Siviʻi Hoʻo Akó 7

Ngāue 1–28

ʻĪmisi

Young women enjoying themselves in Ghana.

ʻOku fakataumuʻa e lēsoni ko ʻení ke tokoniʻi koe ke ke vakaiʻi e ngaahi taumuʻa kuó ke fokotuʻú pea mo e ako mo e tupulaki kuó ke aʻusia lolotonga hoʻo ako e Fuakava Foʻoú.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha ngaahi sīpinga mei he Ngāue ʻa e kakai naʻa nau ului kia Sīsū Kalaisí.

Ngaahi ʻEkitivitī Ako ʻOku Ala Fakahokó

ʻOku fakataumuʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú, ʻenau malava ke fakamatalaʻi e ngaahi akonaki ʻi he Fuakava Foʻoú, pe founga ʻoku liliu ai honau ʻulungāngá, loto-holí, mo ʻenau malava ke moʻui ʻaki e ongoongoleleí. Mahalo ne fakamamafaʻi ʻi he ako ʻa e kau akó e Mātiu 1–28 e ngaahi moʻoni makehe mei he ngaahi moʻoni ʻi he ngaahi ʻekitivitī ko ʻení. Kapau ko ia, ʻe lava ke fulihi e ngaahi ʻekitivitií ke fakakau ai e ngaahi moʻoni ko iá.

ʻOku ʻi ai ha tefito kehe ke fakahoko ai ha sivi ʻi he konga ʻo e “Ngaahi ʻEkitivitī Fakalahi ki he Akó”.

ʻE lava nai e kakaí ʻo liliu?

Fakakaukauloto ʻoku tala atu ho kaungāmeʻá ʻoku ʻi ai ha ngaahi meʻa ʻokú ne fie liliu fekauʻaki mo ia, ka ʻoku ʻikai ke ne fakakaukau te ne lava ʻo fai e ngaahi liliu ko iá.

Ko e hā haʻo tali?
ʻOkú ne tokoniʻi fēfē hoʻo moʻuí ke ʻiloʻi te ke lava ʻo liliu ʻo fakafou ʻi he Fakalelei ʻa Sīsū Kalaisí?

Fakamanatu ki he kau akó ʻa ʻenau teuteu ki he kalasí.

Fakakaukau ki he ngaahi talanoa mei he tohi ʻa Ngāué ʻokú ne fakahaaʻi ʻa e founga ʻe lava ke liliu ai ʻa e kakaí ʻo lelei ange ʻi heʻenau haʻu kia Kalaisi pea hoko ko ʻEne kau ākongá.

Kapau ʻe fiemaʻu, fakakaukau ke toe vakaiʻi ha sīpinga ʻe taha pe lahi ange mei he ngaahi sīpinga ko ʻení.

Kakai naʻa nau kau ki he Siasí: Ngāue 2:14, 36–47
Ko e ʻiunoke ʻItiopeá: Ngāue 8:26–40
Saula (ʻa ia naʻe hoko ko Paulá): Ngāue 9:1–22
Koniliusi: Acts 10:1–8, 24–25, 44–48
Ko hono leʻohi ʻe he leʻo he fale fakapōpulá ʻa Paula mo Sailosí: Ngāue 16:25–36

Fakaʻaongaʻi ha taha ʻo e ngaahi sīpinga ko ʻení mei he tohi ʻa Ngāué, ke teuteu ha tali ki haʻo kaungāmeʻa ʻoku ʻikai ke ne tui ʻe lava ʻo liliú. Fakakau ai e ngaahi meʻa ko ʻení:

Fakamoʻoni ʻo ha taha pe kakai ʻoku liliu ʻi he tokoni ʻa e Fakamoʻuí.
Founga naʻe tokoni ai ʻa e Fakamoʻuí mo e kau tamaioʻeiki naʻá Ne fekauʻí ʻi he fakauluí.
Ko e meʻa naʻe fai ʻe he tokotahá pe kakaí ke nau falala ai ki he ʻEikí mo ʻEne kau tamaioʻeikí.

Fanongo ki he kau akó ‘i heʻenau vahevahe ‘enau ngaahi talí ʻi haʻanau tautau toko ua pe fanga kiʻi kulupu iiki. Kapau ʻoku nau fiemaʻu ha fakahinohino lahi ange fekauʻaki mo e ului kia Sīsū Kalaisí, fakakaukau ke lau fakataha ha ngaahi konga ʻo e Ngāue 9:3–20 pea fakaafeʻi e kau akó ke nau kumi ha ngaahi fakaikiiki ʻe tokoni ke mahino kiate kinautolu ʻa e founga ʻe lava ke liliu ai ʻa e kakaí ʻi he tokoni ʻa e Fakamoʻuí.

Fakalaulauloto ki hoʻo ului kia Sīsū Kalaisí. Fakakaukau ki he ngaahi fakaafe ke liliu pe fakalakalaka kuó ke ongoʻi mei he ʻEikí ʻi hoʻo ako e tohi ʻa Ngāué. Tali e ngaahi fehuʻi ko ʻení ʻi hoʻo tohinoa akó.

Fakaʻaliʻali e ngaahi fehuʻi ko ʻení ke sio ki ai e kau akó ʻo tohi heʻenau tohinoá.

Ko e hā ʻokú ke ʻilo fekauʻaki mo Sīsū Kalaisi ʻokú ne fakaʻaiʻai koe ke ke ʻofa mo muimui kakato ange kiate Iá?
ʻI he māhina kuo ʻosí pe ngaahi māhina kimuʻá, ko e hā ha ngaahi liliu kuó ke ongoʻi ne ueʻi ʻe he Laumālie Māʻoniʻoní ke ke faí? Naʻe anga fēfē hoʻo tali iá?
Kuo tāpuekina fēfē koe ʻe he Tamai Hevaní ʻi hoʻo ngaahi feingá? Ko e hā e meʻa naʻá ke fai naʻe hoko ai e liliu lahi tahá?
Ko e hā, kapau ʻoku ʻi ai ha meʻa, kuó ne ʻai ke faingataʻa hono tali e ngaahi fakaafe ke liliú mo fakalakalaká? Te ke fekumi fēfē ki ha toe tokoni mei he Tamai Hēvaní?

Hokohoko atu hoʻo fekumi ki ha ueʻi mei he Tamai Hevaní ʻo fakafou ‘i he Laumālie Māʻoniʻoní ʻi hoʻo ako e lēsoni ko ʻení. Feinga ke ʻiloʻi ʻa e meʻa ʻokú Ne finangalo ke ke fai ke ke liliu ai mo ului lahi ange kia Sīsū Kalaisí.

Fili ha taha ʻo e ngaahi ʻekitivitī ko ʻení ke fakakakato ʻi hoʻo fakakaukau ki he founga ke ofi ange ai kia Kalaisí.

ʻEkitivitī A: Ko e ngaahi ʻuluaki tefitoʻi moʻoni mo e ngaahi ouau ʻo e ongoongolelei ʻo Sīsū Kalaisí

ʻI he tohi ʻa Ngāué, naʻe maʻu ʻe ha kakai tokolahi ha tokoni fakalangi ke liliu pea hoko ʻo ului lahi ange kia Sīsū Kalaisi ʻo fakafou ʻi hono maʻu e ngaahi ʻuluaki tefitoʻi moʻoni mo e ngaahi ouau ʻo e ongoongoleleí.

ʻOku fakamatalaʻi ʻe he Fakahinohino ki he Ngaahi Folofolá ʻa e founga ʻoku tokoniʻi ai kitautolu ʻe he ngaahi tefitoʻi moʻoni mo e ngaahi ouau ko ʻení ke tau ului kia Sīsū Kalaisí.

ʻOku fakakakato ʻa e uluí ʻe he fakatomalá, papitaiso ki he fakamolemoleʻi ʻo e ngaahi angahalá, maʻu ʻo e Laumālie Māʻoniʻoní ʻi he hilifaki ʻo e nimá, mo e hokohoko atu e tui ki he ʻEiki ko Sīsū Kalaisí. ʻE liliu ʻa e tangata fakakakanó ki ha tangata foʻou kuo fakamāʻoniʻoniʻi mo haohaoa, kuo toe fanauʻi foʻou ʻia Kalaisi Sīsū ( 2 Kolinitō 5:17 ; Mōsaia 3:19).

(Fakahinohino ki he Ngaahi Folofolá, “ Uluí, Fakauluí ,” scriptures.ChurchofJesusChrist.org)

Fakakaukau ki he fakamatala naʻá ke fili naʻá ne fakatātaaʻi ha taha ʻoku liliu ʻi he tokoni ʻa e ʻEikí.

Ko e hā e fatongia ʻo e ngaahi ʻuluaki tefitoʻi moʻoni mo e ngaahi ouau ʻo e ongoongoleleí ʻi heʻenau uluí?
Kuo tokoniʻi fēfē koe pe ko ha niʻihi kehe ʻe he ngaahi ʻuluaki tefitoʻi moʻoni mo e ngaahi ouau ʻo e ongoongoleleí ke ke ului lahi ange ki he Fakamoʻuí?

Fakakaukauloto ʻoku kole tokoni atu e kau faifekau fakalotofonuá fekauʻaki mo ha taha ʻoku nau akoʻi. ʻOku nau fiemaʻu ke ke vahevahe ʻa e founga ʻe lava ke tokoni ai e ngaahi ʻuluaki tefitoʻi moʻoni mo e ngaahi ouau ʻo e ongoongoleleí ke fakamālohia ʻa e ului kia Sīsū Kalaisí mo fakaafeʻi ʻEne tokoní ke fakahoko ʻa e ngaahi liliu ʻoku fiemaʻu ʻi heʻetau moʻuí. Hiki ha fakamatala maʻá e tokotahá ni ʻo hangē pē ʻokú ke lea hangatonu kiate kinautolú. Fakaʻaongaʻi ha sīpinga ʻe taha mei he tohi Ngāué mo ha faʻahinga aʻusia fakatāutaha pē ʻokú ke ongoʻi ʻe ʻaonga.

ʻOange ha taimi ki he kau akó ke tohi ʻenau ngaahi fakakaukaú. Fakaafeʻi leva kinautolu ke ʻoange ʻenau ngaahi fakamatalá ki hanau hoa. Lue takai ʻo fakafanongo ki heʻenau ngaahi fakamatalá. Kapau ʻoku fiemaʻu ʻe he kau akó ha akoʻi lahi ange ʻi he ngaahi ʻuluaki tefitoʻi moʻoni mo e ngaahi ouau ʻo e ongoongolelei, fakakaukau ke fakaʻaongaʻi e ngaahi potufolofola ko ʻeni: Ngāue 19:1–7 ; 2 Nīfai 31:13–21 ; 3 Nīfai 27:13–22 .

ʻEkitivitī E: Ako folofolá mo e uluí

Ko e taha ʻo e ngaahi ngāue mahuʻinga te tau lava ʻo fai ke fakamālohia ʻetau ului kia Sīsū Kalaisí ko hono ako maʻu pē ʻa e folofolá. Fakakaukau ki he founga ʻoku fakahaaʻi ai ʻe he ngaahi fakamatala ko ʻeni mei he tohi ʻa Ngāué ʻa e mahuʻinga ʻo e ako folofola ʻi he fakauluí.

Filipe mo e tangata ʻItiopeá: Ngāue 8:26–40

Paula mo e Kāingalotu ʻi Tesalonika mo Peleá: Ngāue 17:1–14

Fakalaulauloto ki he founga kuo tokoni ai e ako folofolá ʻi hoʻo ului ki he Fakamoʻuí.

Fakakaukauloto ʻoku kole atu hoʻo taki ʻi he Kau Talavoú pe Kau Finemuí ke ke tokoniʻi e toʻu tupu ʻi ho uōtí pe koló ke nau ako e folofolá mo fakamālohia ʻenau ului kia Sīsū Kalaisí. Ko e hā ha maʻuʻanga tokoni te ke lava ʻo faʻu ke fakaʻaiʻai ʻaki kinautolú? Fakaʻaongaʻi ha ngaahi miniti siʻi ke fokotuʻutuʻu hoʻo maʻuʻanga tokoní ʻi hoʻo tohinoa akó. ʻE lava pē ko ha vitiō, fakamatala, lea, uepisaiti, pe ko ha maʻuʻanga tokoni kehe.

ʻE lava ke kau ʻi hoʻo maʻuʻanga tokoní ha taha ʻo e ngaahi meʻá ni:

Ko ha sīpinga mei he tohi ʻa Ngāué pe ko ha tohi folofola ʻe taha ʻokú ne fakahaaʻi e mahuʻinga ʻo e ako folofolá.
Ko ha sīpinga pe founga ʻo ha taukei fakafolofola ʻokú ke fakaʻaongaʻi ʻoku tokoni kiate koe, pe ko ha fakamatala ʻo e founga ʻo hoʻo akó.
Ko ha fakamatala ʻo ha aʻusia naʻe tokoniʻi ai koe pe ko ha taha ʻokú ke ʻilo ʻe he ako folofolá ke ke ului lahi ange ki he Fakamoʻuí.
Ko hoʻo fakamoʻoni fakataautaha ki he mālohi ʻo e ako folofolá.

Fakaafeʻi e kau akó ke nau fai e meʻá ni ʻi heʻenau tohinoa akó.

Fekumi ki he tokoni ʻa e Tamai Hēvaní ʻo fakafou ʻi he Laumālie Māʻoniʻoní ʻi hoʻo hiki ha faʻahinga ngāue pē ʻokú ke ongoʻi ʻoku fiemaʻu ke ke fai ke ke ului lahi ange ai kia Sīsū Kalaisi. ʻE tokoniʻi koe ʻe he Fakamoʻuí ʻi hoʻo feinga ke muimui ki he ngaahi ongo ko ʻení. Fakakaukau ke vahevahe hoʻo ngaahi ongó mo ha mātuʻa pe ko ha taki falalaʻanga ʻo e Siasí. Kole ange ke nau tokoniʻi koe ke ke muimui ki he ngaahi ongo ko ʻení.

Poupouʻi e kau akó ke nau ngāueʻi e ngaahi ueʻi ne nau maʻu mei he Tamai Hēvaní ʻo fakafou ʻi he Laumālie Māʻoniʻoní. Fakamoʻoniʻi ange ʻe tokoniʻi kinautolu ʻe he ʻOtuá ʻi heʻenau feinga ke muimui ki he ngaahi ongo ko iá.

Ngaahi ʻEkitivitī Fakalahi ki he Akó

Ngāue 10 – 11 ; Ngāue 15 ; Ngāue 27 . Fakahā

ʻE lava ke ke vakaiʻi mo e kau akó e meʻa ʻoku nau ʻilo fekauʻaki mo e founga ʻoku maʻu ai e fakahaá ʻe he kau taki ʻo e Siasí. Fakaafeʻi kinautolu ke nau toe vakaiʻi e fanga kiʻi fakamatala ne nau toʻo mei he ngaahi lēsoni ʻi he Ngāue 10 ; 11 ; 15 ; mo e 27 . ʻOange ki he kau akó ha faingamālie ke fokotuʻutuʻu mo fakamatalaʻi ʻenau ngaahi fakakaukaú. Ko ha founga ʻe taha ko hano ʻai e kau akó ke nau hiki ha kiʻi fakamatala nounou ki he makasini Ki Hono Fakamālohia ʻo e Toʻu Tupú ʻoku fakamatalaʻi ai e ngaahi founga ʻoku maʻu ai ʻa e fakahā ki he Siasí fakakātoa pea mo e ʻuhinga ʻoku mahuʻinga ai ke mahino ʻa e ngaahi moʻoni ko ʻení.

Maʻu ha nonga ʻia Kalaisi ʻo fakafou ʻi he faingataʻá

Fakaafeʻi e kau akó ke fakamanatuʻi ha niʻihi fakafoʻituitui mei he tohi ʻa Ngāué ne nau lava ʻo maʻu ʻa e melino ʻia Kalaisí neongo e faingataʻá, ʻo hangē ko Pita mo Sione ʻi he Ngāue 5:40–42 , Sitīveni ʻi he Ngāue 6 – 7 , Pita mo e kau mēmipa ʻo e Siasí ʻi he Ngāue 12:1–19 , pe Paula ʻi he Ngāue 22 – 28 . Fakaafeʻi e kau akó ke vahevahe e ngaahi aʻusia ʻo e founga kuo nau maʻu ai ʻa e melino ʻia Kalaisí ʻi he taimi ʻo e faingataʻá. Te nau lava ʻo ʻiloʻi e ngaahi meʻa ne hoko ʻi he ngaahi fakamatala ʻi he tohi Ngāué mo e ngaahi aʻusia fakataautaha ʻe lava ʻo tokoni kiate kinautolu ke nau fehangahangai ai mo e ngaahi faingataʻa ʻi he kahaʻú. Fakaafeʻi kinautolu ke nau fekumi ki ha tataki fakalaumālie mei he Tamai Hēvaní ʻo fakafou ʻi he Laumālie Māʻoniʻoní pea faʻu ha palani ki he meʻa te nau fai ʻi he ngaahi ʻahiʻahi ko ʻeni ʻi he kahaʻú ke maʻu ʻa e melino ʻia Kalaisí.