ចំណេះចំណានខាងគោលលទ្ធិ ៖ លូកា ២២:១៩–២០
« ចូរធ្វើបុណ្យនេះ ដើម្បីរំឭកពីខ្ញុំចុះ »
នៅក្នុងការសិក្សារបស់អ្នកអំពី ម៉ាថាយ ២៦:២៦–៣០ អ្នកបានរៀនអំពីព្រះអង្គសង្គ្រោះបង្ហាញពីពិធីបរិសុទ្ធនៃពិធីសាក្រាម៉ង់ដល់សិស្សរបស់ទ្រង់នៅឯអាហារចុងក្រោយ ។ មេរៀននេះនឹងផ្តល់ឲ្យអ្នកនូវឱកាសដើម្បីបង្កើនចំណេះចំណានរបស់អ្នកអំពីគោលលទ្ធិនៃសាក្រាម៉ង់ ។ អ្នកនឹងធ្វើដូច្នេះតាមរយៈការទន្ទេញសេចក្ដីយោង និងឃ្លាបទគម្ពីរគន្លឹះសម្រាប់វគ្គចំណេះចំណានខាងគោលលទ្ធិ លូកា ២២:១៩–២០ តាមរយៈការពន្យល់អំពីគោលលទ្ធិ និងតាមរយៈការអនុវត្តគោលការណ៍នៃការទទួលបានចំណេះដឹងខាងវិញ្ញាណ ។
ការជួយសិស្សឲ្យពិនិត្យមើលគោលការណ៍នៃការទទួលបានចំណេះដឹងខាងវិញ្ញាណឡើងវិញ ។ សូមផ្តល់ឱកាសជាទៀងទាត់សម្រាប់សិស្សដើម្បីពិនិត្យឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ៖ ធ្វើសកម្មភាពដោយសេចក្តីជំនឿ ពិនិត្យមើលគោលគំនិត និងសំណួរដោយទស្សនវិស័យដ៏នៅអស់កល្បជានិច្ច ហើយស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ( ឯកសារគោលនៃចំណេះចំណានខាងគោលលទ្ធិ [ ឆ្នាំ ២០២២ ] « ការទទួលបានចំណេះដឹងខាងវិញ្ញាណ » ) ។ សិស្សនឹងរៀនប្រើប្រាស់គោលការណ៍ទាំងនេះជាមួយនឹងលំហាត់រៀនអនុវត្តនីមួយៗ ។ សូមពិនិត្យមើលគោលការណ៍ឲ្យបានគ្រប់គ្រាន់ ដើម្បីឲ្យសិស្សអាចរំឭកឡើងវិញ និងប្រើប្រាស់វាក្នុងជីវិតរបស់ពួកគេ ។
ការរៀបចំរបស់សិស្ស ៖ សូមអញ្ជើញសិស្សឲ្យគិតពីអ្វីដែលជួយពួកគេឲ្យចងចាំព្រះអង្គសង្គ្រោះ នៅពេលពួកគេទទួលទានសាក្រាម៉ង់ ហើយត្រៀមខ្លួនដើម្បីប្រើប្រាស់ ឬចែកចាយបទពិសោធន៍នេះនៅក្នុងមេរៀននេះ ។
សកម្មភាពរៀនសូត្រដែលអាចមាន
ទន្ទេញចាំ និងពន្យល់
មេរៀនវគ្គបទគម្ពីរចំណេះចំណានខាងគោលលទ្ធិនេះត្រូវបានរៀបរៀងឡើងដើម្បីបង្រៀនបន្ទាប់ពីមេរៀន « ម៉ាថាយ ២៦:២៦–៣០; លូកា ២២:១៩–២០ » ដែលជាមេរៀនទាក់ទងនឹងបរិបទសម្រាប់វគ្គបទគម្ពីរចំណេះចំណានខាងគោលលទ្ធិ លូកា ២២:១៩–២០ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង នោះសូមប្រាកដថាបានបង្រៀនមេរៀនបរិបទ ដែលត្រូវគ្នានៅអំឡុងសប្តាហ៍នោះផងដែរ ។
សូមពិចារណាអញ្ជើញសិស្សឲ្យដើរតួក្នុងស្ថានភាពខាងក្រោមជាគូ ឬអញ្ជើញសិស្សពីរនាក់ឲ្យបង្ហាញសាច់រឿងសម្រាប់ថ្នាក់ទាំងមូល ។
សូមស្រមៃអំពីការនាំមិត្តម្នាក់ទៅព្រះវិហារជាមនុស្សដែលមិនដឹងអ្វីសោះអំពីការរៀបចំរបស់សាសនា ឬព្រះយេស៊ូវគ្រីស្ទ ។ បន្ទាប់ពីការប្រជុំសាក្រាម៉ង់ នាងបានសួរថា « តើអ្វីទៅជាគោលបំណងនៃការចែកនំប៉័ង និងទឹកដល់មនុស្សគ្រប់គ្នា ? »
-
តើអ្នកនឹងពន្យល់ពីពិធីបរិសុទ្ធនៃពិធីសាក្រាម៉ង់ដល់មិត្តរបស់អ្នកដោយរបៀបណា ?
សូមផ្តល់ឲ្យសិស្សនូវឱកាសមួយដើម្បីទន្ទេញចាំសេចក្តីយោងសម្រាប់វគ្គបទគម្ពីរចំណេះចំណានខាងគោលលទ្ធិ លូកា ២២:១៩–២០ និងឃ្លាខគម្ពីរគន្លឹះដែលភ្ជាប់មកជាមួយ ។ សកម្មភាពខាងក្រោមគឺជាវិធីមួយដើម្បីធ្វើរឿងនេះ ។ សូមពិចារណាកែសម្រួលសកម្មភាពនេះដោយអនុញ្ញាតឲ្យសិស្សធ្វើការជាគូ ឬជាក្រុមតូចៗ ឬដោយការចូលរួមក្នុងថ្នាក់ទាំងមូល ហើយសរសេរសេចក្ដីយោងបទគម្ពីរ និងឃ្លាគន្លឹះនៅលើក្ដារខៀន ។
នៅក្នុងសៀវភៅកំណត់ហេតុការសិក្សារបស់អ្នក សូមប្រើខ្មៅដៃដើម្បីសរសេរស្រាលៗនូវសេចក្ដីយោងបទគម្ពីរខាងក្រោម និងឃ្លាបទគម្ពីរគន្លឹះ ៖ « លូកា ២២:១៩–២០ ៖ ព្រះយេស៊ូវគ្រីស្ទបានបង្គាប់ឲ្យទទួលទានសាក្រាម៉ង់ ‹ ដើម្បីរំឭកពីខ្ញុំចុះ › » ។
សូមសូត្រសេចក្ដីយោងបទគម្ពីរនេះម្ដងទៀត និងឃ្លាខគម្ពីរគន្លឹះឲ្យឮៗ ។ បន្ទាប់មក សូមលុបពាក្យពីរ ឬលេខចំនួនពីរចេញ ហើយហាត់ទន្ទេញសេចក្ដីយោងបទគម្ពីរ និងឃ្លាម្ដងទៀត ។ សូមធ្វើលំនាំដដែលនេះម្តងទៀត ដោយលុបពាក្យ ឬលេខ ហើយសូត្រសេចក្ដីយោងបទគម្ពីរ និងឃ្លាគន្លឹះ រហូតដល់ពាក្យ និងលេខបានលុបចេញអស់ ។ បន្ទាប់មក សូមសរសេរសេចក្ដីយោងបទគម្ពីរនេះ និងឃ្លាគន្លឹះឲ្យបានច្រើនតាមដែលអ្នកអាចធ្វើបានពីការចងចាំ ។
រៀនអនុវត្ត
ប្រសិនបើចាំបាច់ សូមជួយសិស្សឲ្យរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។ វិធីមួយដើម្បីធ្វើរឿងនេះគឺឲ្យសិស្សបំពេញសកម្មភាពខាងក្រោមនេះ ។ ការរំឭកឡើងវិញនេះមិនគួរចំណាយពេលលើសពី ៣ ទៅ ៥ នាទីនោះទេ ។
សូមពិនិត្យមើលដោយសង្ខេបអំពីគោលការណ៍នៃការទទួលបានចំណេះដឹងខាងវិញ្ញាណ ( សូមមើល ឯកសារគោលនៃចំណេះចំណានខាងគោលលទ្ធិ [ ឆ្នាំ ២០២២ ] « ការទទួលបានចំណេះដឹងខាងវិញ្ញាណ ») ។ សូមជ្រើសរើសគោលការណ៍មួយក្នុងចំណោមគោលការណ៍ទាំងបីនៃការទទួលបានចំណេះដឹងខាងវិញ្ញាណ ហើយគូរនិមិត្តសញ្ញា ឬរូបភាពសាមញ្ញមួយដែលអ្នកមានអារម្មណ៍ថាតំណាងឲ្យវា ។
ឥឡូវនេះ សូមអនុវត្តដោយប្រើគោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង លូកា ២២:១៩–២០ ដោយអានសាច់រឿងខាងក្រោម ហើយឆ្លើយសំណួរដែលមានបន្ទាប់មក ។
សាច់រឿងខាងក្រោមគឺមានបំណងជួយសិស្សឲ្យឆ្ពោះទៅមុខលើសពីការចងក្រងបញ្ជីនៃអ្វីដែលត្រូវធ្វើក្នុងអំឡុងពេលពិធីសាក្រាម៉ង់ ហើយគិតឲ្យស៊ីជម្រៅបន្ថែមទៀតអំពីការធ្វើឲ្យពិធីសាក្រាម៉ង់ក្លាយជាបទពិសោធន៍ដ៏មានអត្ថន័យ ។
សូមពិចារណាកែសម្រួលសាច់រឿងដើម្បីធ្វើឲ្យវាទាក់ទងទៅនឹងសិស្ស ។
ជូឌី មានអាយុ ១៥ ឆ្នាំ បានធ្វើជាសមាជិកសាសនាចក្រពេញមួយជីវិតរបស់នាង ហើយតែងតែចូលរួមការប្រជុំព្រះវិហាររបស់នាងជាប្រចាំ ។ នាងរស់នៅជាមួយម្តាយ និងជីដូនរបស់នាង ដែលធ្វើជាគំរូដ៏ល្អសម្រាប់នាង ។ កាលពីថ្ងៃអាទិត្យកន្លងទៅនេះ ជូឌីចាប់អារម្មណ៍ជាពិសេសលើប្រធានបទរបស់អ្នកឡើងនិយាយក្នុងការប្រជុំសាក្រាម៉ង់ ។ អ្នកឡើងនិយាយម្នាក់ៗបានចែកចាយបទពិសោធន៍ផ្ទាល់ខ្លួនដ៏មានឥទ្ធិពល និងដោយស្មោះត្រង់អំពីការទទួលទានសាក្រាម៉ង់ និងរបៀបដែលវាជួយបង្កើនឥទ្ធិពលរបស់ព្រះអង្គសង្គ្រោះក្នុងជីវិតរបស់ពួកគេ ។ ចំណុចនេះធ្វើឲ្យនាងគិតថា នាងមិនមានបទពិសោធន៍បែបនេះច្រើនទេចំពោះខ្លួននាង ។ នាងដឹងថា អំឡុងពេលធ្វើពិធីសាក្រាម៉ង់ ទូរសព្ទដៃ ឬអ្វីដែលអ្នកដទៃកំពុងធ្វើតែងតែធ្វើឲ្យនាងបែកអារម្មណ៍ជានិច្ច ឬនាងកំពុងគិតអំពីរបៀបដែលនាងអាចទៅផ្ទះវិញឲ្យបានលឿនដើម្បីគេងថ្ងៃ ។
-
តើអ្នកធ្លាប់មានអារម្មណ៍បែបនេះទេ ?
-
តើអ្នកគិតថា ហេតុអ្វីបានជាមនុស្សពេលខ្លះមានអារម្មណ៍បែបនេះទៅវិញ ?
សូមផ្តល់ឲ្យសិស្សនូវឱកាសមួយដើម្បីអនុវត្តដោយប្រើគោលការណ៍នៃការទទួលបានចំណេះដឹងខាងវិញ្ញាណដើម្បីជួយ ជូឌីក្នុងស្ថានភាពនេះ ។ ខាងក្រោមគឺជាវិធីមួយដើម្បីធ្វើរឿងនេះ ។
ប្រសិនបើសិស្សត្រូវការជំនួយបន្ថែមទៀតក្នុងការអនុវត្តគោលការណ៍នៃការទទួលបានចំណេះដឹងខាងវិញ្ញាណចំពោះស្ថានភាពនេះ សូមពិចារណាប្រើសំណួរដែលបានរាយបញ្ជីនៅក្រោមចំណងជើងដិត ដើម្បីដឹកនាំការពិភាក្សាមួយ ។
នៅក្នុងសៀវភៅកំណត់ហេតុការសិក្សារបស់អ្នក សូមរំឭកពួកគេអំពីគោលការណ៍ចំនួនបី នៃការទទួលបានចំណេះដឹងខាងវិញ្ញាណដូចតទៅ ៖ ( ១ ) ធ្វើសកម្មភាពដោយសេចក្ដីជំនឿ ( ២ ) ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច និង ( ៣ ) ស្វែងរកការយល់ដឹងបន្ថែមតាមរយៈប្រភពដែលត្រូវបានតែងតាំងដ៏ទេវភាព ។
ខាងក្រោមចំណងជើងនីមួយៗ សូមសរសេរវិធីជាក់លាក់ដែលគោលការណ៍នៃការទទួលបានចំណេះដឹងខាងវិញ្ញាណអាចជួយ ជូឌីពីស្ថានភាពរបស់នាង ។ ឧទាហរណ៍ អ្នកអាចផ្ដល់យោបល់ពីវិធីជាក់លាក់ដែលនាងអាចធ្វើសកម្មភាពដោយសេចក្ដីជំនឿ ចែកចាយពីរបៀបដែលការរក្សាទស្សនៈដ៏នៅអស់កល្បអាចមានគុណប្រយោជន៍ក្នុងស្ថានភាពរបស់នាង និងផ្ដល់យោបល់ពីប្រភពដែលបានតែងតាំងដ៏ទេវភាពមួយចំនួនដែលនាងអាចប្រើសម្រាប់ការណែនាំ និងការដឹកនាំ ។
-
តើអ្នកនឹងណែនាំ ជូឌីឲ្យចាប់ផ្តើមធ្វើអ្វី ដើម្បីដោះស្រាយកង្វល់របស់នាង ?
-
តើអ្នកអាចប្រើគោលការណ៍ទាំងបីនៃការទទួលបានចំណេះដឹងខាងវិញ្ញាណដើម្បីជួយ ជូឌី យ៉ាងដូចម្ដេច ?
សូមជួយសិស្សឲ្យគិតអំពីវិធីភ្ជាប់ទំនាក់ទំនង និងចងចាំព្រះយេស៊ូវគ្រីស្ទ ក្នុងអំឡុងពេលនៃពិធីបរិសុទ្ធនៃពិធីសាក្រាម៉ង់ ។ នៅពេលសិស្សឆ្លើយ សូមពិចារណាអំពីការសួរសំណួរដូចតទៅនេះ ៖ តើវានឹងជួយអ្នកឲ្យចងចាំព្រះអង្គសង្គ្រោះយ៉ាងដូចម្ដេច ? ជំនួសឲ្យការគ្រាន់តែការធ្វើឲ្យតែបាន តើអ្នកអាចភ្ជាប់ទំនាក់ទំនង និងចងចាំព្រះអង្គសង្គ្រោះដោយរបៀបណា ?
ធ្វើសកម្មភាពដោយសេចក្ដីជំនឿ
-
តើដំបូន្មានអ្វីខ្លះដែលអ្នកនឹងផ្តល់ឲ្យ ជូឌី ដែលអាចជួយនាងឲ្យមានបទពិសោធន៍កាន់តែប្រសើរក្នុងការទទួលទានសាក្រាម៉ង់ ?
-
តើអ្វីអាចរារាំងនាងមិនឲ្យធ្វើការផ្លាស់ប្តូរទាំងនេះបាន ? តើនាងអាចយកឈ្នះលើឧបសគ្គទាំងនេះដោយរបៀបណា ?
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច
-
តើសំណួរអ្វីខ្លះដែលអ្នកអាចសួរ ជូឌី ដើម្បីជួយនាងឲ្យមើលឃើញស្ថានភាពរបស់នាងជាមួយនឹងទស្សនវិស័យដ៏នៅអស់កល្បជានិច្ច ? ហេតុអ្វីអ្នកជ្រើសរើសសំណួរទាំងនោះ ?
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
រំឭកឡើងវិញ
សកម្មភាពរំំឭកឡើងវិញខាងក្រោមនេះគួរតែត្រូវបានប្រើសម្រាប់មេរៀនដែលនឹងត្រូវបានបង្រៀននាពេលខាងមុខនេះ ។
សូមឲ្យប័ណ្ណកត់ចំណាំ ឬក្រដាសកំណត់ចំណាំដល់សិស្សម្នាក់ៗ ។ សូមអញ្ជើញពួកគេឲ្យសរសេរ « លូកា ២២:១៩–២០ ៖ ព្រះយេស៊ូវគ្រីស្ទបានបង្គាប់ថា ចូរទទួលទានសាក្រាម៉ង់ ‹ ដើម្បីរំឭកពីខ្ញុំចុះ › » នៅលើប័ណ្ណកត់ចំណាំ ឬក្រដាសកំណត់ចំណាំរបស់ពួកគេ ហើយបន្ទាប់មកលុបពាក្យ និងលេខមួយចំនួនចេញពីសេចក្ដីយោងបទគម្ពីរ និងឃ្លាគន្លឹះនេះ ។ សូមអញ្ជើញសិស្សឲ្យប្តូរកាត ឬកំណត់ចំណាំគ្នា ហើយមើលថាតើពួកគេអាចបំពេញពាក្យ ឬលេខដែលបាត់បានឬអត់ ។ បន្ទាប់មក សូមអញ្ជើញសិស្សឲ្យព្យាយាមសូត្រសេចក្ដីយោង និងឃ្លាចេញពីការចងចាំ ។
សកម្មភាពរៀនសូត្របន្ថែម
សាច់រឿងជំនួស
ដើម្បីជួយសិស្សឲ្យយល់អំពីមុខងារសំខាន់ដែលពិធីសាក្រាម៉ង់មានក្នុងការចូលថ្វាយបង្គំនៅព្រះវិហារ សូមពិចារណាប្រើសាច់រឿងជំនួសខាងក្រោមនេះ ៖
ថ្មីៗនេះ អ៊ែលឌិន បានទទួលការងារមួយដែលតម្រូវឲ្យគាត់ធ្វើការនៅថ្ងៃអាទិត្យ ។ គាត់មិនបានគិតថា វានឹងក្លាយជារឿងធំដុំមួយនោះទេ ដែលខកខានមិនបានមកព្រះវិហារមួយ ឬពីរថ្ងៃអាទិត្យក្នុងមួយខែនោះ ។ ប៉ុន្តែឥឡូវនេះ អ៊ែលឌិនចាប់ផ្តើមដឹងថា សូម្បីតែនៅថ្ងៃអាទិត្យដែលគាត់មិនធ្វើការក៏ដោយ ក៏វាពិបាកក្នុងការមានអារម្មណ៍បំផុសគំនិតឲ្យចូលរួមក្នុងការថ្វាយបង្គំដែរ ។ គាត់មានអារម្មណ៍ធុញទ្រាន់នៅព្រះវិហារ ហើយគាត់ពិតជាមិនចង់ពាក់ព័ន្ធ ឬទាក់ទងជាមួយអ្នកណាម្នាក់នៅទីនោះទេ ។
បន្ទាប់ពីចែកចាយសាច់រឿងហើយ សូមពិភាក្សាអំពីរបៀបដែលគោលការណ៍នៃការទទួលបានចំណេះដឹងខាងវិញ្ញាណអាចជួយដល់ស្ថានភាពរបស់អ៊ែលឌិន ។ ជាផ្នែកមួយនៃការពិភាក្សារបស់អ្នក សូមអញ្ជើញសិស្សឲ្យពិចារណាអំពីពរជ័យអ្វីដែល អ៊ែលឌិន អាចនឹងបាត់បង់ ដោយសារការមិនទទួលទានសាក្រាម៉ង់ជាទៀងទាត់នោះ ។