nga gahom sa mga elemento—bisan sa kamatayon; kinsa nakaangkon og walay utlanan nga kapasidad sa pag-antos sa atong tanang mga sala ug mga kasakit; ug gani nakasinati niining tanan [tan-awa sa Doktrina ug mga Pakigsaad 88 :6 ]. Mao kini ang misyon ni Jesukristo—mao kini ang Iyang Pag-ula.

Nan unsa ang katuyoan niini? Aron mahimong posible para kanato nga makabalik ngadto sa presensya sa Dios, mahimong mas sama Kaniya, ug makaangkon og kahingpitan sa himaya. Kini gihimo pinaagi sa pagbuntog sa upat ka babag:

1. Pisikal nga kamatayon

2. Ang espirituhanong kamatayon tungod ni Adan ug sa atong mga sala

3. Atong mga kasakit ug mga kahuyang

4. Ang atong mga kahuyang ug mga pagkadili hingpit

(Tad R. Callister, “Ang Pag-ula ni Jesukristo,” Liahona, Mayo 2019, 85)

Unsa nga mga pamati o mga ideya ang aduna ka samtang nagtuon ka mahitungod ni Jesukristo ug sa Iyang Pag-ula?

Pagkahuman sa pagkompleto sa mga estudyante sa handout, ikonsiderar ang pag-awhag kanila nga ipaambit ang ilang mga tubag sa kataposang pangutana diha sa klase o diha sa gagmay nga mga grupo. Mahimong makaayo usab kon hatagan ang mga estudyante og oportunidad nga magsukna og bisan unsang mga pangutana nga lagmit nga aduna sila samtang nagtuon sila sa materyal sa handout.

Sa unsang paagi nga gipakita ang gugma sa Amahan sa pagpadala sa Iyang Anak?

Ang usa sa mga kamatuoran nga gihatagan og gibug-aton sa Manluluwas samtang Iyang gitudloan si Nicodemo mahitungod sa Iyang Pag-ula (tan-awa sa Juan 3:14–17) mao nga ang Langitnong Amahan nahigugma og maayo sa Iyang mga anak nga Iyang gipadala ang Iyang Bugtong Anak aron mag-ula para kanato.

Si Presidente Dallin H. Oaks sa Unang Kapangulohan nagtudlo mahitungod sa kon sa unsang paagi nga gipakita ang gugma sa Langitnong Amahan pinaagi sa Pag-ula sa Manluluwas:

Walay mas labaw nga ebidensya sa walay kinutuban nga gahom ug kahingpitan sa gugma sa Dios kaysa sa gisulti sa Apostol nga si Juan: “Kay gihigugma pag-ayo sa Dios ang kalibotan, ug tungod niini gihatag niya ang iyang bugtong Anak” ( Juan 3:16). Lain nga Apostol misulat nga ang Dios “wala magpahigawas sa iyang kaugalingong Anak, kondili mitugyan hinuon kaniya para kanatong tanan” ( Mga Taga-Roma 8:32). Hunahunaa kon unsa ang kaguol sa atong Langitnong Amahan sa pagpadala sa Iyang Anak sa pag-antos sa dili matugkad nga pag-antos alang sa atong mga sala. Kana mao ang labing dako nga ebidensya sa Iyang gugma alang sa matag usa kanato!

(Dallin H. Oaks, “Gugma ug Balaod,” Liahona, Nob. 2009, 26)

Unsa man ang imong nakat-onan gikan niini nga pamahayag?

Ikonsiderar ang paghatag sa mga estudyante og panahon aron isulat ang ilang mga ideya ug pagpamatuod mahitungod kang Jesukristo diha sa ilang mga journal sa pagtuon. Pagkahuman sa ilang pagsulat, ang pipila ka boluntaryo mahimong mopaambit sa klase kon unsa ang ilang gisulat.

Komentaryo ug Background nga Impormasyon

Unsaon nako paggamit ang gahom nga gihatag kanako ni Jesukristo pinaagi sa Iyang Pag-ula?

Gitudlo ni Presidente Russell M. Nelson ang mosunod mahitungod sa pag-awhag sa gahom ni Jesukristo diha sa atong kinabuhi:

Isip mga Santos sa Ulahing Mga Adlaw, gitawag nato ang Iyang misyon isip ang Pag-ula ni Jesukristo, diin ang pagkabanhaw nahimong reyalidad alang sa tanan ug ang kinabuhing dayon nahimong posible alang niadtong maghinulsol sa ilang mga sala ug modawat ug motuman sa mahinungdanong mga ordinansa ug pakigsaad. …

… Ang atong mga pakigsaad mobugkos kanato ngadto Kaniya ug mohatag kanato og diosnong gahom. Isip matinud-anong mga disipulo, maghinulsol kita ug magpabunyag sama Kaniya. Mosubay kita diha sa dalan sa pakigsaad aron modawat og ubang importanting mga ordinansa. …

Ang mga tawo nga nagsunod sa pakigsaad mangita og paagi nga magpabiling walay lama gikan sa kalibotan aron walay makababag sa ilang pag-access sa gahom sa Manluluwas.

(Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 40, 41)

Unsaon nako pagkahibalo kon naglihok sa akong kinabuhi si Jesukristo ug ang Iyang gahom?

Si Presidente Henry B. Eyring sa Unang Kapangulohan mitudlo:

Kon inyong nabati ang impluwensya sa Espiritu Santo karon, mahimo ninyong hunahunaon kini isip ebidensya nga ang Pag-ula [ni Jesukristo] naglihok sa inyong kinabuhi. Tungod niana nga rason ug daghan pa, maayo kaayo nga inyong ibutang ang inyong kaugalingon sa mga dapit ug sa mga buluhaton nga magdapit sa mga pag-aghat sa Espiritu Santo.

(Henry B. Eyring, “Gifts of the Spirit for Hard Times,” Ensign, Hunyo 2007, 23)

Asa ako makakat-on pa og dugang mahitungod sa Pag-ula ni Jesukristo?

Ikonsiderar ang pagpalawom sa imong pagsabot sa Manluluwas ug sa Iyang Pag-ula pinaagi sa pagpangita sa “ Pag-ula, Pag-ula sa Dugo ” diha sa Giya ngadto sa mga Kasulatan (scriptures.ChurchofJesusChrist.org).

Dugang nga mga Kalihokan sa Pagkat-on

Pag-andam og leksiyon sa misyonaryo

Dapita ang mga estudyante nga hunahunaon nga mga misyonaryo sila ug kinahanglang mag-andam sa pagtudlo sa usa ka tawo mahitungod kang Jesukristo ug sa Iyang Pag-ula. Dapita ang mga estudyante sa pagtuon sa seksiyon nga giulohan og “Ang Pag-ula ni Jesukristo” sa mga panid 51–52 sa Isangyaw ang Akong Ebanghelyo: Usa ka Giya sa Misyonaryo nga Pangalagad (2019). Dapita ang mga estudyante nga mag-andam og 5 hangtod sa 10 ka minuto nga latid sa leksiyon base sa kon unsa ang ilang nakat-onan gikan niana nga kapanguhaan.Pagkahuman sa mga estudyante sa pag-andam sa ilang mga latid, ikonsiderar ang pagbahin sa klase ug pag-awhag sa mga estudyante nga magpuli-puli sa pagtudlo sa ilang mga leksiyon ngadto sa usa ka pares o diha sa gamay nga grupo. Kondili, ang pipila ka boluntaryo mopaambit sa ilang mga leksiyon diha sa klase.

Sa unsang paagi nga ang akong hugot nga pagtuo diha ni Jesukristo magtugot Kaniya nga impluwensiyahan ang akong kinabuhi?

Dapita ang mga estudyante nga maghimo og pamphlet nga adunay disenyo aron tabangan ang mga tawo nga masabtan ang importansya sa Pag-ula ni Jesukristo. Ikonsiderar ang pagdapit sa mga estudyante nga tun-an ang “Ang Pag-ula ug ang Panaw sa Pagka-mortal,” ni Elder David A. Bednar sa Korum sa Napulog Duha ka Apostoles (Liahona, Abr. 2012, 40–47) aron tabangan sila sa pag-andam para niini nga kalihokan. Mahimong gamiton sa mga estudyante ang sulod [content] gikan sa artikulo ni Elder Bednar aron maghimo og mga ulohan ug sulod [content] para sa ilang pamphlet.