Marcos 2:23–3:6

“Pagbuhat og Maayo sa Adlawng Igpapahulay”

Ang Manluluwas kanunay nga gisaway sa mga Pariseo ug sa uban pang mga lider sa Judeo sa kon giunsa Niya pagsunod ang adlaw nga Igpapahulay. Ang mga tubag ni Jesus niini nga mga lider sa relihiyon makatabang kanimo nga mas masabtan ang katuyoan sa adlaw nga Igpapahulay ug unsaon nga mas hingpit nga madapit ang mga panalangin sa Ginoo nganha sa imong kinabuhi.

Pag-andam sa estudyante: Dapita ang mga estudyante nga maghunahuna og paboritong paagi nga mas mahiduol sila sa Manluluwas, sa tagsa-tagsa o kauban ang ilang mga pamilya, panahon sa adlaw nga Igpapahulay.

Posible nga mga Kalihokan sa Pagkat-on

Ang katuyoan sa Igpapahulay

Para sa mosunod nga kalihokan, ikonsiderar ang pagsangon og mga pares sa mga estudyante ug pagdapit sa kada pares nga motubag sa usa sa mga sitwasyon.

Hunahunaa ang mosunod nga duha ka sitwasyon. Sa usa ka sitwasyon, gisultihan ka sa usa ka tawo nga ang adlaw nga Igpapahulay adunay daghang mga butang nga angay buhaton ug dili angay buhaton ug kon dili nimo sundon kining tanan, misupak ka sa mga sugo sa Dios. Sa laing sitwasyon, gisultihan ka sa usa ka tawo nga ang Domingo dili lahi sa bisan unsang uban pang adlaw ug angay nimong buhaton ang bisan unsang gusto nimong buhaton panahon sa Domingo.

• Unsa kakomportable ang imong gibati sa pagtubag niini nga mga sitwasyon?

• Unsa nga mga pangutana ang aduna ka mahitungod sa adlaw nga Igpapahulay?

Samtang nagpakigbahin ang mga estudyante og mga tubag, ikonsiderar ang paglista niini sa pisara. Kon dili komportable ang mga estudyante sa pagpaambit sa ilang mga pangutana sa klase, dapita sila nga isulat ang ilang mga pangutana diha sa ilang mga journal sa pagtuon. Ayaw sulayi sa pagtubag ang mga pangutana sa pagkakaron, pero awhaga ang mga estudyante nga mangita og mga tubag samtang nagpadayon sila sa ilang pagtuon.

Samtang nagtuon ka kon giunsa pagbalaan sa Manluluwas ang Igpapahulay, pangita og mga tubag sa imong mga pangutana. Pangayo og giya gikan sa Langitnong Amahan aron tabangan ka.

Gitudlo sa balaod ni Moises nga ang mga tawo sa Israel kinahanglang dili magtrabaho panahon sa Igpapahulay (tan-awa sa Exodo 31:14–15). Ang mga escriba ug mga Pariseo midugang sa ilang kaugalingong mga interpretasyon sa balaod ni Moises, ug gibag-o ang orihinal nga katuyoan niini.

Basaha ang mosunod nga mga bersikulo, nga magmarka sa mga hugpong sa mga pulong nga nagpakita kon unsa ang panglantaw ni Jesus sa adlaw nga Igpapahulay.

• Marcos 2:23–28 —Gikuwestiyon sa mga Pariseo kon angay ba ang pagpangutlo ug pagkaon og lugas panahon sa Igpapahulay.

• Marcos 3:1–6 —Gikuwestiyon sa mga Pariseo kon angay ba ang pag-ayo og tawo panahon sa Igpapahulay.

Ikonsiderar ang paghangyo sa mga estudyante nga ipaambit ang ilang gimarkahan ug kon ngano.

Ang outline para sa Mateo 11–12; Lucas 11 sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 naghisgot sa adlaw nga Igpapahulay. Kon ang leksiyon karon mitukma sa outline sa Dali, Sunod Kanako, para karong adlawa ikonsiderar ang paghangyo sa mga estudyante nga ipaambit ang ilang nakat-onan sa ilang pagtuon diha sa balay. Mahimo usab nga awhagon ang mga estudyante nga magpaambit og mga ideya gikan sa klase ngadto sa ilang mga pamilya.

Gihatag ni Presidente Russell M. Nelson ang mosunod nga ideya bahin sa mga katuyoan sa adlaw nga Igpapahulay:

Unsay gipasabot sa Manluluwas sa dihang miingon Siya nga “ang adlaw nga igpapahulay gibuhat alang sa tawo, dili ang tawo alang sa adlaw nga igpapahulay”? [ Marcos 2:27 ]. Nagtuo ko nga gusto Niyang atong masabtan nga ang gpapahulay maoy Iyang gasa kanato, naghatag og tinuod nga pahulay [o kahupayan] gikan sa kalisod sa matag adlaw nga kinabuhi ug oportunidad alang sa espiritwal ug pisikal nga pagbag-o. Ang Dios mihatag kanato niining espesyal nga adlaw, dili para sa paglingaw-lingaw o inadlaw nga paghago apan aron mopahulay gikan sa katungdanan, uban sa pisikal ug espiritwal nga pagpahulay.

(Russell M. Nelson, “Ang Igpapahulay Usa ka Kahimut-an,” Liahona, Mayo 2015, 129)

• Unsa ang imong nakat-onan mahitungod sa mga katuyoan sa Ginoo para sa adlaw nga Igpapahulay?

• Unsa ang atong makat-onan mahitungod sa Manluluwas gikan sa Iyang mga aksiyon ug pamatasan panahon sa Igpapahulay?

Tabangi ang mga estudyante sa pag-ila sa mga baroganan sama sa mosunod: gihatag sa Ginoo kanato ang adlaw nga Igpapahulay aron magbuhat og maayo ug mopahulay gikan sa mga kalisod sa kinabuhi sa kada adlaw.

• Sa imong hunahuna, sa unsang paagi nga ang sugo sa Dios nga ibalaan ang adlaw nga Igpapahulay nagpakita sa Iyang gugma para kanato?

Unsaon nimo pagpasidungog ang adlaw nga Igpapahulay?

Ang pagsabot sa mga katuyoan sa adlaw nga Igpapahulay ug sa mga panalangin sa Dios para kanimo makadasig kanimo nga ibalaan ang Igpapahulay. Pinaagi sa pagkat-on kon unsaon nga mas mapasidunggan ang adlaw nga Igpapahulay, makat-onan nimo nga mas hingpit nga madapit ang pag-ayo ug paghupay sa Manluluwas sa imong kinabuhi.

Hatagi ang mga estudyante sa mosunod nga impormasyon sa handout, o ipakita kini sa atubangan sa klase. Mahimong tun-an sa mga estudyante ang impormasyon sa tagsa-tagsa o diha sa gagmay nga mga grupo.

Tun-i ang mga mosunod nga kapanguhaan aron sa pagkat-on og dugang mahitungod sa Igpapahulay ug sa mga panalangin nga madawat nato pinaagi sa pagpasidungog niini.

• Isaias 58:13–14

• Doktrina ug mga Pakigsaad 59:9–10

Gitudlo ni Presidente Russell M. Nelson ang mosunod mahitungod sa pagpakita sa atong gugma sa Ginoo panahon sa Igpapahulay:

Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan [tan-awa sa Exodo 31:13 ; Ezequiel 20:12, 20 ]. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, “Unsa man nga timailhan ang gusto nakong ihatag ngadto sa Dios?” Kana nga pangutana nakapaklaro kaayo sa akong mga pagpili sa adlaw nga Igpapahulay.

(Russell M. Nelson, “Ang Igpapahulay Usa ka Kahimut-an,” Liahona, Mayo 2015, 130)

Ang mosunod nga pangutana makahatag sa mga estudyante og oportunidad nga ipaambit ang ilang mga hunahuna gikan sa gisugyot nga kalihokan sa pag-andam sa estudyante.

• Unsa ang pipila sa imong paboritong mga paagi aron mas mahiduol kang Jesukristo panahon sa Domingo?

Samtang nagpaambit ang mga estudyante, ilha nga lagmit nga aduna silay lain-laing mga panglantaw sa kon unsa ang angay o dili angay sa adlaw nga Igpapahulay. Kon gikinahanglan, pahinumdomi ang mga estudyante nga magmasinabtanon ug magmatinahuron sa mga panglantaw sa uban.

• Sa unsang paagi nga ang imong nakat-onan niini nga leksiyon nakatabang kanimo sa pagtubag sa imong mga pangutana mahitungod sa adlaw nga Igpapahulay?

• Kon wala ka makakita og mga tubag sa imong mga pangutana, unsa ang imong mabuhat aron mapadayon ang pagpangita niini?

• Unsa nga mga impresyon ang imong nadawat mahitungod sa kon unsa ang imong mabuhat aron mas hingpit nga matagamtam ang mga panalangin sa pagpasidungog sa Igpapahulay?

Ikonsiderar ang pagpamatuod sa importansya sa pagbalaan sa adlaw nga Igpapahulay. Dapita usab ang mga estudyante sa pagpaambit sa ilang mga pagpamatuod kon gusto nila.

Komentaryo ug Background nga Impormasyon

Nganong gisaway sa mga Pariseo ang mga disipulo tungod sa “[pagpa]ngutlo sa mga uhay sa trigo” panahon sa Igpapahulay?

Sa ilawom sa balaod ni Moises, ang usa ka tawo mahimong mangutlo og pipila ka lugas gamit ang kamot basta wala niya giabuso kini nga pribilehiyo pinaagi sa paggamit og sanggot aron mag-ani (tan-awa sa Deuteronomio 23:25). Ang gisulti ra nga balaod sa mga Pariseo, hinoon, mas labaw pa kay sa balaod ni Moises ug nag-ingon nga ang pagpangutlo og lugas panahon sa Igpapahulay gidili.

Sa unsang paagi nga ang pagkamapasalamaton makapanalangin sa imong kasinatian sa sakramento ug sa Igpapahulay?

Sa video nga “Pagpasalamat sa Adlawng Igpapahulay” (3:38), giawhag ni Presidente Henry B. Eyring ang mga tawo sa pagtugot sa gahom sa pagkamapasalamaton sa ilang kasinatian sa adlaw nga Igpapahulay. Makita kini nga video sa ChurchofJesusChrist.org.

Unsa pa ang akong mahimo sa pag-awhag sa mga panalangin sa adlaw nga Igpapahulay?

Naghatag si Presidente Russell M. Nelson og pipila ka ideya mahitungod sa epektibong mga paagi aron madapit ang espiritu sa adlaw nga Igpapahulay sa iyang pakigpulong nga “Ang Igpapahulay Usa ka Kahimut-an” (Liahona, Mayo 2015, 129–132).

Dugang nga Kalihokan sa Pagkat-on

Unsaon nimo pag-andam para sa adlaw nga Igpapahulay?

Lagmit nga makabenepisyo ang mga estudyante gikan sa pagkadungog sa mga ideya sa usag usa mahitungod sa kon unsaon pag-andam para sa Igpapahulay atol sa semana. Ikonsiderar ang pagpangutana sa klase, “Unsa ang inyong nakita nga mapuslanong pag-andam atol sa semana aron himoong mas labaw nga panalangin ang Igpapahulay?”