Gihimong bino ni Jesus ang tubig sa usa ka kumbira sa kasal sa unang girekord nga milagro nga Iyang gibuhat sa Iyang unang pagpangalagad. Tinguha niini nga leksiyon nga tabangan kang madugangan ang imong pagtuo kang Jesukristo samtang gitun-an nimo ang iyang milagro ug giila ang mga kamatuoran mahitungod sa gahom ug kinaiya sa Manluluwas.
Pagsukna og mga pangutana aron matabangan ang mga estudyante sa pagsabot sa mga kasulatan. Ang mga pangutana nga makatabang sa mga estudyante sa pag-analisar sa mga kasulatan makatabang kanila nga mas masabtan og maayo ang mga kamatuoran nga gitudlo. Pangita og mga oportunidad aron magsukna og mga pangutana nga makatabang sa mga estudyante nga lawom nga maghuna-huna mahitungod sa importanteng mga pulong o hugpong sa mga pulong ug ikonsiderar kon sa unsang paagi nga ang usa ka partikular nga tudling may kalabotan kanila.
Pag-andam sa estudyante: Dapita ang mga estudyante nga hunahunaon nga gihangyo sila nga maghatag og pakigpulong sa sakramento mahitungod sa gahom ni Jesukristo. Hangyoa sila sa pag-anha sa klase nga andam sa pagpaambit og usa hangtod sa duha ka asoy sa kasulatan nga lagmit nga ilang gamiton sa pagpakita sa Iyang gahom.
Posible nga mga Kalihokan sa Pagkat-on
Kang kinsa ka mosalig?
Ikonsiderar ang pagdala og aytem nga lami nga pagkaon ngadto sa klase ug ihatag kini sa usa ka estudyante nga andam nga mopasalig nga kan-on kini nga dili pa makahibalo kon unsa ang pagkaon. Pagpili og usa ka boluntaryo. Sa dili pa ipakita ang pagkaon sa estudyante, pangutan-a kon nganong misalig siya kanimo nga dawaton kini nga wala pa nakahibalo kon unsa kini.
Posible bang mosalig sa usa ka tawo nga mopasalig gayod nga buhaton ang bisan unsang lagmit nga ilang ihangyo nga buhaton nimo?
Unsa ang kinahanglan nimong mahibaloan mahitungod nianang tawhana aron mahimong andam nga buhaton ang mao nga pasalig?
Pamalandong sulod sa pipila ka minuto kon gibati ba nimo nga nakaila ka pag-ayo sa Manluluwas aron mosalig Kaniya sa bisan unsay Iyang ipabuhat kanimo. Samtang nagtuon ka sa Juan 2 , pangita og ebidensya sa Iyang gahom ug karakter nga makapadugang sa imong pagsalig Kaniya ug sa imong pagkaandam nga mosunod sa bisan unsa nga butang nga Iyang ipabuhat kanimo.
Ang unang girekord nga milagro sa pagpangalagad ni Jesus
Ang unang girekord nga milagro sa panahon sa pagpangalagad sa Manluluwas sa yuta anaa sa Juan 2 . Sa dili pa nimo tun-an kini nga asoy, lagmit nga makatabang kon mahibaloan nga ang bino sa kasagaran mousbaw ang kalidad kon mas nagkadugay na kini ug ang mahutdan sa bino mao ang pinakamakauulaw nga panghitabo para sa mga nagpasiugda sa kumbira sa kasal.
Basaha ang Juan 2:1-11 sa hinay ug mahunahunaong paagi, ug ikonsiderar ang pagmarka sa bisan unsang butang nga importante kanimo. Samtang nagtuon ka, mahimo nimong pamalandongan ang mga tubag sa mga pangutana sama niini: Unsa sa imong hunahuna ang nahibaloan ni Maria mahitungod sa iyang Anak? Unsa sa imong hunahuna ang nakat-onan sa mga sulugoon mahitungod ni Jesus?
Ikonsiderar ang pagdapit sa mga estudyante nga basahon ang Juan 2:1–11 diha sa gagmay nga mga grupo. Awhaga sila sa paghunong kanunay aron hisgotan sa ilang grupo ang mga kamatuoran nga ilang nakat-onan mahitungod kang Jesukristo.
Human sa igong panahon, dapita ang mga grupo sa pagpaambit sa ilang mga nahunahunaan uban sa klase.
Unsa nga mga kamatuoran ang imong nakat-onan mahitungod sa gahom sa Manluluwas ug mahitungod sa Iyang kinaiya?
Aduna ba kay nahunahunaan nga mga sitwasyon diin ang pagkahibalo niini nga mga kamatuoran makatabang sa usa ka tawo karon?
Sa unsang paagi nga nakapanalangin sa imong kinabuhi ang pagkahibalo niini nga mga kamatuoran mahitungod kang Jesukristo?
Tukia kon unsa nga mga nailhang kamatuoran ang labing makatabang kon hatagan og mas dakong panahon ang pagtuon sa mga estudyante. Ang mosunod nga kalihokan sa pagtuon nagpokus lamang sa usa sa daghang importanteng mga kamatuoran nga mailhan sa mga estudyante gikan niini nga tudling.
“Unsa gani iyang isugo kaninyo, buhata ninyo”
Sama sa daghang mga sitwasyon sa Bag-ong Tugon, ang Hubad ni Joseph Smith sa Juan 2:4 makatabang kanato nga makaangkon og dugang pang mga kahibalo mahitungod sa Manluluwas. Kini nag-ingon, “Babaye, unsay buot nimong ipabuhat kanako para kanimo? kana akong buhaton; kay ang akong takna wala pa moabot” (sa Juan 2:4 , footnote a).
Unsa ang gitudlo niini kanimo mahitungod sa relasyon sa Manluluwas sa Iyang inahan?
Ikonsiderar ang pagmarka kon unsa ang gisulti ni Maria sa mga sulugoon, sigon sa girekord sa bersikulo 5 .
Unsa ang gitudlo kanimo sa mga instruksiyon ni Maria sa mga sulugoon mahitungod sa iyang hugot nga pagtuo ni Jesus?
Si Elder L. Whitney Clayton sa Seventy mipasabot og pipila ka butang nga nahibaloan ni Maria mahitungod kang Jesus nga nagpalig-on sa iyang hugot pagtuo diha Kaniya.
Imahe
Official Portrait of Elder L. Whitney Clayton. Photographed March 2017.
Labaw nga nakahibalo si [Maria] mahitungod ni [Jesukristo] kay sa ni bisan kinsa nga tawo dinhi sa yuta. Nasayod siya sa kamatuoran bahin sa Iyang milagrosong pagkatawo. Nasayod siya nga wala Siyay sala ug Siya “wala magsulti sama sa uban nga mga tawo, ni siya matudloan; kay siya wala magkinahanglan nga adunay tawo nga magtudlo kaniya” [ Hubad ni Joseph Smith, Mateo 3:25 (diha sa Apendiks sa Hubad ni Joseph Smith)]. Si Maria nasayod sa Iyang talagsaong kapasidad sa pagsulbad og mga problema, lakip na ang personal sama sa pagsangkap og bino para sa kumbira sa kasal. Aduna siyay dili matarog nga pagsalig diha Kaniya ug sa Iyang balaang gahom. Ang iyang yano, direkta nga instruksiyon ngadto sa mga sulugoon walay pakapin, walay kwalipikasyon, walay limitasyon: “Unsa gani iyang isugo kaninyo, buhata ninyo.”
Unsa ang nahibaloan ni Maria mahitungod kang Jesus nga importanteng mahibaloan nato mahitungod Kaniya?
Hunahunaa nga usa ka sa mga sulugoon nga nakadungog sa mga instruksiyon ni Maria. Basaha pag-usab ang Juan 2:6–8 , nga mangita kon unsa ang gisugo ni Jesus nga buhaton sa mga sulugoon. Sa dili pa magbasa, lagmit nga makatabang nga mahibaloan nga “kini nga mga tadyaw wala gamita sa pagpundo og ilimnon nga tubig apan gigamit alang sa seremonyas nga paghugas” (L. Whitney Clayton, “Unsa Gani Iyang Isugo Kaninyo, Buhata Ninyo,” 97).
Unsa kaha ang imong mahunahuna o pagbati sa dihang gidala nimo ang tasa ngadto sa lider sa kumbira?
Unsa ang pipila ka direksyon nga gihatag ni Jesukristo karon nga nag-awhag kanimo nga mosalig Kaniya aron makasunod?
Ikonsiderar ang mga paagi sa pagtabang sa mga estudyante nga madugangan ang ilang abilidad sa pagsalig kang Jesukristo ug mobuhat sa Iyang ipabuhat kanila. Pananglitan, dapita ang mga estudyante nga magpaambit og mga kasinatian nga nasinati nila sa pagsunod sa mga pulong sa Manluluwas, magpaambit og sugilanon gikan sa pamahayag sa kinatibuk-ang komperensiya, o kompletohon ang mosunod nga kalihokan.
Sa Hubad ni Joseph Smith sa Juan 2:11, nakat-onan nato nga wala lamang gipadayag niini nga milagro ang himaya sa Manluluwas pero nga “ang hugot nga pagtuo sa iyang mga disipulo nalig-on diha kaniya.” Ang mga milagro dili makakabig sa mga tawo, pero kadtong adunay hugot nga pagtuo diha ni Jesukristo nalig-on ang ilang hugot nga pagtuo tungod niini.
Paggahin og pipila ka minuto aron pangitaon ug makakat-on gikan sa uban sa mga kasulatan kinsa, sama ni Maria, adunay hugot nga pagtuo kang Jesukristo. Pangita og mga rason kon nganong gipili sa kada usa kanila nga mosalig ug mosunod sa bisan unsay gisulti ni Jesus. Lakip sa mga ehemplo mao si Nephi ( 2 Nephi 4:34–35), Jacob ( Jacob 4:10), ug ang igsoon ni Jared ( Ether 3:9–12).
Ikonsiderar ang paghatag sa mga estudyante og panahon aron isulat ang mga ideya diha sa ilang mga journal sa pagtuon. Ang mosunod nga mga pangutana makagiya kanila samtang nagsulat sila. Kon mahuman na ang mga estudyante, ikonsiderar ang pagdapit og mga boluntaryo nga magpaambit og bahin sa ilang gisulat.
Unsa ang imong nahibaloan mahitungod ni Jesukristo nga nakadasig kanimo sa pagsunod sa “bisan unsay iyang isugo kani[mo]”? ( Juan 2:5).
Nganong makasalig man ang usa ka tawo kang Jesukristo bisan pa kon ang Iyang isulti wala nila masabti?
Unsa ang imong mabuhat aron mas makaila og maayo si Jesukristo aron madugangan ang imong hugot nga pagtuo diha Kaniya?
Komentaryo ug Background nga Impormasyon
Ang pag-inom og bino supak ba sa mga sugo sa mga panahon sa biblia?
Adunay daghang pakisayran diha sa Biblia mahitungod sa kadaotan sa pagkapalahubog ug sa isog nga mga ilimnon (pananglitan, tan-awa sa Mga Proverbio 23:20–21 ; Isaias 5:11–12 ; Mga Taga-Efeso 5:18). Kini nga mga bersikulo wala magdili sa klarong paagi sa paggamit og ilimnong makahubog, pero gihimaraot niini ang sobra nga pagkapalainom ug pagkapalahubog. Sa atong panahon, ang Ginoo mipadayag sa Pulong sa Kaalam, nga nagdili sa pag-inom og mga ilimnong makahubog [tan-awa sa Doktrina ug mga Pakigsaad 89:4–7 ]. Kinahanglang likayan nato ang paghukom sa mga tawo sa nag-unang mga dispensasyon pinasikad sa mga sugo nga gihatag sa Ginoo kanato sa atong panahon.
(Manwal sa Estudyante sa Bag-ong Tugon [2018], ChurchofJesusChrist.org)
Nganong gitawag man ni Jesus ang Iyang inahan nga “Babaye”?
Si Elder James E. Talmage (1862–1933) Korum sa Napulog Duha ka Apostoles mipasabot:
Imahe
Portrait of James E. Talmage.
Ang ngalan nga gigamit sa pagtawag nga, “Babaye,” nga gigamit sa usa ka anak ngadto sa iyang inahan morag dili maayong pamation, kon ugaling dili man kini kawalay pagtahod; pero ang paggamit niini usa ka ekspresyon nga gituyo uban sa pagtahod. … Sa panahon nga, diha sa makahadlok nga kataposang mga eksena sa Iyang pagka-mortal, si Kristo nagbitay nga himatyong nag-antos sa krus, miduko Siya ngadto sa nagbakho nga si Maria, ang Iyang inahan, ug gisalig siya ngadto sa pag-atiman sa hinigugmang apostol nga si Juan, uban sa mga pulong nga: “Babaye, tan-awa ang imong anak!” [ Juan 19:26 ]. Mahunahuna ba nga niining labihan ka subo nga panahon, ang kabalaka sa atong Ginoo para sa inahan diin Siya hapit na mobulag pinaagi sa kamatayon nasagulan kaha og ubang pagbati gawas niana nga pagtahod, kalumo ug gugma?
(James E. Talmage, Jesus the Christ [1916], 144–45).
Ang firkin gibanabana nga siyam ka galon (34 ka litro), busa ang unom ka tadyaw tingali nagsulod og taliwala sa 100 hangtod sa 160 ka galon (gibana-bana nga 380 hangtod sa 600 ka litro).
Nganong importante man nga buhaton ang “bisan unsang isulti sa [Dios] kanimo”?
Si Elder L. Whitney Clayton sa Seventy mitudlo:
Imahe
Official Portrait of Elder L. Whitney Clayton. Photographed March 2017.
Kon modesisyon kita sa pagbuhat sa “unsa gani [isugo sa Dios]” kanato, matinguhaon kitang mopasalig nga ipahaom ang atong inadlaw nga kinaiya sa kabubut-on sa Dios. Ang ingon ka yano nga mga buhat sa pagtuo sama sa inadlaw nga pagtuon sa kasulatan, regular nga pagpuasa, ug pag-ampo uban sa tinuod nga katuyoan mopadako sa atong espirituhanong kapasidad sa pagtubag sa mga panginahanglan sa mortalidad. Paglabay sa panahon, ang yanong mga gawi sa pagtuo mosangpot sa milagrosong mga resulta. Mousab kini sa atong pagtuo gikan sa usa ka binhi ngadto sa kusganong gahom alang sa kaayohan sa atong kinabuhi. …
… Kung mosalig kita ug mosunod Kaniya, ang atong mga kinabuhi, sama sa tubig nga nahimong bino, mausab. Mamahimo kitang labaw pa ug mas maayo kay sa unsa unta kita mamahimo. Salig sa Ginoo, ug “unsa gani iyang isugo kaninyo, buhata ninyo.”
Sa pagbag-o sa tubig ngadto sa bino, nagbuhat si Jesus og milagro. Makabuhat Siya og mga parehong milagro sa atong kaugalingong kinabuhi, nga bag-ohon kita gikan sa kon kinsa kita ngadto sa posibleng mamahimong kita. Ikonsiderar ang pag-awhag sa mga estudyante sa pagsuta kon sa unsang paagi lagmit nga may kalabotan ang ilang kaugalingong kinabuhi sa tubig niini nga milagro. Lagmit nga makatabang para sa mga estudyante ang paghunahuna mahitungod sa matang sa mga tadyaw sa tubig nga gigamit para sa milagro ug kon unsa ang gibuhat sa mga sulugoon aron makatabang nga mahitabo ang milagro. Tabangi ang mga estudyante nga magpabilin ang ilang pokus diha sa Manluluwas ug masabtan nga tungod kay aduna Siyay gahom sa tanang butang, makabuhat gayod Siya og milagrosong kabag-ohan sa atong kinabuhi.
