Doktrinal nga Kahanas: Lucas 22:19–20
“Buhata Ninyo Kini aron Paghandom Kanako”
Sa inyong pagtuon sa Mateo 26:26–30, inyong nakat-onan ang mahitungod sa pagpaila sa Manluluwas sa ordinansa sa sakramento ngadto sa Iyang mga disipulo diha sa Kataposang Panihapon. Kini nga leksiyon makahatag kaninyo og kahigayonan sa pagdugang sa inyong kahanas sa doktrina bahin sa sakramento. Mahimo ninyo kini pinaagi sa pagsag-ulo sa pakisayran ug mahinungdanon nga hugpong sa kasulatan alang sa tudling sa doktrinal nga kahanas sa Lucas 22:19–20, pinaagi sa pagpasabot sa doktrina, ug pinaagi sa paggamit sa mga baroganan sa pag-angkon og espirituhanong kahibalo.
Pagtabang sa mga estudyante nga makarebyo sa mga baroganan sa pag-angkon og espirituhanong kahibalo. Paghatag og regular nga mga kahigayonan alang sa mga estudyante nga makarebyo sa mga baroganan sa pag-angkon og espirituhanong kahibalo; sa paglihok inubanan sa hugot nga pagtuo, pagsusi sa mga konsepto ug mga pangutana inubanan sa mahangtoron nga panglantaw, ug sa pagtinguha og dugang pang pagsabot pinaagi sa balaanong gitudlo nga mga tinubdan (Mahinungdanon nga Dokumento sa Doktrinal nga Kahanas [2022], “Pag-angkon og Espirituhanong Kahibalo”). Ang mga estudyante magbansay sa paggamit niini nga mga baroganan gamit ang matag pangbansay nga kalihokan. Rebyoha ang mga baroganan saigo nga paagi aron ang mga estudyante makahinumdom ug makagamit niini sa ilang mga kinabuhi.
Pagpangandam sa estudyante: Dapita ang mga estudyante sa paghunahuna kon unsay makatabang nila sa paghinumdom sa Manluluwas samtang moambit sila sa sakramento ug aron maandam sa paggamit o pagpaambit niini nga kasinatian dinhi niini nga leksiyon.
Posible nga mga Kalihokan sa Pagkat-on
Imemorya ug ipasabot
Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “Mateo 26:26–30; Lucas 22:19–20,” nga mao ang pangkonteksto nga leksiyon alang sa tudling sa doktrinal nga kahanas sa Lucas 22:19–20 . Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, siguroha nga matudlo usab ang tukma nga pangkonteksto nga leksiyon nianang semanaha.
Ikonsiderar ang pagdapit sa mga estudyante nga idrama-drama ang mosunod nga sitwasyon uban sa kapares, o pagdapit og duha ka estudyante nga ipakita ang maong senaryo alang sa tibuok klase.
Handurawa ang pagdala og higala ngadto sa simbahan kinsa walay kabangkaagan mahitungod sa naorganisar nga relihiyon o kang Jesukristo. Human sa miting sa sakramento, siya nangutana, “Unsa man ang katuyoan sa pagpasa sa pan ug tubig ngadto sa tanan?”
-
Unsaon ninyo pagpasabot ang ordinansa sa sakramento ngadto sa usa ka higala?
Hatagi ang mga estudyante og kahigayonan aron mosag-ulo sa pakisayran alang sa tudling sa kasulatan sa doktrinal nga kahanas sa Lucas 22:19–20 ug sa kauban niini nga mahinungdanon nga hugpong sa kasulatan. Ang mosunod nga kalihokan usa ka paagi aron mabuhat kini. Ikonsiderar ang pagpahiangay niini nga kalihokan pinaagi sa pagtugot sa mga estudyante nga mohimo niini uban sa kapares o gagmay nga mga grupo o pinaagi sa pagpaapil sa tibuok klase ug pagsulat sa pakisayran sa kasulatan ug sa mahinungdanon nga mga pulong ngadto sa pisara.
Diha sa inyong journal sa pagtuon, gamita ang lapis aron pagsulat sa mosunod nga pakisayran sa kasulatan ug sa mahinungdanon nga hugpong sa kasulatan: “ Lucas 22:19–20 : Si Jesukristo nagsugo, ambit kamo sa sakramento ‘alang sa paghinumdom kanako.’”
Sublia sa kusog nga tingog kini nga pakisayran sa kasulatan ug ang mahinungdanon nga hugpong sa kasulatan. Dayon papasa ang duha ka pulong o mga numero, ug bansaya ang pagsulti og balik sa pakisayran sa kasulatan ug hugpong sa pulong. Sublia kini nga paagi, nga mopapas sa mga pulong o mga numero ug pag-recite sa pakisayran sa kasulatan ug sa mahinungdanon nga hugpong sa pulong, hangtod ang tanang mga pulong ug mga numero napapas na. Dayon pagsulat og daghan kutob sa mahimo niini nga pakisayran sa kasulatan ug sa mahinungdanong mga pulong kutob sa inyong mahinumdoman.
Ipraktis ang paggamit
Kon gikinahanglan, tabangi ang mga estudyante nga makarebyo sa mga baroganan sa pag-angkon og espirituhanon nga kahibalo. Usa ka paagi sa pagbuhat niini mao ang pagpakompleto sa mga estudyante sa mosunod nga kalihokan. Kini nga pagrebyo kinahanglang humanon nga dili molapas sa tulo hangtod sa lima ka minutos.
Irebyo sa daklit ang mga baroganan sa pag-angkon og espirituhanong kahibalo (tan-awa sa Mahinungdanon nga Dokumento sa Doktrinal nga Kahanas [2022], “Pag-angkon og Espirituhanong Kahibalo”). Pagpili og usa sa tulo ka baroganan sa pag-angkon og espirituhanong kahibalo ug pagdrowing og yanong simbolo o hulagway nga gibati ninyong makarepresentar niini.
Karon ipraktis ang paggamit sa mga baroganan sa pag-angkon og espirituhanong kahibalo ug ang doktrina nga gitudlo sa Lucas 22:19–20 pinaagi sa pagbasa sa mosunod nga senaryo ug pagtubag sa mga pangutana nga nagsunod.
Ang mosunod nga senaryo gituyo aron sa pagtabang sa mga estudyante aron makapadayon nga lapas pa sa pagkuha lamang og lista sa mga butang nga buhaton panahon sa sakramento ug aron makahunahuna pa og mas lawom mahitungod sa paghimo sa sakramento isip usa ka makahuloganong kasinatian.
Ikonsiderar ang pagpahiangay sa senaryo aron mahimo kining labing mahinungdanon alang sa mga estudyante.
Si Judy nga 15 anyos, namiyembro sa Simbahan sa tibuok niyang kinabuhi, ug kanunayng mitambong sa iyang mga miting sa simbahan. Nagpuyo siya kauban sa iyang inahan ug apohan nga babaye, kinsa mga maayo kaayong mga ehemplo kaniya. Niadtong milabay nga Dominggo, si Judy nainteresado sa mga hilisgotan sa mga mamumulong [speakers] sa miting sa sakramento. Ang matag mamumulong mipaambit og impluwensiyal ug sinserong personal nga mga kasinatian mahitungod sa pag-ambit sa sakramento ug giunsa niini pagtabang nga madugangan ang impluwensiya sa Manluluwas diha sa ilang kinabuhi. Kini nakapahunahuna niya mahitungod niya nga walay daghang susama nga mga kasinatian nga iyang kaugalingon. Iyang naamgohan nga panahon sa sakramento siya kanunay nga malinga sa iyang selfon o sa unsay ginabuhat sa uban, o naghunahuna siya mahitungod kon unsaon niya nga makauli dayon aron makatagpilaw.
-
Mibati ba kamo og sama niini sukad?
-
Ngano kaha nga ingon man niini ang bation sa mga tawo usahay?
Hatagi ang mga estudyante og kahigayonan nga ipraktis gamit ang mga baroganan sa pag-angkon og espirituhanong kahibalo aron matabangan si Judy sa maong sitwasyon. Ang mosunod mao ang usa ka paagi aron mabuhat kini.
Kon ang mga estudyante nanginahanlan pa og tabang sa paggamit sa mga baroganan sa pag-angkon og espirituhanong kahibalo niini nga sitwasyon, ikonsiderar nga gamiton ang mga pangutana nga nalista ubos sa mga gipabaga nga letra diha sa mga ulohan [heading]aron mapangunahan ang panaghisgot.
Diha sa inyong journal sa pagtuon, paghimo og usa ka ulohan alang sa matag tulo ka baroganan sa pag-angkon og espirituhanong kahibalo: (1) lihokon inubanan sa hugot nga pagtuo, (2) susihon ang mga konsepto ug mga pangutana inubanan sa mahangtorong panglantaw, ug (3) tinguhaon ang dugang panabot pinaagi sa balaanong gitudlo nga mga tinubdan.
Ubos sa matag ulohan, isulat ang pihong mga paagi diin ang baroganan sa pag-angkon og espirituhanong kahibalo makatabang ni Judy sa iyang sitwasyon. Pananglitan, mahimo kang mosugyot og pihong mga paagi nga siya makalihok inubanan sa hugot nga pagtuo, mopaambit sa unsang paagi nga ang pagbaton og mahangtoron nga panglantaw makatabang sa iyang sitwasyon, ug pagsugyot og pipila ka balaanong gitudlo nga mga tinubdan nga tingali iyang magamit isip giya ug direksiyon.
-
Unsa ang inyong itambag ni Judy aron masugdan ang pagsulbad sa iyang mga kabalaka?
-
Unsaon ninyo sa paggamit ang matag usa sa tulo ka baroganan sa pag-angkon og espirituhanong kahibalo aron matabangan si Judy?
Tabangi ang mga estudyante sa paghunahuna og mga paagi nga makonektar ug makahinumdom ni Jesukristo panahon sa ordinansa sa sakramento. Kon makatubag na ang mga estudyante, ikonsiderar nga ipangutana ang mosunod: Sa unsang paagi kini makatabang ninyo nga mahinumdom sa Manluluwas? Unsaon ninyo nga makonektar ug mahinumdom sa Manluluwas imbis mobuhat ra sa mga butang nga wala hunahunaa?
Molihok inubanan sa hugot nga pagtuo
-
Unsa nga tambag ang inyong ihatag kang Judy nga makatabang niya aron makaangkon og mas maayong kasinatian sa pag-ambit sa sakramento?
-
Unsa kaha ang makababag sa iyang pagbuhat niining mga kausaban? Unsaon kaha niya pagbuntog kini nga mga babag?
Susiha ang mga konsepto ug mga pangutana inubanan sa mahangtorong panglantaw
-
Unsa nga mga pangutana ang inyong ikapangutana ni Judy aron matabangan siya nga makita ang iyang sitwasyon uban sa mahangtorong panglantaw? Nganong gipili ninyo kana nga mga pangutana?
Tinguhaa ang dugang nga panabot pinaagi sa balaanong gitudlo nga mga tinubdan
Rebyo
Ang mosunod nga rebyo nga kalihokan kinahanglan nga gamiton sa usa ka leksiyon nga itudlo sa umaabot.
Hatagi ang matag estudyante og gamay nga kard o sticky note. Dapita sila sa pagsulat sa “ Lucas 22:19–20 : Si Jesukristo misugo, moambit kamo sa sakramento ‘aron paghandom kanako’” ngadto sa ilang gagmay nga kard o mga sticky note ug dayon papason ang pipila ka pulong ug mga numero gikan niini nga pakisayran sa kasulatan ug ang nag-una nga hugpong sa pulong. Dapita ang mga estudyante nga magbinayloay sa ilang mga kard o mugbo nga pahinumdom aron makita kon mahulipan ba nila ang nawala nga mga pulong o mga numero. Dayon dapita ang mga estudyante nga sulayan ang pag-recite sa pakisayran ug hugpong sa pulong gikan sa ilang panumdoman.
Dugang nga Kalihokan sa Pagkat-on
Ikapuli nga senaryo
Aron matabangan ang mga estudyante nga makasabot sa pinakamahinungdanon nga tahas sa sakramento diha sa pagtambong sa simbahan, ikonsiderar ang paggamit sa mosunod nga mga senaryo:
Si Eldon bag-o lang nadawat sa trabaho diin siya gikinahanglan nga motrabaho kada Dominggo. Wala siya maghunahuna nga dakong butang ang dili niya pagsimba og usa o duha ka Dominggo kada bulan. Apan karon nakaamgo si Eldon nga bisan sa mga Dominggo nga wala siyay trabaho, dili na siya mobati og bisan unsang kadasig nga motambong. Bation na siya og kalaay sa simbahan ug dili niya masabtan o makonektar ang iyang kaugalingon kang bisan kinsa nga tua didto.
Human mapaambit ang maong senaryo, hisgoti kon sa unsang paagi ang mga baroganan sa pag-angkon og espirituhanong kahibalo makatabang sa sitwasyon ni Eldon. Isip kabahin sa inyong panaghisgot, dapita ang mga estudyante sa paghunahuna mahitungod sa mga panalangin nga malagmit wala kang Eldon gumikan sa iyang dili regular nga pag-ambit sa sakramento.