ចំណេះចំណានខាងគោលលទ្ធិ ៖ ម៉ាថាយ ១១:២៨–៣០

« … ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក »

ព្រះយេស៊ូវគ្រីស្ទបានបង្រៀនថា ប្រសិនបើយើងមករកទ្រង់ នោះទ្រង់នឹងសម្រាលបន្ទុករបស់យើង ហើយឲ្យយើងបានឈប់សម្រាក ។មេរៀននេះនឹងផ្តល់ឱកាសឲ្យអ្នកពន្យល់ពីការយល់ដឹងរបស់អ្នកអំពីគោលលទ្ធិនេះ តាមរយៈការអនុវត្តគោលការណ៍នៃការទទួលបានចំណេះដឹងខាងវិញ្ញាណ នៅក្នុងសាច់រឿងមួយដែលស្រដៀងទៅនឹងបទពិសោធន៍ ដែលអ្នកមាននៅក្នុងជីវិតផ្ទាល់ខ្លួនរបស់អ្នកដែរ ។

ការរៀនចំណេះចំណានខាងគោលលទ្ធិតាមរយៈវិវរណៈ ។ អែលឌើរ គីម ប៊ី ក្លាក នៃពួកចិតសិបនាក់បានចែករំលែកដូចតទៅនេះអំពីចំណេះចំណានខាងគោលលទ្ធិ ៖ « ខ្ញុំចង់ឲ្យអ្នកដឹង និងទទួលអារម្មណ៍នៅក្នុងដួងចិត្តអ្នកថា វាកើតមានតាមរយៈវិវរណៈមកពីព្រះអម្ចាស់ វាគឺជាអព្ភូតហេតុមួយ ។ ខ្ញុំបាននឹកគិតជាញឹកញាប់អំពីរបៀបដែលវាកើតមាន និងពេលណាដែលវាកើតមាន ព្រមទាំងអំពីមូលហេតុផងដែរ ។ ខ្ញុំបានឃើញចំណេះចំណានខាងគោលលទ្ធិនៅក្នុងបរិបទដ៏ធំមួយនៅក្នុងការអប់រំរបស់សាសនាចក្រ ក៏ដូចជាកិច្ចការដ៏អស្ចារ្យរបស់ព្រះអម្ចាស់នៅលើផែនដីនេះដែរ » ( គីម ប៊ី ក្លាក « Doctrinal Mastery and Deep Learning » [ ជំនួបពេលល្ងាចជាមួយនឹងអ្នកមានសិទ្ធិអំណាចទូទៅ ថ្ងៃទី ១៧ ខែ កុម្ភៈ ឆ្នាំ ២០១៧ ] នៅលើគេហទំព័រ broadcasts.ChurchofJesusChrist.org ) ។

ការរៀបចំរបស់សិស្ស ៖ សូមអញ្ជើញសិស្សឲ្យអនុវត្តការទន្ទេញចាំសេចក្តីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ ម៉ាថាយ ១១:២៨–៣០ ( ឬវគ្គបទគម្ពីរទាំងមូល ប្រសិនបើសិស្សអាចធ្វើបាន ) ។ សូមឲ្យពួកគេគិតអំពីរបៀបដែលពួកគេអាចអនុវត្តអ្វីដែលពួកគេបានរៀន អំពីសមត្ថភាពរបស់ព្រះយេស៊ូវគ្រីស្ទក្នុងការសម្រាលបន្ទុករបស់ពួកគេ ប្រសិនបើពួកគេមករកទ្រង់ ។

សកម្មភាពរៀនសូត្រដែលអាចមាន

មេរៀនវគ្គបទគម្ពីរចំណេះចំណានខាងគោលលទ្ធិនេះត្រូវបានរៀបរៀងឡើង ដើម្បីបង្រៀនបន្ទាប់ពីមេរៀន « ម៉ាថាយ ១១:២៨–៣០ » ដែលជាមេរៀនទាក់ទងនឹងបរិបទសម្រាប់វគ្គបទគម្ពីរចំណេះចំណានខាងគោលលទ្ធិ ម៉ាថាយ ១១:២៨–៣០ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង នោះសូមប្រាកដថា អ្នកបានបង្រៀនមេរៀនតាមបរិបទដែលត្រូវគ្នានៅអំឡុងសប្តាហ៍នោះផងដែរ ។

ទន្ទេញ និងពន្យល់

សូមផ្តល់ឱកាសឲ្យសិស្សទន្ទេញសេចក្តីយោង និងឃ្លាបទគម្ពីរគន្លឹះសម្រាប់ ម៉ាថាយ ១១:២៨–៣០ ( សិស្សអាចត្រូវបានអញ្ជើញឲ្យទន្ទេញវគ្គបទគម្ពីរទាំងមូល ប្រសិនបើអាចធ្វើបាន ) ។

ជម្រើសមួយគឺត្រូវសរសេរអ្វីដូចតទៅនេះនៅលើក្ដារខៀន ហើយបន្ទាប់មក សូមអញ្ជើញសិស្សឲ្យហាត់សូត្រសេចក្ដីថ្លែងការណ៍នេះជាថ្នាក់ទាំងមូល ឬរៀងៗខ្លួន ។

« ម៉ាថាយ __:២៨–__ ៖ អ_អ្នកដែលន__ ហើយផ__អើយ ចូរមកឯខ_ ខ_នឹងឲ_អ្នករាល់គ្នាឈ_ » ។

កម្មវិធីចំណេះចំណានខាងគោលលទ្ធិក៏អាចជួយអ្នកឲ្យទន្ទេញឃ្លាបទគម្ពីរគន្លឹះនេះបានដែរ ។

ការពន្យល់សេចក្ដីពិត

សូមផ្តល់ឱកាសឲ្យសិស្សពន្យល់ពីគោលលទ្ធិ ដែលបានបង្រៀននៅក្នុងមេរៀនមុនថា ប្រសិនបើយើងមករកទ្រង់ នោះទ្រង់នឹងសម្រាលបន្ទុករបស់យើង ហើយឲ្យយើងបានឈប់សម្រាក ។

វិធីមួយដើម្បីធ្វើដូចនេះ គឺការបង្ហាញរូបភាពដូចខាងក្រោម ហើយអញ្ជើញសិស្សឲ្យរំឭកថានឹមជាអ្វី ឬពន្យល់ពីការប្រើប្រាស់នឹម ។

សូមរំឭកថានឹមគឺជាអ្វី ( សូមមើលរូបភាពខាងក្រោម ) ។ សូមពិនិត្យមើល ម៉ាថាយ ១១:២៨–៣០ ដោយស្វែងរកសេចក្ដីពិតដែលព្រះអង្គសង្គ្រោះបានបង្រៀន ។

ដោយយោងទៅលើរូបភាពនៃនឹម សូមពន្យល់ពីរបៀបដែលព្រះអង្គសង្គ្រោះអាចជួយសម្រាលបន្ទុករបស់យើងបាន ។ សូមប្រាកដថាបានបញ្ចូលពីតួនាទីរបស់យើង នៅពេលយើងធ្វើជាដៃគូជាមួយព្រះគ្រីស្ទ ។

រៀនអនុវត្ត

ប្រសិនបើសិស្សត្រូវរំឭកគោលការណ៍នៃការទទួលបានចំណេះដឹងខាងវិញ្ញាណឡើងវិញ សូមពិចារណាអញ្ជើញពួកគេឲ្យធ្វើការជាក្រុមដែលមានគ្នាបីនាក់ ។ នៅក្នុងក្រុមដែលមានសមាជិកបីនាក់ នោះសមាជិកក្រុមម្នាក់ៗអាចបើកមើលគោលការណ៍ផ្សេងគ្នា ។ បន្ទាប់មក សមាជិកម្នាក់ៗអាចប្រើពាក្យផ្ទាល់ខ្លួនដើម្បីពន្យល់ពីគោលការណ៍នោះដល់ក្រុមរបស់ពួកគេ ។ បន្ទាប់មក សូមបង្ហាញ ឬចែកសំណៅសកម្មភាពដូចខាងក្រោម ហើយសុំឲ្យសិស្សផ្គូផ្គងគោលការណ៍ទៅនឹងការពន្យល់របស់វា ។ ( ចម្លើយត្រឹមត្រូវគឺ ៖ ១ . គ; ២. ក; ៣. ខ ) ។

ប្រសិនបើចាំបាច់ សូមពិនិត្យមើលគោលការណ៍នៃការទទួលបានចំណេះដឹងខាងវិញ្ញាណឡើងវិញ តាមរយៈការសិក្សាកថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២០ ) ។ បន្ទាប់មក សូមផ្គូផ្គងប្រយោគខាងក្រោមនេះនីមួយៗ ទៅនឹងគោលការណ៍ត្រឹមត្រូវនៃការទទួលបានចំណេះដឹងខាងវិញ្ញាណ ។

១. ការរៀនស្គាល់ និងចៀសវាងពីប្រភពដែលមិនគួរឲ្យជឿ អាចការពារយើងកុំឲ្យភាន់ច្រឡំ និងការពារយើងពីអ្នកទាំងឡាយ ដែលព្យាយាមបំផ្លាញសេចក្ដីជំនឿ ។

២. នៅពេលយើងព្យាយាមអភិវឌ្ឍការយល់ដឹងរបស់យើង ហើយដោះស្រាយកង្វល់នានា នោះវាសំខាន់ណាស់ដែលយើងត្រូវពឹងផ្អែកទៅលើទីបន្ទាល់ ដែលយើងមានរួចទៅហើយអំពីព្រះយេស៊ូវគ្រីស្ទ ការស្ដារឡើងវិញនៃដំណឹងល្អរបស់ទ្រង់ និងការបង្រៀនរបស់ពួកព្យាការីដែលបានតែងតាំងដោយទ្រង់ ។

៣. យើងស្វែងរកជំនួយមកពីព្រះវិញ្ញាណបរិសុទ្ធ ដើម្បីមើលឃើញនូវរឿងទាំងឡាយដូចជាព្រះអម្ចាស់ទតឃើញវា ។

ក. ធ្វើសកម្មភាពដោយសេចក្ដីជំនឿ

ខ. ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច ។

គ. ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។

សាច់រឿង

វាអាចមានគុណប្រយោជន៍ក្នុងការអញ្ជើញសិស្សឲ្យរំឭកឡើងវិញនូវបន្ទុក ដែលពួកគេបានគិតដល់នៅក្នុងមេរៀនមុន ។

សូមសរសេរពីរ ឬបីប្រយោគ ដើម្បីបង្កើតជាសាច់រឿងសម្មតិកម្មមួយដែលមានតួអង្គប្រឌិត ដែលមានអាយុប្រហាក់ប្រហែលនឹងអ្នក ដែលបច្ចុប្បន្នកំពុងមានបន្ទុកយ៉ាងធ្ងន់ ។ សូមដាក់ឈ្មោះ បន្ទុកជាក់លាក់មួយ និងព័ត៌មានលម្អិតមួយ ឬពីរ អំពីអារម្មណ៍របស់បុគ្គលនោះ ។

សូមពិចារណាអញ្ជើញសិស្សឲ្យប្ដូរសាច់រឿងរបស់ពួកគេនឹងគ្នាទៅវិញទៅមក ។ បន្ទាប់មក សិស្សអាចសរសេរការឆ្លើយតបទៅនឹងសាច់រឿង ដែលពួកគេទទួលបាននោះ ដោយប្រើគោលការណ៍នៃការទទួលបានចំណេះដឹងខាងវិញ្ញាណ ។ ឬដើម្បីធ្វើឲ្យមានភាពខុសគ្នាកាន់តែខ្លាំង សិស្សអាចឆ្លើយតបដោយប្រើគោលការណ៍តែមួយគត់នៃការទទួលបានចំណេះដឹងខាងវិញ្ញាណ មុនពេលប្ដូរសាច់រឿងគ្នាជាមួយនឹងសិស្សម្នាក់ទៀត ។ សិស្សនោះអាចឆ្លើយតប ដោយប្រើគោលការណ៍ផ្សេងគ្នាមួយទៀត មុននឹងប្ដូរសាច់រឿងនោះម្ដងទៀត ។ សិស្សអាចប្ដូរសាច់រឿងជាលើកទីបីបាន ដើម្បីប្រើប្រាស់គោលការណ៍ទាំងបី ។ បន្ទាប់មក សូមអញ្ជើញសិស្សឲ្យទៅយកសាច់រឿង ដែលពួកគេបានសរសេរមកវិញ និងពិនិត្យមើលការឆ្លើយតបជាលាយលក្ខណ៍អក្សររបស់មិត្តរួមថ្នាក់ពួកគេឡើងវិញ ។

ការទទួលបានចំណេះដឹងខាងវិញ្ញាណ

សូមគិតអំពីរបៀបដែលអ្នកអាចប្រើគោលការណ៍នៃការទទួលបានចំណេះដឹងខាងវិញ្ញាណ ដើម្បីជួយបុគ្គលនៅក្នុងសាច់រឿងនោះ ។ សូមឆ្លើយសំណួរខាងក្រោមនេះដើម្បីជួយដល់អ្នក ។

ធ្វើសកម្មភាពដោយសេចក្ដីជំនឿ

• តើអ្នកបានធ្វើអ្វីខ្លះដើម្បីទុកចិត្តលើព្រះ ហើយងាកមករកទ្រង់ នៅពេលអ្នកប្រឈមមុខនឹងបញ្ហាទាំងឡាយ ?

• តើមេរៀនអ្វីខ្លះដែលអ្នកបានរៀន ចេញ ពីការអនុវត្តសេចក្តីជំនឿទៅលើព្រះយេស៊ូវគ្រីស្ទកាលពីអតីតកាល ដែលអាចជួយនៅក្នុងស្ថានភាពនេះបាន ? ដោយរបៀបណា ?

ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច

• តើអ្នកដឹងអ្វីខ្លះអំពីព្រះយេស៊ូវគ្រីស្ទ ដែលធ្វើឲ្យទ្រង់អាចជួយសម្រាលបន្ទុកទាំងឡាយបាន ?

• តើការសម្រាលបន្ទុក និងការដោះស្រាយបញ្ហាប្រឈមនៅក្នុងជីវិតរបស់យើង គឺជាផ្នែកដ៏សំខាន់មួយនៃផែនការរបស់ព្រះវរបិតាសួគ៌យើងយ៉ាងដូចម្តេច ?

ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

• តើការដឹងអំពីគោលលទ្ធិដែលមាននៅក្នុង ម៉ាថាយ ១១:២៨–៣០ អាចជួយដោះបន្ទុក ឬបញ្ហាប្រឈមនេះដោយរបៀបណា ?

• តើបទគម្ពីរ ឬសេចក្តីថ្លែងការណ៍របស់ព្យាការីអ្វីផ្សេងទៀតដែលអាចជួយបាន ? ដោយរបៀបណា ?

ការសម្រាលបន្ទុក

ដោយប្រើអ្វីដែលអ្នកបានរកឃើញ សូមសរសេរសំបុត្រទៅកាន់បុគ្គលដែលនៅក្នុងសាច់រឿងរបស់អ្នកនោះ ។ សូមដាក់បញ្ចូលសេចក្ដីពិតចេញពី ម៉ាថាយ ១១:២៨–៣០ និងប្រភពផ្សេងទៀតដើម្បីផ្តល់ការលួងលោម និងការលើកទឹកចិត្ត ។

ប្រសិនបើសិស្សប្ដូរសាច់រឿងនឹងគ្នាទៅវិញទៅមក សូមអញ្ជើញពួកគេឲ្យចែករំលែកសំបុត្ររបស់ពួកគេជាមួយមិត្តរួមថ្នាក់ ដែលបានសរសេរសាច់រឿងដែលពួកគេកំពុងឆ្លើយតបនេះ ។

• តើគោលការណ៍មួយណានៃការទទួលបានចំណេះដឹងខាងវិញ្ញាណ ដែលអ្នកគិតថាមានគុណប្រយោជន៍បំផុត ក្នុងការរៀបចំអ្នកឲ្យឆ្លើយតបទៅនឹងសាច់រឿងនេះបាន ? ហេតុអ្វីទៅ ?

ពិនិត្យមើល

សូមជួយសិស្សឲ្យពិនិត្យសេចក្ដីយោង និងឃ្លាបទគម្ពីរគន្លឹះសម្រាប់ ម៉ាថាយ ១១:២៨–៣០ ឡើងវិញ ។

វិធីមួយដើម្បីជួយសិស្សឲ្យពិនិត្យឡើងវិញ គឺត្រូវសរសេរចំណុចខាងក្រោមនេះនៅលើក្ដារខៀន ។ ប្រសិនបើមាន សូមពិចារណាប្រើកម្មវិធីចំណេះចំណានខាងគោលលទ្ធិ ។ វាអាចមានគុណប្រយោជន៍សម្រាប់សិស្សដើម្បីធ្វើការជាមួយមិត្តរួមថ្នាក់ ដោយដាក់វេនគ្នាសរសេរម្នាក់ម្តងនូវសេចក្ដីយោង និងឃ្លាបទគម្ពីរគន្លឹះ ។

« ម៉ាថាយ __:២៨–__ ៖ អ_អ្នកដែលន__ ហើយផ__អើយ ចូរមកឯខ_ ខ_នឹងឲ_អ្នករាល់គ្នាឈ_ » ។

សកម្មភាពរៀនសូត្របន្ថែម

សាច់រឿងដែលអាចមាន

សូមពិចារណាចែកចាយសាច់រឿងខាងក្រោមនេះ ប្រសិនបើសិស្សមិនអាចគិតដល់រឿងមួយ ក្នុងពេលធ្វើសកម្មភាពសាច់រឿងនៅក្នុងមេរៀននេះបានទេ ។

« ខ្ញុំពិតជាតានតឹងអារម្មណ៍ខ្លាំងណាស់នៅពេលនេះ ។ ខ្ញុំព្យាយាមនៅជិតព្រះអម្ចាស់ ប៉ុន្តែអ្វីៗនៅតែបន្តគរឡើង ។ កិច្ចការសាលាពិបាកណាស់ អ្វីៗមិនប្រសើរជាមួយគ្រួសារខ្ញុំទេនៅពេលនេះ ហើយខ្ញុំមិនដឹងថា តើត្រូវដោះស្រាយរឿងរ៉ាវគ្រប់យ៉ាងយ៉ាងណានោះទេ ។ វាហាក់ដូចជាគ្មានអ្វីដែលនឹងប្រសើរឡើងឡើយ ។ ខ្ញុំព្រួយបារម្ភអំពីរឿងគ្រប់យ៉ាង ហើយខ្ញុំមិនដឹងថាត្រូវធ្វើអ្វីទេ » ។