Mateo 26; Marcos 14; Juan 13
Kinatibuk-ang Pagpasabot
Sa panahon sa Pagsaylo [Passover], si Jesus nagtudlo sa Iyang mga disipulo mahitungod sa pag-alagad ug paghigugma sa usag usa. Gipahibalo Niya nga Siya pagabudhian. Gipasiugdahan Niya ang ordinansa sa sakramento isip bag-ong paagi alang sa Iyang mga disipulo sa paghinumdom Kaniya. Karong semanaha gilakip ang usa ka leksiyon sa doktrinal nga kahanas aron matabangan ang mga estudyante nga mapalambo ang ilang kahanas sa doktrina mahitungod sa sakramento, ingon man usab sa leksiyon nga makatabang nila sa pagtimbang-timbang sa ilang pagkat-on ug paglambo.
Pangandam sa Pagtudlo
Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.
Juan 13
Katuyoan sa leksiyon: Kini nga leksiyon makadasig sa mga estudyante sa pagpangita og kalipay pinaagi sa pag-alagad ug paghigugma sa uban sama sa gibuhat ni Jesus.
-
Pagpangandam sa estudyante: Dapita ang mga estudyante sa pagpangita og kahigayonan nga makaalagad o makapakita og susamang gugma ni Kristo ngadto sa uban.
-
Sugyot alang sa video conference nga pagtudlo: Agi ug dugang sa pagdapit sa mga estudyante nga mohimo og indibidwal nga plano alang sa pagpakita og mas labaw nga gugma ngadto sa uban, ikonsiderar ang paghimo og plano sa tibuok klase nga magdungan sa pagbuhat og butang nga maayo ngadto sa laing tawo.
Mateo 26:1–25
Katuyoan sa leksiyon: Kini nga leksiyon makatabang sa mga estudyante nga makagamit sa mga pulong sa Manluluwas diha sa kasulatan aron pagsusi sa ilang kinabuhi ug pagtino og mga dapit nga kinahanglan nilang palamboon.
-
Pagpangandam sa estudyante: Dapita ang mga estudyante sa paghunahuna og panahon diin sila migamit sa tambag o mga pagtulon-an gikan sa mga kasulatan, mga lider sa Simbahan, o sa Espiritu Santo sa ilang kinabuhi. Unsa kaha ang kalainan sa ilang kinabuhi kon wala sila mopili sa paggamit sa maong tambag?
Mateo 26:26–30; Lucas 22:19–20
Katuyoan sa leksiyon: Kini nga leksiyon makatabang sa mga estudyante ug makabatyag sa importansiya sa paghinumdom sa Manluluwas samtang sila moambit sa sakramento.
-
Pagpangandam sa estudyante: Pahibaloa ang mga estudyante nga sa niini nga leksiyon pagaawhagon sila sa pagtimbang-timbang sa ilang mga kasinatian diha sa pag-ambit sa sakramento. Dapita ang mga estudyante sa paghunahuna sa ilang labing bag-ong kasinatian sa pag-ambit sa sakramento ug pag-adto nga andam nga mopaambit sa unsay ilang gibuhat, gihunahuna, o gibati nga nakatabang nila sa paghinumdom sa Manluluwas.
-
Video: “Ang Sakrament—Pagbag-o alang sa Kalag” (10:38; tan-awa gikan sa time code 9:25 hangtod 9:57)
-
Sugyot alang sa video conference nga pagtudlo: Ikonsiderar asa nga mga kapanguhaan ang inyong ipatan-aw sa mga estudyante samtang mangandam sila sa pagtuon sa doktrina sa sakramento. Magsabot-sabot og paagi alang sa mga estudyante nga makapaambit sa ilang mga outline sa leksiyon mahitungod sa sakramento pinaagi sa paresan o gagmay nga mga grupo.
Doktrinal nga Kahanas: Lucas 22:19–20
Katuyoan sa leksiyon: Kini nga leksiyon maghatag sa mga estudyante og oportunidad aron mapalambo ang ilang kahanas bahin sa doktrina sa sakramento pinaagi sa pagmemorya sa pakisayran ug sa mahinungdanong hugpong sa pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo.
-
Pagpangandam sa estudyante: Dapita ang mga estudyante sa paghunahuna unsa ang makatabang nila sa paghinumdom sa Manluluwas samtang mag-ambit sila sa sakramento ug sa pag-andam sa paggamit o pagpaambit niini nga kasinatian dinhi niini nga leksiyon.
Susiha ang Inyong Nakat-onan 5
Katuyoan sa leksiyon: Kini nga leksiyon gituyo aron matabangan ang mga estudyante nga matimbang-timbang ang mga tumong nga ilang gitakda ug ang personal nga paglambo nga ilang nasinati gikan sa ilang pagtuon sa Bag-ong Tugon.
-
Pagpangandam sa estudyante: Dapita ang mga estudyante nga pamalandongan ang miaging daghan nga leksiyon ug ilang mga kasinatian isip resulta sa maong mga leksiyon.
-
Mga Hulagway: Mga hulagway nga makatabang sa mga estudyante nga mahinumdom sa pipila ka nag-unang hitabo ug mga pagtulon-an nga ilang natun-an panahon sa milabay nga tulo ka semana
-
Sugyot alang sa videoconference nga pagtudlo: Samtang magpaambit ang mga estudyante sa ilang mga pagpasabot mahitungod sa Ikaduhang Pag-anhi ni Jesukristo, ikonsiderar ang pagdapit sa mga estudyante kinsa pinakabag-ong mipaambit nga mopili og lain pang sakop sa klase nga maoy mosunod. Ang maong estudyante mahimo dayon nga dapiton nga magdugang og labing menos usa ka detalye nga wala malakip sa miagi ug dayon mopili og lahi na sab nga estudyante nga mopaambit. Kini nga proseso mahimong balik-balikon hangtod ang tibuok klase wala nay mahunahunaan pang mga detalye nga gusto nilang ipasabot.