Buhata ang Kabubut-on sa Dios aron Masayod sa Iyang Doktrina
Imahe
Si Jesukristo nagtudlo diha sa templo ug giduol sa halangdong mga pari, mga elder ug mga escriba kinsa nangutana Kaniya sa tinubdan sa iyang awtoridad. Si Kristo nangutana kanila kon ang bunyag ni Juan Bautista iya ba sa langit o sa tawo. Ang mga eksena nga wala gilakip sa kataposan nga bersiyon [outtakes] naglakip sa duol nga mga kuha [closeups] sa mga tawo diha sa pundok ug ni Caifas.
Sa panahon sa Kasaulogan sa mga Payagpayag [Tabernacle] didto sa Jerusalem, gipasabot ni Jesus kon unsaon pagkasayod ni bisan kinsa alang sa ilang kaugalingon nga ang doktrina nga Iyang gitudlo naggikan sa Langitnong Amahan. Kini nga leksiyon makatabang kanimo sa pagdiskobre unsa ang imong buhaton aron masayod sa kamatuoran mahitungod sa mga pagtulon-an sa Langitnong Amahan ug ni Jesukristo.
Paglakip sa mga estudyante. Pangita og mga paagi sa pag-awhag sa tanan nga mga estudyante nga moapil diha sa klase. Si Elder David A. Bednar sa Korum sa Napulog Duha ka Apostoles mitudlo nga ang atong tumong mao ang pagtabang sa mga estudyante aron mahimong “espirituhanong makabarog sa kaugalingon … samtang kita motabang [kanila] sa pagkat-on pinaagi sa pagbuhat” (“Paningkamot sa Pagkat-on pinaagi sa Hugot nga Pagtuo” Liahona, Septyembre 2007, 23).
Pagpangandam sa estudyante: Dapita ang mga estudyante sa paghunahuna mahitungod kon si kinsa o unsa ang labing impluwensiyal sa paghulma sa ilang kasamtangan nga pagsabot ug mga gituohan mahitungod kang Jesukristo ug sa Iyang mga pagtulon-an. Dapita sila sa pagsulat sa ilang mga hunahuna ngadto sa usa ka papel og dad-on ang papel ngadto sa klase.
Posible nga mga Kalihokan sa Pagkat-on
Mga nagkalainlain nga gituohan mahitungod kang Jesukristo
Unsa ang uban nga gituohan sa mga tawo mahitungod sa kon kinsa si Jesukristo?
Nganong mahinungdanon man nga imong masayran ang tinuod mahitungod kang Jesukristo bisan unsa pay hunahuna sa uban?
Kon ang mga estudyante mikompleto sa pagpangandam sa kalihokan, ikonsiderar ang pag-awhag kanila sa pagpaambit sa ilang sinulat.
Gahini og panahon ang paghunahuna kon unsa ang nakaimpluwensiya sa imong mga gituohan mahitungod kang Jesukristo. Ilha unsa nga mga tinubdan ang sagad imong adtoan alang sa kamatuoran, ug pamalandongi kon sa unsang paagi kini nagimpluwensiya sa imong mga gituohan. Samtang ikaw magtuon karon, tan-awa kon unsay imong mabuhat aron masayran ang kamatuoran mahitungod kang Jesukristo ug sa Iyang mga pagtulon-an.
Tungod kay daghan man sa Jerusalem ang gustong mopatay kang Jesus, Siya mitambong sa Kapistahan sa mga Payagpayag sa hilom (tan-awa sa Juan 7:1, 10). Samtang ang mga Judio nangita kang Jesus, ug sa kinatibuk-an sa kapistahan, ang mga tawo nagpaambit sa usag usa sa nagkalainlain nga mga opinyon mahitungod kon kinsa si Jesus.
Ipakita o kopyaha ang tsart ngadto sa pisara. Ikonsiderar ang pagbahinbahin sa mga bersikulo ug mga pangutana ngadto sa mga estudyante aron malikayan ang paggahin og taas nga panahon niini nga bahin sa leksiyon.
Giunsa sa mga Pariseo sa paghulagway ang bisan kinsa nga mituo kang Jesus?
Unsa ang mga rason nga gihatag sa katawhan sa pagtuo o sa wala pagtuo kang Jesukristo?
Unsa ang pipila ka opinyon sa mga tawo mahitungod kang Jesukristo ug sa Iyang mga pagtulon-an karon?
Unsaon nato pagkasayod sa kamatuoran mahitungod kang Jesukristo ug sa Iyang mga gitudlo?
Pagkasayod sa kamatuoran mahitungod kang Jesukristo ug sa Iyang mga pagtulon-an
Sa panahon sa Kapistahan sa mga Payagpayag, si Jesus miadto sa templo aron manudlo. Iyang gipasabot sa katawhan didto nga ang doktrina nga Iyang gitudlo ug Siya Mismo naggikan sa Langitnong Amahan (tan-awa sa Juan 7:14, 16–18, 28–29)
Basaha ang Juan 7:17, mangita kon unsa ang giingon ni Jesus nga mahimong buhaton sa katawhan aron sila masayod nga ang gitudlo ni Jesus tinuod ug nga Siya ang gipadala sa Langitnong Amahan.
Dapita ang mga estudyante sa pagpaambit kon unsa nga mga baroganan ang ilang makat-onan gikan niini nga bersikulo. Isulat sa pisara ang mga pahayag nga gipaambit sa mga estudyante.
Usa ka baroganan nga atong makat-onan niini nga bersikulo mao nga kon atong buhaton ang kabubut-on sa Langitnong Amahan, kita masayod nga ang Iyang doktrina tinuod.
Ang pagbuhat sa kabubut-on sa Langitnong Amahan nagpasabot nga kita magpakabuhi sigon sa Iyang gusto nga pamaagi. Ang Manluluwas nga si Jesukristo kanunay nga nagpakabuhi ug nagtudlo sa kabubut-on sa Langitnong Amahan.
Unsa nga mga ehemplo ang imong mapaambit bahin ni Jesus nga nagbuhat sa kabubut-on sa Amahan?
Unsa ang nakalisod sa pagsunod og usa ka baroganan nga wala pa nato mahibaloi nga tinuod?
Si Presidente Bonnie L. Oscarson, kanhi Kinatibuk-ang Presidente sa Young Women, mihatag sa mosunod nga tambag mahitungod sa pagkahibalo sa kamatuoran:
Imahe
Opisyal nga hulagway ni Bonnie Lee Green Oscarson, kinatibuk-ang presidente sa Young Women, 2013. Gipaluyohan sa Abril 2013 nga kinatibuk-ang komperensiya.
Usahay bali ang atong buhaton. Pananglit, atong gamiton kini nga paagi: Malipay kong magsunod sa balaod sa ikapulo, apan kinahanglan ko unang mahibaloan nga kini tinuod. Tingali mag-ampo kita aron makaangkon og pagpamatuod sa balaod sa ikapulo ug nanghinaot nga ang Ginoo mopanalangin kanato niana nga pagpamatuod sa dili pa gayod kita makasulat diha sa resibo sa ikapulo. Kini dili gayod mosalir. Ang Ginoo nagpaabot nga kita mopakita og hugot nga pagtuo. Kinahanglan kanunay kitang mobayad og hingpit ug tinud-anay nga ikapulo aron makaangkon og pagpamatuod sa ikapulo. Kining sama nga sumbanan magamit ngadto sa tanang mga baroganan sa ebanghelyo, mabalaod man sa kaputli, sa baroganan sa hustong pagsinina, sa Pulong sa Kaalam, o sa balaod sa puasa.
(Bonnie L. Oscarson, “Magpakabig Kamo,” Liahona, Nob. 2013, 77)
Sa imong hunahuna ngano kaha nga si Jesukristo gusto nga kita mahibalo nga ang Iyang doktrina naggikan sa Langitnong Amahan ug nga kini tinuod?
Sa unsang paagi nga ang pagkahibalo nga ang doktrina ni Jesukristo tinuod nga makatabang usab kanato sa pagkaila Kaniya?
Tabangi ang mga estudyante nga mapalawom ang ilang pagsabot sa baroganan nga gitudlo sa Juan 7:17 . Usa ka paagi sa paghimo niini mao ang pagpaambit sa mga kasinatian sa mga tawo kinsa nakaangkon og pagpamatuod sa kamatuoran pinaagi sa pagbuhat niini.
Sa pagtudlo sa baroganan nga anaa sa Juan 7:17, pipila ka video ang gilakip diha sa “Dugang nga Kalihokan sa Pagtuon” nga seksiyon dapit sa kataposan niini nga leksiyon. Ang mga estudyante mahimong dapiton usab sa pagpaambit og mga kasinatian o pagbuhat sa mosunod nga kalihokan.
Pagpili og usa sa mga pagtulon-an sa Ginoo diin ganahan ka og mas lig-on nga pagpamatuod. Alang sa pipila ka ideya bahin sa Iyang mga pagtulon-an, mahimo nimong tan-awon ang mga pakigpulong nga gipamulong ngadto sa kabatan-onan sa bag-o lang milabay nga kinatibuk-ang komperensiya. Makapangita usab ka og mga ideya diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022) nga booklet o diha sa Alang sa Kalig-on sa mga Kabatan-onan nga magasin. Dapita ang Espiritu nga tabangan ka sa pagpili og usa sa mga pagtulon-an sa Ginoo nga imong pagatutokan nga makapanalangin kaayo kanimo niining panahona sa imong kinabuhi.
Isulat ang pagtulon-an nga imong napili sa ibabaw sa blangko nga panid sa imong journal sa pagtuon o sa usa ka blangko nga piraso sa papel. Karon paghunahuna og yano nga hulagway o butang nga mahimo nimong idrowing aron sa pagrepresenta niini nga doktrina, ug idrowing kini sa tunga sa imong papel.
Pananglitan, tingali napili nimo nga palig-onon ang imong pagpamatuod bahin sa Basahon ni Mormon isip pulong sa Dios. Mahimo kang magdrowing og yanong hulagway sa Basahon ni Mormon.
Aron matabangan ka sa paghunahuna unsa ang angay buhaton aron makadawat og pagpamatuod sa pagtulon-an nga imong napili, paghunahuna ug lainlain nga mga buhat nga tingali maoy gusto sa Langitnong Amahan nga imong buhaton nga may kalabotan sa maong pagtulon-an. Pagsulat ug labing minos tulo ka buhat palibot sa litrato nga imong gidrowing.
Hunahunaa kon sa unsang paagi kaha nga ang pagbaton ug mas lig-on nga pagmatuod niini nga doktrina makaimpluwensiya sa imong relasyon ngadto sa Langitnong Amahan ug kang Jesukristo.
Unsa ang mga babag nga posibleng makapugong kanimo sa pagsunod niini nga doktrina? Sa unsang paagi nimo mabuntog kini nga mga babag?
Unsa ka mahinungdanon ang pagsabot mahitungod sa panahon ug paningkamot nga angay buhaton aron maila nga kining doktrina gikan sa Dios?
Ikonsiderar ang pagdapit sa mga estudyante sa pagpaambit diha sa gagmay nga mga grupo kon unsa ang ilang nasulat o nadrowing ug unsa ang doktrina nga ilang gitutokan.
Mahimo nimong ipaambit ang imong mga plano ngadto sa usa ka miyembro sa pamilya kinsa makatabang kanimo sa pagsunod sa doktrina ug pagkahibalo nga gikan kini sa Dios.
Komentaryo ug Background nga Impormasyon
Juan 7:2 . Unsa ang Kapistahan sa mga Payagpayag [Tabernacles]?
Ang Kapistahan sa mga Payagpayag (nga gitawag usab og Kasaulogan sa mga Balongbalong o sa mga Payagpayag) magsugod ug mahuman panahon sa Igpapahulay ug mahuman sulod sa gidugayon nga walo ka adlaw. Ang usa ka bahin niini nga kasaulogan naglakip sa pagtukod ug temporaryong mga payag nga gihimo gikan sa mga sanga sa kahoy. Ang mga tawo nagpabilin niini nga mga payag panahon sa kasaulogan aron mapahinumdoman sila nga ang Dios mipanalangin sa Iyang katawhan sulod sa 40 ka tuig samtang sila nagpuyo sa kamingawan sa Sinai.
Juan 7:17 . Unsa ang bili sa pagpangita sa kamatuoran pinaagi sa pagkamasulundon?
Ang Manluluwas miingon sa Iyang mga tinun-an nga kadtong magpadayon pagsunod sa Iyang mga pagtulon-an mahibalo sa kamatuoran ug nga kini nga kamatuoran maghatag kanila og kagawasan (tan-awa sa Juan 8:31–32).Si Presidente Dieter F. Uchtdorf sa Korum sa Napulog Duha ka Apostoles mipasabot nganong kita kinahanglan nga mohimo og paningkamot aron makadawat og personal nga pagpamatuod sa kamatuoran.
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 mipuli sa litrato nga gikuha niadtong 2004.
Ang uban moingon nga lisod ra kaayo ang mga lakang o dili kini motugbang sa paningkamot. Apan moingon ko nga kining personal nga pagpamatuod sa ebanghelyo ug sa Simbahan maoy pinakaimportante nga inyong maangkon niini nga kinabuhi. Dili lamang kini mopanalangin ug mogiya ninyo niining kinabuhia, apan may direkta kining epekto sa inyong kinabuhi hangtod sa kahangtoran.
(Dieter F. Uchtdorf, “Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 22)
Juan 7:39 . Nganong miingon man si Juan nga “niadtong higayona wala pa ikahatag ang Espiritu [Santo]”?
Si Juan nagpasabot “lamang sa gasa sa Espiritu Santo nga wala nianang panahona, tungod kay ang gahom sa Espiritu Santo naglihok sa panahon sa mga pagpangalagad ni Juan Bautista ug ni Jesus; kay kon dili man wala untay bisan usa nga nakadawat og pagpamatuod sa mga kamatuoran nga gitudlo niining mga tawhana [ Mateo 16:16–17 ; tan-awa usab sa 1 Mga Taga-Corinto 12:3 ]” (Giya ngadto sa mga Kasulatan, “ Espiritu Santo ”).
Dugang nga Kalihokan sa Pagkat-on
Bidyo sa mga sanglitanan sa pagkamasulundon nga mosangpot ngadto sa pagpamatuod
Ang mosunod nga mga bidyo nagpakita og mga sanglitanan sa mga tawo nga nagsunod sa ebanghelyo ug nakaangkon og pagpamatuod pinaagi sa ilang matinud-anong pagkamasulundon. Ikonsiderar ang pagpasalida sa usa o sa duha niini nga mga bidyo aron sa pag-awhag sa mga estudyante nga molihok inubanan sa hugot nga pagtuo ug sa pagtinguha sa pag-angkon og ilang kaugalingon nga pagpamatuod sa mga pagtulon-an sa Langitnong Amahan.
Bidyo 1: Si Presidente Bonnie L. Oscarson, kanhi Kinatibuk-ang Presidente sa Young Women, mihulagway kon unsa sama ang pagdako isip usa ka tin-edyer niadtong mga tuig 1960. Ang iyang pagkamasulundon sa Pulong sa Kaalam nagtugot sa Espiritu Santo nga magpamatuod diha kaniya sa kamatuoran niana nga baroganan sa ebanghelyo. (Tan-aw sa Bonnie L. Oscarson, “Magpakabig Kamo,” Liahona, Nob. 2013, 77)
Bidyo 2: Si Presidente Henry B. Eyring sa Unang Kapangulohan mipasabot kon giunsa sa Langitnong Amahan pagtabang kaniya aron masabtan ang kamatuoran mahitungod sa mahangtorong mga pamilya samtang gibuhat niya ang iyang bahin aron malikayan ang panagbikil ug magdala og kalinaw ngadto sa iyang panimalay. (Tan-awa sa Henry B. Eyring, “Usa ka Buhing Pagpamatuod,” Liahona, Mayo 2011, 126–27).
