Mateo 2:11–23

“Gipahimatngonan sa Dios”

Pagkahuman sa paghatag sa Maalamong mga Tawo sa ilang mga gasa ngadto sa bata nga si Kristo, gipahimatngonan sila sa Ginoo nga dili mobalik kang Haring Herodes. Adunay anghel nga mipakita kang Jose sa damgo ug gisultihan siya nga dalhon ang iyang pamilya sa Ehipto. Kini nga mga pahimatngon nakaluwas sa batan-ong si Jesus gikan sa pagpatay ni Herodes sa tanang bata nga duha ka tuig ang edad ug anaa sa lugar duol sa Betlehem. Pagkahuman sa kamatayon ni Herodes, gimandoan si Jose sa Ginoo nga mobalik sa Israel. Sama sa pagpanalangin sa Ginoo sa Maalamong mga Tawo, kang Jose, ug Maria pinaagi sa pagpadayag, gusto usab ka Niyang panalanginan pinaagi sa pagpadayag. Niini nga leksiyon, mag-ila ka og pipila ka paagi nga mahimong makigsulti kanimo ang Ginoo. Dapiton usab ka nga pangitaon kini nga komunikasyon sa imong kaugalingong kinabuhi.

Pagtabang sa mga estudyante sa pag-ila sa mga baroganan. Ang importanteng kahanas nga angay nga angkonon ug praktison sa mga estudyante atol sa ilang panahon sa seminary mao ang abilidad sa pag-ila sa mga baroganan gikan sa mga kasulatan. Kon ang mga estudyante makahimo sa pag-ila og mga baroganan, madugangan ang ilang abilidad sa pagsabot ug pagkinabuhi sa ebanghelyo.

Pag-andam sa estudyante: Hangyoa ang mga estudyante nga mohatag og pagtagad sa kon giunsa pagpaningkamot sa Ginoo nga makigsulti kanila, lakip na pinaagi sa pagpadayag ug inspirasyon gikan sa Espiritu Santo. Awhaga ang mga estudyante nga hinumdoman kini nga mga komunikasyon.

Posible nga mga Kalihokan sa Pagkat-on

Gipahimatngonan sa Ginoo ang Maalamong mga Tawo ug si Jose

Ikonsiderar ang pagpakita sa mosunod nga mga pangutana. Aron tabangan ang mga estudyante sa pag-ila kon unsa ang ilang nahibaloan ug lagmit nga wala mahibaloi mahitungod sa pagdawat sa pagpadayag, awhaga sila nga tubagan kini nga mga pangutana sa ilang mga journal sa pagtuon.

Paghunahuna og mga paagi nga nakigsulti kanimo ang Langitnong Amahan sa imong kinabuhi, ug tubagi ang mosunod nga mga pangutana.

• Sa imong hunahuna, unsa kamaayo ang imong pag-ila kon nakigsulti ba kanimo ang Langitnong Amahan?

• Unsa ang pipila ka paagi nga ang Dios naghatag kanimo og pagpadayag o giya?

• Sa unsa nga aspeto sa imong kinabuhi nga gibati nimong gikinahanglan nimo pag-ayo ang giya ug pagpanudlo sa Langitnong Amahan?

Ikonsiderar ang paghangyo sa mga estudyante nga magpaambit og mga paagi nga ang Dios nakigsulti kanila o ang pagdapit kanila nga mangutana mahitungod sa pagdawat sa pagpadayag.

Samtang nagtuon ka sa Mateo 2 , makabaton ka og oportunidad nga makakat-on mahitungod sa pagdawat og giya ug pagpanudlo gikan sa Langitnong Amahan.

Sa panahon sa pagkatawo sa Manluluwas, ang tigmando sa Judea nailhan nga si Haring Herodes. Daotan siya nga tawo. Sa dihang iyang nakaila ang Maalamong mga Tawo, gihangyo niya sila nga mobalik ug ipahibalo kaniya kon unsa ang ilang madiskobre mahitungod sa bata nga si Kristo (tan-awa sa Mateo 2:8). Tungod sa kadaotan ni Herodes, gipahimatngonan sa Dios ang Maalamong mga Tawo ug mipadala og anghel aron pasidan-an si Jose sa damgo.

Ang sunod nga bahin sa leksiyon gitumong aron matabangan ang mga estudyante nga makapraktis sa pag-ila sa mga baroganan sa higayon nga magtuon sila sa mga kasulatan.

Samtang nagtuon ka sa mga kasulatan, importante nga ilhon ang mga baroganan. Ang baroganan mao ang malungtaron nga kamatuoran nga makahatag kanimo og panglantaw ug makatabang kanimo sa pagdesisyon. Kasagaran atong maila ang ang mga baroganan pinaagi sa pagtubag sa mga pangutana sama sa mosunod:

• Sa imong hunahuna, unsa ang moral o punto sa sugilanon?

• Sa imong hunahuna, nganong giapil man sa tigsulat kining mga panghitabo o mga tudling sa ilang rekord?

• Unsa nga mga leksiyon ang lagmit nga gitumong sa tigsulat nga atong makat-onan?

Pagpili og usa sa mga pangutana sa ibabaw, ug tubagi kini samtang namalandong ka sa Mateo 2:11–16 .

• Unsa nga baroganan ang imong naila gikan sa Mateo 2:11–16 ?

Kon gikinahanglan, tabangi ang mga estudyante sa pag-ila sa ilang kaugalingong mga baroganan. Ikonsiderar ang pagdapit sa mga estudyante nga isulat sa pisara ang ilang mga baroganan. Dayga ang mga estudyante samtang nag-ila sila og mga baroganan. Ang mga estudyante mahimong moila og baroganan nga pareho sa mosunod: Mapahimatngonan ug maprotektahan kita sa Ginoo batok sa peligro.

• Sa unsang paagi makatabang kanimo ang baroganan nga imong giila sa mga desisyon sa imong kinabuhi?

Pahimatngonan kita sa Ginoo

Gikan sa Mateo 2:11–16 , lagmit nga nag-ila ka og baroganan mahitungod sa pagdawat og mga pasidaan gikan sa Ginoo. Si Presidente Boyd K. Packer (1924–2015) sa Korum sa Napulog Duha ka Apostoles naghatag og saad mahitungod sa mga pahimatngon pinaagi sa Espiritu Santo.

Wala paab[o]ta nga moagi mo niining kinabuhia nga dili masayop, apan dili mo makahimo og dagkong sayop nga wala mapasidan-i daan pinaagi sa mga aghat sa Balaang Espiritu. Kini nga saad magamit sa tanang mga miyembro sa Simbahan.

(Boyd K. Packer, “Tambag ngadto sa mga Kabatan-onan,” Liahona, Nob. 2011, 18)

• Unsay masulti nato mahitungod sa kinaiyahan ug pamatasan sa Langitnong Amahan sa Iyang tinguha nga mopahimatngon kanato pinaagi sa Espiritu?

• Sa unsang paagi nga mahimong makatabang kaninyo karon ug sa umaabot ang pagpangita ug pagsanong sa mga aghat ug mga pahimatngon sa Espiritu?

Ang pagbalik ni Jose, Maria, ug Jesus gikan sa Ehipto

Ikonsiderar ang magamit nga oras sa klase ug mga panginahanglan sa mga estudyante, ug ipahiangay ang sunod nga bahin sa leksiyon sigon niini. Pananglitan, mahimong basahon sa mga estudyante ang Mateo 2:19–23 ug ilhon ang ilang kaugalingong baroganan, mahimo nilang iminubo ang mga bersikulo, o mahimo nilang hisgotan ang mga paagi nga mahimong makigsulti kanato ang Ginoo.

Sa Mateo 2:19–23 , mabasa nato nga sa dihang namatay si Herodes, naghatag ang Ginoo og laing mensahe kang Jose samtang siya, si Maria, ug Jesus anaa sa Ehipto. Gikan niini nga komunikasyon kang Jose, nakat-onan nato nga kon andam kitang maminaw ug mosunod, makadawat kita og pagpadayag ug giya.

Basaha ang Mateo 2:19–23 , ug pangita og mga detalye nga nagtudlo niini nga baroganan.

Samtang nagpaambit ang mga estudyante sa ilang nakit-an, tabangi sila sa pagsabot sa pipila sa mga paagi nga mahimong makigsulti kanato ang Espiritu Santo. Ikonsiderar ang paggamit sa pipila sa materyal sa mga seksiyon nga “Komentaryo ug Background nga Impormasyon” ug “Dugang nga mga Kalihokan sa Pagkat-on”.

Lagmit nga makabenepisyo ang mga estudyante gikan sa pagtan-aw sa video nga “Receiving Revelation” (4:17), nga nangita og mga paagi nga mahimong makigsulti kanato ang Espiritu Santo. Makita kini nga video sa ChurchofJesusChrist.org.

Sa Mateo 2 , nakigsulti ang Dios sa Maalamong mga Tawo ug kang Jose pinaagi sa mga damgo ug pinaagi sa mga pagbisita gikan sa mga anghel. Makigsulti usab ang Amahan sa Langit sa Iyang mga anak sa daghan pang paagi, lakip na pinaagi sa inspirasyon ug pagpadayag gikan sa Espiritu Santo. Samtang nagtuon ka sa ebanghelyo diha sa panimalay ug sa seminary, paghatag og pagtagad sa kon unsa ang imong nakat-onan gikan sa mga kasulatan ug kon unsa ang gitudlo kanimo sa Langitnong Amahan pinaagi sa Espiritu Santo. Mapausbaw ang imong pagtuon sa ebanghelyo ug mahimong mas personal samtang maminaw ka kon unsa ang gitudlo kanimo sa Dios pinaagi sa Iyang Espiritu.

Posible nga mga pangutana sa panaghisgotan

• Unsa ang pipila ka paagi nga nakigsulti kanimo ang Ginoo?

• Unsa nga mga kasinatian ang imong nasinati diin gipahimatngonan o gigiyahan ka sa Espiritu Santo? Sa unsang paagi nga nakaapekto sa imong kinabuhi kini nga mga kasinatian?

• Kon makadungog ka sa tingog sa Manluluwas nga nakig-istorya kanimo pinaagi sa Espiritu Santo samtang nagtuon ka, unsa ang epekto niini sa imong kasinatian sa seminary?

• Sa imong pamati, unsa ang imong mabuhat aron mahimong mas madawaton sa giya ug pagpadayag sa Espiritu Santo nga gustong ihatag kanimo sa Langitnong Amahan ug ni Jesukristo?

Ikonsiderar ang pagpaambit og personal nga kasinatian ug pagdapit sa mga estudyante nga mangita og mga paagi nga makigsulti kanila ang Langitnong Amahan sa ilang mga pang-adlaw-adlaw nga kinabuhi.

Komentaryo ug Background nga Impormasyon

Sa unsa nga paagi nga makatabang ang Espiritu Santo kanako?

Si Presidente Henry B. Eyring sa Unang Kapangulohan mitudlo:

Ang pagpakig-uban sa Espiritu Santo makapahimo sa maayo nga mas madanihon ug makapaminos sa kusog nga tintasyon. Kini igo na nga rason aron maningkamot kita nga mahimong takos aron ang Espiritu magauban kanato sa kanunay.

(Henry B. Eyring, “Ang Espiritu Santo isip Inyong Kauban,” Liahona, Nob. 2015, 104)

Elder Ronald A. Rasband sa Korum sa Napulog Duha ka Apostoles:

Ang atong Amahan sa Langit nasayod nga sa pagka-mortal magsagubang kita og mga pagsulay, kalisdanan, ug kasamok; nasayod Siya nga manlimbasog kita sa mga pangutana, mga kasagmuyo, mga pagtintal, ug mga kahuyang. Aron mahatagan kita og kalig-on ug balaanong giya, gihatagan kita Niya sa Balaang Espiritu, lain nga pangalan alang sa Espiritu Santo.

(Ronald A. Rasband, “Tuguti ang Balaang Espiritu nga Mao ang Mogiya,” Liahona, Mayo 2017, 93)

Unsaon nako sa pagkahibalo kon nakigsulti kanako ang Ginoo?

Aron makadungog og mga ehemplo sa kon sa unsang paagi nga nakadawat og pagpadayag ang lainlaing mga indibidwal, tan-awa ang video nga “Receiving Revelation” (4:17), nga anaa sa ChurchofJesusChrist.org.

Kon gusto nimong makahibalo pa og dugang mahitungod sa mga paagi nga makasulti kanato ang Espiritu Santo, ikonsiderar ang pagbasa sa artikulo nga “Eight Ways God Can Speak to You” ni Presidente Dallin H. Oaks sa Unang Kapangulohan (New Era, Sept. 2004, 4–8).

Nganong gipatay man ni Herodes ang inosenteng mga bata?

Si Haring Herodes, nga “nahasol” sa balita nga adunay natawo nga laing “Hari sa mga Judeo” ( Mateo 2:2–3), gustong patyon si Jesus aron maprotektahan ang iyang kaugalingong trono. Nasayod nga natawo si Jesus sa Betlehem sa milabay nga duha ka tuig, gimandoan ni Herodes nga patyon ang tanang bata nga anaa didto nga ubos sa duha ka tuig (tan-awa sa Mateo 2:4, 7, 12–16). Ilado si Herodes nga salbahis batok sa mga gidudahang hulga, bisan gani ang iyang asawa ug tulo sa iyang mga anak nga lalaki iyang gipapatay (tan-awa sa Bible Dictionary, “Herod”).

Dugang nga mga Kalihokan sa Pagkat-on

Mga paagi nga mahimong makigsulti kanato ang Espiritu Santo

Ikonsiderar ang paggamit sa mosunod nga mga kasulatan aron matabangan ang mga estudyante sa pag-ila og pipila ka paagi nga mahimong makigsulti kanato ang Ginoo.

1 Mga Hari 19:12 ; Juan 14:26 ; 2 Nephi 32:3 ; Moroni 8:26 ; Doktrina ug mga Pakigsaad 6:23 ; Doktrina ug mga Pakigsaad 8:2–3 .

Ang Ginoo mahimong makigsulti kanato diha sa seminary

Lagmit nga makabenepisyo ang mga estudyante gikan sa paghunahuna ug paghisgot sa mga pangutana sama sa “Unsa ang imong nadungog pinaagi sa Espiritu nga wala gisulti sa klase?” o “Unsaon nimo pagdapit ang Ginoo nga tudloan ka samtang nagtuon ka sa seminary?” Awhaga ang mga estudyante nga irekord ang giya ug pagpadayag nga ilang nadawat gikan sa Ginoo diha sa seminary. Kon gikinahanglan, tan-awa sa leksiyon nga “Pagkat-on pinaagi sa Espiritu.”

Mga pananglitan mahitungod sa pahimangno sa Espiritu

Kon makabenepisyo ang mga estudyante gikan sa pagpaminaw sa mga ehemplo sa mga indibidwal nga gipahimangnoan sa Espiritu, ikonsiderar ang pagpamalandong sa usa o duha sa mosunod nga mga kasinatian:

Si Presidente Wilford Woodruff gipasidan-an nga ibalhin ang iyang karwahe (tan-awa sa Mga Pagtulun-an sa mga Presidente sa Simbahan: Wilford Woodruff [2004], 52).

Si Elder Kenneth Johnson sa Seventy gipasidan-an sa batan-on pa siya (tan-awa sa “Yielding to the Enticings of the Holy Spirit,” Ensign o Liahona, Nob. 2002, 89–91).