Sa Kanyang ministeryo, itinuro ng Tagapagligtas ang mas mataas na batas ng ebanghelyo at pinagaling Niya ang maysakit. Bagama’t dumarami ang tumututol sa Tagapagligtas at sa Kanyang mga turo, kinundena Niya ang kasamaan at nangako Siya ng kapahingahan sa lahat ng lalapit sa Kanya. Ang lesson na ito ay mas magpapatibay sa iyong tiwala na tutulungan ka ng Panginoon sa iyong mga hamon at pasanin.
Paghahanda ng estudyante: Sabihin sa mga estudyante na itanong sa isang kapamilya o kaibigan kung paano siya binigyan ng Tagapagligtas ng kapayapaan o kapanatagan.
Mga Posibleng Aktibidad sa Pag-aaral
Ang iyong mga pasanin at hamon
Ang sumusunod na aktibidad ay maaaring gawin sa pisara bilang isang klase, o maaaring sabihin sa mga estudyante na gumawa ng sarili nilang drowing.
Magdrowing ng isang stick figure na kumakatawan sa isang tinedyer. Gumuhit ng backpack sa likod ng stick figure na kumakatawan sa mga pasanin at stress na kinakaharap ng mga tinedyer ngayon. Sumulat ng kahit lima sa mga pasanin o stress na iyon sa loob, sa ibabaw, o sa paligid ng backpack.
Sabihin sa mga estudyante na ibahagi ang idinrowing nila.
Larawan
Stick man carrying a backpack.
Sabihin sa mga estudyante na ipikit ang kanilang mga mata at isipin ang kanilang sagot sa sumusunod na tanong.
Sa scale na isa hanggang lima, kung saan ang lima ay napakahusay at ang isa ay hindi mahusay, sa palagay mo, gaano kahusay mong hinaharap ang iyong mga pasanin at ang mga nakaka-stress na pangyayaring nararanasan mo?
Kung hindi mo pa ito nagagawa, isiping maglaan ng ilang sandali ngayon upang maanyayahan ang iyong Ama sa Langit na tulungan ka sa paghahanap ng mga alituntunin na makatutulong sa iyo sa mga partikular na pasaning dinadala mo sa kasalukuyan.Basahin ang Mateo 11:28–30 , at alamin ang mga katotohanang itinuro ng Tagapagligtas na maaaring makatulong sa isang taong nabibigatan sa mga pasanin.
Mateo 11:28–30 ay isang doctrinal mastery passage. Maaari mong markahan ang mga doctrinal mastery passage sa paraang madali mo itong mahahanap.
Maaari mong isulat sa pisara ang mga sagot ng mga estudyante sa mga sumusunod na tanong malapit sa stick figure.
Ano ang mga katotohanang nahanap mo?
Paano makatutulong ang mga katotohanang ito sa isang taong nahihirapan?
Bagama’t maaaring gumamit ang mga estudyante ng magkakaibang salita, tiyaking nauunawaan nila na kung lalapit tayo kay Jesucristo, pagagaanin Niya ang ating mga pasanin at bibigyan Niya tayo ng kapahingahan. Itanong sa mga estudyante kung mayroon silang anumang tanong tungkol sa natutuhan nila.
Tingnan ang bahaging “Mga Karagdagang Aktibidad sa Pag-aaral” para sa isang alternatibong paraan upang matulungan ang mga estudyante na matutuhan ang tungkol sa mga parirala sa Mateo 11:28–30.
“Pasanin ninyo ang aking pamatok”
Kung minsan, ang mga salita o parirala sa mga banal na kasulatan ay maaaring mahirap maunawaan. Ang matutuhan ang kahulugan ng mga salita at parirala ay makatutulong sa atin na malaman kung ano ang nais ng Tagapagligtas na malaman natin. Magsanay rito gamit ang pariralang “Pasanin ninyo ang aking pamatok” ( Mateo 11:29).
Hikayatin ang mga estudyante na ibahagi ang nalalaman na nila tungkol sa pariralang ito sa pamamagitan ng pagtatanong ng mga sumusunod: Ano ang pamatok? Ano ang pamatok ni Jesucristo? Paano natin papasanin ang pamatok ni Jesucristo?
Gamitin ang alinman sa sumusunod na impormasyon o ang lahat ng ito upang matulungan ang mga estudyante na maunawaan ito.
Ipakita ang sumusunod na larawan.
Larawan
Harvest time, Gujarat, India
Ang pamatok ay “isang kagamitang inilalagay sa leeg ng mga hayop o tao upang gamitin silang magkasama” (Gabay sa mga Banal na Kasulatan, “ Pamatok ,” https://www.churchofjesuschrist.org/study/scriptures/gs?lang=tgl). Ang mga hayop sa larawang ito ay nilagyan ng pamatok.
Isinalaysay ni Elder Edward Dube ng Pitumpu ang sumusunod na karanasan:
Larawan
Official Portrait of Elder Edward Dube. Photographed March 2017.
Noong Disyembre 2015 sa Madziva, Zimbabwe, may nakita kami ni Naume [ang asawa ko] ng isang lalaking nag-aararo sa kanyang bukid kasama ang dalawang baka. Nagulat ako sa nakita ko na ang isang hayop ay isang malaking baka at ang isa naman ay isang maliit na toro. Nagtaka talaga ako. Naibulalas ko, “Bakit mag-aararo ang isang magsasaka gamit ang dalawang hayop na magkaiba ng laki at nilagyan ng pamatok?”
Ang ina ni Naume, na nakatayo sa malapit, ay itinuro ang pamatok. Tiningnan ko nang mabuti at nakakita ako ng panali [lubid o tanikala] sa pamatok na nakatali sa toro. Hinihila ng malaking baka ang lahat ng bigat, at sinasanay at tinuturuang mag-araro ang maliit na toro.
(Edward Dube, “Learn of Me,” Liahona, Okt. 2020, Africa Southeast Local Pages, ChurchofJesusChrist.org)
Paano maitutulad ang ating ugnayan sa Tagapagligtas sa malaking baka at maliit na toro?
Paano napalalalim ng nalaman mong kahulugan ng pamatok ang iyong pagkaunawa sa nadarama ni Cristo tungkol sa iyo?
Sinabi ni Elder David A. Bednar ng Korum ng Labindalawang Apostol:
Larawan
Official Portrait of Elder Edward Dube. Photographed March 2017.
Sa paggawa at pagtupad ng mga sagradong tipan, pinapasan natin ang pamatok at nakikiisa tayo sa Panginoong Jesucristo.
(David A. Bednar, “Mabata Nila ang Kanilang mga Pasanin nang May Kagaanan,” Ensign o Liahona, Mayo 2014, 88)
Sa iyong palagay, paano natin nakakasama ang Tagapagligtas at paano tayo nakikiisa sa Kanya sa paggawa at pagtupad ng mga tipan?
Ipinaliwanag ni Elder Dube:
Larawan
Official Portrait of Elder Edward Dube. Photographed March 2017.
Kapag nakikiisa tayo kay Jesucristo, pinapasan Niya ang pasanin, at nakikibahagi tayo sa kagalakan sa paggawa. Ang paanyaya ng Panginoon sa bawat isa sa atin na matuto sa Kanya ang tanging tiyak na paraan na magdudulot ng kapayapaan, kagalakan at nagbibigay ng mga sagot sa nababagabag.
(Edward Dube, “Learn of Me,” Liahona, Okt. 2020, Africa Southeast Local Pages, ChurchofJesusChrist.org)
Paano nakatulong sa iyo ang natutuhan mo tungkol kay Jesucristo sa taon na ito na makayanan ang iyong pasanin at paano ito nagdulot sa iyo ng kapayapaan at kagalakan?
Ipakita sa pisara ang mga pamagat ng mga sumusunod na aktibidad. Maaari mong itanong kung alin sa mga sumusunod na pahayag ang mas gustong pag-aralan ng mga estudyante bilang isang klase. O sabihin sa mga estudyante na pumili ng isang aktibidad at mag-aral nang mag-isa, kasama ang isang kaklase, o sa isang maliit na grupo. Ipakita ang mga instruksyon para sa mga aktibidad upang matingnan ito ng mga estudyante habang nag-aaral sila.
Paglapit kay Cristo at pagtanggap sa Kanyang kapahingahan
Aktibidad A: “Lumapit kayo sa akin” ( Mateo 11:28). Paano ako makalalapit kay Cristo?
Upang matanggap ang tulong ng Tagapagligtas at ang kapahingahang ibinibigay Niya, kailangan nating lumapit sa Kanya.
Kung may nagtanong sa iyo kung ano ang ibig sabihin ng lumapit kay Cristo, ano ang sasabihin mo?
Tinukoy ni Elder Richard G. Scott (1928–2015) ng Korum ng Labindalawang Apostol ang ilang paraan kung paano tayo makalalapit kay Cristo.
Larawan
Official Portrait of Elder Edward Dube. Photographed March 2017.
Kapag patuloy tayong nagdarasal sa umaga at sa gabi, nag-aaral ng ating mga banal na kasulatan araw-araw, nagkakaroon ng lingguhang family home evening, at dumadalo sa templo nang regular, tayo ay masigasig na tumutugon sa Kanyang paanyaya na “lumapit sa Kanya.”
(Richard G. Scott, “Unahin Ninyong Manampalataya,” Ensign o Liahona, Nob. 2014, 94)
Larawan
Harvest time, Gujarat, India
Ano ang ilang bagay na ginawa mo upang mas mapalapit kay Jesucristo? (Maaaring kabilang dito ang mga tipang ginawa at tinupad mo.)
Ano sa palagay mo ang maaari mong gawin upang mas lubos na makalapit kay Cristo at matamo ang Kanyang banal na tulong?
Aktibidad B: “Kayo’y bibigyan ko ng kapahingahan” ( Mateo 11:28). Paano mapagagaan ni Cristo ang aking mga pasanin?
Nakatala sa Aklat ni Mormon ang isang nakaaantig na halimbawa tungkol sa pagpapagaan ng Tagapagligtas sa mga pasanin. Si Alma at ang kanyang mga tao ay binihag, sapilitang pinagtrabaho, at labis na inusig.
Ano ang natutuhan mo tungkol sa mga paraan kung paano ka matutulungan ng Tagapagligtas na batahin ang iyong mga pasanin?
Ano ang ginawa ng mga tao ni Alma upang matanggap ang tulong ng Tagapagligtas?
Paano makatutulong sa isang taong nahaharap sa mga hamon ang pag-unawa na dapat tayong lumapit sa Tagapagligtas?
Isipin ang sarili mong mga karanasan o ang mga karanasan ng mga taong kilala mo, at isulat ang isang pagkakataon na pinagaan ng Tagapagligtas ang isang pasanin. Tiyaking isama ang ginawa mo o ng isang taong kilala mo upang lumapit sa Tagapagligtas at kung paano Siya tumulong.
Kapag nagawa na ng mga estudyante ang kanilang piniling aktibidad, sabihin sa kanila na ibahagi ang gusto nilang maalala. Maaari kang magbahagi ng personal na patotoo o anyayahan ang mga estudyante na ibahagi ang kanilang mga patotoo kung paano sila tinulungan ng Tagapagligtas sa mga oras ng pangangailangan.
Komentaryo at Pinagmulang Impormasyon
Paano tayo tinututulungan ni Jesucristo kapag lumalapit tayo sa Kanya?
Ipinaliwanag ni Elder John A. McCune ng Pitumpu ang ilan sa mga pagpapalang maaaring dumating kapag lumapit tayo kay Jesucristo.
Larawan
Official portrait of John A. McCune. Sustained April 6, 2019 as a General Authority Seventy.
Sa pagtanggap natin sa paanyaya ng Tagapagligtas na “lumapit sa akin,”maglalaan Siya ng suporta, aliw, at kapayapaang kailangan. … Maging sa pinakamabibigat nating pagsubok, madarama natin ang mainit na yakap ng Kanyang pagmamahal kapag nagtiwala tayo sa Kanya at tinanggap natin ang Kanyang kalooban.
(John A. McCune, “Lumapit kay Cristo—Pamumuhay bilang mga Banal sa mga Huling Araw,” Ensign o Liahona, Mayo 2020, 36)
Mga Karagdagang Aktibidad sa Pag-aaral
Alternatibong aktibidad sa pag-aaral
Ang aktibidad na ito ay maaaring gawin sa simula ng klase. Magdala sa klase ng kahon o backpack na walang laman at mabibigat na bagay na ilalagay sa loob nito, tulad ng malalaking bato o mga aklat. Sabihin sa isang estudyante na pumunta sa harap ng silid, at ipahawak sa kanya ang kahon na walang laman o isuot ang backpack. Ipasagot sa klase ang mga tanong na matatagpuan sa simula ng lesson. Maaaring ilista sa pisara ng isang estudyante ang mga sagot ng kanyang mga kaklase. Pagkatapos ng bawat sagot, maglagay ng mabigat na bagay sa kahon o backpack hanggang mapuno ito.
Maaaring basahin ng mga estudyante ang Mateo 11:28–30 , at alamin at markahan ang maiikling parirala na mahalaga sa kanila. Kabilang sa mga halimbawa ang “Lumapit kayo sa akin,” “Kayo’y bibigyan ko ng kapahingahan,” “Makakatagpo kayo ng kapahingahan para sa inyong mga kaluluwa,” “Matuto kayo sa akin,” at “Maamo at may mapagpakumbabang puso.”
Sabihin sa mga estudyante na pumili ng isang parirala at isulat ito sa sarili nilang salita. Sabihin sa kanila na maghanap ng cross-reference na tutulong sa kanila na maunawaan kung ano ang ibig sabihin ng parirala. Halimbawa, maaari nilang hanapin ang mga salitang lumapit, kapahingahan, o mapagpakumbaba sa Gabay sa mga Banal na Kasulatan. Sabihin sa mga estudyante na ibahagi ang nalaman nila at kung paano ito makatutulong sa isang taong nahihirapan sa isang pasanin.
