Doktrinal nga Kahanas: Lucas 2:10–12

Si Jesukristo Natawo isip Manluluwas ug Ginoo

Sa miaging leksiyon, nagtuon ka sa pagpamatuod sa usa ka anghel ngadto sa mga magbalantay sa karnero nga si Jesukristo mao ang Anak sa Dios ug Manluluwas sa kalibotan (tan-awa sa Lucas 2:10–12). Hatagan ka niini nga leksiyon og oportunidad aron ipakita ang imong pagsabot niini nga doktrina samtang naggamit ka og mga baroganan sa pag-angkon og espirituhanong kahibalo sa usa ka sitwasyon sa tinuod nga kinabuhi.

Gidisenyo kini nga leksiyon sa doktrinal nga kahanas aron itudlo human sa Lucas 2:1–14 , nga mao ang pangkontekstong leksiyon para sa tudling sa doktrinal nga kahanas sa Lucas 2:10–12 . Kon kinahanglang ibalhin kini nga leksiyon sa laing semana aron motukma sa mga eskedyul sa eskuwelahan, siguroha nga ibalhin usab ang pangkontekstong leksiyon.

Pagtudlo sa mga estudyante sa mga baroganan sa pag-angkon og espirituhanong kahibalo. Mas makab-ot sa mga estudyante ang mga katuyoan sa doktrinal nga kahanas kon ilang masabtan ang mga baroganan sa pag-angkon og espirituhanong kahibalo ug hatagan sila og mga oportunidad nga gamiton kini. Ikonsiderar ang mubo nga pagrebyo niini nga mga baroganan sa kada leksiyon sa doktrinal nga kahanas. Mahimo kining makatabang kon maghatag og mga pananglitan kon unsaon paggamit ang mga baroganan sa sayo nga bahin sa tuig ug tugotan ang mga estudyante nga maghatag og ilang kaugalingong mga pananglitan samtang gipausbaw nila ang ilang mga abilidad.

Pag-andam sa estudyante: Dapita ang mga estudyante nga sugdan ang pagmemorya sa pakisayran ug importante nga hugpong sa mga pulong, Lucas 2:10–12 : “Kay karong gabhiona, natawo sa lungsod ni David ang inyong Manluluwas, ang Kristo nga Ginoo.”

Posible nga mga Kalihokan sa Pagkat-on

Imemorya ug ipasabot

Tan-awa ang hulagway sa pagkatawo sa Manluluwas ug ang importante nga hugpong sa mga pulong sa kasulatan para sa Lucas 2:10–12 . Makatabang sa pagmemorya ang paglambigit og hulagway uban sa pakisayran ug importante nga hugpong sa mga pulong sa kasulatan.

Dapita ang mga estudyante nga isaysay ang pakisayran ug importante nga hugpong sa mga pulong sa kasulatan sa daghang higayon. Mahimo kining buhaton nga magtinagsa o isip usa ka klase.

Tan-awa ang hulagway sa pagkatawo sa Manluluwas ug isaysay ang pakisayran ug importante nga hugpong sa mga pulong sa kasulatan para sa Lucas 2:10–12 : “Kay karong gabhiona, natawo sa lungsod ni David ang inyong Manluluwas, ang Kristo nga Ginoo.” Balika hangtod nga mobati ka og pagsalig nga masaysay nimo kini gikan sa memorya.

Ang mosunod nga kalihokan gituyo aron tabangan ang mga estudyante sa pagpasabot pinaagi sa ilang kaugalingong mga pulong sa doktrina nga si Jesukristo mao ang Manluluwas sa kalibotan, sama sa gitudlo sa Lucas 2:10–12 .

Tan-awa ang hulagway sa pagkatawo sa Manluluwas. Pagsulat og duha o tulo ka saysay nga nagpasabot kon nganong ang panghitabo nga anaa sa hulagway dinhi “nagdala og maayong balita nga makalipay kaayo … sa tanang katawhan” ( Lucas 2:10).

Pagdapit og andam nga mga estudyante sa pagpakigbahin kon unsay ilang gisulat. Paminaw pag-ayo sa mga tubag sa mga estudyante, ug rebyoha ang materyal gikan sa leksiyon sa Lucas 2:1–14 kon gikinahanglan.

Ipraktis ang paggamit

Pagtagana og pipila ka minuto aron rebyohon ang mga baroganan sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Para sa kada baroganan, pagmarka og bisan usa lamang ka saysay nga gibati nimo nga nagpasabot sa konsepto.

Dapita ang pipila ka andam nga estudyante sa pagpaambit sa mga saysay nga ilang gimarkahan. Ikonsiderar ang pagsukna og follow-up nga mga pangutana nga makatabang sa mga estudyante sa pagpasabot kon nganong ilang gipili ang partikular nga saysay ug kon unsa ang buot ipasabot niini ngadto kanila sa personal.

Ikonsiderar ang mosunod nga mga sitwasyon:

Ang usa sa imong mga higala nga dili relihiyoso bag-ohay nga nakakita og pares sa mga misyonaryo nga nakig-istorya sa pipila ka tawo sa parke. Gipangutana ka sa imong higala, “Nganong ang mga misyonaryo gikan sa imong simbahan mogawas man ug magsangyaw mahitungod kang Jesus? Morag gisulayan ninyo sa pagpugos ang inyong mga gituohan ngadto sa uban pang mga tawo. Nganong dili na lamang ninyo sila pasagdan nga malipay sa kon unsa sila?”

Samtang naghunahuna niini nga sitwasyon, tun-i ang mosunod nga mga baroganan sa pag-angkon og espirituhanong kahibalo ug pamalandongi kon sa unsang paagi kini makatabang kanimo sa pagtubag sa pangutana sa imong higala.

Mahimong bahinon ang mga estudyante sa mga pares o gagmay nga mga grupo aron hisgotan ang mga baroganan sa pag-angkon og espirituhanong kahibalo ug kon sa unsang paagi nila magamit kini nga mga baroganan aron motubag niini nga sitwasyon.

Ikonsiderar ang paggamit og tulo ka bahin nga pagpuli-puli og turno aron hisgotan ang mga baroganan. I-imprinta ug guntinga ang mosunod nga mga segment aron adunay igo ang kada pares o grupo nga makabaton og tagsa-tagsa. Hatagi ang mga estudyante og panahon aron hisgotan ang ilang segment sa dili pa sila hangyoon nga magbaylo og mga papel sa silingan nga grupo o pares. Kon mahisgotan na sa tanang grupo o mga pares ang tanang tulo ka segment, dapita ang mga estudyante nga motubag sa sitwasyon sa ilang kaugalingon.

Molihok inubanan sa hugot nga pagtuo

“Molihok kita inubanan sa hugot nga pagtuo kon atong pilion ang pagsalig sa Dios ug Siya ang unahon” (Mahinungdanon nga Dokumento sa Doktrinal nga Kahanas, “Pag-angkon og Espirituhanong Kahibalo,” parapo 5).

Unsa nga mga hugpong sa mga pulong ang imong makita sa mga parapo 5–7 sa seksiyon nga “Pag-angkon og Espirituhanong Kahibalo” nga makatabang kanimo niini nga sitwasyon?
Sa unsang paagi nga ang paglihok inubanan sa hugot nga pagtuo makatabang kanimo samtang nangita ka og tubag para sa imong higala?

Susihon ang mga konsepto ug mga pangutana inubanan sa mahangturong panglantaw

“Sa pagsusi sa [mga konsepto, mga pangutana] inubanan sa mahangturong panglantaw, atong ikonsiderar ang kinatibuk-ang kahulogan niini sa plano sa kaluwasan ug sa mga pagtulon-an sa Manluluwas” (Mahinungdanon nga Dokumento sa Doktrinal nga Kahanas, “Pag-angkon og Espirituhanong Kahibalo,” parapo 8).

Rebyoha ang Lucas 2:10–12 . Hunahunaa kon unsa ang gitudlo niini nga tudling kauban ang imo nang nahibaloan mahitungod kang Jesukristo.

Unsa ang mga tahas sa Manluluwas diha sa plano sa kaluwasan?
Nganong importante man para niadtong wala pa nakahibalo mahitungod kang Jesukristo nga makahibalo mahitungod Kaniya?
Nganong importante man nga atong ipaambit ang mensahe sa Iyang gipahiuli nga ebanghelyo sa tanan, lakip na sa uban pang Kristiyano nga midawat na Kaniya?
Sa unsang paagi nimo magamit ang mga tubag sa mga miaging pangutana sa pagtubag sa imong higala?

Tinguhaon ang dugang nga panabot pinaagi sa balaanong gipili nga mga tinubdan

Aron matabangan kita nga makaangkon og espirituhanong kahibalo, ang Ginoo “miestablisar og mga tinubdan nga pinaagi niini Siya mopadayag sa kamatuoran ug giya ngadto sa Iyang mga anak” (Mahinungdanon nga Dokumento sa Doktrinal nga Kahanas, “Pag-angkon og Espirituhanong Kahibalo,” parapo 11).

Rebyoha ang usa o labaw pa sa mosunod nga dinasig nga mga tinubdan, nga mangita og impormasyong makatabang kanimo sa pagtubag sa pangutana sa imong higala.

“ Ang Buhi nga Kristo: Ang Pagpamatuod sa Mga Apostoles ” (ChurchofJesusChrist.org)
Ang mga bersikulo nga imong gi-link o gi-cross reference sa Lucas 2:10–12 sa miaging leksiyon
Mga kanta nga nakalista sa ilawom sa hilisgotan nga “Jesukristo” diha sa hymnbook

Ikonsiderar kon unsa ang gitudlo niini nga mga tinubdan mahitungod sa kon sa unsang paagi nga ang Manluluwas ug ang Iyang mga pagtulon-an makahatag og kalipay sa mga tawo.

Unsa ang imong nakat-onan mahitungod sa Manluluwas ug sa Iyang mga pagtulon-an nga makahatag sa mga tawo og kalipay niini nga kinabuhi ug sa kinabuhi nga moabot?
Unsang personal nga mga kasinatian diha sa Manluluwas o sa Iyang mga pagtulon-an ang naghatag kanimo og kalipay?
Sa unsang paagi nga ang imong mga tubag niini nga mga pangutana makatabang kanimo sa pagtubag sa pangutana sa imong higala?

Ikonsiderar ang paghatag sa mga estudyante og oportunidad nga i-role play kini nga sitwasyon pagkahuman sa paghisgot sa mga baroganan sa pag-angkon og espirituhanong kahibalo.

Rebyo sa Doktrinal nga Kahanas

Sa sinugdanan o kataposan sa umaabot nga leksiyon, pagtagana og sobra sa 3 hangtod sa 5 ka minuto sa pagrebyo sa tudling sa doktrinal nga kahanas. Ipakita ang hulagway sa pagkatawo sa Manluluwas nga gigamit sa dihang gimemorya sa mga estudyante ang Lucas 2:10–12 , ug dapita ang mga estudyante nga balikon ang pakisayran ug importante nga hugpong sa mga pulong sa kasulatan hangtod nga mabuhat nila kini gikan sa memorya.

Dugang nga Kalihokan sa Pagkat-on

Alternatibong sitwasyon sa pagpraktis sa paggamit

Hunahunaa nga nag-post ka og hulagway sa Belen [Nativity] diha sa social media nga adunay mensahe nga nagsulti nga mapasalamaton ka para sa kalinaw ug kalipay nga gihatag kanimo sa imong pagkahibalo sa Manluluwas. Ang usa sa imong mga higala nga dili relihiyoso mikomento sa imong post nga nag-ingon, “Dili ba makabaton og kalinaw ug kalipay ang mga tawo kon wala si Jesus?”