Lucas 2:1–39; Mateo 2:1–12

Saksi sa Manluluwas

Ang mga magbalantay sa karnero, ang Mga Maalamong Tawo, si Simeon, ug Ana mao ang unang mga saksi sa Manluluwas. Samtang nakahibalo ka mahitungod sa ilang mga kasinatian, makabaton ka og kagustohan nga magtinguha ug mousbaw ug magmalipayon sa imong kaugalingong pagpamatuod kang Jesukristo.

Pag-andam sa estudyante: Dapita ang mga estudyante nga pamalandongan kini nga mga pangutana: Unsa ka kusog ang imong gibati nga ikaw makapamatuod mahitungod kang Jesukristo? Unsaon nimo pagpalig-on ang imong pagpamatuod sa Manluluwas?

Posible nga mga Kalihokan sa Pagkat-on

Ang Espiritu Santo nagpamatuod mahitungod kang Jesukristo

Ikonsiderar ang pagsugod sa klase pinaagi sa pagkanta sa himno nga “Buhi ang Manunubos Ko, Niini Nasay[o]d Ako” (Mga Himno, nu. 80). Mahimong makatabang usab kon mopaambit og personal nga pagpamatuod mahitungod sa Manluluwas.

Hunahunaa ang mosunod nga mga pangutana:

Unsa ang pagpamatuod?

Kon maglisod ang mga estudyante sa pagpasabot kon unsa ang pagpamatuod, ikonsiderar ang paggamit sa pasabot gikan sa Mga Hilisgotan sa Ebanghelyo sa seksiyon nga “Komentaryo ug Background nga Impormasyon”.

Unsay mabuhat nimo aron makabaton ug mapalig-on ang pagpamatuod?
Sa pag-ila nga usahay ang ubang tawo makatabang nimo sa pagpalambo sa pagpamatuod, nganong dili man makahatag kanimo og pagpamatuod ang imong mga ginikanan, mga igsoon, o mga higala?

Ang pagpamatuod maangkon kon ang Espiritu Santo momatuod og kamatuoran ngadto sa tinuoray nga nagtinguha. Ayaw kasagmuyo kon manginahanglan og dugay nga panahon ang pagbaton og imong kaugalingong pagpamatuod. Samtang nagpadayon ka sa sinserong pagtinguha og pagpamatuod, tubagon ka sa Ginoo sa Iyang kaugalingong panahon ug paagi.

Kon makatabang sa mga estudyante, ikonsiderar ang dali nga paghisgot kon sa unsang paagi magpamatuod ang Espiritu Santo. Mahimong makatabang ang mosunod nga mga tudling sa kasulatan: Juan 14:26 ; 16:13 ; Doktrina ug Mga Pakigsaad 6:23 ; 8:2–3 .

Basaha ang Juan 15:26 ug ang mosunod nga pamahayag ni Presidente Russell M. Nelson, nga mangita kon unsa ang gitudlo niini mahitungod sa pagpamatuod mahitungod kang Jesukristo.

Ang labing importante nga kamatuoran nga saksihan sa Espiritu Santo kaninyo mao nga si Jesus mao ang Kristo, ang Anak sa buhing Dios.

(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)

Pamalandongi ang mosunod nga mga pangutana, ug ikonsiderar ang pagsulat sa imong mga nahunahunaan diha sa imong journal sa pagtuon:

Pahinumdomi ang mga estudyante nga gisukna sila sa mga mosunod nga pangutana aron sa pag-andam para niini nga leksiyon. Hatagi sila og panahon sa paghunahuna mahitungod sa ilang mga tubag. Ikonsiderar ang paghisgot sa ikaduhang pangutana.

Sa imong hunahuna, nganong kini man ang pinakaimportanteng kamatuoran nga saksihan sa Espiritu nganha kanimo?
Unsaon nimo pagpalig-on ang imong pagpamatuod sa Manluluwas?

Niini nga leksiyon, makakat-on ka mahitungod sa mga saksi sa pagkatawo sa Manluluwas. Samtang nagtuon ka sa ilang mga asoy, pangitaa kon giunsa pagkahibalo niini nga mga saksi ang Manluluwas ug kon unsa ang ilang gibuhat sa mga pagpamatuod nga ilang nadawat. Hinumdomi kini nga kamatuoran samtang nagtuon ka sa: Ang akong kaugalingong pagpamatuod mahitungod kang Jesukristo miabot pinaagi sa pagsaksi sa Espiritu Santo.

Ikonsiderar ang pagsulat niini nga kamatuoran sa pisara ug dapita ang mga estudyante nga irekord kini diha sa ilang mga journal sa pagtuon.

Simeon ug Ana

Walo ka adlaw pagkahuman sa pagkatawo ni Jesus, gipakita ni Maria ug Jose ang batang si Jesus didto sa templo sigon sa balaod sa Judeo (tan-awa sa Exodo 13:2). Si Simeon ug Ana, nga anaa sa templo, miila sa batang Jesus isip ilang Manluluwas.

Basaha ang Lucas 2:25–33, 36–38 , nga mangita og ebidensya sa Espiritu Santo nga mitabang kang Simeon ug Ana nga makadawat og pagsaksi mahitungod kang Jesukristo. Ang hugpong sa mga pulong nga “nagpaabot sa kaluwasan sa Israel” sa bersikulo 25 nagpasabot sa paghulat sa Mesiyas nga moabot.

Giunsa pagtabang sa Espiritu Santo kang Simeon nga makabaton og pagpamatuod mahitungod kang Kristo?
Unsa ang gibuhat ni Ana nga nakatabang kaniya nga makadawat og pagsaksi sa Ginoo?
Unsa ang imong makat-onan gikan kang Simeon ug Ana nga makatabang kanimo sa pagtinguha, pag-usbaw, ug pagmalipayon sa imong kaugalingong pagsaksi mahitungod kang Jesukristo?

Ikonsiderar ang pagbahin sa mga estudyante sa gagmay nga mga grupo ug pagtagana sa kada grupo og usa sa mosunod nga mga kalihokan.

Dugang pa kang Simeon ug Ana, morag nakabaton usab og pagpamatuod kang Jesukristo ang mga magbalantay sa karnero ug ang Mga Maalamong Tawo. Mahimo kitang makakat-on gikan sa ilang mga ehemplo kon sa unsang paagi nga makaimpluwensya kanato ang pagdawat og pagpamatuod mahitungod sa Manluluwas. Kon gusto nimong makahibalo pa og dugang mahitungod sa pagpaambit sa imong pagpamatuod, tun-i ang mga magbalantay sa karnero sa Kalihokan A. Kon gusto nimong pausbawon ang imong pagdayeg ug maghunahuna og mga gasa nga mahatag nimo sa Ginoo, tun-i ang Mga Maalamong Tawo sa Kalihokan B.

Kalihokan A: Ang mga Magbalantay sa Karnero (Lucas 2:15–20)—Pagpaambit sa imong pagpamatuod

Sa gabii sa pagkatawo sa Manluluwas sa Betlehem, nagbantay ang mga magbalantay sa karnero sa ilang mga panon sa karnero sa mga uma sa palibot sa lungsod. Adunay anghel nga nagpakita kanila ug gipahibalo ang paghimugso ni Jesukristo, nga nagdala og “maayong balita makalipay kaayo” para sa “tanang katawhan” ( Lucas 2:10).

Basaha ang Lucas 2:15–20 , nga mangita kon giunsa pagtubag sa mga magbalantay sa karnero ang mensahe sa anghel. Mahimo usab nimong tan-awon ang video nga “Shepherds Learn of the Birth of Christ” (2:50), nga anaa sa ChurchofJesusChrist.org.

2:50

Sa imong hunahuna, nganong gipaambit man sa mga magbalantay sa karnero ang ilang pagpamatuod sa Ginoo ngadto sa ubang tawo?
Unsa ang imong makat-onan gikan niini nga asoy mahitungod sa kon unsay mahitabo kon makadawat ka og imong kaugalingong pagpamatuod mahitungod kang Jesukristo?
Kanus-a nimo gitinguha ang pagpakigbahin sa imong pagpamatuod mahitungod ni Jesukristo ug sa Iyang ebanghelyo ngadto sa ubang tawo? Pagpaambit og kasinatian nga imong nasinati bahin sa pagpaambit sa imong pagpamatuod.

Kalihokan B: Ang Mga Maalamong Tawo (Mateo 2:1–12)—Pagpausbaw sa imong pagdayeg

Gipangita sa Mga Maalamong Tawo ang Manluluwas gikan sa panahon sa Iyang paghimugso hangtod nga usa na siya ka gamayng bata (tan-awa sa Mateo 2:1–2).

Basaha ang Mateo 2:9–11 , nga mangita kon unsa ang gibuhat sa Mga Maalamong Tawo sa dihang nakita na nila ang Manluluwas. Mahimo usab nimong tan-awon ang video nga “The Wise Men Seek Jesus” gikan sa code sa oras nga 2:58 hangtod sa 4:37. Makita kini nga video sa ChurchofJesusChrist.org.

5:41

Unsa ang imong makat-onan gikan sa ehemplo sa Mga Maalamong Tawo?
Sa unsang paagi nga ang imong pagpamatuod mahitungod kang Jesukristo nakaimpluwensya sa imong tinguha sa pagsimba Kaniya?
Naghalad ang Mga Maalamong Tawo og mga gasa aron daygon ang batang si Jesus. Unsa ang pipila ka paagi sa imong pagsimba sa Manluluwas?

Imong kaugalingong pagpamatuod

Pamalandongi ang mga hunahuna ug mga pagbati nga imong nadawat gikan sa Espiritu Santo sa panahon niini nga leksiyon. Samtang nagpadayon ka sa pagtuon sa kinabuhi sa Manluluwas sigon sa girekord sa Bag-ong Tugon, paghatag og pagtagad sa kon sa unsang paagi nga ang Espiritu Santo mihatag og pagsaksi mahitungod ni Jesukristo nganha kanimo.

Adunay daghang paagi nga mapaambit sa mga estudyante ang ilang pagpamatuod mahitungod kang Jesukristo. Ang mga estudyante kinahanglang dili mobati nga gipugos sila sa pagpaambit pero kinahanglang mobati nga gidapit sila. Ang mosunod mao ang pipila ka paagi nga makapaambit ang mga estudyante.

Ipaambit ang imong pagsaksi sa Manluluwas nga si Jesukristo o ang unsay imong nahibaloan mahitungod Kaniya. Mahimo nimong ipaambit ang imong pagpamatuod sa Ginoo sa daghang paagi. Pananglitan, mahimo nimong i-post ang imong pagpamatuod ug hulagway sa Manluluwas diha sa social media, ipaambit ang imong pagpamatuod diha sa panagtigom alang sa pagpamatuod, o isulat ang imong pagpamatuod sa usa ka kopya sa Basahon ni Mormon ug ihatag kini sa usa ka higala o sakop sa pamilya.

Komentaryo ug Background nga Impormasyon

Unsa ang pagpamatuod?

Ang pagpamatuod usa ka espirituwal nga pagsaksi nga gihatag sa Espiritu Santo. Ang pundasyon sa pagpamatuod mao ang kahibalo nga ang Langitnong Amahan buhi ug nahigugma sa Iyang mga anak; nga buhi si Jesukristo, nga Siya mao ang Anak sa Dios, ug gibuhat Niya ang walay kinutobang Pag-ula; nga si Joseph Smith mao ang propeta sa Dios nga gitawag aron ipahiuli ang ebanghelyo; nga Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan sa Manluluwas dinhi sa yuta; ug ang Simbahan gipangulohan sa buhi nga propeta karon. Niini nga pundasyon, mousbaw ang pagpamatuod nga naglakip sa tanang baroganan sa ebanghelyo.

(Gospel Topics, “Testimony,” topics.ChurchofJesusChrist.org)

Sa unsang paagi nga makaimpluwensya kanato ang pagpamatuod mahitungod kang Jesukristo?

Si Presidente Henry B. Eyring sa Unang Kapangulohan mipasabot kon sa unsang paagi nga ang Espiritu Santo nagpamatuod mahitungod kang Kristo:

Kini ang Espiritu Santo kinsa mopamatuod nga si Jesukristo mao ang Hinigugmang Anak sa Langitnong Amahan kinsa nahigugma kanato ug buot nga kita makaangkon og kinabuhing dayon uban Kaniya diha sa mga pamilya. Bisan kon kita mao pa lamay pag-angkon og pagpamatuod, kita mobati og tinguha nga moalagad Kaniya ug mohupot sa Iyang mga sugo. Kon kita magpadayon sa pagbuhat niana, atong madawat ang mga gasa sa Espiritu Santo nga mohatag og gah[o]m sa atong pag-alagad. Atong makita ang kamot sa Dios nga mas klaro, klaro kaayo nga moab[o]t ang panahon nga dili lamang kita mahinumdom Kaniya apan kita mahigugma Kaniya ug, pinaagi sa gah[o]m sa Pag-ula, labaw nga mahisama Kaniya.

(Henry B. Eyring, “O Hinumdumi, Hinumdumi,” Liahona, Nob. 2007, 68–69)

2:3

Unsa nga mga gasa ang imong mahalad kang Jesukristo?

Si Presidente Russell M. Nelson mitudlo:

Ang labing mahinungdanong gasa nga imong ikahatag sa Ginoo mao ang paghimo sa imong kaugalingon nga walay buling sa kalibotan, takos nga motambong sa Iyang balaan nga balay. Ang iyang gasa kanimo mao ang kalinaw ug kasigurohan sa pagkasayod nga ikaw takos sa pagsugat Kaniya, kon moabot na ang panahon.

(Russell M. Nelson, “Ang Umaabot sa Simbahan: Pag-andam sa Kalibotan para sa Ikaduhang Pag-anhi sa Manluluwas,” Liahona, Abril 2020, 15)

Si Elder Dieter F. Uchtdorf sa Korum sa Napulog Duha ka Apostoles mitudlo:

Kita, sama sa Mga Maalamong Tawo kaniadto, kinahanglang mangita kang Kristo ug ihalad Kaniya ang pinakabililhong mga gasa: masulob-ong kasingkasing ug mahinulsulon nga espiritu. Kinahanglan kitang maghalad Kaniya sa atong gugma. Kinahanglan natong ihatag Kaniya ang atong pagkaandam nga dad-on ang Iyang ngalan sa atong kaugalingon ug maglakaw sa dalan sa pagkadisipulo. Kinahanglan kitang mosaad nga hinumdoman Siya kanunay, nga sundon ang Iyang ehemplo, ug magbuhat og maayo (tan-awa sa Doktrina ug mga Pakigsaad 20:77, 79 ; Mga Buhat 10:38).Dili nato mahalad Kaniya ang gasa sa pagkahingpit sa tanang butang tungod kay kini usa ka gasa nga dili nato mahatag—sa pagkakaron. Pero gimando Niya nga dalhon nato isip mga gasa ang atong mga pinakamaayong paningkamot nga maglakaw sa mga dalan nga Iyang giandam ug gitudlo.

(Dieter F. Uchtdorf, “Tinuod nga mga Gasa sa Pasko,” New Era, Dis. 2018, 3)

Nganong naghalad man si Maria og mga tokmo o mga salampati sa templo?

Ang balaod ni Moises namahayag nga ang kababayen-an dili angayang moapil sa seremonyas sa pagsimba human makapanganak. Aron malimpyo, ang bag-ong inahan kinahanglang mopresentar og nating karnero diha sa templo para sa halad nga sinunog, ug usa ka salampati o usa ka tokmo para sa halad para sa sala (tan-awa sa Levitico 12:5–6). “Apan kon dili siya makahimo paghatag ug nating karnero, magdala siya ug duha ka buok tukmo o duha ka kuyabog nga salampati” (Levitico 12:8). Kanang pagpresentar ni Maria og mga tukmo o mga salampati imbis nga usa ka nating karnero usa ka ebidensya nga si Jesukristo natawo sa usa ka inahan nga gamay lamang og materyal nga kabtangan.

Dugang nga Kalihokan sa Pagkat-on

Sama sa Mga Maalamong Tawo, mahimo kitang maghalad og mga gasa sa Manluluwas

Pagkahuman sa paghisgot sa Mga Maalamong Tawo, dapita ang mga estudyante nga maghunahuna mahitungod sa mga gasa nga mahimo nilang ihalad sa Manluluwas. Ikonsiderar ang pagpaambit sa mga pamahayag ni Presidente Nelson ug Elder Uchtdorf nga gilakip sa seksiyon nga “Komentaryo ug Background nga Impormasyon” niini nga leksiyon.