“Ang Buot Magbuhat sa Gisugo sa Dios Mahibalo Kon ang Akong Gitudlo Gikan ba sa Dios”
Imahe
Young adult woman ponders scriptures near lake.
Panahon sa imong pagtuon sa Juan 7, imong nakat-onan nga si Jesus nagdapit kanato sa pagbuhat sa kabubut-on sa Langitnong Amahan aron kita mahibalo nga ang Iyang doktrina tinuod (tan-awa sa bersikulo 17). Kini nga leksiyon makatabang kanimo sa pagmemorya niining pakisayran sa doktrinal nga kahanas ug niini nga mga mahinungdanong hugpong sa mga pulong sa kasulatan, pagsabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga kahimtang sa kinabuhi.
Pagpangandam sa estudyante: Dapita ang mga estudyante sa paghunahuna mahitungod sa nagkalainlain nga sugo, mga pagtulon-an, o doktrina sa Manluluwas nga gipaningkamotan sa mga tin-edyer aron makabaton niana nga pagpamatuod.
Posible nga mga Kalihokan sa Pagkat-on
Gidisenyo kini nga leksiyon sa tudling sa doktrinal nga kahanas nga itudlo human sa leksiyon sa “Juan 7,” nga mao ang pangkonteksto nga leksiyon para sa tudling sa doktrinal nga kahanas sa Juan 7:17 . Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, siguroha nga itudlo usab ang tukma nga pangkonteksto nga leksiyon nianang semanaha.
Imemorya ug ipasabot
Hatagi og higayon ang mga estudyante sa pagmemorya sa pakisayran alang sa Juan 7:17 kauban sa mahinungdanong hugpong sa mga pulong sa kasulatan. Usa ka paagi sa pagmemorya isip usa ka klase mao ang pagsulat sa pakisayran sa kasulatan ug sa mahinungdanong hugpong sa mga pulong sa kasulatan ngadto sa pisara isip tulo ka lahi-lahi nga bahin. Bahina ang klase ngadto sa tulo ka grupo, ug i-assign ang matag grupo sa managlahi nga bahin. Dapita ang mga grupo sa han-ay nga pag-recite sa ilang mga bahin ug magdungan. Ikonsiderar ang pag-assign sa mga estudyante ngadto sa lainlain nga bahin hangtod nga ilang mahibaloan ang pakisayran ug ang mahinungdanon nga hugpong sa mga pulong sa kasulatan gikan sa ilang panumdoman. Ang Doctrinal Mastery nga app, nga anaa sa ChurchofJesusChrist.org, mahimong magamit usab aron sa pagtabang sa mga estudyante sa pagmemorya.
Juan 7:17
“Ang buot magbuhat sa gisugo sa Dios,
mahibalo kon ang akong gitudlo gikan ba sa Dios.”
Basaha ang mosunod nga pamahayag ni Presidente Dallin H. Oaks sa Unang Kapangulohan.
Imahe
Official Portrait of President Dallin H. Oaks taken March 2018.
Kinahanglan natong hinumd[o]man nga ang pagbaton og pagpamatuod dili butang nga mouyon-uyon apan usa ka proseso diin kita gila[o]man sa pagbuhat og butang.
(Dallin H. Oaks, “Pagpamatuod,” Liahona, Mayo 2008, 27)
Sa inyong hunahuna sa unsang paagi ang pahayag ni Presidente Oaks may kalambigitan sa gitudlo sa Manluluwas sa Juan 7:17 ?
Pagbansay sa paggamit
Bahina ang klase ngadto sa gagmay nga mga grupo. Dapita ang matag estudyante sa pagpili og usa ka baroganan sa pag-angkon ug espirituhanong kahibalo (tan-awa sa Mahinungdanon nga Dokumento sa Doktrinal nga Kahanas [2022], “Pag-angkon og Espirituhanong Kahibalo,” mga parapo 5–12). Hangyoa ang mga estudyante sa pagpasabot sa baroganan ngadto sa ilang grupo human sa mubo nga pagrebyo sa maong baroganan.
Gahini og pipila ka minuto ang pagrebyo sa mga baroganan sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Pagpili og usa sa baroganan nga tun-an pag-ayo.
Unsaon nimo sa pagpasabot sa daklit nga paagi ang baroganan nga imong gipili ngadto sa tawo nga tingale dili pamilyar niini?
Kon masabtan nimo ang mga baroganan sa pag-angkon og espirituhanong kahibalo, matabangan nimo ang imong kaugalingon ug ang uban sa pag-angkon og pagpamatuod o pag-atubang sa walay kasiguroan nga butang. Gamita ang mosunod nga senaryo aron pagbansaybansay alang sa pagtabang og usa ka higala.Sa pakigsulti nimo sa imong higala nga si Luis, iya kang giingnan nga wala siyay pagpamatuod bahin sa [magpili ka og doktrina]. Imong nahinumdoman ang imong nakat-onan gikan sa Juan 7:17 , ug masaligon ka nga mipasabot kaniya nga siya makadawat og pagpamatuod niini nga doktrina pinaagi sa [ipasabot kang Luis unsa ang iyang mabuhat aron makadawat og pagpamatuod niini nga doktrina]. Makasulti ka nga si Luis nasagmuyo samtang miingon siya nimo nga, “Akong gisulayan pagbuhat kana sa pipila ka higayon, apan ingon og wala gihapon ko mobati nga kini tinuod.”
Unsa kaha ang posibleng mga rason nganong si Luis dili makabatyag nga siya adunay pagpamatuod?
Ang paggamit sa mga baroganan sa pag-angkon og espirituhanong kahibalo, makatabang ni Luis sa pagsabot unsa nga mga babag nga tingale angay niyang buntogon aron makaangkon og pagpamatuod. Mahimo nimong gamiton ang mosunod nga mga pangutana o uban nga imong mahunahunaan aron makaandam og tubag sa pagtabang ni Luis.
Lihokon inubanan sa hugot nga pagtuo
Sa imong hunahuna, nganong mahinungdanon man ang padayon nga pagsunod sa mga pagtulon-an sa Manluluwas bisan og ang pagpamatuod wala moabot sa panahon nga atong gusto?
Unsa nga kasinatian ang imong mapaambit kang Luis mahitungod sa pagpaningkamot nga gikinahanglan aron maangkon ang pagpamatuod?
Susihon ang mga konsepto ug mga pangutana inubanan sa mahangtorong panglantaw
Unsa kaha ang gusto sa Langitnong Amahan nga mahibaloan sa tawo nga sama kang Luis nga mahitungod sa pag-angkon og usa ka pagpamatuod?
Sa unsang paagi kaha nga ang pagsabot nga ang pagpamatuod naggikan sa Langitnong Amahan ug dili lamang gikan sa yanong panahon nga makatabang kang Luis? (tan-awa sa Mateo 16:13–17).
Tinguhaon ang dugang nga panabot pinaagi sa balaanong gipili nga mga tinubdan
Unsa ang pipila ka balaanong gipili nga mga tinubdan nga tingale makatabang kang Luis sa pagsangpit sa Ginoo alang sa tabang aron makaangkon siya og pagpamatuod?
Usa ka pananglitan sa paggamit sa balaanong gipili nga tinubdan mao ang pagsiksik sa pakigpulong ni Presidente Dallin H. Oaks nga “Pagpamatuod,” nga anaa sa ChurhofJesusChrist.org, ug sa pagpaambit ug mubo nga pahayag gikan niini nga tingale makatabang kang Luis.
Gamit ang imong mga hunahuna samtang namalandong ka sa mga baroganan sa pag-angkon og espirituhanong kahibalo, pagsulat og tubag alang kang Luis. Mahimo nimong ilakip ang imong kaugalingong kasinatian, ang imong pagpamatuod, ug ang usa ka pagdapit kang Luis sa paglihok inubanan sa hugot nga pagtuo.
Ikonsiderar ang pagdapit sa mga estudyante sa pagpaambit sa ilang mga plano ngadto sa ilang mga kauban o sa klase. Tingale makatabang ang pagpaambit og kaugalingong kasinatian sa pag-angkon og pagpamatuod sa bisan unsang mga pagtulon-an sa Manluluwas.
Rebyohon
Tabangi ang mga estudyante sa pagrebyo sa pakisayran ug sa mahinungdanon nga hugpong sa mga pulong sa kasulatan alang sa Juan 7:17 . Ang mosunod nga rebyo nga kalihokan kinahanglan nga gamiton sa usa ka leksiyon nga itudlo sa umaabot.
Isulat ang pakisayran sa kasulatan ug mga mahinungdanon nga hugpong sa mga pulong sa kasulatan sa tulo ka linya ngadto sa pisara, sigon sa gipasabot sa “Pagmemorya ug pagpasabot” nga seksiyon sa bag-o lang nga leksiyon. Human madapit ang mga estudyante sa paglitok sa matag hugpong sa pulong, papasa ang usa sa mga linya ug dapita ang mga estudyante sa pagsubli sa matag hugpong sa pulong. Human sa pipila ka higayon, papasa na pud ang uban pang hugpong sa pulong. Balika ang proseso hangtod mapapas ang tanang tulo ka linya ug ang mga estudyante mobati og kakomportable sa pag-recite sa tanang tulo ka linya.