Mateo 26:1–25

“Ginoo, Ako Ba Ang Imong Gipasabot?”

Jesus giving the sop to Judas Iscariot. Outtakes include just Jesus, all the disciples seated, Jesus passing the cup of wine, Jesus holding the bread, a servant woman bring a jar, Judas Iscariot eating the sop, Jesus taking a piece of bread wrapped in cloth, and Jesus raising a glass of wine.

Sa wala pa ang kasaulogan sa Pagsaylo [Passover], gidihogan ni Maria ang Manluluwas og mahalon nga pahumot, ug si Judas nakigkunsabo sa pangulong mga pari ug mga eskriba aron patyon si Jesus. Panahon sa pagkaon sa Pagsaylo, gipahibalo ni Jesus nga Siya pagabudhian. Ang Apostoles nangutana kinsa ang mobudhi sa Manluluwas pinaagi sa pagpangutana og, “Ginoo, ako ba ang imong gipasabot?” Kini nga leksiyon makatabang ninyo sa paggamit sa mga pulong sa Manluluwas diha sa mga kasulatan aron masusi ang inyong kinabuhi og matino ang mga dapit diin kamo kinahanglan nga molambo.

Pagpangandam inubanan sa paghunahuna sa mga estudyante. Samtang mangandam sa pagtudlo, hunahunaa kon unsay angay nga makab-ot sa mga estudyante isip resulta sa leksiyon. Si Presidente Thomas S. Monson (1927–2018) miingon: “Ang katuyoan sa pagtudlo sa ebanghelyo … dili ang ‘pagbu-bu og impormasyon’ ngadto sa hunahuna sa mga sakop sa klase. … [Kini mao ang pagtabang kanila sa] pagpalambo og hugot nga pagtuo diha ni Ginoong Jesukristo ug … makabig ngadto sa Iyang ebanghelyo ” (“Pagtuon Kamo Gikan Kanako,” Liahona, Mar. 2016, 4). Tinguhaa ang inspirasyon aron mahibaloan unsaon pagtabang ang mga estudyante nga molambo ang ilang hugot nga pagtuo ug mobati og mas labaw nga gugma alang ug gikan ni Jesukristo sa matag leksiyon.

Pagpangandam sa estudyante: Dapita ang mga estudyante sa paghunahuna og panahon diin ilang gigamit ang tambag o mga pagtulon-an gikan sa mga kasulatan, mga lider sa Simbahan, o sa Espiritu Santo diha sa ilang kinabuhi. Unsa kaha ang kalainan sa ilang kinabuhi kon wala sila mopili sa paggamit sa maong tambag?

Posible nga mga Kalihokan sa Pagkat-on

Giunsa nato pagtagad ang butang nga atong gipakabili

Ikonsiderar ang pagpaambit og personal nga sanglitanan isip kabahin sa mosunod nga panaghisgot.

Paghunahuna og usa ka tawo nga importante kaayo nganha kaninyo.

Nganong kini nga tawo importante man kaayo kaninyo?
Sa unsang paagi ang inyong mga buhat nagpakita kon unsa kaimportante kining tawhana diha kaninyo?

Dinhi niini nga bahin sa leksiyon, inyong tun-an kon sa unsang paagi ang ubang mga indibidwal mipakita pinaagi sa ilang mga buhat unsa kadako ang ilang paghigugma ug pagmanggad sa Manluluwas. Sa inyong pagtuon, tan-awa unsa ka importante, gani kamahinungdanon, ang Manluluwas diha kaninyo ug kon unsay inyong mahimo aron mapakita ang inyong paghigugma Kaniya.Pipila ka adlaw sa wala pa mapundok ni Jesus ang Iyang Apostoles alang sa Iyang kataposang pagkaon sa Pagsaylo, Siya miadto sa Betania aron makig-uban sa Iyang mga tinun-an (tan-awa sa Mateo 26:6 ; Juan 12:1).

Basaha ang Juan 12:3–8 aron makat-on mahitungod sa unsay gibuhat ni Maria alang sa Manluluwas samtang didto Siya sa Betania.

Unsa ang gipasabot sa mga buhat ni Maria mahitungod sa kon giunsa niya sa paghigugma ug pagmanggad ang Manluluwas?
Unsay inyong makat-onan mahitungod sa Manluluwas gikan niini nga asoy?

Ang mga estudyante mahimong mohatag og lainlaing mga tubag sa miaging pangutana, lakip sa mosunod: Siya giisip nga bililhon sa Iyang mga tinun-an; Siya nakasabot nga ang Iyang mortal nga kinabuhi hapit na matapos; Siya mitagad ni Judas uban sa gugma ug kamabination, bisan tuod og Siya nahibalo nga si Judas mobudhi Kaniya.

Unsa nga mga hunahuna o mga pagbati ang anaa ninyo human mamalandong niini nga mga kamatuoran mahitungod sa Manluluwas?

Sa Mateo 26:3–5 , atong nakat-onan nga ang mga pangulong pari nakigkonsulta sa usag usa mahitungod sa kon unsaon nila pagpatay si Jesus. Basaha ang Mateo 26:14–16 , nga mangita kon unsay nahitabo human gidihogan ni Maria si Jesus didto sa Betania.

Tingali kini makapainteresado nga mahibaw-an nga ang pagbudhi ni Judas kang Jesus alang sa napulog tulo ka pilak nagtuman sa panagna sa propeta sa Daang Tugon nga si Zacarias (tan-awa sa Zacarias 11:12). Usab, sumala sa balaod ni Moises, ang napulog tulo ka piraso nga pilak maoy balor nga gigamit aron ibayad sa usa ka agalon alang sa kamatayon sa usa ka ulipon (tan-awa sa Exodo 21:32 ).

Unsa ang inyong nakat-onan gikan sa pagtandi sa mga gibuhat ni Maria ngadto sa mga gibuhat ni Judas?

Ang mosunod nga mga pangutana mas labing maayo nga tubagon sa indibidwal nga paagi sa mga estuydante diha sa ilang journal sa pagtuon.

Gahini og higayon ang pagrebyo sa inyong semana.

Unsa nga mga kahigayonan ang anaa ninyo aron mapakita ang inyong paghigugma alang sa Manluluwas?
Aduna bay mga higayon diin nangandoy kamo nga unta mas maayo ang inyong nabuhat?
Unsa kaha ang lahi ninyong mabuhat sa umaabot aron mas hingpit nga makapakita sa inyong gugma alang Kaniya?

Pagkonsiderar kon sa unsang paagi ang mga pulong ni Jesus magamit ngari kanato

Si Jesus misalmot sa pagkaon sa Pagsaylo, nga nailhan usab nga Kataposang Panihapon, kauban sa Iyang Apostoles pipila ka adlaw human Siya gidihogan ni Maria. Basaha ang Mateo 26:20–21 , nga mangita sa pahibalo nga gihimo sa Manluluwas atol niini nga pagpangaon.

Kon usa pa kamo sa Apostoles, unsa kaha ang inyong mahunahuna atol niini nga higayon?

Basaha ang Mateo 26:22 aron makita kon sa unsang paagi misanong ang Apostoles.

Si Presidente Dieter F. Uchtdorf, kanhi sakop sa Unang Kapangulohan, mipaambit og usa sa mga leksiyon nga atong makat-onan gikan sa tubag sa Apostoles.

18:18

Ang mga disipulo wala magduda sa katinuod sa unsay gisulti [ni Jesus]. Ni sila milingi sa palibot, mitudlo ngadto sa lain, ug nangutana, “Siya ba?”

“Hinoon, ‘nangaguol pag-ayo ang mga [disipulo] ug ang tagsatagsa kanila nangutana kaniya, Ginoo ako ba ang imong gipasabot?” [ Mateo 26:22 ].

Naghunahuna ko kon unsa kahay buhaton sa matag usa kanato. … Motan-aw kaha kita sa naglib[o]t kanato ug moingon sa atong mga kasingkasing, “Si Brother Johnson siguro iyang gipasab[o]t. Dugay na kong nagduda niya”, o “Maayo kay naa dinhi si Brother Brown. Kinahanglan gay[o]d siya nga makadungog niini nga mensahe”? O kita kaha, sama niadtong mga disipulo sa karaan, motan-aw sa kaugalingon ug mangutana nga matugkaron: “Ako ba?”

Niining yano nga mga pulong, “Ako ba, Ginoo?” anaa ang sinugdanan sa kaalam ug ang dalan sa personal nga pagkakabig ug malungtarong kausaban.

(Dieter F. Uchtdorf, “Ako ba, Ginoo?,” Liahona, Nob. 2014, 56)

Usa ka kamatuoran nga atong makat-onan gikan niini nga pamahayag ug sa sanglitanan sa Apostoles mao nga ang pagkat-on sa pagsusi sa atong kinabuhi pinasubay sa mga pulong sa Manluluwas makatabang nato nga mahisubay sa agianan paingon sa personal nga pagkakabig ug walay kinutobang pagkausab.

Nganong importante man kanato ang pagpangutana sa atong kaugalingon kon sa unsang paagi nato gigamit ang mga pulong sa Ginoo imbes nga maghunahuna nga ang Iyang mga pulong gituyo para sa uban?
Unsa ang pipila ka sitwasyon sa inyong kinabuhi diin kamo makapangutana , “Ginoo ako ba ang imong gipasabot?”
Unsa ang inyong nahibaloan mahitungod kang Jesukristo nga makadasig kaninyo sa pagpangutana, “Ginoo, ako ba ang imong gipasabot?”

Si Presidente Uchtdorf mipaambit og duha ka sanglitanan sa mga kapanguhaan nga atong magamit aron makatabang kanato sa pagsusi sa atong kaugalingon sa espirituhanong paagi:

Mosugyot ko nga ang balaang kasulatan ug mga pakigpulong nga gihatag sa kinatibuk-ang komperens[i]ya naghatag og mga bar[o]ganan nga magamit nato sa pag-eksamin sa atong kaugalingon.

Samtang kamo maminaw o magbasa sa mga pulong sa karaan ug modernong mga propeta, likayi ang paghunahuna kon unsaon kaha nga magamit kining mga pulonga ngadto sa laing tawo ug hinoon mangutana niining yano nga pangutana: “Ako ba, Ginoo?”

(Dieter F. Uchtdorf, “Ako ba, Ginoo?,” Liahona, Nob. 2014, 58)

Hunong sa makadiyot aron sa paghunahuna mahitungod sa kon unsa ka kanunay ninyo gigamit ang mga kasulatan o ang mga pagtulon-an gikan sa kinatibuk-ang komperensiya sa inyong kinabuhi. Hunahunaa ang mahitungod sa mga panalangin nga inyong nasinati alang sa inyong mga pagpaningkamot nga ilakip ang mga pulong sa Ginoo diha sa inyong kinabuhi.

Ikonsiderar ang pagdapit sa mga estudyante sa pagpaambit og mga kasinatian diin sila migamit sa tambag o mga pagtulon-an gikan sa mga kasulatan o sa mga pakigpulong sa kinatibuk-ang komperensiya diha sa ilang kinabuhi. Dapita sila sa paghunahuna kon sa unsang paagi lahi ra ang ilang kinabuhi kon wala sila mogamit sa maong tambag. Ang mga estudyante tingali makahunahuna mahitungod sa maong mga kasinatian isip kabahin sa ilang pagpangandam sa estudyante nga kalihokan.

Bansaya ang paggamit sa mga pulong sa Ginoo sa inyong kinabuhi

Pagtuon og labing menos sa tulo sa mosunod nga mga tudling sa doktrinal nga kahanas. Samtang kamo magtuon, tinguhaa ang giya sa Espiritu Santo aron pagtino kon sa unsang paagi ang mga pulong sa Ginoo dinhi niini nga mga tudling magamit diha kaninyo. Mahimo usab ninyong tun-an ang pakigpulong sa bag-o lang nga kinatibuk-ang komperensiya isip kabahin niini nga kalihokan.

Human ang mga estudyante makahuman sa pagtuon, pagdapit og mga moboluntaryo sa pagpaambit og pipila ka paagi diin kining mga bersikulo o mga pakigpulong nga ilang natun-an magamit sa ilang kinabuhi. Ikonsiderar ang paggamit sa mosunod nga mga pangutana isip kabahin sa panaghisgot.

Unsa nga mga pagtulon-an ang inyong nakit-an nga mahimong magamit sa inyong mga kahimtang sa kinabuhi karon?
Unsa kaha nga mga panalangin ang sa inyong hunahuna inyong madawat pinaagi sa paggamit niining mga pagtulon-an sa inyong kinabuhi?

Pamatud-i ang mga kamatuoran nga inyong nahisgotan karon. Dapita ang mga estudyante nga ipadayon ang pagpangita og mga kahigayonan aron makita kon sa unsang paagi ang mga pulong sa Ginoo magamit sa ilang kinabuhi.

Komentaryo ug Background nga Impormasyon

Nganong gidihogan man ni Maria si Jesus?

Si Elder James E. Talmage (1862–1933) sa Korum sa Napulog Duha ka Apostoles nag-ingon:

Ang pagdihog og lana sa usa ka dinapit gamit ang ordinaryo nga lana mao ang pagpasidungog kaniya; ang pagdihog usab og lana sa iyang mga tiil nagpakita og dili sagad ug talagsaon nga pagtagad; apan ang pagdihog og lana sa ulo ug tiil gamit ang lunsay nga nardo, ug sa ingon nga kadaghan, usa ka buhat sa balaang pagtahod nga panagsa rang buhaton bisan ngadto sa mga hari. Ang gibuhat ni Maria usa ka pagpakita sa pagdayeg; usa kadto ka nangalisbo nga kahumot gikan sa kasingkasing nga nag-awas-awas gumikan sa pagsimba ug pagbati.

(James E. Talmage, Jesus the Christ[1916], 512)

Unsaon nato nga malikay sa sobrang pagpanghinaway sa kaugalingon samtang pabilin nga moila sa panginahanglan nga pagpalambo sa kaugalingon?

Si Sister Michelle D. Craig, Unang Magtatambag sa Kinatibuk-ang Kapangulohan sa Young Women mipaambit sa mosunod nga mga panglantaw:

Kinahanglan natong hangupon ang mga pagbati sa balaan nga pagkawala matagbaw nga nanawagan kanato ngadto sa mas halangdon nga paagi, samtang nagaila ug naglikay sa sinundog ni Satanas—makaparalisar nga pagkawala sa pagla[o]m. Usa kini ka kahigay[o]nan diin si Satanas gusto kaayo nga maoy atong bation. Makapili kita nga maglakaw sa mas halangdon nga dalan nga modala nato sa pagtinguha sa Dios ug sa Iyang kalinaw ug grasya, o mahimong maminaw kita kang Satanas, kinsa kanunayng mopaluya nato og mga mensahe nga dili gay[o]d kita magmalamp[o]son: maadunahan, maantigo, matah[o]m, bisan unsa dili paigo. Ang atong pagkawala matagbaw mahimong balaan—o makalaglag.

(Michelle D. Craig, “Balaan nga Pagkawala Matagbaw,” Liahona, Nob. 2018, 53)