Depiction of Jesus healing a blind man. For Mormon Channel use.
Si Jesus miayo sa usa ka tawo nga gipakatawo nga buta. Ang mga Pariseo miusisa niining tawhana ug mipalayas kaniya sa sinagoga tungod kay midumili siya sa paghukom ni Jesus nga usa ka makasasala gumikan sa pagpang-ayo atol sa Igpapahulay. Gipangita sa Manluluwas ang maong tawo, ug ang tawo miyukbo kang Jesus isip Anak sa Dios. Kini nga leksiyon makatabang nimo sa pagsabot sa unsang paagi ang pagpabilin nga matinud-anon sa unsay imong nahibaloan mahitungod sa Manluluwas, bisan pa sa kalisdanan, makapalig-on sa imong pagpamatuod Kaniya.
Paghunong sa mga video aron paghisgot. Mahimong ihunong ang mga video sa pipila ka importanting higayon aron sa pagpangutana, pagpatin-aw sa konteksto, o pagdapit sa mga estudyante sa pagpangutana. Samtang nangandam sa pagtudlo gamit ang video, ikonsiderar ang mga dapit diin imong ihunong ang video aron makasalmot ang mga estudyante bahin sa unsa ang gitudlo sa maong video.
Pagpangandam sa estudyante: Dapita ang mga estudyante sa paghunahuna mahitungod sa mga panahon dihang sila nagpabilin nga matinud-anon sa unsay ilang nahibaloan ug gituohan mahitungod ni Jesukristo atubangan sa oposisyon.
Posible nga mga Kalihokan sa Pagkat-on
Pagpabiling matinud-anon diha kang Jesukristo
Ikonsiderar ang pagbuhat og usab diha sa klase sa senaryo sa ubos gamit ang mga rosas o laing mga butang.
Hunahunaa nga gihatagan ka ug kahon nga adunay dalag nga rosas sa sulod.
Unsaon nimo pagtubag kon ang uban nga wala makakita sa sulod sa kahon moingon nga ang rosas nga naa sa kahon pink?
Usahay makatagbo kita og mga tawo o mga ideya nga mosukwahi sa atong kahibalo ug pagpamatuod kang Jesukristo. Bisan kon ang Espiritu nagsaksi kanato mahitungod kang Jesukristo, ang uban mosulay sa pakiglantugi niana nga mga kamatuoran.
Ang ubang estudyante tingale adunay mga kasinatian nga ilang ikapaambit mahitungod sa panahon diin sila nag-atubang og oposisyon bahin sa unsay ilang nahibaloan mahitungod ni Jesukristo. Mahimong ipaambit sa mga estudyante unsay ilang nahunahuna panahon sa pagpangandam sa estudyante sa kalihokan. Kon gikinahanglan, ikonsiderar ang pagpaambit sa ehemplo ni Joseph Smith nga anaa sa Joseph Smith—Kasaysayan 1:21–26 o personal nga kasinatian.
Nag-atubang ka ba og bisan unsang oposisyon sa imong paningkamot nga magpabiling matinud-anon sa unsay imong nahibaloan mahitungod ni Jesukristo?
Kon mao, unsay epekto niini sa imong kinabuhi?
Ikonsiderar ang pagsulat sa mosunod nga kamatuoran diha sa pisara aron kini mahinumdoman sa mga estudyante samtang magtuon sila sa Juan 9 .
Sa Juan 9 imong makat-onan ang mahitungod sa tawo nga buta kinsa giayo sa Ginoo. Usa sa mga baroganan nga atong makat-onan gikan sa ehemplo niining tawhana mao nga kon magpabilin kita nga matinud-anon sa atong kahibalo diha ni Jesukristo bisan pa og mag-atubang kita og oposisyon, mapalig-on ang atong pagpamatuod Kaniya. Pangita og ebidensya bahin niini nga baroganan samtang magtuon ka sa asoy diha sa Juan 9 .
Basaha ang Juan 9:1–12 , nga mangita kon unsay nakat-onan sa buta nga tawo mahitungod ni Jesus.
Dinhi nga punto, unsa man ang nahibaloan niining tawhana mahitungod ni Jesus?
Human maayo ang tawo nga buta, ang pipila ka mga tawo naglantugi kon siya ba gayod kadtong tawo nga gipakatawo nga buta, samtang ang uban naghunahuna kon giunsa niya sa pagkaayo. Gidala siya ngadto sa mga Pariseo, nga nangasuko tungod kay ang milagro gihimo atol sa Igpapahulay. Ilang gisugdan sa pag-usisa ang maong tawo. Giusisa usab sa mga Pariseo ang iyang mga ginikanan, apan nagdumili ang mga ginikanan sa pagtubag sa mga Pariseo, tungod kay nahadlok sila nga isalikway sa sinagoga kon ilang suportahan si Jesus. Giusisa pag usab sa mga Pariseo ang maong tawo mahitungod sa iyang pagkaayo. (Tan-awa sa Juan 9:13–34 .)
Ikonsiderar ang pagdapit sa mga estudyante sa paglista diha sa pisara sa nagkalainlain nga pahayag nga gisulti sa tawo mahitungod kang Jesus. Ang mga estudyante makabenispisyo usab gikan sa pagmarka niining mga pamahayag diha sa ilang mga kasulatan.
Sa sugilanon bahin sa tawo nga buta, unsang kalig-onan ang imong nakita sa baroganan nga kon magpabilin kita nga matinud-anon sa atong kahibalo diha ni Jesukristo bisan pa og mag-atubang kita og oposisyon, mapalig-on ang atong pagpamatuod Kaniya?
Sa unsang mga paagi kaha nakaangkon kining tawhana og mas dako nga panabot mahitungod sa kon kinsa si Jesus?
Unsa ang natudlo sa mga pamahayag niining maong tawo diha kanimo mahitungod ni Jesukristo?
Tungod kay ang maong tawo nagpadayon sa pag-ingon nga si Jesus iya sa Dios, ang mga Pariseo misalikway kaniya pagawas sa sinagoga (tan-awa sa Juan 9:34).
Basaha ang Juan 9:35–38 , nga mangita kon giunsa sa Manluluwas sa papangalagad ang maong tawo.
Hunahunaa ang panginahanglan sa mga estudyante, ug pagpili og pipila sa mosunod nga mga pangutana nga hisgotan. Ang mga estudyante makabenipisyo gikan sa pagtubag sa gipili nga mga pangutana diha sa ilang mga journal sa dili pa maghisgot diha sa tibuok klase.
Posibleng mga pangutana nga pagahisgotan
Sa unsang paagi nalig-on ang pagpamatuod sa tawo nga natawo nga buta samtang pabilin siyang nagmatinud-anon sa unsay iyang nahibaloan mahitungod sa Manluluwas?
Sa unsang paagi ang atong pagpamatuod kang Jesukristo malig-on samtang kita makalahutay sa oposisyon o pagsulay sa atong hugot nga pagtuo?
Unsa ang atong makat-onan mahitungod sa mga hiyas ni Jesukristo gikan sa Iyang mga pakig-inter-aksyon ngadto sa tawo nga natawo nga buta?
Sa unsang paagi ang Manluluwas nakatabang nga molambo ang pagpamatuod sa tawo nga buta? Sa unsang paagi Siya makatabang kanato nga mapalambo ang atong pagpamatuod?
Sa unsang paagi nga ang imong nakat-onan mahitungod sa Manluluwas dinhi niini nga asoy makatabang sa imong pag-atubang sa oposisyon karon o sa umaabot?
Ikonsiderar ang pagpaambit og kaugalingong kasinatian bahin sa pagpabiling matinuoron ngadto sa Manluluwas kon mag-atubang og oposisyon.
Komentaryo ug Background nga Impormasyon
Juan 9:1–3 . Nganong ang mga tinun-an ni Jesus nagtuo nga ang pagkabuta sa maong tawo resulta sa sala?
Si Presidente Boyd K. Packer (1924–2015) sa Korum sa Napulog Duha ka Apostoles mitudlo:
Imahe
Final official portrait of Elder Boyd K. Packer, President of the Quorum of the Twelve Apostles, 2000. Passed away 3 July 2015.
Natural lamang sa mga ginikanan sa [adunay kakulian sa panglawas] nga mga anak nga makapangutana sa ilang kaugalingon, “Unsa nga sayop ang among nahimo?” Ang ideya nga ang tanan nga pag-antos direkta nga resulta sa sala gitudlo na sukad sa karaang kapanahonan. Sayop kini nga doktrina. Kana nga ideya gidawat pa gani sa pipila sa unang mga tinun-an hangtod nga gikorihian sila sa Ginoo.
“ Samtang naglakaw si Jesus nakita niya ang usa ka tawo nga buta sukad pa sa iyang pagkahimugso.
“Ang iyang mga tinun-an nangutana kaniya, Magtutudlo, kinsa may nakasala nga natawo man siyang buta? Siya ba o ang iyang mga ginikanan?
“Si Jesus mitubag, Dili nga nakasala siya o ang iyang mga ginikanan: kondili aron ang mga buhat sa Dios ikapadayag diha kaniya.” ( Juan 9:1–3)
Dili kaayo angay nga mahasol ang imong konsensya kalabot sa mga tawo nga may [kakulian sa panglawas]. Ang ubang mga [kakulian sa panglawas] posibling mahitabo gumikan sa kawalay pag-amping o pag-abuso, ug ang pipila gumikan sa pagkaadik sa mga ginikanan. Apan kadaghanan kanila dili. Ang mga kasakit moab[o]t ngadto sa mga inosente.
(Boyd K. Packer, “The Moving of the Water,” Ensign, Mayo 1991, 7–8)
Unsa man ang nasinati sa tawo nga buta human niya gigamit ang iyang pagtuo sa Manluluwas?
Si Presidente Howard W. Hunter (1907–95) mitudlo:
Imahe
Howard W. Hunter
Karon ang panan-aw gihatag sa makaduha—kausa aron pag-ayo sa usa ka pisikal nga depekto [nga anaa na sukad pa sa pagkatawo] ug kausa aron makakita sa Hari sa mga Hari sa wala pa Siya mosaka ngadto sa Iyang mahangt[o]rong trono. Gipalagsik ni Jesus ang temporal ug espirituwal nga panan-aw. Giiwag niya ang iyang kahayag sa mangitngit nga dapit, ug kini nga tawo, sama sa daghan pang uban nianang panahona ingon man usab sa atong panahon karon, midawat sa kahayag ug nakakita.
(Howard W. Hunter, “The God That Doest Wonders,” Ensign, Mayo 1989, 16–17)
Unsa ang pagbati nga makadawat og espirituhanong panan-aw sa atong kinabuhi?
Si Presidente Thomas S. Monson (1927–2018) nagtudlo:
Imahe
Official portrait of President Thomas S. Monson, 2008.
Kadtong mga nakabatyag sa paghikap sa kamot sa Agalon ingon og dili makapasabot sa kausaban nga miabot sa ilang kinabuhi. Adunay tinguha sa pag-alagad nga matinud-anon, sa paglakaw nga mapaubsanon, ug sa pagkahimong sama sa Manluluwas. Tungod sa pagkabaton og Espirituhanon nga panab[o]t ug nakakita sa mga saad sa kahangt[o]ran, sila misubli sa mga pulong sa buta nga tawo nga gipahiuli ni Jesus ang panan-aw kinsa miingon “Ang nasayran ko lamang mao nga buta ako kaniadto apan karon makakita na” [ Juan 9:25 ].
(Thomas S. Monson, “Matinguhaon nga Moapil,” Liahona, Nob. 2004, 58)
Juan 9:22, 34–35 . Unsa ang kahulogan sa pagkasalikway gikan sa sinagoga?
“Ang mga sinagoga nagsilbing sentro sa relihiyuso ug sosyal nga mga kalihokan alang sa daghang mga komunidad nga Judeo. Ang mga sinagoga mihatag og access ngadto sa espirituwal nga panudlo ug pagsimba, ingon man usab sa edukasyon ug sosyal nga mga oportunidad. Tungod kay ang sinagoga gikinahanglan man kaayo sa katilingban sa mga Judeo, ang pagsalikway gikan sa sinagoga … nagpasab[o]t og labaw pa sa pagka-excommunicate ug mawad-an sa pakigdait [fellowship] uban sa relihiyuso nga komunidad. Kini nagpasab[o]t usab nga gipapahawa usab gikan sa kultural ug sosyal nga mga kalihokan. Kini nga hulga ingon og grabe gayod nga ang mga ginikanan sa tawo nga gipakatawo nga buta dili gusto nga malakip sa imbestigasyon bahin niini nga milagro [nga pagkaayo sa ilang anak]” (New Testament Student Manual [2014], 230).
Dugang nga mga Kalihokan sa Pagkat-on
Juan 9:1–7 . Mahimong gamiton sa Dios ang atong mga kalisdanan aron ikapakita ang Iyang mga buhat ug gahom
Ikonsiderar ang paggamit sa Juan 9:1–7 sa pagtudlo sa mosunod nga mga kamatuoran: Ang Dios mahimong mogamit sa atong mga kalisdanan aron ikapakita ang Iyang mga buhat ug gahom.Ang pipila ka mga pahayag diha sa seksiyon nga “Komentaryo ug Background nga Impormasyon” makatabang sa mga estudyante sa pagsabot niini nga baroganan. Mahimong hisgotan sa mga estudyante kon sa unsang paagi ang asoy niini nga mga bersikulo makaimpluwensiya sa paagi sa ilang pagtan-aw sa kaugalingon nilang kalisdanan ingon man usab sa uban. Mahimo usab nga ipaambit sa mga estudyante ang ilang kaugalingong mga kasinatian nga may kalabotan niini nga baroganan. Tingale makatabang ang pagpahinumdom sa mga estudyante nga dili ipakigbahin ang mga kasinatian nga personal kaayo o pribado.
Usa ka susamang baroganan anaa sa Dali, Sunod Kanako nga materyal (tan-awa sa “Abril 24–30. Juan 7–10: ‘Ako ang Maayong Magbalantay,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023). Ang mga estudyante mahimong mogamit sa bisan unsang mga kasinatian o mga ideya gikan sa ilang indibidwal o pamilya nga pagtuon.
Usa ka alternatibo nga konklusyon sa leksiyon
Aron matabangan ang mga estudyante nga makagamit sa mga baroganan gikan niini nga leksiyon, hatagi sila og mga kopya sa mosunod nga diagram. Pataboni sa mga estudyante ang ilang wala nga mata ug gunitan ang diagram nga ituyhad ang kamot. Hangyoa sila sa pagtan-aw sa (+) nga sign gamit ang tuo nilang mata ug ihinay-hinay og paduol ang papel ngadto sa ilang nawong. Sa pipila ka punto, ang itom nga lingin dapit sa tuo mawala gikan sa ngilit sa ilang panan-aw. (Mahimo nimong ipasabot nga ang punto diin nawala ang tuldok mao ang gitawag nga dili makita nga dapit [blind spot].)
Imahe
A plus sign and a black dot inside a rectangle.
Ipasabot nga samtang ang mga estudyante mo-adjust sa distansya sa papel gikan sa ilang mata, ang tuldok mobalik na sad. Awhaga sila sa pagpamalandong sa mosunod nga pangutana: Kon ang tuldok nga naa sa diagram nagrepresentar sa Manluluwas, unsa nga mga pag-adjust ang mahimo nimong buhaton sa imong kinabuhi aron imong makita ang Manluluwas sa mas klaro nga paagi? Dapita ang mga estudyante sa pagsulat diha sa ilang mga journal sa pagtuon kon unsay ilang buhaton.
