Ako Maʻuloto ʻa e Ngaahi Fakamoʻoni Fakafolofolá mo e Ngaahi Kupuʻi Lea Mahuʻinga he Folofolá
ʻĪmisi
Mother and young woman in New Zealand are sitting together reading scriptures. Also shots of woman along pondering.
ʻE lava ke tokoniʻi koe ʻi ha ngaahi founga lahi ʻi hono manatua e ngaahi potufolofolá mo e ngaahi meʻa ʻoku nau akoʻí. ʻOku fakataumuʻa ʻa e lēsoni ko ʻení ke tokoni atu ke ke ako maʻuloto ha niʻihi ʻo e ngaahi potufolofola fakataukei fakatokāteline ʻo e Fuakava Foʻoú mo e ngaahi kupuʻi folofola mahuʻingá.
Ko hono fakaʻaongaʻi ʻo e founga kehekehe ke fakakau mai e kau akó. ʻE lava ke tokoni hono fakaʻaongaʻi ha ngaahi founga fakafaiako kehekehe ke ako lelei ange ai e kau akó. Fakafenāpasi e naunau fakalēsoní ke fakamānako ki he kau akó mo ne lava ʻo tokoniʻi lelei taha kinautolu ke nau ako.
Teuteu ʻa e tokotaha akó: Fakaafeʻi e kau akó ke nau lau ha potufolofola fakataukei fakatokāteline ʻe taha pe ua kuo nau ako. Fakatukupaaʻi ke nau ako maʻuloto ʻa e fakamoʻoni fakafolofola mo e kupuʻi lea mahuʻinga ʻo e folofolá pe, kapau ʻe lava, ako maʻuloto kotoa e potufolofola fakataukei fakatokāteliné.
Ngaahi ʻEkitivitī Ako ʻOku Ala Fakahokó
ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni potufolofola fakataukei fakatokāteline takitaha lolotonga e fakataha ʻa e seminelí.
Ko e hā nai e ʻuhinga ka ke ka ako maʻuloto ai ha niʻihi ʻo e ngaahi meʻá ni: fakalea ʻo e hivá, taimi-tēpilé, pe ngaahi moʻoniʻi meʻa fekauʻaki mo e kau vaʻinga sipotí pe kau faivá?
Ko e hā ha ngaahi sīpinga kehe ʻo e ngaahi meʻa ʻokú ke ako maʻulotó? Ko e hā e ʻuhinga ʻokú ke ako maʻuloto ai kinautolú?
Fakakaukau ke vahevahe ha sīpinga fakataautaha ʻo hono ako maʻuloto ha meʻa mo ha ngaahi ʻuhinga ki hono ako maʻuloto iá.
Ko e hā ha ngaahi ʻuhinga ke ako maʻuloto ai e folofolá?
Lau e fakamatala ko ʻeni ʻa ‘Eletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá. Kumi ha tāpuaki ʻe tolu pe lahi ange ʻe lava ke tau maʻu mei hono ako maʻuloto e ngaahi veesi folofolá.
ʻĪmisi
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.
ʻOku ou fokotuʻu atu ke mou ako maʻuloto e potufolofola ʻoku ongo ki homou lotó mo fakafonu homou laumālié ʻaki e mahinó. ʻI he taimi ʻoku fakaʻaongaʻi ai e folofolá ʻo fakatatau mo e ʻuhinga kuo fekau ʻe he ʻEikí ke hiki ai kinautolú, ʻoku ʻi ai honau mālohi ʻoku ʻikai lava ʻo fakahoko ʻo kapau ʻe fakamatalaʻi ʻi he lea pē ʻaʻau. Ko e taimi ʻe niʻihi ʻi he taimi ʻoku ʻi ai ai ha fiemaʻu mahuʻinga ʻi heʻeku moʻuí, ʻoku ou toe vakaiʻi e folofola kuó ne ʻomi kiate au ha mālohí. ʻOku ʻi ai ha fakafiemālie, fakahinohino, mo ha mālohi lahi ʻoku maʻu mei he folofolá, tautautefito ki he folofola ʻa e ʻEikí.
(Lisiate G. Sikoti, “He Lives,” Ensign, Nov. 1999, 87–88)
Ko e hā ha ngaahi tāpuaki kuó ke aʻusia mei hono ako maʻuloto ʻo e folofolá pe ngaahi kupuʻi lea mahuʻinga mei he folofolá?
Kuo tokoniʻi fēfē koe ʻe hono ako maʻuloto e ngaahi folofola ʻa e ʻEikí ʻoku lekooti ʻi he folofolá ke ke ongoʻi ofi ange ai ki he Tamai Hēvaní mo Sīsū Kalaisi?
ʻŪ kaati fakaʻaliʻalí
Ko e founga ʻe taha ke ako maʻuloto ai e ngaahi fakamoʻoni fakafolofolá mo e ngaahi kupuʻi lea mahuʻingá ko hono fakaʻaongaʻi e fanga kiʻi kaati fakaʻaliʻalí. Ke faʻu ha fanga kiʻi kaati fakaʻaliʻali, pelu ua ha laʻipepa teʻeki fakafonu ha meʻa ai pea toe vaeua ke faʻu ha konga ʻe fā. Fakaava e laʻipepá, pea kosi ʻi he laine kuo pelupelú ke faʻu ha kaati ʻe fā.
Kapau ʻe fiemaʻu, fetongi e ngaahi fakamoʻoni fakafolofola mo e ngaahi kupuʻi lea mahuʻinga ko ʻení ʻaki e ngaahi fakamoʻoni fakafolofola mo e ngaahi kupuʻi lea mahuʻinga ʻo e ngaahi potufolofola fakataukei fakatokāteline kuo ako ʻe he kau akó.
Hiki e ngaahi fakamoʻoni fakafolofola takitaha ko ʻení ʻi he tafaʻaki ʻe taha ʻo e kaati takitaha. ʻI he tafaʻaki ʻe tahá, tohiʻi ai ʻa e kupuʻi lea mahuʻinga ʻo e potufolofolá.
“[Ko] e ngaahi tohi māʻoniʻoní … ʻoku faʻa fakapoto koe ki he fakamoʻuí.”
Mohu founga ke tokoni atu ke ke ako maʻuloto. Fili ha taha ʻo e ngaahi fakakaukau ko ʻení pe faʻu haʻo fakakaukau pē ʻaʻau.
Siviʻi koe: Puke e fanga kiʻi kaati fakaʻaliʻalí ke ke lava ʻo sio pē ki he fakamoʻoni fakafolofolá pe kupuʻi lea mahuʻingá. Feinga ke ke lea ʻaki e kupuʻi lea pe fakamoʻoni fakafolofola mahuʻinga ʻoku fekauʻaki mo iá. Toutou fai ʻeni ʻaki ʻa e fakamoʻoni fakafolofola takitaha pea mo e kupuʻi lea ʻoku fekauʻaki mo iá.
Toe vakaiʻi e fakamatalá: Text ha potufolofola ki ho ngaahi kaungāmeʻa ʻi he kalasi seminelí pea sio pe ko hai ʻe text fakafoki atu mo e kupuʻi lea mahuʻinga tonú.
ʻEkitivitī fakatauhoá: Ngāue fakataha mo ha kaungā-ako ʻe taha pe mēmipa ʻo e fāmilí. ʻAi ha taha ke hanga ki ʻolunga ʻene kātí pea fakafoʻohakeʻi ʻe he tokotaha ʻe tahá ʻene kātí mo e kupuʻi lea mahuʻingá ke hanga hake ki ʻolunga. Fakatauhoa e kupuʻi folofola mahuʻingá ki he fakamoʻoni fakafolofola ʻoku fekauʻaki mo iá ʻaki hano fakahoa hifo e kaati mo e kupuʻi lea mahuʻingá ʻi ʻolunga ʻi he kaati fakafekauʻakí.
Fakaʻaongaʻi ʻa e polokalamá: Fakaʻaongaʻi ʻa e app Fakataukei Fakatokāteliné ke tokoni atu ke ke ako maʻuloto.
Fakakaukau ke vahevahe e kau akó ki ha ngaahi kulupu tautau toko fā. Fakaafeʻi e kulupu takitaha ke nau fakaʻaongaʻi ha seti kaati fakaʻaliʻali ʻe taha pea vahevahe ʻa e seti ko ʻení ki he kau mēmipa ʻo e kulupú. Lau ha kupuʻi lea mahuʻinga ki he kalasí. ʻOku totonu ke ʻoange leva ʻe he tokotaha ako ʻi he kulupu takitaha ʻokú ne maʻu ʻa e kātí ʻa e fakamoʻoni fakafolofola ʻoku hoa mo iá, ʻa e kātí ki he faiakó. Poleʻi e kulupu takitaha ke ʻomi ʻa e kaati totonú ki he faiakó ʻi loto ʻi ha taimi fakangatangata (hangē ko ʻení, sekoni ʻe nima). Poupouʻi e kau akó ke nau tokoni ki he kau mēmipa kehe ʻo ʻenau timí. ʻE lava foki ke fakaafeʻi e kau akó ke nau fetongi kaati mo ha taha kehe ʻi heʻenau kulupú ke tokoni ke nau ako kotoa e ngaahi fakamoʻoni fakafolofolá mo e ngaahi kupuʻi lea mahuʻingá.
Fili ha taha ʻo e ngaahi potufolofola fakataukei fakatokāteliné.
Ko e hā ka ke fiemaʻu ai ke ako maʻuloto ʻa e potufolofola pe kupuʻi lea mahuʻinga ko ʻení?
ʻE tokoni fēfē ia ke fakaloloto ange hoʻo mahino kia Sīsū Kalaisi mo ʻEne ongoongoleleí?
Kapau ʻoku toe ha taimi, ʻe lava ke ngaohi ʻe he kau akó ha fanga kiʻi kaati fakaʻaliʻali maʻa ha ngaahi fakamoʻoni fakafolofola kehe pea mo e ngaahi kupuʻi folofola mahuʻinga ʻoku fekauʻaki mo iá.
