ម៉ាថាយ ២៦:១–២៥

« ព្រះអម្ចាស់អើយ តើទូលបង្គំឬអី ? »

មុនបុណ្យរំលង ម៉ារាបានចាក់ប្រេងលាបព្រះអង្គសង្គ្រោះដោយប្រេងក្រអូបដ៏មានតម្លៃ ហើយយូដាសបានឃុបឃិតជាមួយនឹងពួកសង្គ្រាជ និងពួកអាចារ្យដើម្បីធ្វើគុតព្រះយេស៊ូវ ។ ក្នុងអំឡុងពេលសោយអាហារនៃបុណ្យរំលង ព្រះយេស៊ូវបានប្រកាសថានឹងមានគេក្បត់ទ្រង់ ។ ពួកសាវកបានសួរថា តើនរណានឹងក្បត់ព្រះអង្គសង្គ្រោះ ដោយសួរថា « ព្រះអម្ចាស់អើយ តើទូលបង្គំឬអី ? » មេរៀននេះអាចជួយអ្នកឲ្យប្រើព្រះបន្ទូលរបស់ព្រះអង្គសង្គ្រោះនៅក្នុងព្រះគម្ពីរ ដើម្បីពិនិត្យមើលជីវិតរបស់អ្នក និងកំណត់ផ្នែកដែលអ្នកត្រូវកែលម្អ ។

ការរៀបចំមេរៀនដោយគិតដល់សិស្សក្នុងចិត្ត ។ ពេលកំពុងរៀបចំបង្រៀន សូមពិចារណាពីលទ្ធផលដែលសិស្សគួរសម្រេចបានដែលជាលទ្ធផលនៃមេរៀន ។ ប្រធាន ថូម៉ាស អេស ម៉នសុន ( ឆ្នាំ ១៩២៧–២០១៨ ) បានមានប្រសាសន៍ ៖ « គោលដៅនៃការបង្រៀនដំណឹងល្អ គឺមិនមែនដើម្បីចាក់បង្ហូរព័ត៌មានចូលទៅក្នុងចិត្តគំនិតរបស់បុត្រាបុត្រីព្រះនោះទេ ។ … [ វាគឺជាការជួយពួកគេឲ្យ ] អភិវឌ្ឍសេចក្តីជំនឿលើព្រះអម្ចាស់ព្រះយេស៊ូវគ្រីស្ទ ហើយ … ប្រែចិត្តជឿ លើដំណឹងល្អរបស់ទ្រង់ » ( « Learn of Me » Ensign ខែ មីនា ឆ្នាំ ២០១៦ ទំព័រ ៤ ) ។ សូមស្វែងរកការបំផុសគំនិតដើម្បីដឹងពីរបៀបជួយសិស្សបង្កើនសេចក្តីជំនឿរបស់ពួកគេ ហើយមានអារម្មណ៍ស្រឡាញ់កាន់តែខ្លាំងចំពោះ និងពីព្រះយេស៊ូវគ្រីស្ទនៅក្នុងមេរៀននីមួយៗ ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីពេលវេលាមួយដែលពួកគេអនុវត្តការប្រឹក្សា ឬការបង្រៀនពីព្រះគម្ពីរ ថ្នាក់ដឹកនាំសាសនាចក្រ ឬព្រះវិញ្ញាណបរិសុទ្ធចំពោះជីវិតរបស់ពួកគេ ។ តើជីវិតរបស់ពួកគេនឹងខុសគ្នាយ៉ាងណា បើពួកគេមិនបានជ្រើសរើសអនុវត្តតាមការប្រឹក្សាទាំងនោះ ?

សកម្មភាពរៀនសូត្រដែលអាចមាន

របៀបដែលយើងប្រព្រឹត្តចំពោះអ្វីដែលយើងឲ្យតម្លៃ

សូមពិចារណាចែកចាយឧទាហរណ៍ផ្ទាល់ខ្លួនជាផ្នែកមួយនៃការពិភាក្សាខាងក្រោម ។

សូមគិតអំពីមនុស្សម្នាក់ដែលសំខាន់ចំពោះអ្នក ។

• ហេតុអ្វីបានជាមនុស្សនេះមានសារៈសំខាន់ដល់ម្ល៉េះចំពោះអ្នក ?

• តើទង្វើរបស់អ្នកបង្ហាញថា មនុស្សម្នាក់នេះសំខាន់ប៉ុណ្ណាចំពោះអ្នក ?

នៅក្នុងផ្នែកនៃមេរៀននេះ អ្នកនឹងសិក្សាពីរបៀបដែលបុគ្គលមួយចំនួនបានបង្ហាញដោយសកម្មភាពរបស់ពួកគេថាតើពួកគេស្រឡាញ់ និងដឹងគុណព្រះអង្គសង្គ្រោះប៉ុណ្ណា ។ នៅពេលអ្នកសិក្សា សូមពិចារណាថាតើព្រះអង្គសង្គ្រោះមានសារៈសំខាន់យ៉ាងណាចំពោះអ្នក និងអ្វីដែលអ្នកអាចធ្វើដើម្បីបង្ហាញពីសេចក្តីស្រឡាញ់របស់អ្នកចំពោះទ្រង់ ។ពីរបីថ្ងៃមុនពេលព្រះយេស៊ូវបានប្រមូលពួកសាវករបស់ទ្រង់ជួបជុំគ្នាដើម្បីទទួលទានអាហារនៅបុណ្យរំលងចុងក្រោយរបស់ទ្រង់ នោះទ្រង់បានទៅបេថានី ដើម្បីនៅជាមួយពួកអ្នកដើរតាមទ្រង់មួយចំនួន ( សូមមើល ម៉ាថាយ ២៦:៦ ; យ៉ូហាន ១២:១ ) ។

សូមអាន យ៉ូហាន ១២:៣–៨ ដើម្បីរៀនអំពីអ្វីដែលម៉ារាបានធ្វើសម្រាប់ព្រះអង្គសង្គ្រោះ ពេលទ្រង់គង់នៅភូមិបេថានី ។

• តើទង្វើរបស់ម៉ារាបង្ហាញអ្វីខ្លះអំពីរបៀបដែលនាងស្រឡាញ់ និងដឹងគុណព្រះអង្គសង្គ្រោះ ?

• តើអ្នកអាចរៀនអ្វីខ្លះអំពីព្រះអង្គសង្រ្គោះនៅក្នុងដំណើររឿងនេះ ?

សិស្សអាចផ្តល់ចម្លើយជាច្រើនចំពោះសំណួរមុន រួមទាំងសំណួរខាងក្រោមនេះ ៖ ទ្រង់ត្រូវបានគេចាត់ទុកថាមានតម្លៃដោយអ្នកដើរតាមទ្រង់ ។ ទ្រង់យល់ថាជីវិតរមែងស្លាប់របស់ទ្រង់នឹងមកដល់ទីបញ្ចប់ក្នុងពេលឆាប់ៗនេះ ។ ទ្រង់បានប្រព្រឹត្តចំពោះយូដាសដោយសេចក្តីស្រឡាញ់ និងសេចក្ដីសប្បុរស ទោះជាទ្រង់ដឹងថាយូដាសនឹងក្បត់ទ្រង់ក៏ដោយ ។

• តើអ្នកមានគំនិត ឬអារម្មណ៍អ្វីខ្លះ បន្ទាប់ពីបានសញ្ជឹងគិតពីសេចក្តីពិតទាំងនេះអំពីព្រះអង្គសង្គ្រោះ ?

នៅក្នុង ម៉ាថាយ ២៦:៣–៥ យើងរៀនថា ពួកសម្តេចសង្ឃបានប្រឹក្សាគ្នាអំពីរបៀបដែលពួកគេអាចនឹងធ្វើគត់ព្រះយេស៊ូវ ។ សូមអាន ម៉ាថាយ ២៦:១៤–១៦ ដោយរកមើលអ្វីដែលបានកើតឡើងភ្លាមៗ បន្ទាប់ពីម៉ារាបានចាក់ប្រេងតាំងព្រះយេស៊ូវនៅបេថានី ។

វាប្រហែលជាគួរឲ្យចាប់អារម្មណ៍ក្នុងការដឹងថា ការក្បត់របស់យូដាសចំពោះព្រះយេស៊ូវសម្រាប់ប្រាក់សាមសិបបំណែកបានបំពេញការព្យាករណ៍របស់ព្យាការីសាការីក្នុងព្រះគម្ពីរសញ្ញាចាស់ ( សូមមើល សាការី ១១:១២ ) ។ ម្យ៉ាងទៀត យោងទៅតាមក្រឹត្យវិន័យរបស់ម៉ូសេ ប្រាក់សាមសិបបំណែក គឺជាតម្លៃដែលត្រូវបានប្រើដើម្បីផ្តល់សំណងដល់ម្ចាស់សម្រាប់ការស្លាប់របស់ទាសករ ( សូមមើល និក្ខមនំ ២១:៣២ ) ។

• តើអ្នករៀនអ្វីខ្លះពីការប្រៀបធៀបទង្វើរបស់ម៉ារាទៅនឹងទង្វើរបស់យូដាស ?

សំណួរខាងក្រោមនេះអាចល្អបំផុតឲ្យសិស្សម្នាក់ៗឆ្លើយនៅក្នុងសៀវភៅកំណត់ហេតុសិក្សារបស់ពួកគេ ។

សូមចំណាយពេលបន្តិច ដើម្បីពិនិត្យមើលសប្តាហ៍របស់អ្នកមកទល់ពេលនេះ ។

• តើអ្នកមានឱកាសអ្វីខ្លះដើម្បីបង្ហាញសេចក្ដីស្រឡាញ់របស់អ្នកចំពោះព្រះអង្គសង្គ្រោះ ?

• តើមានពេលណាខ្លះដែលអ្នកចង់ធ្វើឲ្យបានល្អជាងនេះ ?

• តើអ្នកអាចនឹងធ្វើអ្វីផ្សេងទៀតនៅពេលអនាគត ដើម្បីបង្ហាញសេចក្ដីស្រឡាញ់របស់អ្នកចំពោះទ្រង់ឲ្យកាន់តែពេញលេញ ?

ការពិចារណាអំពីរបៀបដែលព្រះបន្ទូលរបស់ព្រះយេស៊ូវអនុវត្តចំពោះយើង

ព្រះយេស៊ូវបានចូលរួមក្នុងអាហារបុណ្យរំលង ដែលគេស្គាល់ថាជាអាហារចុងក្រោយជាមួយពួកសាវករបស់ទ្រង់ប៉ុន្មានថ្ងៃបន្ទាប់ពីម៉ារាបានចាក់ប្រេងតាំងទ្រង់ ។ សូមអាន ម៉ាថាយ ២៦:២០–២១ ដោយរកមើលការប្រកាសដែលព្រះអង្គសង្គ្រោះបានធ្វើអំឡុងពេលអាហារនេះ ។

• ប្រសិនបើអ្នកជាសាវកម្នាក់ តើអ្នកប្រហែលនឹងគិតពីរឿងអ្វីខ្លះនៅគ្រានេះ ?

សូមអាន ម៉ាថាយ ២៦:២២ ដើម្បីមើលពីរបៀបដែលពួកសាវកបានឆ្លើយតប ។

ប្រធាន ឌៀថើរ អេហ្វ អុជដូហ្វ ដែលកាលនោះជាសមាជិកក្នុងគណៈប្រធានទីមួយ បានចែកចាយមេរៀនមួយ ដែលយើងអាចរៀនពីការឆ្លើយតបរបស់ពួកសាវកបាន ។ អ្នកគួរតែមើលវីដេអូ « Lord Is it I? » មាននៅគេហទំព័រ ChurchofJesusChrist.org ចាប់ពីលេខកូដម៉ោង ១:០៩ ដល់ ២:៣០ ឬអានអត្ថបទខាងក្រោម ។

ពួកសិស្សមិនបានសង្ស័យលើសេចក្ដីពិតនូវអ្វីដែល [ ព្រះយេស៊ូវ ] មានបន្ទូលឡើយ ។ ឬក៏មើលជុំវិញខ្លួន ចង្អុលទៅមនុស្សម្នាក់ផ្សេងទៀត ហើយទូលសួរថា « តើគាត់មែនទេ ? »

ផ្ទុយទៅវិញ « នោះគ្រប់គ្នាមានសេចក្ដីព្រួយជាខ្លាំង ហើយចាប់តាំងទូលសួរទ្រង់ថា ព្រះអម្ចាស់អើយ តើទូលបង្គំឬអី ? » [ ម៉ាថាយ ២៦:២២ ; បានគូសបញ្ជាក់បន្ថែម ] ។

ខ្ញុំចង់ដឹងថាតើពួកយើងម្នាក់ៗនឹងធ្វើអ្វីខ្លះ ។ … តើយើងនឹងក្រឡេកមើលអ្នកនៅជុំវិញខ្លួនយើង ហើយគិតក្នុងចិត្តថា « ទ្រង់ប្រហែលជាមានព្រះបន្ទូលពីបងប្រុស ចនសុន ហើយមើលទៅ ។ ខ្ញុំតែងងឿងឆ្ងល់ពីគាត់ » ឬ « ខ្ញុំរីករាយដែលបងប្រុស ប្រោន នៅទីនេះ ។ គាត់ពិតជាត្រូវការស្ដាប់ឮសារលិខិតនេះ » ? ឬតើយើងនឹងមើលមកខ្លួនឯង ហើយទូលសួរសំណួរដ៏សំខាន់នោះ ដូចជាពួកសាវកពីបុរាណ ៖ « តើទូលបង្គំឬអី ? »

ក្នុងឃ្លាដ៏សាមញ្ញនេះ « ព្រះអម្ចាស់អើយ តើទូលបង្គំឬអី ? » គឺការចាប់ផ្ដើមនៃប្រាជ្ញា និងមាគ៌ាឆ្ពោះទៅកាន់ការប្រែចិត្តជឿផ្ទាល់ខ្លួន និងការផ្លាស់ប្ដូរដ៏យូរអង្វែង ។

( ឌៀថើរ អេហ្វ អុជដូហ្វ « Lord, Is It I? ? » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៥៦ )

សេចក្តីពិតមួយ ដែលយើងអាចរៀនពីសេចក្តីថ្លែងការណ៍នេះ និងគំរូរបស់ពួកសាវកគឺថា ការរៀនពិសោធន៍ជីវិតរបស់យើងផ្ទាល់ យោងទៅតាមព្រះបន្ទូលរបស់ព្រះអង្គសង្គ្រោះ ជួយយើងឲ្យនៅលើផ្លូវទៅកាន់ការប្រែចិត្តជឿផ្ទាល់ខ្លួន និងការផ្លាស់ប្តូរដ៏យូរអង្វែង ។

• ហេតុអ្វីបានជាវាសំខាន់សម្រាប់យើងដើម្បីសួរខ្លួនយើងពីរបៀបដែលព្រះបន្ទូលរបស់ព្រះអម្ចាស់អនុវត្តចំពោះយើង ជាជាងការសន្មតថាព្រះបន្ទូលទ្រង់មានន័យសម្រាប់អ្នកផ្សេង ?

• តើមានស្ថានភាពអ្វីខ្លះក្នុងជីវិតរបស់អ្នក ដែលអ្នកអាចសួរថា « ព្រះអម្ចាស់អើយ តើទូលបង្គំឬអី ? »

• តើអ្នកដឹងអ្វីខ្លះអំពីព្រះយេស៊ូវគ្រីស្ទ ដែលអាចលើកទឹកចិត្តអ្នកឲ្យសួរថា « ព្រះអម្ចាស់អើយ តើទូលបង្គំឬអី ? »

ប្រធាន អុជដូហ្វ បានចែកចាយឧទាហរណ៍ពីរអំពីប្រភពដែលយើងអាចប្រើដើម្បីជួយយើងឲ្យពិសោធន៍ជីវិតយើងខាងវិញ្ញាណ ៖

ខ្ញុំសូមផ្តល់យោបល់ថា ព្រះគម្ពីរបរិសុទ្ធ និងសុន្ទរកថាដែលផ្ដល់ឲ្យក្នុងសន្និសីទទូទៅគឺជាកញ្ចក់ឆ្លុះបញ្ចាំងដ៏មានប្រសិទ្ធភាពមួយដែលយើងអាចយកមកឆ្លុះមើលខ្លួនឯងបាន ។

កាលបងប្អូនស្ដាប់ឮ ឬអានពាក្យសម្ដីនៃពួកព្យាការីពីបុរាណ និងសម័យទំនើប សូមចៀសវាងកុំគិតពីរបៀបដែលពាក្យសម្ដីទាំងនោះអនុវត្តចំពោះអ្នកដទៃឡើយ ហើយសួរនូវសំណួរដ៏សាមញ្ញនេះថា ៖ « ព្រះអម្ចាស់អើយ តើទូលបង្គំឬអី ? »

( ឌៀថើរ អេហ្វ អុជដូហ្វ « Lord, Is It I? » Ensign ឬ Liahona ខែ វិច្ឆិកា ឆ្នាំ ២០១៤ ៥៨ )

សូមចំណាយពេលមួយភ្លែតដើម្បីគិតថា តើវាញឹកញាប់ប៉ុណ្ណាដែលអ្នកព្យាយាមអនុវត្តតាមបទគម្ពីរ ឬការបង្រៀនពីសន្និសីទទូទៅមកកាន់ជីវិតរបស់អ្នក ។ សូមគិតអំពីពរជ័យដែលអ្នកមានបទពិសោធន៍សម្រាប់ការខិតខំរបស់អ្នកដើម្បីបញ្ចូលព្រះបន្ទូលរបស់ព្រះអម្ចាស់ទៅក្នុងជីវិតរបស់អ្នក ។

សូមពិចារណាអំពីការអញ្ជើញសិស្សឲ្យចែកចាយបទពិសោធន៍ នៅពេលពួកគេបានអនុវត្តតាមការប្រឹក្សា ឬការបង្រៀនពីព្រះគម្ពីរ ឬសុន្ទរកថាក្នុងសន្និសីទទូទៅមកក្នុងជីវិតរបស់ពួកគេ ។ សូមអញ្ជើញពួកគេឲ្យគិតអំពីរបៀបដែលជីវិតរបស់ពួកគេនឹងខុសគ្នា ប្រសិនបើពួកគេមិនបានជ្រើសរើសអនុវត្តតាមការប្រឹក្សានោះ ។ សិស្សប្រហែលជាបានគិតអំពីបទពិសោធន៍បែបនេះជាផ្នែកនៃសកម្មភាពរៀបចំរបស់សិស្ស ។

រៀនអនុវត្តព្រះបន្ទូលរបស់ព្រះអម្ចាស់ក្នុងជីវិតរបស់អ្នក

សូមសិក្សាយ៉ាងហោចណាស់វគ្គបទគម្ពីរចំណេះចំណានខាងគោលលទ្ធិចំនួនបីខាងក្រោមនេះ ។ នៅពេលអ្នកសិក្សា សូមស្វែងរកការណែនាំពីព្រះវិញ្ញាណបរិសុទ្ធ ដើម្បីកំណត់ពីរបៀបដែលព្រះបន្ទូលរបស់ព្រះអម្ចាស់នៅក្នុងវគ្គបទគម្ពីរទាំងនេះអនុវត្តចំពោះអ្នក ។ អ្នកក៏ប្រហែលចង់សិក្សាសុន្ទរកថាសន្និសីទទូទៅថ្មីៗជាផ្នែកមួយនៃសកម្មភាពនេះផងដែរ ។

• ម៉ាថាយ ៥:១៤–១៦

• កូរិនថូស ទី១ ៦:១៩–២០

• យ៉ាកុប ១:៥–៦

• នីហ្វៃទី១ ៣:៧

• ម៉ូសាយ ២:៤១

បន្ទាប់ពីសិស្សបានសិក្សាចប់ហើយ សូមអញ្ជើញអ្នកស្ម័គ្រចិត្តចែកចាយពីរបៀបមួយចំនួន ដែលខគម្ពីរ ឬសុន្ទរកថាដែលពួកគេបានសិក្សាអនុវត្តចំពោះជីវិតរបស់ពួកគេ ។ សូមពិចារណាប្រើសំណួរខាងក្រោមជាផ្នែកមួយនៃការពិភាក្សា ។

• តើការបង្រៀនអ្វីខ្លះដែលអ្នករកឃើញថាអាចអនុវត្តបានចំពោះស្ថានភាពជីវិតបច្ចុប្បន្នរបស់អ្នក ?

• តើពរជ័យអ្វីខ្លះដែលអ្នកគិតថាអ្នកអាចទទួលបានដោយការអនុវត្តតាមការបង្រៀនទាំងនេះក្នុងជីវិតរបស់អ្នក ?

សូមថ្លែងទីបន្ទាល់អំពីសេចក្ដីពិតដែលអ្នកបានពិភាក្សានៅថ្ងៃនេះ ។ សូមអញ្ជើញសិស្សឲ្យបន្តស្វែងរកឱកាសដើម្បីមើលពីរបៀបដែលព្រះបន្ទូលរបស់ព្រះអម្ចាស់អនុវត្តចំពោះជីវិតរបស់ពួកគេ ។

វិចារណកថា និង ព័ត៌មានសាច់រឿង

ហេតុអ្វីបានជាម៉ារាបានចាក់ប្រេងតាំងព្រះយេស៊ូវ ?

អែលឌើរ ជេម អ៊ី ថាលម៉េហ្គ ( ឆ្នាំ ១៨៦២–១៩៣៣ ) ក្នុងកូរ៉ុមនៃពួកសាវកដប់ពីរនាក់បានថ្លែង ៖

ការចាក់ប្រេងលើសិរសារបស់ភ្ញៀវម្នាក់ដោយប្រេងធម្មតា គឺធ្វើដើម្បីផ្ដល់កិត្តិយសដល់ភ្ញៀវនោះ ការចាក់ប្រេងនៅលើព្រះបាទាទ្រង់ក៏បង្ហាញពីទីសម្គាល់នៃការគោរពខុសពីធម្មតាដែរ ប៉ុន្តែការចាក់ប្រេងលើសិរសា និងព្រះបាទាដោយប្រេងទេព្វិរូ ហើយយ៉ាងច្រើនដូច្នេះ គឺជាទង្វើនៃការគោរពបូជាដោយកម្រដែលស្មើនឹងស្ដេច ។ ទង្វើរបស់ម៉ារាសម្តែងនូវសេចក្តីស្រឡាញ់ដ៏ខ្ពង់ខ្ពស់ វាគឺជាក្លិនក្រអូបដែលចេញពីដួងចិត្តពោរពេញដោយការថ្វាយបង្គំ និងមេត្រីភាព ។

( ជេមស៍ អ៊ី ថាល់មេហ្គ Jesus the Christ [ ឆ្នាំ ១៩១៦ ] ទំព័រ ៥១២ )

តើយើងអាចជៀសវាងការរិះគន់ខ្លួនឯងខ្លាំងពេក ខណៈពេលដែលយើងនៅតែទទួលស្គាល់ថាខ្លួនយើងត្រូវការការកែលម្អដោយរបៀបណា ?

ស៊ិស្ទើរ មីឈែល ឌី ក្រេហ្ក ទីប្រឹក្សាទីមួយក្នុងគណៈប្រធានយុវនារីទូទៅ បានចែកចាយការយល់ឃើញដូចតទៅនេះ ៖

យើងគួរស្វាគមន៍អារម្មណ៍នៃភាពសោកសៅដ៏ទេវភាព ដែលហៅយើងឲ្យទៅកាន់ផ្លូវដ៏ខ្ពស់ជាងមួយ តាមរយៈការស្គាល់ ហើយចៀសវាងពីការក្លែងបន្លំរបស់សាតាំង—ជាការបាក់ទឹកចិត្តដែលរាំងស្ទះការរីកចម្រើនរបស់យើង ។ នេះគឺជាឱកាសមួយដ៏មានតម្លៃដែលសាតាំងជំរុញឲ្យយើងកើតមានអារម្មណ៍នេះជាញឹកញាប់ ។ យើងអាចជ្រើសដើរលើផ្លូវដ៏ខ្ពស់ជាង ដែលដឹកនាំយើងឲ្យស្វែងរកព្រះ ព្រមទាំងភាពសុខសាន្ត និងព្រះគុណរបស់ទ្រង់ ឬយើងអាចស្ដាប់តាមសាតាំងដែលបំពុលយើងជាមួយនឹងសារលិខិតថា យើងនឹងពុំល្អគ្រប់គ្រាន់ទេ ដូចជា ៖ ពុំសូវមាន ពុំសូវឆ្លាត ពុំស្អាតគ្រប់គ្រាន់ឡើយ គឺយើងគ្មានអ្វីល្អនោះទេ ។ ភាពសោកសៅរបស់យើងអាចជួយពង្រឹងយើងឲ្យកែលម្អ—ឬក៏បំផ្លាញយើង ។

( មីឈែល ឌី ក្រេហ្គ « Divine Discontent » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ៥៣ )

សកម្មភាពរៀនសូត្របន្ថែម

នៅពេលយើងយល់ឃើញពីបញ្ហាច្បាស់ នោះយើងគួរមើលមកខ្លួនឯងជាមុន ជាជាងវិនិច្ឆ័យអ្នកដទៃ

សូមពិចារណានាំយកកញ្ចក់ឆ្លុះមួយផ្ទាំង និងកញ្ចក់ថ្លាមួយបំណែក ឬបង្អួចតូចមួយមកថ្នាក់រៀន ។

បន្ទាប់ពីការពិភាក្សា នោះសាវកបានសួរថា « ព្រះអម្ចាស់អើយ តើទូលបង្គំឬអី ? » សូមបង្ហាញសិស្សនូវកញ្ចក់ឆ្លុះមុខ និងកញ្ចក់ថ្លាមួយបំណែក ។ សូមសួរសំណួរដូចខាងក្រោមនេះ ៖

• ហេតុអ្វីបានជាអ្នកគិតថា វាសំខាន់ក្នុងការសួរថា « ព្រះអម្ចាស់អើយ តើទូលបង្គំឬអី ? » [ បង្ហាញកញ្ចក់ឆ្លុះមុខ ] ជំនួសឲ្យ « ព្រះអម្ចាស់អើយ តើគាត់ ឬនាងឬអី ? » [ សូមបង្ហាញកញ្ចក់ថ្លា ] ?

• តើបញ្ហាអ្វីខ្លះដែលយើងអាចចៀសវាងបានក្នុងទំនាក់ទំនងរបស់យើង ប្រសិនបើយើងមើលខ្លួនយើង [ បង្ហាញកញ្ចក់ឆ្លុះមុខ ] ជំនួសឲ្យការវិនិច្ឆ័យលើអ្នកដទៃ [ បង្ហាញកញ្ចក់ថ្លា ] ?

វីដេអូ « Looking through Windows » ( ២:១៩ ) ក៏បានបង្ហាញផងដែរ ដើម្បីពង្រឹងការយល់ដឹងរបស់សិស្សអំពីគោលការណ៍នេះ ។ ( វីដេអូនេះអាចបញ្ចាំងបាន នៅពេលសិស្សសិក្សា ម៉ាថាយ ៧ ) ។