ម៉ាកុស ២:២៣–៣:៦

« ធ្វើការល្អនៅថ្ងៃឈប់សម្រាក »

Filipino women walking on the street while visiting teaching a sister.

ព្រះអង្គសង្គ្រោះត្រូវបានពួកផារិស៊ី និងមេដឹកនាំសាសន៍យូដាដទៃទៀតរិះគន់ជាញឹកញាប់ ទាក់ទងនឹងរបៀបដែលទ្រង់គោរពថ្ងៃឈប់សម្រាក ។ ការឆ្លើយតបរបស់ព្រះយេស៊ូវចំពោះមេដឹកនាំសាសនាទាំងនេះ នឹងជួយអ្នកឲ្យយល់កាន់តែច្បាស់អំពីគោលបំណងនៃថ្ងៃឈប់សម្រាក និងរបៀបអញ្ជើញពរជ័យរបស់ព្រះអម្ចាស់ឲ្យចូលមកក្នុងជីវិតរបស់អ្នកបានកាន់តែពេញលេញ ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីវិធីដែលពួកគេចូលចិត្ត ដែលធ្វើឲ្យពួកគេខិតទៅកាន់តែជិតព្រះអង្គសង្គ្រោះ ទាំងជាលក្ខណៈបុគ្គល ឬជាមួយក្រុមគ្រួសាររបស់ពួកគេនៅថ្ងៃឈប់សម្រាក ។

សកម្មភាពរៀនសូត្រដែលអាចមាន

គោលបំណងនៃថ្ងៃឈប់សម្រាក

សម្រាប់សកម្មភាពដូចខាងក្រោម សូមពិចារណាចាត់ឲ្យសិស្សធ្វើការជាដៃគូ ហើយអញ្ជើញដៃគូនីមួយៗឲ្យឆ្លើយតបទៅនឹងស្ថានភាពមួយក្នុងចំណោមស្ថានភាពទាំងអស់ ។

សូមស្រមៃមើលស្ថានភាពពីរខាងក្រោមនេះ ។ នៅក្នុងស្ថានភាពមួយ មាននរណាម្នាក់ប្រាប់អ្នកថា ថ្ងៃឈប់សម្រាកមានអ្វីដែលត្រូវធ្វើ និងមិនត្រូវធ្វើច្រើនណាស់ ហើយប្រសិនបើអ្នកមិនធ្វើតាមវាទាំងអស់ទេ នោះអ្នកបំពានព្រះបញ្ញត្តិរបស់ព្រះហើយ ។ នៅក្នុងស្ថានភាពមួយទៀត មាននរណាម្នាក់ប្រាប់អ្នកថា ថ្ងៃអាទិត្យមិនខុសពីថ្ងៃផ្សេងទៀតទេ ហើយអ្នកគួរតែធ្វើអ្វីដែលអ្នកចង់ធ្វើនៅថ្ងៃអាទិត្យ ។

• តើអ្នកមានអារម្មណ៍ស្រួលប៉ុណ្ណាក្នុងការឆ្លើយតបទៅនឹងស្ថានភាពទាំងនេះ ?

• តើអ្នកមានសំណួរអ្វីខ្លះអំពីថ្ងៃឈប់សម្រាក ?

នៅពេលសិស្សចែកចាយសំណួរទាំងនេះ សូមពិចារណាសរសេរវានៅលើក្ដារខៀន ។ ប្រសិនបើសិស្សមិនស្រណុកក្នុងការចែកចាយសំណួររបស់ពួកគេជាមួយសិស្សក្នុងថ្នាក់ទេ សូមអញ្ជើញពួកគេឲ្យសរសេរសំណួររបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ សូមកុំព្យាយាមឆ្លើយសំណួរនៅពេលនេះ ប៉ុន្តែសូមលើកទឹកចិត្តសិស្សឲ្យស្វែងរកចម្លើយ នៅពេលពួកគេបន្តការសិក្សារបស់ពួកគេ ។

នៅពេលអ្នកសិក្សាពីរបៀបដែលព្រះអង្គសង្គ្រោះរក្សាថ្ងៃឈប់សម្រាកឲ្យបរិសុទ្ធ សូមរកមើលចម្លើយចំពោះសំណួររបស់អ្នក ។ សូមស្វែងរកការណែនាំពីព្រះវរបិតាសួគ៌ដើម្បីជួយអ្នក ។

ក្រឹត្យវិន័យរបស់ម៉ូសេបានបង្រៀនថា ប្រជាជនអ៊ីស្រាអែលមិនគួរធ្វើការនៅថ្ងៃឈប់សម្រាកនោះទេ ( សូមមើល និក្ខមនំ ៣១:១៤–១៥ ) ។ ពួកអាចារ្យ និងពួកផារិស៊ីបានបន្ថែមការបកស្រាយផ្ទាល់របស់ពួកគេចំពោះក្រឹត្យវិន័យរបស់ម៉ូសេ ដោយផ្លាស់ប្តូរចេតនាដើមនៃក្រឹត្យវិន័យនេះ ។

សូមអានខគម្ពីរខាងក្រោមនេះ ដោយគូសចំណាំឃ្លាដែលបង្ហាញពីទស្សនៈរបស់ព្រះយេស៊ូវចំពោះថ្ងៃឈប់សម្រាក ។

• ម៉ាកុស ២:២៣–២៨ —ពួកផារិស៊ីបានចោទសួរអំពីភាពសមរម្យនៃការរើស និងការបរិភោគគ្រាប់ធញ្ញជាតិនៅថ្ងៃឈប់សម្រាក ។

• ម៉ាកុស ៣:១–៦ —ពួកផារិស៊ីបានចោទសួរអំពីភាពសមរម្យនៃការប្រោសមនុស្សម្នាក់នៅថ្ងៃឈប់សម្រាក ។

សូមពិចារណាសុំឲ្យសិស្សចែកចាយនូវអ្វីដែលពួកគេបានគូសចំណាំ និងហេតុផល ។

គម្រោងមេរៀនសម្រាប់ ម៉ាថាយ ១១–១២; លូកា ១១ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ពិភាក្សាអំពីថ្ងៃឈប់សម្រាក ។ ប្រសិនបើពេលវេលានៃមេរៀនថ្ងៃនេះត្រូវនឹងគម្រោងមេរៀន ចូរមកតាមខ្ញុំ នោះ សូមពិចារណាសុំឲ្យសិស្សចែករំលែកនូវអ្វី ដែលពួកគេបានរៀនពីការសិក្សានៅផ្ទះរបស់ពួកគេ ។ សិស្សក៏អាចត្រូវបានលើកទឹកចិត្តឲ្យចែកចាយការយល់ដឹង ដែលទទួលបានពីថ្នាក់រៀនជាមួយគ្រួសាររបស់ពួកគេផងដែរ ។

ប្រធាន រ័សុល អិម ណិលសុន បានផ្តល់នូវការយល់ដឹងដូចខាងក្រោមនេះអំពីគោលបំណងនៃថ្ងៃឈប់សម្រាក ៖

Official portrait of President Russell M. Nelson taken January 2018

តើព្រះអង្គសង្គ្រោះមានន័យដូចម្ដេច កាលទ្រង់មានបន្ទូលថា « ថ្ងៃឈប់សម្រាកបានតាំងសម្រាប់ឲ្យមនុស្ស មិនមែនជាមនុស្សសម្រាប់ថ្ងៃឈប់សម្រាកទេ » ? [ ម៉ាកុស ២:២៧ ] ។ ខ្ញុំជឿថា ទ្រង់មានព្រះទ័យឲ្យយើងយល់ថា ថ្ងៃឈប់សម្រាកគឺជាអំណោយមកពីទ្រង់ បានប្រទានដល់យើង ដើម្បីសម្រាក [ ឬបានធូរស្បើយ ] ពីអស់ទាំងការតានតឹងក្នុងជីវិតប្រចាំថ្ងៃ និងឱកាសដើម្បីធ្វើឲ្យស្រស់ស្រាយខាងវិញ្ញាណ និងសាច់ឈាមឡើងវិញ ។ ព្រះបានប្រទានថ្ងៃពិសេសនេះដល់យើង មិនមែនសម្រាប់ការកម្សាន្ត ឬប្រកបការងារប្រចាំថ្ងៃនោះទេ ប៉ុន្តែដើម្បីសម្រាកពីកិច្ចការ ដោយមានធូរស្រាលខាងសាច់ឈាម និងវិញ្ញាណ ។

( រ័សុល អិម ណិលសុន « The Sabbath Is a Delight » Ensign ឬ Liahona ខែ ឧសភា ឆ្នាំ ២០១៥ ទំព័រ ១២៩ )

• តើអ្នកបានរៀនអ្វីខ្លះអំពីគោលបំណងរបស់ព្រះអម្ចាស់សម្រាប់ថ្ងៃឈប់សម្រាក ?

• តើយើងអាចរៀនអ្វីខ្លះអំពីព្រះអង្គសង្គ្រោះ ចេញពីសកម្មភាព និងអាកប្បកិរិយារបស់ទ្រង់នៅថ្ងៃឈប់សម្រាក ?

សូមជួយសិស្សឲ្យរកឃើញគោលការណ៍ដូចតទៅនេះ ៖ ព្រះអម្ចាស់ប្រទានថ្ងៃឈប់សម្រាកដល់យើងដើម្បីធ្វើអំពើល្អ និងសម្រាកពីអស់ទាំងការតានតឹងក្នុងជីវិតប្រចាំថ្ងៃ។

• តើអ្នកគិតថា ព្រះបញ្ញត្តិរបស់ព្រះឲ្យរក្សាថ្ងៃឈប់សម្រាកទុកជាបរិសុទ្ធ បង្ហាញពីសេចក្តីស្រឡាញ់របស់ទ្រង់ចំពោះយើងយ៉ាងដូចម្តេច ?

តើអ្នកអាចគោរពថ្ងៃឈប់សម្រាកដោយរបៀបណា ?

ការយល់ដឹងអំពីគោលបំណងនៃថ្ងៃឈប់សម្រាក និងពរជ័យដែលព្រះមានសម្រាប់អ្នក អាចជំរុញអ្នកឲ្យរក្សាថ្ងៃឈប់សម្រាកទុកជាបរិសុទ្ធបាន ។ តាមរយៈការរៀនពីរបៀបគោរពថ្ងៃឈប់សម្រាកឲ្យបានប្រសើរឡើង នោះអ្នករៀនដើម្បីអញ្ជើញឲ្យមានការប្រោស និងការសម្រាលទុក្ខរបស់ព្រះអង្គសង្គ្រោះចូលក្នុងជីវិតរបស់អ្នក ។

សូមផ្តល់ឲ្យសិស្សនូវសំណៅចែកមួយ ដែលមានព័ត៌មានដូចខាងក្រោម ឬបង្ហាញវានៅខាងមុខថ្នាក់ ។ សិស្សអាចសិក្សាព័ត៌មាននេះជាលក្ខណៈបុគ្គល ឬជាក្រុមតូចៗបាន ។

សូមសិក្សាប្រភពខាងក្រោមនេះដើម្បីស្វែងយល់បន្ថែមអំពីថ្ងៃឈប់សម្រាក និងពរជ័យដែលយើងអាចទទួលបាន តាមរយៈការគោរពដល់ថ្ងៃឈប់សម្រាក ។

• អេសាយ ៥៨:១៣–១៤

• គោលលទ្ធិ និង សេចក្ដីសញ្ញា ៥៩:៩–១០

ប្រធាន រ័សុល អិម ណិលសុន បានបង្រៀនដូចតទៅនេះ អំពីការបង្ហាញសេចក្តីស្រឡាញ់របស់យើងចំពោះព្រះនៅថ្ងៃឈប់សម្រាក ៖

Official portrait of President Russell M. Nelson taken January 2018

កាលខ្ញុំនៅក្មេង ខ្ញុំបានរៀនពីបញ្ជីមួយ ដែលគេចុះអំពីកិច្ចការដែលត្រូវធ្វើ និងកិច្ចការដែល មិន ត្រូវធ្វើនៅថ្ងៃឈប់សម្រាក ។ ទាល់តែក្រោយមកទៀត ទើបខ្ញុំបានរៀនចេញពីព្រះគម្ពីរថា ទង្វើ និងឥរិយាបថខ្ញុំនៅថ្ងៃឈប់សម្រាកគឺជា ទីសម្គាល់ រវាងខ្ញុំ និងព្រះវរបិតាសួគ៌ [ សូមមើល និក្ខមនំ ៣១:១៣ ; អេសេគាល ២០:១២, ២០ ] ។ ដោយមានការយល់ដឹងបែបនោះ ខ្ញុំពុំត្រូវការបញ្ជីនៃកិច្ចការដែលត្រូវធ្វើ និងមិនត្រូវធ្វើទៀតឡើយ ។ ពេលខ្ញុំសម្រេចចិត្តថាតើសកម្មភាពណា ដែលសមស្របនៅថ្ងៃឈប់សម្រាក ខ្ញុំសួរខ្លួនឯងថា « តើ ទីសម្គាល់ ណាដែលខ្ញុំចង់បង្ហាញដល់ព្រះ ? » សំណួរនេះបានធ្វើឲ្យជម្រើសខ្ញុំ នៅថ្ងៃឈប់សម្រាកមានភាពច្បាស់លាស់ឡើង ។

( រ័សុល អិម ណិលសុន « The Sabbath Is a Delight » Ensign ឬ Liahona ខែ ឧសភា ឆ្នាំ ២០១៥ ទំព័រ ១៣០ )

Sabbath Day handout

• តើអ្នកបានរៀនអ្វីខ្លះអំពីគោលបំណង និងពរជ័យនៃថ្ងៃឈប់សម្រាក ?

សូមមើលវីដេអូ « Share Your Sabbath » ( ០:៥៣ ) ដែលចែកចាយពីវិធីជាច្រើនដើម្បី « ធ្វើល្អ » នៅថ្ងៃឈប់សម្រាក ។

សំណួរខាងក្រោមនេះអាចផ្តល់ឱកាសឲ្យសិស្សចែករំចាយគំនិតរបស់ពួកគេ ចេញពីសំណើសកម្មភាពរៀបចំរបស់សិស្ស ។

• តើមានរបៀបណាខ្លះដែលអ្នកចូលចិត្ត ដើម្បីចូលទៅកាន់តែជិតព្រះយេស៊ូវគ្រីស្ទនៅថ្ងៃអាទិត្យ ?

នៅពេលសិស្សចែកចាយ សូមទទួលស្គាល់ថា ពួកគេអាចមានទស្សនៈផ្សេងគ្នាអំពីអ្វីដែលសមរម្យ ឬមិនសមរម្យនៅថ្ងៃឈប់សម្រាក ។ ប្រសិនបើចាំបាច់ សូមរំឭកសិស្សឲ្យយោគយោបល់ដល់គ្នា និងគោរពទស្សនៈរបស់អ្នកដទៃ ។

• តើអ្វីដែលអ្នកបានរៀននៅក្នុងមេរៀននេះ ជួយឆ្លើយនឹងសំណួររបស់អ្នកអំពីថ្ងៃឈប់សម្រាកយ៉ាងដូចម្តេច ?

• ប្រសិនបើអ្នករកមិនឃើញចម្លើយចំពោះសំណួររបស់អ្នកទេ តើអ្នកអាចធ្វើអ្វីខ្លះ ដើម្បីបន្តស្វែងរកចម្លើយទាំងនោះបាន ?

• តើអ្នកទទួលបានចំណាប់អារម្មណ៍អ្វីខ្លះ អំពីអ្វីដែលអ្នកអាចធ្វើបាន ដើម្បីរីករាយនឹងពរជ័យនៃការគោរពថ្ងៃឈប់សម្រាកឲ្យបានកាន់តែពេញលេញ ?

សូមពិចារណាថ្លែងទីបន្ទាល់អំពីសារៈសំខាន់នៃការរក្សាថ្ងៃឈប់សម្រាកទុកជាបរិសុទ្ធ ។ សូមអញ្ជើញសិស្សឲ្យចែកចាយទីបន្ទាល់របស់ពួកគេផងដែរ ប្រសិនបើពួកគេចង់ ។

វិចារណកថា និង ព័ត៌មានសាច់រឿង

ហេតុអ្វីបានជាពួកផារិស៊ីរិះគន់ពួកសិស្សចំពោះ « [ ការ ] បេះផ្លែពោត » នៅថ្ងៃឈប់សម្រាក ?

តាមក្រឹត្យវិន័យរបស់ម៉ូសេ មនុស្សម្នាក់អាចរើសគ្រាប់ធញ្ញជាតិដោយដៃបាន ដរាបណាគាត់ ឬនាងមិនប្រើឯកសិទ្ធិនេះហួសហេតុពេក ដោយការប្រើកណ្ដៀវទៅច្រូតកាត់វិញ ( សូមមើល ចោទិយកថា ២៣:២៥ ) ។ ទោះជាយ៉ាងណា ច្បាប់ផ្ទាល់មាត់របស់ពួកផារិស៊ីមានកំហិតហួសពីច្បាប់ម៉ូសេ ហើយនិយាយថា ការរើសគ្រាប់ស្រូវដោយដៃនៅថ្ងៃឈប់សម្រាកត្រូវបានហាមឃាត់ ។

តើការដឹងគុណអាចប្រទានពរដល់បទពិសោធន៍របស់អ្នកជាមួយពិធីសាក្រាម៉ង់ និងថ្ងៃឈប់សម្រាកយ៉ាងដូចម្តេច ?

នៅក្នុងវីដេអូ « Gratitude on the Sabbath Day » ( ៣:៣៨ ) ប្រធាន ហិនរី ប៊ី អាវរិង អញ្ជើញមនុស្សឲ្យអនុញ្ញាតឲ្យអំណាចនៃការដឹងគុណចូលក្នុងបទពិសោធន៍នៃថ្ងៃឈប់សម្រាករបស់ពួកគេ ។ វីដេអូនេះមាននៅលើគេហទំព័រ ChurchofJesusChrist.org ។

តើមានអ្វីទៀតដែលខ្ញុំអាចធ្វើបាន ដើម្បីអញ្ជើញឲ្យមានពរជ័យនៃថ្ងៃឈប់សម្រាក ?

ប្រធាន រ័សុល អិម ណិលសុន បានផ្តល់ការយល់ដឹងជាច្រើនអំពីវិធីដ៏មានប្រសិទ្ធភាព ដើម្បីអញ្ជើញឲ្យមានវិញ្ញាណនៃថ្ងៃឈប់សម្រាកនៅក្នុងសុន្ទរកថារបស់លោក « The Sabbath Is a Delight » ( Ensign ឬ Liahona ខែ ឧសភា ឆ្នាំ ២០១៥ ទំព័រ ១២៩–១៣២ ) ។វីដេអូ « Make the Sabbath a Delight by Finding Your Ancestors » ( ២:៥៧ ) បង្ហាញពីរបៀបដែលការចំណាយពេលវេលានៅថ្ងៃអាទិត្យ ដើម្បីធ្វើកិច្ចការពង្សប្រវត្តិអាចជះឥទ្ធិពលយ៉ាងខ្លាំងទៅលើថ្ងៃរបស់អ្នក និងលើជីវិតរបស់អ្នក ។ វីដេអូនេះមាននៅលើគេហទំព័រ ChurchofJesusChrist.org ។

តើការគោរពថ្ងៃឈប់សម្រាកអាចប្រទានពរដល់គ្រួសារខ្ញុំតាមរបៀបណា ?

វីដេអូ « How We Have Changed—Saisopa Family and the Sabbath Day » ( ៥:០៣ ) ដែលមាននៅលើគេហទំព័រ ChurchofJesusChrist.org ចែកចាយបទពិសោធន៍របស់គ្រួសារមួយ ដែលជីវិតដ៏រវល់របស់ពួកគេបានផ្លាស់ប្តូរ តាមរយៈការទទួលយកដំណឹងល្អ និងការគោរពដល់ថ្ងៃឈប់សម្រាក ។

សកម្មភាពរៀនសូត្របន្ថែម

តើអ្នកអាចរៀបចំខ្លួនសម្រាប់ថ្ងៃឈប់សម្រាកដោយរបៀបណា ?

សិស្សអាចទទួលបានអត្ថប្រយោជន៍ពីការស្តាប់គំនិតគ្នាទៅវិញទៅមក អំពីរបៀបត្រៀមខ្លួនសម្រាប់ថ្ងៃឈប់សម្រាកនៅសប្តាហ៍នេះ ។ សូមពិចារណាសួរសិស្សក្នុងថ្នាក់ថា « តើអ្នកបានរកឃើញអ្វីខ្លះ ដែលជាការរៀបចំដ៏មានគុណប្រយោជន៍ក្នុងអំឡុងសប្តាហ៍ ដើម្បីធ្វើឲ្យថ្ងៃឈប់សម្រាកកាន់តែមានពរជ័យ ? »