Pagrerebyu ng Doctrinal Mastery 16

Isaulo ang mga Reperensya at Mahahalagang Parirala ng Banal na Kasulatan

Ang pagsasaulo ng mga scripture passage at ng itinuturo sa mga ito ay makatutulong sa iyo sa maraming paraan. Ang lesson na ito ay naglalayong tulungan kang maisaulo ang ilan sa mga doctrinal mastery scripture reference sa Bagong Tipan at mahahalagang parirala ng banal na kasulatan.

Paggamit ng iba’t ibang paraan upang mahikayat ang mga estudyante. Ang paggamit ng iba’t ibang estratehiya sa pagtuturo ay makatutulong sa mga estudyante na matuto nang mas epektibo. Iangkop ang materyal ng lesson upang mahikayat ang mga estudyante at makatulong ito nang husto sa kanila na matuto.

Paghahanda ng estudyante: Ipabasa sa mga estudyante ang isa o dalawa sa mga doctrinal mastery passage na pinag-aaralan nila. Hikayatin silang isaulo ang reperensyang banal na kasulatan at mahalagang parirala ng banal na kasulatan, o kung maaari, ang buong doctrinal mastery passage.

Mga Posibleng Aktibidad sa Pag-aaral

Maaaring kailanganing ituro ang isang doctrinal mastery passage lesson kapalit ng lesson sa pagrerebyu na ito. Tingnan ang iskedyul sa pagtuturo na ibinigay ng area o region director o coordinator upang matiyak na maituturo ang bawat doctrinal mastery passage lesson habang may klase sa seminary.

• Bakit mo isasaulo ang ilan sa mga sumusunod: mga titik ng awit, iskedyul, o impormasyon tungkol sa mga manlalaro ng sports o mga performer?

• Ano ang iba pang halimbawa ng mga bagay na isinasaulo mo? Bakit mo isinasaulo ang mga ito?

Maaari kang magbahagi ng isang halimbawa ng isang bagay na isinasaulo mo at kung bakit mo ito isinasaulo.

• Ano ang ilang dahilan sa pagsasaulo ng mga banal na kasulatan?

Basahin ang sumusunod na pahayag ni Elder Richard G. Scott (1928–2015) ng Korum ng Labindalawang Apostol. Maghanap ng kahit tatlong pagpapala na maibibigay sa atin ng mga isinaulong banal na kasulatan.

Iminumungkahi ko na isaulo ninyo ang mga banal na kasulatan na umaantig sa inyong puso at pumupuspos ng pag-unawa sa inyong kaluluwa. Kapag ginagamit ang mga banal na kasulatan ayon sa paraan kung paano ito ipinasulat ng Panginoon, ang mga ito ay may tunay na kapangyarihan na hindi ninyo maipararating kung ibang salita ang gagamitin ninyo. Kung minsan, kapag may matinding pangangailangan sa buhay ko, inaalala at binabalikan ko ang mga banal na kasulatan na nagbibigay sa akin ng lakas. May malaking kapanatagan, patnubay, at kapangyarihan na nagmumula sa mga banal na kasulatan, lalo na sa mga salita ng Panginoon.

(Richard G. Scott, “He Lives,” Ensign, Nob. 1999, 87–88)

• Ano ang ilang pagpapalang naranasan mo sa pagsasaulo ng mga banal na kasulatan o mahahalagang parirala mula sa mga banal na kasulatan?

• Paano nakatulong sa iyo ang pagsasaulo ng mga salita ng Panginoon na nakatala sa banal na kasulatan upang mas mapalapit ka sa Ama sa Langit at kay Jesucristo?

Mga flash card

Ang isang paraan upang magsaulo ng mga reperensyang banal na kasulatan at mahahalagang parirala ay gumamit ng mga flash card. Para makagawa ng mga flash card, itupi sa gitna ang isang blangkong papel at pagkatapos ay itupi ito ulit upang makagawa ng apat na bahagi. Buklatin ang papel, at gupitin ito sa mga linya para makagawa ng apat na card.

Kung kinakailangan, palitan ang mga sumusunod na reperensya at mahahalagang parirala ng banal na kasulatan ng mga reperensya at mahahalagang parirala ng mga doctrinal mastery passage na pinag-aaralan ng mga estudyante.

Isulat ang bawat isa sa mga sumusunod na reperensya sa isang bahagi ng bawat card. Sa kabilang bahagi, isulat ang mahalagang parirala ng banal na kasulatan.

Reperensya	Mahalagang Parirala ng Banal na Kasulatan
Efeso 1:10	“Bilang katiwala ng kaganapan ng panahon, upang tipunin ang lahat ng mga bagay kay Cristo.”
Efeso 2:19–20	Ang Simbahan ay “itinayo sa saligang inilagay ng mga apostol at ng mga propeta, na si Cristo Jesus ang batong panulok.”
2 Tesalonica 2:1–3	“Ang kaarawan ng Panginoon … [ay] hindi darating, malibang maunang maganap ang pagtalikod.”
2 Timoteo 3:15–17	“Ang mga banal na kasulatan [ay] makakapagturo sa iyo tungo sa kaligtasan.”

Maging malikhain na makatutulong sa iyo na magsaulo. Pumili ng isa sa mga sumusunod na ideya o mag-isip ng mga sarili mong ideya.

• Bigyan ng quiz ang iyong sarili: Hawakan ang mga flash card upang ang reperensya o mahahalagang parirala ng banal na kasulatan lang ang makikita mo. Subukang sabihin ang kaukulang mahalagang parirala o reperensyang banal na kasulatan. Ulitin ito nang ilang beses sa bawat reperensya at kaukulang parirala.

• Mag-text bilang rebyu: Mag-text ng isang reperensya sa mga kaibigan sa iyong klase sa seminary at tingnan kung sino ang magte-text ng tamang mahalagang parirala.

• Pagtutugma-tugma: Makipagpartner sa isang kaklase o kapamilya. Sabihin sa isang tao na ilagay ang kanyang mga card nang nakaharap ang mga reperensya at sa isa pang tao na ilagay ang kanyang mga card nang nakaharap ang mahahalagang parirala ng banal na kasulatan. Itugma ang mahalagang parirala ng banal na kasulatan sa kaukulang reperensya sa pamamagitan ng pagpapatong ng card na may mahalagang parirala ng banal na kasulatan sa card ng reperensya.

• Gamitin ang app: Gamitin ang Doctrinal Mastery app para matulungan kang magsaulo.

Maaari mong hatiin ang mga estudyante sa mga grupong may tig-aapat na miyembro. Sabihin sa bawat grupo na gumamit ng isang set ng mga flash card at hatiin ito sa mga kagrupo. Magbasa ng isang mahalagang parirala ng banal na kasulatan sa klase. Ang estudyante sa bawat grupo na may hawak ng card na may katugmang reperensya ang magbibigay ng card sa titser. Hikayatin ang bawat grupo na dalhin ang tamang card sa titser nang hindi lalampas sa itinakdang oras (halimbawa, limang segundo). Hikayatin ang mga estudyante na tulungan ang iba pa nilang kagrupo. Maaari ding anyayahan ang mga estudyante na makipagpalitan ng card sa kanilang mga kagrupo upang matulungan silang matutuhan ang lahat ng reperensya at mahahalagang parirala ng banal na kasulatan.

Pumili ng isa sa mga doctrinal mastery passage.

• Bakit gusto mong isaulo ang scripture passage o mahalagang parirala ng banal na kasulatan na ito?

• Paano ito makatutulong na mapalalim ang iyong pag-unawa tungkol kay Jesucristo at sa Kanyang ebanghelyo?

Kung may natitira pang oras, maaaring gumawa ang mga estudyante ng mga flash card para sa iba pang reperensya at kaukulang mahahalagang parirala ng banal na kasulatan.