Lucas 11:1–13

“Ginoo, Tudloi Kami sa Pag-ampo”

Two girls, likely sisters, kneel next to each other at a bed, praying. There are blankets folded up at the head of the bed. Behind them is a wardrobe.

Pagkahuman sa pagkadungog nga nag-ampo si Jesus, “miingon ang usa sa iyang mga tinun-an, Ginoo, tudloi kami sa pag-ampo” (Lucas 11:1). Mitubag si Jesus gamit ang maayong mga pagtulon-an nga makatabang sa pagpalig-on sa atong koneksyon sa Langitnong Amahan pinaagi sa pag-ampo. Kini nga leksiyon makatabang kanimo nga mahimong mas makahuluganon ang imong mga pag-ampo.

Pag-andam sa estudyante: Dapita ang mga estudyante nga pamalandongan ang ilang gibuhat aron mahimong mas makahuloganon ang ilang mga pag-ampo.

Posible nga mga Kalihokan sa Pagkat-on

Gitudloan kita sa Ginoo mahitungod sa pag-ampo

Ikonsiderar ang pagdrowing og pahigda nga linya sa pisara. Sa usa ka bahin isulat ang Sayon ang pag-ampo ug sa laing bahin isulat ang Lisod ang pag-ampo. Hangyoa ang mga estudyante nga moadto sa pisara ug magsulat og pulong o hugpong sa mga pulong bisan asa nga habig sa linya nga naghulagway kon ngano kaha nga gihunahuna nga sayon o lisod ang pag-ampo. Paghatag og pagtagad sa mga tubag sa mga estudyante ug itukma ang leksiyon aron matubag ang ilang mga kabalaka ug mga pangutana.

Pamalandongi ang mga tubag niining duha ka pangutana:

Nganong sayon ang pag-ampo?
Nganong lisod ang pag-ampo?

Mahimong simple ug direkta ang pag-ampo apan usab lawom ug makahuloganon. Samtang nagkat-on ka gikan sa mga pagtulon-an sa Manluluwas bahin sa pag-ampo, pagtinguha og pagpadayag sa kon unsaon nimo paghimong mas makahuluganon ang imong mga pag-ampo.Basaha ang Lucas 11:1 , nga mangita sa hangyo nga gihangyo Kaniya sa usa sa mga disipulo sa Manluluwas.

Mitubag si Jesus sa unsay nailan nga Pag-ampo sa Ginoo. Gihatag usab niya kini nga pag-ampo sa panahon sa Wali sa Bukid (tan-awa ang Mateo 6:9–13). Gibati sa pipila nga gitinguha ni Jesus nga imemorya kini nga pag-ampo ug balik-balikon. Pero, sigon sa gitudlo ni Presidente Russell M. Nelson, “ang Pag-ampo sa Ginoo nagsilbi nga sundanan nga angay sundon ug dili usa ka pakigsulti nga memoryado ug binalikbalik nga pagkasulti” (“Mga Leksyon gikan sa mga Pag-ampo sa Ginoo,” Liahona, Mayo 2009, 46). Pagkahuman sa paghatag ni Jesus sa Pag-ampo sa Ginoo isip ehemplo kon unsaon pag-ampo, nagtanyag Siya og uban pang makadasig nga mga pagtulon-an mahitungod sa pag-ampo.

Pagkat-on og dugang mahitungod sa pag-ampo

Aron makadiskobre og mga kamatuoran nga mahimong makatabang kanimo, basaha ang mosunod nga mga pangutana, pagpili og usa nga gusto nimong makat-onan og dugang, ug basaha ang kauban nga mga tudling sa kasulatan.

Unsa ang akong makat-onan gikan sa ehemplo sa pag-ampo sa Manluluwas? ( Lucas 11:2–4 ; Mateo 6:9–13)
Unsa ang gisaad sa Manluluwas mahitungod sa pag-ampo? ( Lucas 11:9–13)

Unsa ang gipasidaan kanato sa Manluluwas nga dili nato buhaton sa atong mga pag-ampo? ( Mateo 6:7–8)

Ikonsiderar ang pag-awhag sa mga estudyante nga tubagan ang mosunod nga mga pangutana diha sa ilang mga journal sa pagtuon o hisgotan kini isip usa ka klase.

Unsa ang usa ka kamatuoran nga imong nakat-onan mahitungod sa pag-ampo gikan niini nga mga bersikulo?
Unsa nga mga kasinatian ang imong nasinati niini nga kamatuoran?
Unsay imong nakat-onan mahitungod sa imong Langitnong Amahan gikan niini nga mga bersikulo?

Dapita ang pipila ka andam nga mga estudyante sa pagpakigbahin sa ilang mga tubag. Ikonsiderar ang pagsulat diha sa pisara sa mga kamatuoran nga ilang gihisgotan.

Ikonsiderar kon hain sa mosunod nga tulo ka kalihokan ang lagmit nga labing makatubag sa mga panginahanglan sa mga estudyante. Ang tibuok nga klase mahimong dungan nga magbuhat sa usa ka kalihokan, o mahimong ipakita kini nga mga kalihokan aron tagsa-tagsang makapili ang mga estudyante sa kalihokan nga gusto nilang buhaton.

Isip alternatibo, ikonsiderar ang pag-set up og mga istasyon sa pagkat-on sa kinatibuk-an sa klasehanan gamit ang mosunod nga mga kalihokan. Dapita ang mga estudyante nga tagsa-tagsang magtuon sa kada istasyon o diha sa gagmay nga mga grupo ug unya i-report sa klase ang ilang nakat-onan.

Pagpalawom sa imong kahibalo

Kalihokan A: Unsa ang akong makat-onan gikan sa ehemplo sa Manluluwas bahin sa pag-ampo? ( Lucas 11:2–4)

Basaha ang mga mosunod nga hugpong sa pulong nga gigamit sa Manluluwas sa Iyang pag-ampo, ug pagpili og duha nga gusto nimong pamalandongan.

“Amahan namo nga anaa sa langit, balaanon ang Imong ngalan” ( Lucas 11:2).
“Umabot kanamo ang Imong gingharian” ( Lucas 11:2).
“Matuman ang Imong pagbuot, dinhi sa yuta, maingon sa langit” ( Lucas 11:2).
“Ang kalan-on namo sa matag adlaw, ihatag kanamo karong adlawa” ( Lucas 11:3).
“Pasayloa kami sa among mga sala; ingon nga nagapasaylo kami sa mga nakasala kanamo” ( Lucas 11:4).
“Ug dili mo kami itugyan sa panulay; hinonoa luwasa kami sa dautan” (Hubad ni Joseph Smith, Mateo 6:14 [tan-awa usab sa Lucas 11:4 ]).

Samtang gihunahuna ang duha ka hugpong sa mga pulong nga imong gipili, hunahunaa ang imong mga tubag sa mosunod nga mga pangutana:

Unsaon nimo pagsumada kon unsa ang kahulogan niini nga mga hugpong sa mga pulong?
Kanus-a ka nag-ampo og usa ka butang nga pareho sa giampo sa Manluluwas? Sa unsa nga paagi kini nakaapekto kanimo?
Ngano kaha nga makatabang kon mag-ampo nga nagsunod sa sundanan nga gihatag kanato sa Manluluwas?

Kon gipili nimo kini nga kalihokan, pagsulat diha sa imong journal sa pagtuon og usa ka paagi nga gusto nimong sundon ang ehemplo sa Manluluwas sa imong mga pag-ampo.

Kalihokan B: Unsa ang gisaad sa Manluluwas mahitungod sa pag-ampo? ( Lucas 11:9-13)

Sama sa nakarekord sa Lucas 11:9 , ang Ginoo misaad, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan.”

Ikonsiderar ang pag-awhag sa tulo ka estudyante nga i-aksiyon kon unsa ang pagpangayo, pagpangita, ug pagtuktok sa dili pa ipangutana ang mosunod nga mga pangutana.

Sa unsa nga paagi nga magkapareho ang mga aksiyon nga “pagpangayo,” “pagpangita,” ug “pagtuktok”? Sa unsang paagi nga kini managlahi?
Sa unsang paagi nga makatabang kanimo kini nga mga pulong nga masabtan kon unsaon pag-ampo sa mas makahuluganon nga paagi?

Unya gikompara ni Jesus ang tinguha sa usa ka mortal nga amahan sa paghatag og mga gasa sa iyang mga anak ngadto sa tinguha sa Langitnong Amahan sa paghatag kanato og mga gasa. Sa Hubad ni Joseph Smith, si Jesus mitudlo nga kon ang dili perpekto nga mortal nga amahan “mahibalo nga mohatag og maayong mga gasa sa [iyang] mga anak” ( Lucas 11:13), “unsa gayod ka labaw pa sa inyong Langitnong Amahan nga mohatag og maayong mga gasa, pinaagi sa Espiritu Santo ngadto kanila nga nangayo kaniya?” Importante nga hinumdoman nga tubagon sa Langitnong Amahan ang mga pag-ampo sa Iyang kaugalingong paagi ug panahon.

Unsa nga mga matang sa mga gasa kaha ang gustong ihatag sa Langitnong Amahan niadtong nangayo ug nangita niini? Unsa kaha ang gusto Niyang ihatag kanimo?

Kon gipili nimo kini nga kalihokan, pagsulat diha sa imong journal sa pagtuon mahitungod sa panahon nga gibati nimo nga nakadawat ka og tubag sa imong mga pag-ampo, o ihulagway kon unsa ang imong buhaton aron mangayo og tubag sa usa ka pag-ampo.

Ilakip kon sa unsang paagi nga ang paghinumdom nga motubag ang Dios lagmit nga makatabang nga mahimong mas makahuluganon ang imong kasamtangang mga pag-ampo.

Kalihokan C: Unsa ang gipasidaan kanato sa Manluluwas nga dili nato buhaton sa atong mga pag-ampo? ( Mateo 6:7–8)

Sa Wali sa Bukid, gitudlo ni Jesus nga kita kinahanglang “[dili] [mo]gamit og daghang pulong nga walay kahulogan” ( Mateo 6:7). Niini nga konteksto, ang walay kahulogan nagpasabot nga walay pulos o walay tumong. Ang pag-ampo gamit ang daghang pulong nga walay kahulogan mao ang pagsubli sa samang pag-ampo o sa samang mga pulong sulod sa usa ka pag-ampo sa paagi nga wala hunahunaa. Kon sinsero kita sa atong mga gipangayo, bisan pa kon balik-balik ang atong mga pag-ampo, dili kini daghang pulong nga walay kahulogan.

Sa unsang paagi nga ang paglikay sa daghang pulong nga walay kahulogan sa atong mga pag-ampo makatabang kanato nga mas mahiduol sa Ginoo?
Unsa ang imong mabuhat nga makatabang kanimo sa paglikay sa paggamit og daghang pulong nga walay kahulogan samtang nag-ampo ka?

Paghunahuna og mga pananglitan sa mga pag-ampo nga imong gisulti nga hunahunaon ug sinsero.

Sa unsang paagi nakaapekto kanimo ang pag-ampo niini nga paagi?

Kon gipili nimo kini nga kalihokan, pagsulat diha sa imong journal sa pagtuon og usa ka paagi nga gusto nimong sundon ang mga pagtulon-an sa Manluluwas aron malikayan ang daghang pulong nga walay kahulogan sa imong mga pag-ampo.

Dapita ang andam nga mga estudyante nga ipaambit ang ilang nakat-onan karon o unsa ang ilang giplano nga buhaton aron himoong mas makahuluganon ang ilang mga pag-ampo. Ikonsiderar ang pagpamatuod sa importansya sa makahuloganong pag-ampo diha sa pag-ugmad og lig-on nga relasyon sa Langitnong Amahan.

Komentaryo ug Background nga Impormasyon

1:47

2:49

Unsa kaha kon morag wala tubaga ang akong mga pag-ampo?

Si Elder J. Devn Cornish sa Seventy mitudlo:

Usahay morag wala kita makadawat og tubag sa atong sinsero ug determinado nga mga pag-ampo. Nagkinahanglan kini og hugot nga pagtuo sa paghinumdom nga ang Ginoo motubag sa Iyang panahon ug sa Iyang paagi aron nga kita mapanalanginan og maayo. O, sa dugang nga pagpamalandong, kanunay natong maamgohan nga nasayod na diay kita sa hingpit kon unsay angayan natong buhaton.

Palihug ayaw kasagmuyo kon kini dili mosalir kaninyo diha-diha dayon. Sama sa pagkat-on og usa ka langyaw nga pinulongan, nagkinahanglan kini og praktis ug paningkamot. Palihug hibaloi, hinuon, nga kamo makakat-on sa pinulongan sa Espiritu, ug kon mahitabo kana, makahatag kini kaninyo og dakong pagtuo ug gahum diha sa pagkamatarong.

(J. Devn Cornish, “Ang Pribilehiyo sa Pag-ampo,” Liahona, Nob. 2011, 103)

Unsa kaha kon mibati ko nga dili takos nga mag-ampo?

Si Elder J. Devn Cornish sa Seventy mitudlo:

Adunay risgo nga ang usa ka tawo mobati nga dili ganahang mag-ampo. Kini nga ideya nagagikan nianang dautan nga espiritu kinsa mao ang usa nga nagtudlo kanato nga dili mag-ampo (tan-awa sa 2 Nephi 32:8). Makuyaw kini nga maghunahuna nga kita makasasala ra kaayo aron mag-ampo sama nga ang usa ka masakiton kaayo nga tawo magtuo nga masakiton ra kaayo siya aron moadto sa doktor!

(J. Devn Cornish, “Ang Pribilehiyo sa Pag-ampo,” Liahona, Nob. 2011, 103)