Mateo 26:26–30; Lucas 22:19–20

Ang Sakramento

Sa usa ka lugar nga gitawag og lawak sa itaas, ang Manluluwas “milingkod kauban ang napulog duha” (Mateo 26:20) ug mipahigayon sa kasaulogan sa Pagsaylo sa makausa sa kataposang higayon samtang anaa sa pagka-mortal. Panahon niining kataposan nga pagpangaon sa Pagsaylo, gipasiugdahan ni Jesukristo ang ordinansa sa sakramento isip bag-ong paagi sa Iyang mga disipulo sa paghinumdom Kaniya. Kini nga leksiyon makatabang kaninyo sa pagsabot ug pagbati sa importansiya sa paghinumdom sa Manluluwas samtang kamo moambit sa sakramento.

Pagdapit sa mga estudyante aron mopaambit. Pangita og mga higayon aron makadapit sa mga estudyante nga mopaambit sa ilang mga kasinatian. Ang pagpaambit og mga ideya ug tukma nga mga kasinatian makatabang sa pagpatin-aw sa pagsabot sa usa ka estudyante bahin sa doktrina sa ebanghelyo ug mga baroganan. Samtang ang mga estudyante nagpaambit sa mga ideya ug mga kasinatian, kasagaran giyahan sila sa Espiritu Santo ngadto sa mas halawom nga pagpamatuod bahin sa mga kamatuoran mismo nga ilang gipahayag. Pinaagi sa gahom sa Espiritu Santo, ang ilang mga pulong makahimo usab og makahuloganong epekto sa mga kasingkasing ug mga hunahuna sa ilang mga kaedad.

Pagpangandam sa estudyante: Pahibaloa ang mga estudyante nga dinhi niini nga leksiyon dapiton sila sa pagtimbang-timbang sa ilang mga kasinatian sa pag-ambit sa sakramento. Dapita ang mga estudyante sa paghunahuna sa ilang labing bag-ong kasinatian sa pag-ambit sa sakramento ug pag-adto nga andam nga mopaambit sa unsay ilang gibuhat, gihunahuna, o gibati nga nakatabang nila sa paghinumdom sa Manluluwas.

Posible nga mga Kalihokan sa Pagkat-on

Ang kaimportante sa sakramento

Para sa mosunod nga kalihokan, ikonsiderar ang pagdapit og mga estudyante nga motubag uban sa kapares o sa gagmay nga mga grupo. Dayon dapita sila sa paghisgot sa ilang mga tubag ngadto sa klase. Tingali usab makatabang ang pagdrama-drama niini nga senaryo.

Unsaon kaha ninyo sa pagtubag kon adunay mangutana kaninyo sa mosunod nga pangutana:

Nganong ang mga miyembro sa Ang Simbahan ni Jesukristo sa mga Santos sa Ulahing mga Adlaw moadto man sa simbahan matag Dominggo?

Agig kapilian nga mahimong ikahulip sa pagbasa sa mosunod nga pamahayag, ikonsiderar ang pagpaambit og usa ka personal nga kasinatian mahitungod sa pag-ila sa pinakamahinungdanon nga tahas sa ordinansa sa sakramento isip kabahin sa pagtambong sa Simbahan

Usa ka importanteng hinungdan nga kita motambong sa Simbahan mao ang pag-ambit sa sakramento. Si Sister Cheryl A. Esplin, kanhi sakop sa Kinatibuk-ang Kapangulohan sa Primary, mipaambit og usa ka inter-aksiyon nga nahitabo taliwala sa usa ka 96 anyos nga tigulang nga lalaki ug sa iyang anak nga lalaki nga nagpakita sa mahinungdanon nga tahas sa pag-ambit sa sakramento isip kabahin sa pagtambong sa Simbahan.

10:39

Kon mas palandungon nato ang kaimportante sa sakramento, mas masagrado ug makahuluganon kini ngari kanato. Kini ang pahayag sa 96 anyos nga amahan ngadto sa iyang anak sa dihang nangutana, “Pa, nganong mosimba man ka? Dili ka makakita, dili makadungog, ug maglis[o]d sa paglihok-lihok. Nganong mosimba man ka?” Ang amahan mitubag, “Tungod sa sakramento. Moadto ko aron moambit sa sakramento.”

(Cheryl A. Esplin, “Ang Sakramento—usa ka Pagbag-o sa Kalag,” Liahona, Nob. 2014, 14)

Unsa kaha sa inyong hunahuna ang nasabtan ug gibati niining tawhana mahitungod sa sakramento nga naghimong mahinungdanon kaayo kaniya?

Dapita ang mga estudyante sa hilom nga pagpamalandong samtang ilang kompletohon ang mosunod nga pagtimbang-timbang sa kaugalingon. Ikonsiderar ang paghatag kanila og panahon aron isulat ang ilang mga tubag diha sa ilang mga journal sa pagtuon.

Timbang-timbanga ang inyong kasinatian sa pagtambong sa simbahan ug pagsalmot sa ordinansa sa sakramento. Gamit ang sukod nga usa hangtod sa lima, nga ang usa maoy pinakaubos ug ang lima maoy pinakataas, tubaga ang mosunod nga mga pangutana.

Unsa kadako ang inyong pagprayoridad sa pagtambong sa simbahan ug pag-ambit sa sakramento?
Kon moambit kamo sa sakramento, unsa kalagmit kamo nga mohunahuna ni Jesukristo ug magbaton og makahuloganon nga kasinatian?

Human nga matimbang-timbang ninyo ang inyong kasinatian, pamalandongi nganong mao man kini ang inyong gigrado sa inyong kaugalingon. Sa inyong pagtuon niini nga leksiyon, tinguhaa ang tabang sa Ginoo aron mahibaloan unsaon pagpalawom sa inyong pagsabot sa importansiya sa paghinumdom sa Manluluwas samtang kamo moambit sa sakramento.

Si Jesukristo nagpasiugda sa sakramento

Si Jesukristo misalmot sa kasaulogan sa Pagsaylo sa wala pa ang Iyang mga pag-antos didto sa Getsemani ug kamatayon sa krus. Kini nga hitabo nailhan isip ang Kataposang Panihapon. Dihang ang Manluluwas mikaon sa pagkaon sa Pagsaylo [Pagpalabay] uban sa Iyang Apostoles, gipasiugdahan Niya ang ordinansa sa sakramento.

Kon ang mga estudyante makabenipisyo gikan sa mas lawom nga pagsabot bahin sa ordinansa sa Pagsaylo ug sa koneksiyon niini ngadto sa sakramento, ikonsiderar ang paghimo sa kalihokan nga anaa sa “Mga Dugang nga Kalihokan sa Pagkat-on” nga seksiyon dapit sa kataposan niini nga leksiyon.

Basaha ang Mateo 26:26–30 ug Lucas 22:19–20 , nga mangita kon unsay gitudlo sa Manluluwas sa Iyang Apostoles mahitungod sa katoyuan sa sakramento. Mahimo ninyong badlisan ang mga pulong o mga hugpong sa pulong.

5:27

Unsa ang katuyoan sa Manluluwas sa pagpasiugda sa ordinansa sa sakramento?

Usa ka kamatuoran nga atong makat-onan gikan niini nga mga tudling mao nga si Jesukristo nagpasiugda sa sakramento aron matabangan kita sa paghinumdom Kaniya.Bisan og ang Manluluwas wala pa makasinati og pag-antos ug kahigwaos sa Iyang maulaon nga sakripisyo, ang ordinansa ug mga ilhanan nga Iyang gitudlo sa Iyang Apostoles mao ang pagtabang kanila sa paghinumdom Kaniya ug sa gasa sa Iyang Pag-ula.

Unsa nga mga kasulatan o personal nga mga kasinatian ang nakatabang ninyo sa pagpamalandong sa sakripisyo nga gibuhat sa Manluluwas alang kaninyo?
Unsa ang inyong mga pagbati alang sa Manluluwas kon mobasa kamo niini nga mga bersikulo o maghunahuna niini nga mga kasinatian?

Kon ang mga estudyante magkinahanglan og tabang sa paghinumdom og mga kasinatian og mga pagbati, ikonsiderar ang pagpaambit og personal nga mga kasinatian, sa mga pulong ni Brother Lund nga anaa sa “Komentaryo ug Background nga Impormasyon” nga seksiyon niini nga leksiyon, o lain pang mga kasulatan sama sa Doktrina ug mga Pakigsaad 19:16–19 o Alma 7:11–13 . Sa umaabot nga leksiyon, tun-an sa mga estudyante kini nga mga tudling nga mas detalyado isip kabahin sa pagsabot sa pag-antos sa Manluluwas ug mga kasinatian sa Tanaman sa Getsemani.

Sa unsang paagi ang mga simbolo sa sakramento nakatabang ninyo nga mas makasabot sa unsay nabuhat ug mabuhat sa Manluluwas alang kaninyo?

Paghimo og usa ka outline sa leksiyon

Handurawa nga ikaw gihangyo nga patudloon mahitungod sa sakramento sa umaabot nga pagtuon sa kasulatan sa inyong panimalay nga maghisgot bahin sa sakramento. Gamit ang mga kasulatan nga bag-o lang ninyong natun-an ug ubang mga pakisayran nga inyong gipili (sama sa Mga Hiligotan sa Ebanghelyo, “Sakramento,” topics.ChurchofJesusChrist.org, o mga pakigpulong sa bag-o nga kinatibuk-ang komperensiya), pangandami ang pagtabang sa uban nga makasabot ug mobati sa importansiya sa sakramento.

Dugang pa niana, ang artikulo nga “The Bread and Water” (Ensign, Hulyo 2017, 68–69) makatabang usab.

Ipakita ang mosunod nga mga instruksiyon aron ang mga estudyante maka-refer diha niini samtang sila maghimo og outline sa ilang leksiyon.

Ang inyong outline sa leksiyon kinahanglan maglangkob sa mosunod: (1) usa o daghan pang mga kasulatan o mga pamahayag sa mga lider sa Simbahan mahitungod sa sakramento aron tun-an ug pamalandongan, (2) dili moubos duha ka pangutana nga lagmit inyong ipangutana aron pagpalawom sa pagsabot, ug (3) usa ka pagdapit aron magamit ang mga kamatuoran nga inyong gihisgotan. Gamita ang pipila o ang tanan sa mosunod nga mga pangutana aron mahatagan kamo og giya sa paghimo sa inyong outline.

Unsa ang sakramento?
Sa unsang paagi ang sakramento makatabang nato nga mas makasabot sa Manluluwas ug sa Iyang Pag-ula?
Unsa ang nakatabang kaninyo aron makabaton kamo og makahuloganong mga kasinatian samtang nag-ambit sa sakramento?
Unsa kaha kalahi ang inyong kinabuhi kon kamo mohinumdon ni Jesukristo sa kanunay?

Awhaga ang mga estudyante nga maningkamot pag-ayo og mohinumdom sa Manluluwas diha sa ilang pag-ambit sa sakramento.

Komentaryo ug Background nga Impormasyon

Unsa ang koneksiyon tali sa Pagsaylo ug sa sakramento?

Ang infographic nga “The Passover Supper” (New Era, Abr. 2019, 8–9) mahimong makatabang sa pagsabot sa koneksiyon tali sa Pagsaylo ug sa sakramento.

Nganong mogamit man ta og tubig alang sa sakramento imbis bino?

Ang Doktrina ug mga Pakigsaad 27:1–2 nag-ingon nga dili importante unsay gamiton alang sa sakramento basta gibuhat kini “uban sa bug-os nga tinguha ngadto sa himaya ni [Kristo]” ( bersikulo2). Karon, ang mga lider sa Simbahan naghangyo nga gamiton ang tubig diha sa atong pag-ambit sa sakramento.

Unsa ang akong mahimo aron mahimong mas makahuloganon ang sakramento?

Si Presidente Steven J. Lund, Kinatibuk-ang Presidente sa Young Men, nagtudlo:

Matag panahon nga ang usa ka deacon mogunit sa usa ka tray sa sakramento, gipahinumdoman kita sa sagrado nga istorya sa Katap[o]sang Panihapon, sa Getsemani, sa Kalbaryo, ug sa tanaman sa lubnganan. Sa dihang ang Manluluwas miingon ngadto sa Iyang Apostoles, “Buhata ninyo kini aron paghandom kanako,” [Lucas 22:19], nagsulti usab Siya latas sa katuigan ngari sa matag usa kanato. Nagsulti Siya sa walay kataposang milagro nga Iyang ihatag samtang ang umaabot nga mga deacon, mga teacher, ug mga priest mopresentar sa Iyang mga timaan ug modapit sa Iyang mga anak sa pagdawat sa Iyang maulaon nga gasa.

Ang tanan nga mga simbolo sa sakramento nagpunting kanato ngadto niana nga gasa. Namalandong kita sa pan nga Iyang gipikas-pikas kaniadto—ug sa pan nga karon, sa ilang turno, gipikas-pikas sa mga priest. Naghunahuna kita sa kahulogan sa tubig [liquid] nga gipahinungod, kaniadto ug karon, samtang ang mga pulong niadtong mga pag-ampo sa sakramento ligdong nga moagi gikan sa mga baba sa batan-on nga mga priest paingon sa atong mga kasingkasing ug ngadto sa kalangitan, nga nagbag-o sa mga pakigsaad nga nagkonektar kanato ngadto sa mismong mga gahom sa kaluwasan ni Kristo. Mahimo kitang maghunahuna kon unsay gipasabot niini kon ang usa ka deacon magdala sa sagrado nga mga timaan ngari kanato, nagbarog ingon sa usa ka deacon sa dapit diin si Jesus mobarog kon Siya anaa dinha, nagtanyag sa pagkuha sa atong nga mga palas-anon ug sa atong kasakit.

(Steven J. Lund, “Pagkaplag og Kalipay diha kang Kristo,” Liahona, Nob. 2020, 36)

Si Presidente Dallin H. Oaks sa Unang Kapangulohan mipaambit sa mosunod nga tambag:

Panahon sa miting sa sakrament—ug ilabi na atol sa pagpahigayon sa sakramento—kinahanglan nga kita maghunahuna og maayo sa pagsimba ug molikay gikan sa tanang lain nga mga kalihokan, ilabi na sa pamatasan nga makabalda sa pagsimba sa uban. Bisan gani ang usa ka tawo kinsa nahinanok og maayo dili makapanghilabot sa uban. Ang miting sa sakramento dili panahon alang sa pagbasa sa mga libro o mga magasin. Mga batan-on, dili kini panahon alang sa mga paghinunghonganay og sulti diha sa mga cell phone o sa pag-text og mensahe sa mga tawo didto sa laing mga dapit. Kon moambit kita sa sakramento, naghimo kita og sagrado nga pakigsaad nga kita kanunay nga mahinumdom sa Manluluwas. Unsa ka subo nga tan-awon sa mga tawo nga klarong nakalapas nianang pakigsaad diha gay[o]d sa miting diin sila mihimo niini.

(Dallin H. Oaks, “Ang Miting sa Sakrament ug ang Sakrament[o],” Liahona, Nob. 2008, 18–19)

Dugang nga mga Kalihokan sa Pagkat-on

Ang kasaulogan sa Pagsaylo [Passover]

Aron matabangan ang mga estudyante sa pagsabot sa koneksiyon tali sa Pagsaylo ug sa sakramento, dapita ang mga estudyante sa pagsusi og mga hulagway sa pagpangaon sa Pagsaylo ug sa sakramento, o ikonsiderar ang pagpakita og sapya nga pan (o biskwit) ug usa ka tasa sa kilid sa lamesa ug mga tray sa sakramento sa pikas nga kilid sa lamesa. Dapita ang mga estudyante sa pagpaambit unsay ilang nahibaloan mahitungod sa mga elemento sa kasaulogan sa Pagsaylo nga gihimo sa karaang panahon ug sa koneksiyon niini sa ordinansa sa sakramento nga atong gihimo karon.