Doktrinal nga Kahanas: Mateo 11:28–30

“Duol Kamo Kanako … ug Papahulayon Ko Kamo”

Gitudlo ni Jesukristo nga kon moduol kita Kaniya, Iyang himoong sayon ang atong mga palas-anon ug papahulayon kita.Hatagan ka og oportunidad niini nga leksiyon nga ipasabot ang imong nasabtan niini nga doktrina pinaagi sa paggamit sa mga baroganan sa pag-angkon og espirituhanong kahibalo sa sitwasyon nga pareho sa mga kasinatian nga lagmit nga aduna ka sa imong kaugalingong kinabuhi.

Doktrinal nga kahanas pinaagi sa pagpadayag. Si Elder Kim B. Clark sa Seventy mipakigbahin sa mosunod mahitungod sa doktrinal nga kahanas: “Gusto kong masayod kamo ug mobati sa inyong kasingkasing nga gipadayag kini sa Ginoo; milagro kini. . Kanunay akong namalandong kon sa unsa nga paagi kini miabot ug kanus-a kini miabot ug ngano nga kini miabot. Akong nakita ang Doctrinal Mastery sa mas dakong kahulugan sa Church education ug sa talagsaong buhat sa Ginoo dinhi” (Kim B. Clark, “Doctrinal Mastery ug Pagpatuhop sa Nakat-unan” [gabii uban sa General Authority, Peb.17, 2017], broadcasts.ChurchofJesusChrist.org).

Pag-andam sa estudyante: Dapita ang mga estudyante nga ipraktis ang pagmemorya sa pakisayran sa doktrinal nga kahanas ug mahinungdanong hugpong sa mga pulong sa kasulatan para sa Mateo 11:28–30 (o ang tibuok nga tudling kon kaya kini sa mga estudyante). Hangyoa sila nga maghunahuna mahitungod sa kon sa unsang paagi nila magamit ang ilang nakat-onan mahitungod sa abilidad ni Jesukristo nga pas-anon ang ilang mga palas-anon kon moduol sila Kaniya.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “Mateo 11:28–30,” nga mao ang pangkontekstong leksiyon para sa tudling sa doktrinal nga kahanas sa Mateo 11:28–30 . Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, siguroha nga itudlo usab ang tukma nga pangkontekstong leksiyon nianang semanaha.

Imemorya ug ipasabot

Hatagi ang mga estudyante og oportunidad nga imemorya ang pakisayran ug mahinungdanong hugpong sa mga pulong sa kasulatan para sa Mateo 11:28–30 (Mahimong dapiton ang mga estudyante nga imemorya ang tibuok nga tudling kon kaya nila.)

Ang usa ka opsiyon mao ang pagsulat sa mosunod diha sa pisara ug unya dapiton ang mga estudyante nga ipraktis ang pagsulti sa pamahayag isip usa ka klase o sa ilang kaugalingon.

“Mateo __:28–__: Duol kamo ka____, kamong ta____ nga gi____ ug gibug-atan sa inyong gi____, ug pa____ ko ka____.”

Pagpasabot sa kamatuoran

Hatagi ang mga estudyante og oportunidad nga ipasabot ang doktrina nga gitudlo sa miaging leksiyon nga kon moduol kita kang Jesukristo, Iyang himoong sayon ang atong mga palas-anon ug papahulayon kita.

Ang usa ka paagi aron buhaton kini mao ang pagpakita sa mosunod nga hulagway ug pagdapit sa mga estudyante nga hinumdoman kon unsa ang yugo o ipasabot ang paggamit og yugo.

Hinumdomi kon unsa ang yugo (tan-awa ang mosunod nga hulagway). Rebyoha ang Mateo 11:28–30 , nga mangita sa mga kamatuoran nga gitudlo sa Manluluwas.

Samtang nagtan-aw sa hulagway sa yugo, ipasabot kon sa unsang paagi nga makatabang kanato ang Manluluwas sa atong mga palas-anon. Siguroha nga ilakip ang atong tahas samtang nakigtambayayong kita kang Kristo.

Ipraktis ang paggamit

Kon kinahanglang rebyohon sa mga estudyante ang mga baroganan sa pag-angkon og espirituhanong kahibalo, ikonsiderar ang pagdapit kanila nga buhaton kini diha sa mga grupo nga adunay tulo ka sakop. Sa mga grupo nga adunay tulo ka sakop, ang kada sakop sa grupo mahimong mangita og lain-laing baroganan. Ang kada tawo mahimong mogamit og ilang kaugalingong mga pulong aron ipasabot ang baroganan ngadto sa ilang grupo. Unya ipakita o ihatag ang mosunod nga kalihokan, ug hangyoa ang mga estudyante nga itukma ang baroganan ngadto sa pasabot niini. (Ang mga saktong tubag mao ang 1. C; 2. A; 3. B.)

Kon gikinahanglan, rebyoha ang mga baroganan sa pag-angkon og espirituhanong kahibalo pinaagi sa pagtuon sa mga parapo [paragraph] 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2020). Unya itukma ang kada usa sa mosunod nga mga kapahayag [sentence] sa angay nga baroganan sa pag-angkon og espirituhanong kahibalo.

1. Ang pagkat-on sa pag-ila ug paglikay sa dili kasaligang mga tinubdan makapanalipod nato gikan sa sayop nga impormasyon ug gikan niadtong nagtinguha sa pagdaot sa atong tinuohan.

2. Samtang magtinguha kita sa pagpalambo sa atong panabot ug pagsulbad sa mga problema, importante nga mosalig kita sa pagpamatuod nga atong gibatonan bahin ni Jesukristo, sa Pagpahiuli sa Iyang ebanghelyo, ug sa mga pagtulon-an sa Iyang gi-orden nga mga propeta.

3. Tinguhaon nato ang tabang sa Espiritu Santo aron atong matan-aw ang mga butang sama sa pagtan-aw niini sa Ginoo.

A. Lihokon inubanan sa hugot nga pagtuo

B. Susihon ang mga konsepto ug mga pangutana inubanan sa mahangturong panglantaw

C. Tinguhaon ang dugang nga panabot pinaagi sa balaanong gitudlo nga mga tinubdan

Sitwasyon

Lagmit nga makatabang kon dapiton ang mga estudyante nga hinumdoman ang mga palas-anon nga ilang gihunahuna sa miaging leksiyon.

Sa duha o tulo ka kapahayag, paghimo og hypothetical nga sitwasyon sa dili tinuod nga tawo nga halos pareho sa imong edad nga kasamtangang naglisod sa palas-anon. Paglakip og ngalan, partikular nga palas-anon, ug usa o duha ka detalye mahitungod sa gibati sa tawo.

Ikonsiderar ang pagdapit sa mga estudyante nga magbayloay sila og mga sitwasyon sa usag usa. Mahimong magsulat dayon ang mga estudyante og tubag sa sitwasyon nga ilang nadawat gamit ang mga baroganan sa pag-angkon og espirituhanong kahibalo. O, para mas lain-lain, mahimong motubag ang mga estudyante gamit lamang ang usa ka baroganan sa pag-angkon og espirituhanong kahibalo sa dili pa makigbaylo og sitwasyon sa laing estudyante. Mahimong motubag kana nga estudyante gamit ang laing baroganan sa dili pa makigbaylo pag-usab og mga sitwasyon. Mahimong makigbaylo ang mga estudyante og sitwasyon sa ikatulo nga higayon aron magamit ang tanang tulo ka baroganan. Unya dapita ang mga estudyante nga kuhaon ang mga sitwasyon nga ilang gisulat ug rebyohon ang mga nakasulat nga tubag sa ilang mga klasmeyt.

Pag-angkon og espirituhanong kahibalo

Hunahunaa kon unsaon nimo paggamit ang mga baroganan sa pag-angkon og espirituhanong kahibalo aron tabangan ang tawo nga anaa sa sitwasyon. Tubagi ang mosunod nga mga pangutana aron matabangan ka.

Lihokon inubanan sa hugot nga pagtuo

• Unsa ang imong gibuhat aron mosalig sa Dios ug modangop Kaniya samtang nag-atubang ka og mga hagit?

• Unsa nga mga leksiyon ang imong nakat-onan gikan sa paggamit og hugot nga pagtuo diha kang Jesukristo kaniadto nga mahimong makatabang niini nga sitwasyon? Unsaon?

Susihon ang mga konsepto ug mga pangutana inubanan sa mahangturong panglantaw

• Unsa ang imong nahibaloan mahitungod kang Jesukristo nga nakahatag Kaniya og abilidad nga matabangan ka sa pagpas-an sa mga palas-anon?

• Sa unsang paagi nga ang pagdumala sa mga palas-anon ug mga hagit sa atong kinabuhi usa ka importante nga bahin sa plano sa atong Langitnong Amahan?

Tinguhaon ang dugang nga panabot pinaagi sa balaanong gipili nga mga tinubdan

• Sa unsang paagi nga ang kahibalo sa doktrina nga anaa sa Mateo 11:28–30 makatabang niini nga palas-anon o hagit?

• Unsa ang laing kasulatan o mapanagnaong pamahayag nga mahimong makatabang? Unsaon?

Pagpas-an sa mga palas-anon

Gamit ang imong gituki, pagsulat og usa ka sulat ngadto sa tawo nga anaa sa imong sitwasyon. Paglakip og mga kamatuoran gikan sa Mateo 11:28–30 ug uban pang mga tinubdan nga makahatag og kahupay ug kadasig.

Kon nagbayloay og mga sitwasyon ang mga estudyante, dapita sila nga ipaambit ang ilang sulat ngadto sa klasmeyt nga nagsulat sa sitwasyon nga ilang tubagon.

• Unsa nga baroganan sa pag-angkon og espirituhanong kahibalo kaha ang labing mapuslanon sa pag-andam kanimo sa pagtubag niini nga sitwasyon? Ngano man?

Rebyohon

Tabangi ang mga estudyante sa pagrebyo sa pakisayran ug mahinungdanong hugpong sa mga pulong sa kasulatan para sa Mateo 11:28–30 .

Ang usa ka paagi sa pagtabang sa mga estudyante sa pagrebyo mao ang pagsulat sa mosunod diha sa pisara. Kon aduna, ikonsiderar ang paggamit sa app sa Doktrinal nga Kahanas. Lagmit nga makatabang sa mga estudyante ang pakigtambayayong sa klasmeyt, ug pagpuli-puli nga balikon pag-usab ang pakisayran ug mahinungdanong hugpong sa mga pulong sa kasulatan.

“Mateo __:28–__: Duol kamo ka____, kamong ta____ nga gi____ ug gibug-atan sa inyong gi____, ug pa____ ko ka____.”

Dugang nga Kalihokan sa Pagkat-on

Posibleng sitwasyon

Ikonsiderar ang pagpaambit sa mosunod nga sitwasyon kon dili makahunahuna ang mga estudyante og usa atol niini nga kalihokan sa sitwasyon diha sa leksiyon.

“Na-stress gayod ako karon. Naningkamot ako sa pagpabiling duol sa Ginoo, pero padayon nga midaghan ang mga problema. Lisod ang pag-eskuwela, dili maayo ang sitwasyon sa akong pamilya karon, ug dili ako segurado kon unsaon pagdumala ang tanan. Morag wala ra gihapoy kalamboan nga nahitabo. Nabalaka ako mahitungod niining tanan, ug wala ako nakahibalo kon unsa ang angay nga buhaton.”