Juan 13

“Paghigugmaay Kamo”

Human moambit sa pagkaon sa Pagsaylo, gihugasan ni Jesus ang mga tiil sa Iyang mga disipulo. Gitudloan Niya sila mahitungod sa pag-alagad ug paghigugmaay. Kini nga leksiyon makadasig kaninyo sa pagpangita og kalipay pinaagi sa pag-alagad ug paghigugma sa uban sama sa gihimo ni Jesus.

Pag-awhag og daghang tubag sa mga pangutana. Likayi ang kalagmitan nga modawat og usa lamang ka tubag sa usa ka pangutana ug dayon mopadayon sa leksiyon. Dapita ang uban pang mga estudyante sa pagtubag o pagkomento sa nag-unang tubag. Tinguhaa ang giya sa Espiritu samtang nagdapit kamo sa inyong mga estudyante sa pagsalmot sa mga panaghisgot.

Pagpangandam sa estudyante: Dapita ang mga estudyante sa pagpangita og kahigayonan nga makaalagad o makapakita og susamang gugma ni Kristo ngadto sa uban.

Posible nga mga Kalihokan sa Pagkat-on

Maningkamot nga mahisama ni Jesus

Kantaha o basaha ang mga pulong sa “Maninguha Kong Mahimong Mahisama Kang Jesus” (Songbook sa mga Bata, 40). Sa inyong pagkanta, pagbasa, o pagtan-aw, hunahunaa ang mahitungod sa mga rason nganong gusto ninyong mahisama kang Jesus.

Music Video: I’m Trying to Be Like Jesus – Emily Brown

Ikonsiderar ang pagdapit sa mga estudyante nga mopaambit sa ilang mga hunahuna o mga pagbati samtang sila nagkanta o nagbasa sa kanta o nagtan-aw sa video. Ipangutana ang mosunod nga mga pangutana, gamit ang unang pangutana aron sa pagdapit og kaugalingong pagpamalandong kay sa paghisgotanay.

• Sa unsang mga paagi nga kamo naningkamot nga mahisama ni Jesus?

• Unsang mga kalahian ang inyong nakita sa mga kinabuhi sa tawo diha sa ilang paningkamot nga mahisama kang Jesus? Unsa man sab kaha sa inyong kinabuhi?

Sa inyong pagsalmot niini nga leksiyon hatagi og pagtagad ang mga pag-aghat sa Espiritu Santo nga makadasig kaninyo nga mas makasunod sa ehemplo ug sa mga pagtulon-an sa Manluluwas.

“Ako mihatag kaninyo og panig-ingnan”

Ikonsiderar ang pagpakita og hulagway gikan sa sinugdanan niini nga leksiyon aron matabangan ang mga estudyante nga mahanduraw unsa ang nanghitabo dinhi niini nga asoy sa kasulatan.

Paingon sa pagtapos sa kinabuhi sa Manluluwas, Iyang gipundok ang Iyang mga Apostoles alang sa Iyang kataposang pagkaon sa Pagsaylo. Ang mga hitabo niining gabhiona kanunayng gipasabot isip ang Kataposang Panihapon.

Basaha ang Juan 13:1–11 , nga mangita kon unsay gibuhat ni Jesus human nga ang Iyang mga Apostoles nahuman sa pagpangaon sa pagkaon sa Pagsaylo.

Adunay mga kahigayonan aron mahisgotan ang lain pang mga hitabo panahon sa Pagsaylo diha sa ubang mga leksiyon karong semanaha.

Tingali makatabang ang pagkahibalo nga sa kapanahonan sa Bag-ong Tugon, ang mga tawo kasagaran hugaw kaayo og mga tiil tungod sa pagsul-ob og mga sandal ug paglakaw kasagaran sa yuta nga mga dalan. Ang paghugas og mga tiil sa ubang tawo kasagarang ginahimo sa pinakaubos nga lebel sa mga sulugoon.

• Unsa ang inyong nakat-onan mahitungod sa kinaiya ni Jesus gikan sa Iyang gibuhat nga paghugas sa mga tiil sa mga Apostoles?

• Unsa kaha ang inyong pagbati o isanong kon si Jesus mitanyag kaninyo niining klaseha sa mapaubsanong pagserbisyo?

Pinaagi sa paghugas sa mga tiil sa Iyang mga Apostoles, gihimo sa Manluluwas dili lang ang matahom nga buhat sa pagserbisyo, apan gipasiugdahan sab Niya ang usa ka sagradong ordinansa (tan-awa sa Bruce R. McConkie, Doctrinal New Testament Commentary [1965], 1:708–9). Kini nga ordinansa gipahiuli sa atong dispensasyon pinaagi ni Propeta Joseph Smith (tan-awa sa Doktrina ug mga Pakigsaad 88:74–75, 137–41 ; Mga Santos, 1:188). Tungod kay kini usa ka balaang ordinansa nga talagsa rang hisgotan sa mga propeta ug apostoles, ang mga magtutudlo dili mahimong mohisgot giunsa pagbuhat kini nga ordinansa sa atong panahon karon. Ang mga magtutudlo ug mga estudyante dili mahimong mosalmot sa bisan unsang kalihokan nga may kalabotan sa paghugas sa tiil sa uban. Kondili, mopasabot og maayo sa talagsaong ehemplo sa Manluluwas bahin sa paghigugma pinaagi sa pagpangalagad sa Iyang mga disipulo sa ingon niini nga paagi.

Basaha ang Juan 13:12–17 , nga mangita sa mga leksiyon nga inyong makat-onan gikan sa mga pulong sa Manluluwas.

• Unsay inyong nakat-onan gikan sa mga pagtulon-an sa Manluluwas dinhi niini nga mga bersikulo?

• Kanus-a kamo nakasinati og kalipay pinaagi sa pagsunod sa ehemplo ni Jesus sa pagpangalagad?

“Paghigugmaay kamo”

Human mahugasan ang mga tiil sa Iyang Apostoles, ang Manluluwas migahin og panahon sa pagtudlo kanila. Basaha ang Juan 13:34–35 aron madiskobrehan ang importanteng doktrina nga Iyang gitudlo.

Tabangi ang mga estudyante sa pag-ila sa kamatuoran nga susama sa mosunod: aron mamahimong tinuod nga mga disipulo ni Jesukristo, kita angay gayod nga maghigugmaay sama sa Iyang paghigugma kanato.

Ang ubang mga estudyante maglisod sa paghigugma sa uban nga nakapasakit kanila. Pangitaa ang direksiyon sa Espiritu Santo sa pag-ila kon unsa nga mga pagpahiangay ang kinahanglang buhaton aron matabangan ang mga estudyante nga mobati sa gugma ni Jesukristo alang kanila ug alang sa uban.

• Samtang kamo nagbasa ug naghunahuna mahitungod niining mga bersikulo, unsang mga hunahuna, mga pagbati, o mga pangutana ang anaa kaninyo?

Ikonsiderar ang pagdapit sa mga estudyante nga buhaton ang mosunod nga kalihokan nga managpares o diha sa gagmay nga mga grupo. Ang mga estudyante mahimong modugang sa ilang mga sanglitanan ngadto sa ilang lista diha sa pisara.

Paghunahuna og mga asoy sa kasulatan diin ang Manluluwas nagpakita ug gugma sa uban.

• Giunsa ni Jesukristo sa pagpakita og gugma sa lainlaing paagi ngadto sa lainlaing mga tawo?

Paggahin og pipila ka panahon sa paghunahuna ug pagsulat mahitungod kon kanus-a o kon unsay inyong pagbati sa gugma ni Jesus alang kaninyo. Ikonsiderar ang paghunong ug paghangyo sa Langitnong Amahan nga tabangan kamo nga mamatikdan ninyo kini nga mga panahon.

• Sa unsang paagi ang pagmatikod ug ang pagbati sa gugma sa Manluluwas kaninyo nakaapekto sa inyong tinguha nga makapakita og gugma ngadto sa uban?

Ang ubang mga estudyante tingali maglisod sa paghunahuna kon giunsa sa Manluluwas sa pagpakita og gugma ngadto kanila sa personal nga mga paagi. Ikonsiderar ang pagpaambit og mga sanglitanan kon sa unsang paagi Siya mipakita og gugma, sama sa pagtanyag og pasaylo, o sa pagtabang nila nga sila makakita sa ilang bili, o sa paghimo nga sila mahibalo nga Siya nakasabot sa unsay ilang gisinati. Ikonsiderar ang pagpaambit og personal nga kasinatian aron matabangan ang mga estudyante nga makita nga Siya nagpadayon sa paghimo sa mao gihapon nga mabinationg paghigugma alang kanato nga Iyang gibuhat diha sa mga asoy nga anaa sa mga kasulatan.

Hibaloi nga ang sunod nga “Pagtimbang-timbang sa Inyong Pagkat-on” nga leksiyon maoy follow up niini nga plano. Kon ang mga kausaban gibuhat dinhi, siguroha nga ipahiangay kini sa “Pagtimbang-timbang sa Inyong Pagkat-on” nga leksiyon sumala niana nga paagi.

Paghimo og plano kon unsaon ninyo sa pagsunod ang ehemplo sa Manluluwas sa paghigugma ug pag-alagad sa uban, ingon man usab kon kanus-a ninyo kini gustong buhaton. Ang mosunod nga mga ideya tingali makatabang sa paghunahuna samtang kamo mohimo og plano.

• Pagbuhat og usa ka butang karon alang sa usa ka sakop sa pamilya, higala, o sa usa ka tawo sa komunidad.

• Pagbuhat og butang aron makapakita og gugma ngadto sa tawo nga lahi kaninyo o gani usa ka tawo nga kaniadto naglisod kamo nga ikauban.

• Pag-ila og usa ka tawo nga gibati ninyo ang pag-aghat nga pakitaan og mas dakong gugma ug respeto.

• Ikonsiderar kon unsaon kaha ninyo nga madapit ang gugma sa Manluluwas diha sa inyong mga paningkamot.

Komentaryo ug Background nga Impormasyon

Juan 13:26 . Unsa man ang “pan”?

Ang “pan” nga gihulagway diha sa Juan 13:26 mao ang usa ka gamay nga piraso sa tinapay nga gamiton niadtong nangaon sa pagsandok sa sabaw ug karne gikan sa usa ka panaksan. Tungod kay kini usa ka buhat sa kamabination ug pagtahod alang sa usa ka tig-abiabi sa pagtuslob sa pan ug paghatag niini ngadto sa usa ka bisita sa panihapon, ang Manluluwas pinaagi niini nga buhat mihatag kang Judas og halad sa panaghigalaay, tingali usa ka kataposang oportunidad alang kaniya sa pagbiya sa iyang giplano nga pagbudhi.

Unsaon nato pagtabang sa uban nga mobati sa gugma ni Jesukristo pinaagi sa atong pag-alagad kanila?

Si Presidente Henry B. Eyring mipaambit sa mosunod nga sugilanon:

Gi-assign ako nga mobisita og miting sa sakramento sa usa ka care center. Gihangyo ako nga mopasa sa sakramento. Imbis maghunahuna mahitungod sa proseso o kamainampingon sa akong pagpasa sa sakramento, gitan-aw nako ang mga nawong sa matag tigulang nga tawo. Akong nakita ang daghan kanila nga nagbakho. Usa ka babaye ang mibira sa akong bukton, mihangad, ug misulti og kusog, “Ah, salamat, salamat.”

Ang Ginoo mipanalangin sa akong serbisyo nga gihatag pinaagi sa Iyang ngalan. Nianang adlawa akong giampo nga ang ingon niadto nga milagro moabot imbis mag-ampo alang sa unsaon nga mahimo nako og tarong ang akong bahin. Nag-ampo ako nga ang mga tawo mobati sa gugma sa Ginoo pinaagi sa mahigugmaong pagserbisyo. Akong nahibaloan nga mao kini ang importanting paagi sa pagserbisyo ug pagpanalangin sa uban diha sa Iyang ngalan.

(Henry B. Eyring, “Mopanalangin pinaagi sa Iyang Ngalan,” Liahona, Mayo 2021, 68–69)

Dugang nga mga Kalihokan sa Pagkat-on

Kapilian nga paagi sa pagsugod sa leksiyon

Ipakita ang mosunod nga dayagram diha sa pisara:

Basaha og kusog ang mosunod nga mga pangutana, ug dapita ang mga estudyante sa pagpamalandong sa ilang mga tubag (ipasabot nga dili sila kinahanglang motubag og kusog):

Asa kaha ninyo mabutang ang inyong kaugalingon dinhi niining continuum [graph sa kalipay]?

Gusto ba kamong mas malipayon kay sa unsa kamo sa karon?

Kinsa man ang gusto ninyo nga motabang aron mas magmalipayon?

Samtang nagtuon ang mga estudyante sa Juan 13 , dapita sila sa pagpangita og mga baroganan nga makatabang nila sa pagkahibalo unsa ang ilang mabuhat aron mas magmalipayon.

Unsaon ninyo sa pagpakita nga kamo Kristiyano?

Dapit sa sinugdanan sa seksiyon nga “Paghigugmaay kamo,” ang mosunod nga kalihokan makatabang sa mga estudyante nga makasalmot og balik sa leksiyon:

Pangutan-a ang mga estudyante kon nakasulay ba sila nga gipasanginlan nga dili sila Kristiyano, o dili sila tinuod nga mga disipulo ni Jesukristo, tungod kay miyembro sila sa Ang Simbahan ni Jesukristo sa mga Santos sa Ulahing mga Adlaw. Kon adunay mga estudyante nga nakasulay, pangutan-a giunsa nila pagsanong ang maong sitwasyon. Dapita ang mga estudyante sa paghisgot sa mosunod nga mga pangutana:

Unsaon ninyo sa pagsanong kon dunay tawo nga moingon ninyo nga kamo dili Kristiyano?

Unsa ang pipila sa mga paagi nga inyong ikapakita nga kamo mga sumusunod ni Jesukristo?

Juan 13:35 . “Kon maghigugmaay kamo, mahibalo ang tanan nga kamo akong mga tinun-an [disipulo]”

Ikonsiderar ang pagpasabot og maayo sa kamatuoran nga anaa sa Juan 13:34 nga kon kita maghigugmaay sama sa paghigugma ni Jesukristo kanato, ang uban mahibalo nga kita Iyang mga disipulo.

Sa paghulagway niini nga kamatuoran, ipaambit ang mosunod nga sugilanon, nga gisaysay ni Elder Paul E. Koelliker, kinsa miserbisyo isip sakop sa Seventy:

Duha ka misyonaryo nanuktok sa pultahan, nanghina[o]t nga may modawat sa ilang mensahe. Giablihan ang pultahan, ug usa ka dakong tawo mitagad nila nga dili kaayo mahigalaon: “Siguro nasultihan ko na kamo nga dili na manuktok. Gipasidan-an ko na kamo nga kon mobalik gani mo, dili nindot ang inyong masinati. Karon lakaw na mo.” Kalit niyang gisira ang pultahan.

Sa paglakaw sa mga elder, ang mas dugay, mas sinati nga misyonaryo miagbay sa mas bag-ong misyonaryo sa paghupay ug pagdasig niya. Wala sila masay[o]d, ang tawo nagtan-aw nila sa bintana sa pagsiguro nga nasabtan nila ang iyang gisulti. Nagtuo siya nga makita sila nga mangatawa ug ibaliwala lang ang iyang dili maayong pagtagad. Apan, sa iyang pagtan-aw sa kamabination sa duha ka misyonaryo, nahumok dayon ang iyang kasingkasing. Giablihan niyag balik ang pultahan ug gipabalik ang mga misyonaryo ug gipakigbahin ang ilang mensahe niya.

… Kining bar[o]ganan sa paghigugmaay ug pagpalambo sa abilidad nga nakasentro kang Kristo importante isip disipulo ni Kristo ug magtutudlo sa Iyang ebanghelyo.

(Paul E. Koelliker, “Tinuod Siya nga Nahigugma Kanato,” Liahona, Mayo 2012, 17)

Dapita ang mga estudyante nga ikonsiderar nganong kini nga pakigsultihanay tali sa mga misyonaryo adunay dako nga epekto sa maong tawo.