ម៉ាថាយ ២៦:២៦–៣០; លូកា ២២:១៩–២០

ពិធីសាក្រាម៉ង់

នៅកន្លែងដែលគេស្គាល់ថាជាបន្ទប់ជាន់លើ ព្រះអង្គសង្គ្រោះ « បានអង្គុយជាមួយសិស្សទាំងដប់ពីរនាក់ » ( ម៉ាថាយ ២៦:២០ ) ហើយបានធ្វើពិធីបុណ្យរំលងជាលើកចុងក្រោយកាលនៅក្នុងអំឡុងព្រះជន្មរមែងស្លាប់ ។ ក្នុងអំឡុងពេលអាហារបុណ្យរំលងចុងក្រោយនេះ ព្រះយេស៊ូវគ្រីស្ទបានតាំងពិធីបរិសុទ្ធនៃសាក្រាម៉ង់ឡើង ជាវិធីថ្មីសម្រាប់ពួកសិស្សទ្រង់ក្នុងការចងចាំទ្រង់ ។ មេរៀននេះអាចជួយអ្នកឲ្យយល់ និងមានអារម្មណ៍ថាមានសារៈសំខាន់ក្នុងការចងចាំព្រះអង្គសង្គ្រោះ នៅពេលអ្នកទទួលទានសាក្រាម៉ង់ ។

ការអញ្ជើញសិស្សឲ្យចែកចាយ ។ សូមរកមើលឱកាសដើម្បីអញ្ជើញសិស្សឲ្យចែកចាយបទពិសោធន៍របស់ពួកគេ ។ ការចែកចាយការយល់ដឹង និងបទពិសោធន៍ដែលទាក់ទងអាចជួយសិស្សឲ្យយល់ច្បាស់អំពីគោលលទ្ធិ និងគោលការណ៍ទាំងឡាយនៃដំណឹងល្អ ។ នៅពេលសិស្សចែកចាយការយល់ដឹង និងបទពិសោធន៍នានា នោះជាញឹកញាប់ពួកគេត្រូវបានដឹកនាំដោយព្រះវិញ្ញាណបរិសុទ្ធឲ្យមានទីបន្ទាល់កាន់តែស៊ីជម្រៅអំពីសេចក្ដីពិតគ្រប់យ៉ាងដែលពួកគេកំពុងបង្ហាញ ។ តាមរយៈព្រះចេស្ដានៃព្រះវិញ្ញាណបរិសុទ្ធ នោះពាក្យសម្ដី និងបទពិសោធន៍ទាំងឡាយរបស់ពួកគេក៏អាចមានឥទ្ធិពលខ្លាំងទៅលើដួងចិត្ត និងគំនិតរបស់មិត្តភក្ដិពួកគេផងដែរ ។

ការរៀបចំរបស់សិស្ស ៖ សូមប្រាប់សិស្សថានៅក្នុងមេរៀននេះ ពួកគេនឹងត្រូវបានអញ្ជើញឲ្យវាយតម្លៃបទពិសោធន៍របស់ពួកគេក្នុងការទទួលទានសាក្រាម៉ង់ ។ សូមអញ្ជើញសិស្សឲ្យគិតអំពីបទពិសោធន៍ថ្មីៗបំផុតរបស់ពួកគេក្នុងការទទួលទានសាក្រាម៉ង់ ហើយមកកាន់ថ្នាក់រៀនដោយបានរៀបចំខ្លួនដើម្បីចែកចាយអ្វីដែលពួកគេកំពុងធ្វើ កំពុងគិត ឬកំពុងទទួលអារម្មណ៍ដែលជួយពួកគេឲ្យចងចាំព្រះអង្គសង្គ្រោះ ។

សកម្មភាពរៀនសូត្រដែលអាចមាន

សារៈសំខាន់នៃពិធីសាក្រាម៉ង់

សម្រាប់សកម្មភាពដូចខាងក្រោមនេះ សូមពិចារណាអញ្ជើញសិស្សឲ្យឆ្លើយជាគូ ឬជាក្រុមតូចៗ ។ បន្ទាប់មក សូមអញ្ជើញពួកគេឲ្យពិភាក្សាចម្លើយរបស់ពួកគេជាមួយនឹងសិស្សក្នុងថ្នាក់ ។ វាក៏អាចមានប្រយោជន៍ផងដែរក្នុងការអញ្ជើញសិស្សឲ្យដើរតួក្នុងសាច់រឿងនេះ ។

តើអ្នកអាចឆ្លើយតបយ៉ាងណា ប្រសិនបើមាននរណាម្នាក់ចង់សួរអ្នកនូវសំណួរដូចខាងក្រោម ៖

• ហេតុអ្វីបានជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយទៅព្រះវិហាររៀងរាល់ថ្ងៃអាទិត្យ ?

ជាជម្រើសមួយក្នុងការអានសេចក្ដីថ្លែងការណ៍ខាងក្រោម សូមពិចារណាចែកចាយបទពិសោធន៍ផ្ទាល់ខ្លួនអំពីការទទួលស្គាល់តួនាទីសំខាន់នៃពិធីបរិសុទ្ធនៃពិធីសាក្រាម៉ង់ជាផ្នែកនៃការទៅថ្វាយបង្គំនៅព្រះវិហារ

ហេតុផលសំខាន់មួយដែលយើងទៅថ្វាយបង្គំនៅព្រះវិហារគឺដើម្បីទទួលទានសាក្រាម៉ង់ ។ ស៊ិស្ទើរ ឆារិល អេ អេសព្លិន អតីតគណៈប្រធានអង្គការបឋមសិក្សាទូទៅ បានចែកចាយការប្រាស្រ័យទាក់ទងគ្នាមួយ ដែលបានកើតឡើងរវាងបុរសអាយុ ៩៦ ឆ្នាំ និងកូនប្រុសរបស់គាត់ ដែលបកស្រាយបំភ្លឺអំពីតួនាទីដ៏សំខាន់នៃការទទួលសាក្រាម៉ង់ ដែលជាផ្នែកមួយនៃការថ្វាយបង្គំនៅព្រះវិហារ ។

កាលណាយើងកាន់តែពិចារណាអំពីសារៈសំខាន់នៃពិធីសាក្រាម៉ង់ នោះវាកាន់តែពិសិដ្ឋ និងមានអត្ថន័យចំពោះយើង ។ នេះគឺជាអ្វីដែលឪពុកអាយុ ៩៦ ឆ្នាំ បានសម្ដែងអារម្មណ៍ ពេលកូនប្រុសរបស់គាត់សួរថា « ប៉ា ហេតុអ្វីប៉ាទៅព្រះវិហារ ? ប៉ា មើលមិនឃើញ ប៉ាមិនអាចស្ដាប់ឮ ប៉ាពិបាកធ្វើដំណើរណាស់ ។ ហេតុអ្វីប៉ាទៅព្រះវិហារ ? » ឪពុកបានតបថា « គឺសាក្រាម៉ង់ ។ ប៉ាទៅទទួលទានសាក្រាម៉ង់ » ។

( ឆារិល អេ អេសព្លិន « The Sacrament—a Renewal for the Soul » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ១៤ )

• តើអ្នកគិតថាបុរសរូបនេះយល់ និងមានអារម្មណ៍យ៉ាងណា ដែលធ្វើឲ្យវាមានសារៈសំខាន់យ៉ាងខ្លាំងចំពោះគាត់ ?

សូមអញ្ជើញសិស្សឲ្យសញ្ជឹងគិតដោយស្ងាត់ស្ងៀម នៅពេលពួកគេបំពេញការវាយតម្លៃពីខ្លួនឯងខាងក្រោមនេះ ។ សូមពិចារណាផ្តល់ពេលវេលាឲ្យពួកគេថតចម្លើយរបស់ពួកគេទុកនៅក្នុងសៀវភៅកំណត់ហេតុការសិក្សារបស់ពួកគេ ។

សូមវាយតម្លៃបទពិសោធន៍របស់អ្នកក្នុងការមកព្រះវិហារ និងការចូលរួមនៅក្នុងពិធីបរិសុទ្ធនៃពិធីសាក្រាម៉ង់ ។ ដោយប្រើមាត្រដ្ឋានពីមួយទៅប្រាំ ដោយមួយទាប និងប្រាំខ្ពស់ សូមឆ្លើយសំណួរខាងក្រោម ។

• តើវាមានអាទិភាពប៉ុណ្ណាសម្រាប់អ្នកដើម្បីចូលក្នុងការថ្វាយបង្គំនៅព្រះវិហារ និងការទទួលទានសាក្រាម៉ង់ ?

• ពេលអ្នកទទួលទានសាក្រាម៉ង់ តើអ្នកទំនងជាគិតដល់ព្រះយេស៊ូវគ្រីស្ទ ហើយមានបទពិសោធន៍ដ៏មានអត្ថន័យយ៉ាងណាដែរ ?

បន្ទាប់ពីអ្នកបានវាយតម្លៃបទពិសោធរបស់អ្នកហើយ សូមសញ្ជឹងគិតថាហេតុអ្វីបានជាអ្នកចាត់ថ្នាក់ខ្លួនឯងយ៉ាងដូច្នោះ ។ នៅពេលអ្នកសិក្សាមេរៀននេះ សូមស្វែងរកជំនួយពីព្រះអម្ចាស់ដើម្បីដឹងពីរបៀបធ្វើឲ្យមានការយល់ដឹងកាន់តែស៊ីជម្រៅអំពីសារៈសំខាន់នៃការចងចាំព្រះអង្គសង្គ្រោះ នៅពេលអ្នកទទួលទានសាក្រាម៉ង់ ។

ព្រះយេស៊ូវគ្រីស្ទបានតាំងពិធីសាក្រាម៉ង់នេះឡើង

ព្រះយេស៊ូវគ្រីស្ទបានចូលរួមក្នុងពិធីបុណ្យរំលងមុនការរងទុក្ខរបស់ទ្រង់នៅក្នុងសួនគែតសេម៉ានី និងការសុគតនៅលើឈើឆ្កាង ។ ព្រឹត្តិការណ៍នេះត្រូវបានគេស្គាល់ថាជាអាហារចុងក្រោយ ។ បន្ទាប់ពីព្រះអង្គសង្គ្រោះសោយអាហារបុណ្យរំលងជាមួយនឹងពួកសាវកទ្រង់ នោះទ្រង់បានតាំងពិធីបរិសុទ្ធសាក្រាម៉ង់នេះឡើង ។

ប្រសិនបើសិស្សនឹងទទួលបានអត្ថប្រយោជន៍ពីការយល់ដឹងកាន់តែស៊ីជម្រៅអំពីពិធីបរិសុទ្ធនៃបុណ្យរំលង និងទំនាក់ទំនងរបស់វាទៅនឹងពិធីសាក្រាម៉ង់ សូមពិចារណាធ្វើសកម្មភាពនៅក្នុងផ្នែក « សកម្មភាពសិក្សាបន្ថែម » នៅចុងបញ្ចប់នៃមេរៀននេះ ។

សូមអាន ម៉ាថាយ ២៦:២៦–៣០ និង លូកា ២២:១៩–២០ ដោយរកមើលអ្វីដែលព្រះអង្គសង្គ្រោះបានបង្រៀនពួកសាវករបស់ទ្រង់អំពីគោលបំណងនៃពិធីសាក្រាម៉ង់ ។ អ្នកគួរគូសចំណាំពាក្យ ឬឃ្លាសំខាន់ៗ ។ អ្នកក៏គួរមើលវីដេអូ « Always Remember Him » ចាប់ពីលេខកូដម៉ោង ០:០០ ដល់ ០:៥៣ ផងដែរ ។ វីដេអូនេះមាននៅលើគេហទំព័រ ChurchofJesusChrist.org ។

លូកា ២២:១៩–២០ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាគូសចំណាំវគ្គបទគម្ពីរចំណេះចំណានខាងគោលលទ្ធិតាមវិធីដែលងាយសម្គាល់ ដូច្នេះអ្នកអាចរកឃើញវាដោយងាយស្រួល ។ អ្នកនឹងរៀនបន្ថែមអំពីវគ្គបទគម្ពីរចំណេះចំណានខាងគោលលទ្ធិនេះនៅក្នុងមេរៀនក្រោយ ។

• តើអ្វីជាគោលបំណងរបស់ព្រះអង្គសង្គ្រោះក្នុងការតាំងពិធីបរិសុទ្ធនៃសាក្រាម៉ង់ឡើង ?

សេចក្តីពិតមួយដែលយើងអាចរៀនពីវគ្គបទគម្ពីរទាំងនេះគឺថា ព្រះយេស៊ូវគ្រីស្ទបានតាំងពីធីសាក្រាម៉ង់នេះឡើងដើម្បីជួយឲ្យយើងចងចាំដល់ទ្រង់ ។ទោះបីជាព្រះអង្គសង្គ្រោះមិនទាន់បានជួបប្រទះនឹងការរងទុក្ខវេទនា និងទុក្ខព្រួយនៃពលិកម្មដ៏ធួនរបស់ទ្រង់ក៏ដោយ ក៏ពិធីបរិសុទ្ធ និងនិមិត្តរូបដែលទ្រង់កំពុងបង្រៀនពួកសាវករបស់ទ្រង់ គឺដើម្បីជួយឲ្យពួកគេចងចាំទ្រង់ និងអំណោយទាននៃដង្វាយធួនរបស់ទ្រង់ដែរ ។

• តើបទគម្ពីរ ឬបទពិសោធន៍ផ្ទាល់ខ្លួនអ្វីខ្លះបានជួយអ្នកឲ្យសញ្ជឹងគិតអំពីការលះបង់ដែលព្រះអង្គសង្គ្រោះបានធ្វើសម្រាប់អ្នក ?

• តើអ្នកមានអារម្មណ៍យ៉ាងណាចំពោះព្រះអង្គសង្គ្រោះ ពេលអ្នកអានខគម្ពីរទាំងនេះ ឬគិតអំពីបទពិសោធន៍ទាំងនេះ ?

ប្រសិនបើសិស្សត្រូវការជំនួយក្នុងការរំឭកពីបទពិសោធន៍ និងអារម្មណ៍នោះ សូមពិចារណាការចែកចាយបទពិសោធន៍ផ្ទាល់ខ្លួន និងពាក្យសម្ដីរបស់បងប្រុស ឡាន់ នៅក្នុងផ្នែក « វិចារណកថា និង ព័ត៌មានសាច់រឿង » នៃមេរៀននេះ ឬបទគម្ពីរផ្សេងទៀតដូចជា គោលលទ្ធិ និង សេចក្ដីសញ្ញា ១៩:១៦–១៩ ឬ អាលម៉ា ៧:១១–១៣ ជាដើម ។ នៅក្នុងមេរៀននាពេលអនាគត សិស្សនឹងសិក្សាវគ្គបទគម្ពីរទាំងនេះឲ្យកាន់តែលម្អិតជាផ្នែកនៃការយល់ដឹងអំពីទុក្ខលំបាក និងបទពិសោធន៍របស់ព្រះអង្គសង្គ្រោះនៅក្នុងសួនច្បារគែតសេម៉ានី ។

• តើនិមិត្តសញ្ញានៃពិធីសាក្រាម៉ង់អាចជួយអ្នកឲ្យយល់កាន់តែច្បាស់អំពីអ្វីដែលព្រះអង្គសង្គ្រោះបានធ្វើ និងអាចធ្វើសម្រាប់អ្នកយ៉ាងដូចម្ដេច ?

ការបង្កើតគម្រោងមេរៀន

សូមស្រមៃថា អ្នកត្រូវបានស្នើសុំឲ្យបង្រៀនអំពីពិធីសាក្រាម៉ង់នៅក្នុងការពិភាក្សានៃការសិក្សាព្រះគម្ពីរនាពេលខាងមុខនៅក្នុងគេហដ្ឋានរបស់អ្នក ។ ដោយប្រើបទគម្ពីរដែលអ្នកទើបតែបានសិក្សា និងសេចក្ដីយោងផ្សេងទៀតដែលអ្នកជ្រើសរើស ( ដូចជា សេចក្ដីណែនាំដល់បទគម្ពីរទាំងឡាយ « បុណ្យសាក្រាម៉ង់ » គេហទំព័រ scriptures.ChurchofJesusChrist.org ឬសុន្ទរកថាសន្និសីទទូទៅថ្មីៗ ) រៀបចំដើម្បីជួយអ្នកដទៃឲ្យយល់ និងទទួលអារម្មណ៍ពីសារៈសំខាន់នៃពិធីសាក្រាម៉ង់ ។

បន្ថែមលើនេះ អត្ថបទ « The Bread and the Water » ( Ensign ខែ កក្កដា ឆ្នាំ ២០១៧ ទំព័រ ៦៨–៦៩ ) ក៏អាចមានប្រយោជន៍ដែរ ។

សូមបង្ហាញការណែនាំខាងក្រោមនេះឲ្យសិស្សយោងទៅ នៅពេលពួកគេបង្កើតគម្រោងមេរៀនរបស់ពួកគេ ។

គម្រោងមេរៀនរបស់អ្នកគួររួមបញ្ចូលដូចតទៅនេះ ៖ ( ១ ) វគ្គបទគម្ពីរមួយ ឬច្រើន ឬសេចក្តីថ្លែងការណ៍ដោយអ្នកដឹកនាំសាសនាចក្រអំពីពិធីសាក្រាម៉ង់ដើម្បីសិក្សា និងសញ្ជឹងគិត ( ២ ) យ៉ាងហោចណាស់សំណួរពីរដែលអ្នកអាចសួរដើម្បីយល់កាន់តែស៊ីជម្រៅ និង ( ៣ ) ការអញ្ជើញឲ្យអនុវត្តនូវសេចក្ដីពិតដែលអ្នកពិភាក្សា ។ សូមប្រើសំណួរមួយចំនួន ឬទាំងអស់ខាងក្រោមដើម្បីជួយណែនាំអ្នកក្នុងការបង្កើតគម្រោងមេរៀនរបស់អ្នក ។

• តើពិធីសាក្រាម៉ង់ជាអ្វីទៅ ?

• តើពិធីសាក្រាម៉ង់អាចជួយយើងឲ្យយល់កាន់តែច្បាស់អំពីព្រះអង្គសង្គ្រោះ និងដង្វាយធួនរបស់ទ្រង់ដោយរបៀបណា ?

• តើអ្វីបានជួយអ្នកឲ្យមានបទពិសោធន៍ដ៏មានអត្ថន័យ ពេលទទួលទានសាក្រាម៉ង់ ?

• តើជីវិតរបស់អ្នកអាចខុសគ្នាយ៉ាងណា បើអ្នកចងចាំព្រះយេស៊ូវគ្រីស្ទបានញឹកញាប់ជាងនេះ ?

សូមលើកទឹកចិត្តសិស្សឲ្យខិតខំធ្វើបន្ថែមទៀតដើម្បីចងចាំព្រះអង្គសង្គ្រោះ នៅពេលពួកគេទទួលទានសាក្រាម៉ង់ ។

វិចារណកថា និង ព័ត៌មានសាច់រឿង

តើអ្វីទៅជាទំនាក់ទំនងរវាងបុណ្យរំលង និងពិធីសាក្រាម៉ង់ ?

តារាងផ្ទាំងព័ត៌មាន « The Passover Supper » ( New Era ខែ មេសា ឆ្នាំ ២០១៩ ទំព័រ ៨–៩ ) អាចជួយក្នុងការយល់ដឹងអំពីទំនាក់ទំនងរវាងបុណ្យរំលង និងពិធីសាក្រាម៉ង់ ។

ហេតុអ្វីបានជាយើងប្រើទឹកសម្រាប់ធ្វើពិធីសាក្រាម៉ង់ជំនួសឲ្យស្រា ?

គោលលទ្ធិ និង សេចក្តីសញ្ញា ២៧:១–២ ចែងថា វាមិនមានបញ្ហាចំពោះអ្វីដែលត្រូវប្រើសម្រាប់ពិធីសាក្រាម៉ង់នោះទេ ដរាបណាវាត្រូវបានប្រារព្ធ « ដោយភ្នែកស្មោះត្រង់ទាំងស្រុងចំពោះសិរីល្អរបស់ [ ព្រះគ្រីស្ទ ] » នោះ ( ខទី ២ ) ។ បច្ចុប្បន្ន ថ្នាក់ដឹកនាំសាសនាចក្រស្នើសុំឲ្យយើងប្រើទឹក នៅពេលយើងទទួលទានសាក្រាម៉ង់ ។

តើខ្ញុំអាចធ្វើអ្វីខ្លះដើម្បីធ្វើឲ្យពិធីសាក្រាម៉ង់កាន់តែមានអត្ថន័យ ?

ប្រធាន ស្ទីវិន ចេ ឡាន់ ប្រធានយុវជនទូទៅ បានបង្រៀន ៖

រាល់ពេលដែលឌីកុនកាន់ថាសសាក្រាម៉ង់ នោះយើងនឹកឃើញដល់ដំណើររឿងដ៏ពិសិដ្ឋនៃអាហារចុងក្រោយ នៅសួនច្បារគែតសេម៉ានី កាល់វ៉ារី និងសួននៃផ្នូរសព ។ នៅពេលព្រះអង្គសង្គ្រោះមានព្រះបន្ទូលទៅសាវករបស់ទ្រង់ថា « ចូរធ្វើបុណ្យនេះ ដើម្បីរំឭកពីខ្ញុំចុះ » [ លូកា ២២:១៩ ] នោះទ្រង់ក៏មានបន្ទូលបែបនោះរាប់ជំនាន់មកហើយមកកាន់យើងម្នាក់ៗ ។ ទ្រង់មានព្រះបន្ទូលអំពីអព្ភូតហេតុ មិនចេះចប់ដែលទ្រង់នឹងប្រទាន ពេលឌីកុន គ្រូ និងសង្ឃនាពេលអនាគតហុចនំប៉័ង និងទឹករបស់ទ្រង់ ហើយអញ្ជើញបុត្រាបុត្រីទ្រង់ឲ្យទទួលយកអំណោយទានដ៏ធួនរបស់ទ្រង់ ។

និមិត្តរូបសាក្រាម៉ង់ទាំងអស់ចង្អុលបង្ហាញយើងទៅរកអំណោយទាននោះ ។ យើងសញ្ជឹងគិតដល់នំប៉័ងដែលទ្រង់ធ្លាប់បានកាច់—និងនំប៉័ងដែលសង្ឃកំពុងកាច់នៅចំពោះមុខយើងនាពេលនេះ ។ យើងគិតដល់អត្ថន័យនៃទឹកដែលបានញែកចេញនាពេលនោះ និងពេលនេះ ដូចការអធិស្ឋានសាក្រាម៉ង់ទាំងនោះចេញពីមាត់សង្ឃវ័យក្មេងយ៉ាងមុតមាំ ទៅកាន់ដួងចិត្តរបស់យើង និងស្ថានសួគ៌ ហើយរំឭកដល់សេចក្ដីសញ្ញាដែលភ្ជាប់យើងទៅនឹងព្រះចេស្ដាដ៏ខ្លាំងនៃសេចក្ដីសង្គ្រោះរបស់ព្រះគ្រីស្ទ ។ យើងអាចគិតអំពីអត្ថន័យវា ពេលដែលឌីកុនហុចនំប៉័ង និងទឹកដ៏ពិសិដ្ឋឲ្យយើង ឈរនៅកន្លែងដែលព្រះយេស៊ូវនឹងឈរ បើទ្រង់គង់នៅទីនោះ ហើយចង់សម្រាលបន្ទុក និងការឈឺចាប់យើង ។

( ស្ទីវិន ជេ ឡាន់ « Finding Joy in Christ » Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៣៦ )

ប្រធាន ដាល្លិន អេក អូក ក្នុងគណៈប្រធានទីមួយបានចែកចាយការប្រឹក្សាដូចខាងក្រោមនេះ ៖

នៅអំឡុងការប្រជុំសាក្រាម៉ង់—ហើយជាពិសេសអំឡុងការបម្រើនៃពិធីសាក្រាម៉ង់—យើងគប្បីសញ្ជឹងគិតលើការថ្វាយបង្គំ ហើយទប់អារម្មណ៍ពីអស់ទាំងសកម្មភាពផ្សេងៗទៀត ជាពិសេសពីអាកប្បកិរិយាដែលអាចរំខានដល់ការថ្វាយបង្គំរបស់អ្នកដទៃដែរ ។ សូម្បីតែអ្នកដេកលក់ស្ងាត់ៗដែលគិតថាមិនរំខានអ្នកដទៃក៏ដោយ ។ ការប្រជុំសាក្រាម៉ង់មិនមែនជាពេលមួយសម្រាប់អានសៀវភៅ ឬទស្សនាវដ្ដីនោះទេ ។ យុវវ័យអើយ វាមិនមែនជាពេលមួយសម្រាប់ខ្សឹបពីការសន្ទនាតាមទូរសព្ទ ឬសម្រាប់ផ្ញើសារទៅមនុស្សដែលនៅទីកន្លែងផ្សេងទៀតនោះទេ ។ ពេលយើងទទួលទានសាក្រាម៉ង់ យើងធ្វើសេចក្ដីសញ្ញាដ៏ពិសិដ្ឋមួយថា យើងនឹងតែងតែចងចាំព្រះអង្គសង្គ្រោះជានិច្ច ។ គួរឲ្យសោកស្ដាយណាស់ដែលឃើញមនុស្សបំពានលើសេចក្ដីសញ្ញានោះស្ទើរតែគ្រប់កិច្ចប្រជុំ ។

( ដាល្លិន អេក ដាល្លិន « Sacrament Meeting and the Sacrament » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ១៨–១៩ )

សកម្មភាពរៀនសូត្របន្ថែម

បុណ្យរំលង

ដើម្បីជួយសិស្សឲ្យយល់អំពីទំនាក់ទំនងរវាងបុណ្យរំលង និងពិធីសាក្រាម៉ង់ សូមអញ្ជើញសិស្សឲ្យពិនិត្យមើលរូបភាពនៃអាហារបុណ្យរំលង និងពិធីសាក្រាម៉ង់ ឬពិចារណាដាក់បង្ហាញនំប៉័ងបន្ទះៗ ( ឬនំប្រៃ ) និងពែងនៅលើតុម្ខាង និងថាសសាក្រាម៉ង់នៅលើតុម្ខាងទៀត ។ សូមអញ្ជើញសិស្សឲ្យចែកចាយអ្វីដែលពួកគេដឹងអំពីធាតុសំខាន់ៗនៃបុណ្យរំលងដែលបានប្រារព្ធពីបុរាណ និងទំនាក់ទំនងរបស់វាទៅនឹងពិធីបរិសុទ្ធនៃពិធីសាក្រាម៉ង់ដែលយើងប្រារព្ធនៅសព្វថ្ងៃនេះ ។

ការធ្វើឲ្យពិធីសាក្រាម៉ង់កាន់តែមានអត្ថន័យ

សូមពិចារណាបង្ហាញវីដេអូ « That They Do Always Remember Him » ( ៦:២៩ ) ដោយអែលឌើរ ក្លូឌីយ៉ូ អ័រ អិម កូស្តា នៃពួកចិតសិបនាក់ ។ សូមអញ្ជើញសិស្សឲ្យរកមើលការប្រឹក្សាពីអែលឌើរ កូស្តា ដែលអាចជួយធ្វើឲ្យសាក្រាម៉ង់កាន់តែមានន័យសម្រាប់ពួកគេ ។