Doctrinal Mastery: Mateo 11:28–30
“Lumapit Kayo sa Akin … at Kayo’y Bibigyan Ko ng Kapahingahan”
Itinuro ni Jesucristo na kung lalapit tayo sa Kanya, pagagaanin Niya ang ating mga pasanin at bibigyan Niya tayo ng kapahingahan.Ang lesson na ito ay magbibigay sa iyo ng pagkakataon na maipaliwanag ang iyong pagkaunawa sa doktrinang ito sa pamamagitan ng paggamit ng mga alituntunin ng pagtatamo ng espirituwal na kaalaman sa isang sitwasyon na katulad ng mga karanasan mo sa sarili mong buhay.
Doctrinal mastery sa pamamagitan ng paghahayag. Ibinahagi ni Elder Kim B. Clark ng Pitumpu ang sumusunod tungkol sa doctrinal mastery: “Gusto kong malaman at madama ninyo sa inyong puso na dumating ito sa pamamagitan ng paghahayag mula sa Panginoon; isa itong himala. Napag-isipan ko na nang madalas kung paano ito dumating at kailan at bakit ito dumating. Nakita ko ang Doctrinal Mastery sa mas malaking aspekto ng edukasyon sa Simbahan at sa dakilang gawain ng Panginoon sa lupa” (Kim B. Clark, “Doctrinal Mastery at Malalim na Pag-aaral” [isang gabi kasama ang isang General Authority, Peb. 17, 2017], https://www.churchofjesuschrist.org/study/broadcasts/evening-with-ga-elder-gerrit-w-gong/2017/02/doctrinal-mastery-and-deep-learning?lang=tgl).
Paghahanda ng estudyante: Sabihin sa mga estudyante na magsanay na isaulo ang doctrinal mastery reference at ang mahalagang parirala para sa Mateo 11:28–30 (o ang buong scripture passage kung makakaya ng mga estudyante). Sabihin sa kanila na pag-isipan kung paano nila maipamumuhay ang natutuhan nila tungkol sa kapangyarihan ni Jesucristo na pagaanin ang kanilang mga pasanin kung lalapit sila sa Kanya.
Mga Posibleng Aktibidad sa Pag-aaral
Ang doctrinal mastery passage lesson na ito ay ginawa upang ituro pagkatapos ng “Mateo 11:28–30,” na siyang kontekstuwal na lesson para sa doctrinal mastery passage na Mateo 11:28–30 . Kung kailangang ilipat ang doctrinal mastery passage lesson na ito sa ibang linggo, tiyaking ituro din ang kaukulang kontekstuwal na lesson sa linggo ring iyon.
Isaulo at ipaliwanag
Bigyan ang mga estudyante ng pagkakataong isaulo ang reperensya at mahalagang parirala para sa Mateo 11:28–30 (Maaaring sabihin sa mga estudyante na isaulo ang buong scripture passage kung kaya itong gawin.)
Ang isang opsiyon ay isulat sa pisara ang sumusunod at pagkatapos ay sabihin sa mga estudyante na magsanay na bigkasin ang pahayag bilang isang klase o nang mag-isa.
“Mateo __:28–__: Lumapit kayo sa a_, k__ lahat na n____ a__ lubhang n____, at kayo’y b____ ko ng k_____.”
Ang Doctrinal Mastery app ay maaari ding makatulong sa iyo na maisaulo ang mahalagang pariralang ito.
Pagpapaliwanag ng katotohanan
Bigyan ang mga estudyante ng pagkakataong ipaliwanag ang doktrinang itinuro sa nakaraang lesson na kung lalapit tayo kay Jesucristo, pagagaanin Niya ang ating mga pasanin at bibigyan Niya tayo ng kapahingahan.
Ang isang paraan upang magawa ito ay ipakita ang sumusunod na larawan at sabihin sa mga estudyante na alalahanin kung ano ang pamatok o ipaliwanag ang gamit ng pamatok.
Alalahanin kung ano ang pamatok (tingnan ang sumusunod na larawan). Balikan ang Mateo 11:28–30 , at alamin ang mga katotohanang itinuro ng Tagapagligtas.
Tinutukoy ang larawan ng pamatok, ipaliwanag kung paano tayo matutulungan ng Tagapagligtas sa ating mga pasanin. Tiyaking isama kung ano ang ginagampanan natin bilang katuwang ni Cristo.
Pagsasanay para sa pagsasabuhay
Kung kailangang rebyuhin ng mga estudyante ang mga alituntunin ng pagtatamo ng espirituwal na kaalaman, maaari mong sabihin sa kanila na gawin ito sa mga grupo na may tigtatatlong estudyante. Sa mga grupo na may tigtatatlong estudyante, ang bawat isa sa grupo ay maaaring maghanap ng ibang alituntunin. Pagkatapos ay maaaring gamitin ng bawat tao ang sarili niyang salita upang ipaliwanag ang alituntunin sa kanyang grupo. Pagkatapos ay idispley o ibigay bilang handout ang sumusunod na aktibidad, at ipatugma sa mga estudyante ang alituntunin sa paliwanag nito. (Ang mga tamang sagot ay 1. C; 2. A; 3. B.)
Kung kinakailangan, rebyuhin ang mga alituntunin ng pagtatamo ng espirituwal na kaalaman sa pamamagitan ng pag-aaral ng talata 5–12 ng bahaging “Pagtatamo ng Espirituwal na Kaalaman” sa Doctrinal Mastery Core Document (2020). Pagkatapos ay itugma ang bawat isa sa mga sumusunod na pangungusap sa naaangkop na alituntunin ng pagtatamo ng espirituwal na kaalaman.
1. Ang matutong matukoy at maiwasan ang mga di-mapagkakatiwalaang sources ay maaaring magprotekta sa atin laban sa mga maling impormasyon at mula sa mga naghahangad na sirain ang ating pananampalataya.
2. Kapag hinahangad nating palaguin ang ating pang-unawa at lutasin ang mga alalahanin, mahalagang umasa tayo sa patotoong taglay na natin tungkol kay Jesucristo, sa Pagpapanumbalik ng Kanyang ebanghelyo, at sa mga turo ng Kanyang inorden na mga propeta.
3. Hinahangad natin ang tulong ng Espiritu Santo para makita ang mga bagay-bagay ayon sa pagtingin dito ng Panginoon.
A. Kumilos nang may pananampalataya
B. Suriin ang mga konsepto at tanong nang may walang-hanggang pananaw
C. Hangarin na mas makaunawa sa pamamagitan ng mga itinalagang sources na ibinigay ng Diyos
Sitwasyon
Maaaring makatulong na sabihin sa mga estudyante na alalahanin ang mga pasaning naisip nila sa nakaraang lesson.
Sa dalawa o tatlong pangungusap, gumawa ng isang kunwa-kunwariang sitwasyon tungkol sa isang taong kaedad mo na kasalukuyang nahihirapan sa isang pasanin. Magsama ng pangalan, isang partikular na pasanin, at isa o dalawang detalye tungkol sa nadarama ng tao.
Maaari mong sabihin sa mga estudyante na makipagpalitan ng sitwasyon. Pagkatapos ay maaaring sumulat ang mga estudyante ng tugon sa sitwasyong natanggap nila gamit ang mga alituntunin ng pagtatamo ng espirituwal na kaalaman. O kaya, para sa mas magkakaibang tugon, ang mga estudyante ay maaaring tumugon gamit lamang ang isang alituntunin ng pagtatamo ng espirituwal na kaalaman bago makipagpalitan ng sitwasyon sa isa pang estudyante. Maaaring tumugon ang estudyanteng iyon gamit ang ibang alituntunin bago muling magpalitan ng sitwasyon. Maaaring magpalitan ang mga estudyante ng mga sitwasyon sa ikatlong pagkakataon upang magamit ang lahat ng tatlong alituntunin. Pagkatapos ay sabihin sa mga estudyante na kunin ang mga sitwasyong isinulat nila at rebyuhin ang mga isinulat na sagot ng kanilang mga kaklase.
Pagtatamo ng espirituwal na kaalaman
Isipin kung paano mo magagamit ang mga alituntunin ng pagtatamo ng espirituwal na kaalaman upang matulungan ang tao sa sitwasyon. Sagutin ang mga sumusunod na tanong upang matulungan ka.
Kumilos nang may pananampalataya
-
Ano ang ginawa mo upang magtiwala sa Diyos at lumapit sa Kanya nang maharap ka sa mga hamon ng buhay?
-
Anong mga aral ang natutuhan mo sa pananampalataya kay Jesucristo noon na makatutulong sa sitwasyong ito? Paano?
Suriin ang mga konsepto at tanong nang may walang-hanggang pananaw
-
Ano ang nalalaman mo tungkol kay Jesucristo na dahilan kaya nagagawa Niyang pagaanin ang mga pasanin?
-
Paano naging mahalagang bahagi ng plano ng ating Ama sa Langit ang pagharap sa mga pasanin at hamon sa ating buhay?
Hangarin na mas makaunawa sa pamamagitan ng mga itinalagang sources na ibinigay ng Diyos
-
Paano makatutulong ang pag-alam sa doktrinang matatagpuan sa Mateo 11:28–30 sa pasanin o hamon na ito?
-
Ano ang isa pang banal na kasulatan o pahayag ng propeta na maaaring makatulong? Paano?
Pagpapagaan ng mga pasanin
Gamit ang natukoy mo, sumulat ng liham sa tao sa iyong sitwasyon. Isama ang mga katotohanan mula sa Mateo 11:28–30 at iba pang sources na makapagbibigay ng kapanatagan at lakas ng loob.
Kung nagpalitan ang mga estudyante ng mga sitwasyon, sabihin sa kanila na ibahagi ang kanilang liham sa kaklase na nagsulat ng sitwasyong tinugon nila.
-
Sa iyong palagay, aling alituntunin ng pagtatamo ng espirituwal na kaalaman ang pinakanakatulong sa iyo na maghanda sa pagtugon sa sitwasyong ito? Bakit?
Pagrerebyu
Tulungan ang mga estudyante na rebyuhin ang reperensya at mahalagang parirala para sa Mateo 11:28–30 .
Ang isang paraan upang matulungan ang mga estudyante sa pagrerebyu ay ang pagsusulat sa pisara ng mga sumusunod. Kung mayroon, maaari mong gamitin ang Doctrinal Mastery app. Maaaring makatulong sa mga estudyante na makipagtulungan sa isang kaklase, nang nagsasalitan sa pag-uulit ng reperensya at mahalagang parirala ng banal na kasulatan.
“Mateo __:28–__: Lumapit kayo sa a_, k__ lahat na n____ a__ lubhang n____, at kayo’y b____ ko ng k_____.”
Karagdagang Aktibidad sa Pag-aaral
Posibleng sitwasyon
Maaari mong ibahagi ang sumusunod na sitwasyon kung hindi makapag-isip ang mga estudyante ng sitwasyon habang isinasagawa ang aktibidad sa sitwasyon sa lesson.
“Talagang nahihirapan ako ngayon. Sinisikap kong manatiling malapit sa Panginoon, pero parami nang parami ang mga problema. Nahihirapan ako sa paaralan, hindi maganda ang sitwasyon sa pamilya ko ngayon, at hindi ako sigurado kung paano haharapin ang lahat. Parang hindi na maaayos ang lahat. Nag-aalala ako sa lahat ng ito, at hindi ko na alam kung ano ang gagawin.”