Seminelí
Loma 1–6

Loma 1–6

Vakai Fakalūkufuá

Naʻe fakahā ʻe Paula ʻi heʻene lea ki he Kāingalotu naʻe nofo ʻi Lomá naʻe “ʻikai te [ne] mā ʻi he ongoongolelei ʻo Kalaisí” (Loma 1:16). Naʻe fakatou fiemaʻu tokoni e kau papi ului Siú mo e senitailé ke mahino kiate kinautolu ʻenau falala kia Sīsū Kalaisí mo e founga ke tali ai e ngaahi tāpuaki ʻo ʻEne Fakaleleí ki heʻenau moʻuí. Naʻe feinga ʻa Paula ke tokoni ke mahino ki he Kāingalotu Lomá ʻa e ʻaloʻofa ʻa Kalaisí ʻaki ʻene akoʻi fekauʻaki mo ʻene fehokotaki mo e tuí mo e ngaahi ngāué. Naʻá ne akoʻi ʻoku tau maʻu e mālohi ʻo e Fakamoʻuí ʻi heʻetau fakahoko mo tauhi e ngaahi fuakava mo Iá, ʻo “felakaʻi ʻi he moʻui foʻoú” (Loma 6:4).

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Loma 1

Taumuʻa ʻo e lēsoní: ʻE tokoni e lēsoni ko ʻení ki he kau akó ke nau ʻiloʻi e ngaahi founga ke hoko ai ko ha ākonga moʻoni ʻa Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau haʻu mateuteu ke aleaʻi e ʻuhinga ʻe momou ai e kakaí ke ʻiloa kinautolu ko ha kau ākonga ʻa Kalaisi pe ke vahevahe e ongoongoleleí mo e niʻihi kehé.

  • Fokotuʻu ki he ako konifelenisi fakavitioó: Fakakaukau ke fakahoko e kiʻi siví ʻaki hano fakaʻaliʻali ia ki he kau akó pea fakaʻatā ke nau fakaʻilongaʻi e ngaahi tali ʻoku nau pehē ʻoku tonú pe hiki e ngaahi mataʻitohi ʻo ʻenau ngaahi tali ne filí ʻi he fetalanoaʻakí. ʻE lava leva ke aleaʻi tahataha e ngaahi talí ʻi he taimi ʻe fai ai ʻa e siví pe ʻi he hoko mai ʻa e ngaahi tefitó ʻi he lēsoní.

Loma 2–3

Taumuʻa ʻo e lēsoní: ʻE tokoni ʻa e lēsoni ko ʻení ke mahino lelei ange ki he kau akó ʻa e fiemaʻu ke fakamolemoleʻi kotoa ʻetau ngaahi angahalá pea fakatonuhiaʻi ʻo fakafou ʻia Sīsū Kalaisi.

  • Teuteu ʻa e tokotaha akó: Fakaafeʻi e kau akó ke nau lau e ngaahi fakaʻuhinga ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mei he lēsoni ʻi he Loma 1–6 pea mateuteu ke vahevahe ʻi he lea pē ʻanautolu ʻa e fakaʻuhinga ki he ngaahi foʻi lea hangē ko e fakatonuhiaʻí, tuí, mo e ʻaloʻofá.

  • Meʻa ke fakaʻaliʻali: Ko e ngaahi fakaʻuhinga ‘o e fakatonuhiaʻí, tuí, fonó, mo e ʻaloʻofá

  • Fokotuʻu ki he ako konifelenisi fakavitioó: Fakaafeʻi ha tokotaha ako ke ne fakaʻaongaʻi e whiteboard pea fakatātaaʻi ʻa e fakatātā ʻoku fokotuʻu atú ki he kalasí fakakātoa.

Loma 4–5

Taumuʻa ʻo e lēsoní: ʻE tokoniʻi ʻe he lēsoni ko ʻení ʻa e kau akó ke fakatupulaki ʻenau mahino mo e houngaʻia ʻi he ʻaloʻofa ʻa Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau lau e konga ko e “ʻAloʻofá” ʻi he Fakahinohino ki he Ngaahi Folofolá , pea feinga ke ʻiloʻi e founga ʻe taha kuo nau maʻu ai e ʻaloʻofa ʻa e ʻOtuá ʻi heʻenau moʻuí.

  • Meʻa ke fakaʻaliʻali atú: Ko e fakatātā ʻo e fōtunga ngaohi mei he vaʻakaú ʻi he toafá mo e fakamatala ʻoku ʻoatú

  • Fokotuʻu ki he konifelenisi fakavitioó: ʻE lava ke fokotuʻutuʻu ʻa e kau akó ki ha ngaahi loki mālōlō ke aleaʻi ʻa e fakatātaá. Fakapapauʻi ke ʻoange ha ngaahi fakahinohino mahino koeʻuhí ke ʻilo ʻe he kau akó ʻa e meʻa ʻoku nau feinga ke fakahokó. Mahalo ʻe tokoni ke fakaʻaliʻali e ngaahi fehuʻi ʻe tolu ke aleaʻi ʻe he kau akó ʻi he ngaahi loki fepōtalanoaʻakí (breakout rooms).

Loma 6

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau fekumi ki ha liliu ʻo fakafou ʻia Sīsū Kalaisi pea ʻiloʻi lelei ange ʻa e taimi ʻoku hoko ai ʻa e ngaahi liliu ko iá.

  • Teuteu ʻa e tokotaha akó: Fakaafeʻi e kau akó ke nau fakamanatu ha ngaahi fakaikiiki fekauʻaki mo honau papitaisó pea ʻe lava pē ke nau ʻomi ha fakatātā kapau ʻoku ʻi ai. Mahalo naʻe hiki ʻe ha kau ako ʻe niʻihi pe ko ʻenau mātuʻá ha tohinoa ʻi he taimi ne papitaiso ai e kau akó. Mahalo naʻa makehe ke lau ʻe he kau akó e tohinoa ko iá pe talanoa mo ʻenau mātuʻá fekauʻaki mo e ngaahi fakaikiiki ʻo honau papitaisó, ʻo kau ai ha ngaahi meʻa kuo ngalo ʻi he kau akó.

  • Meʻa ke fakaʻaliʻali atú: Ko ha fakatātā ʻo e taimi naʻe papitaiso ai koé

  • Fokotuʻu ki he ako konifelenisi fakavitioó: Fakakaukau ke fakaʻaongaʻi ha loki fetalanoaʻaki ʻe ono ki he fokotuʻu ʻa e faiakó ʻa ia ʻoku ʻoatu fakataha mo e Loma 6:9–14 . Vahevahe fakakulupu e kau akó pea vahe ki he kulupu takitaha ha veesi ʻe taha pe lahi ange mei he Loma 6:9–14 ke aleaʻi fakataha, hili iá te nau vahevahe mo e kalasí ʻa e meʻa ne nau akó. ʻAʻahi nounou ki he kulupu takitaha ke fai ha tokoni fakataautaha mo tali ha ngaahi fehuʻi ʻo ka fiemaʻu. Fakapapauʻi ʻoku mateuteu e kau akó ke vahevahe mo honau kaungāakó kimuʻa pea toki ʻosi ʻenau fetalanoaʻakí.

Fakamanatu ʻo e Fakataukei Fakatokāteliné 17

Taumuʻa ‘o e lesoní: ʻE tokoni e lēsoni ko ʻení ki he kau akó ke fakaloloto ‘enau mahinó mo fakamatalaʻi e ngaahi moʻoni fekauʻaki mo ha potufolofola fakataukei fakatokāteline ʻe taha pe lahi ange mei he Fuakava Foʻoú.

  • Teuteu ʻa e tokotaha akó: Fakaafeʻi e kau akó ke nau tokanga ki ha faʻahinga veesi, kupuʻi lea, pe foʻi lea ʻi heʻenau ako folofola fakataautaha pe fakafāmili ka hokó pea haʻu mateuteu ke vahevahe kinautolu ki he kalasí.

  • Fokotuʻu ki he ako konifelenisi fakavitioó: Fakakaukau ke fakaʻaongaʻi e ngaahi loki fetalanoaʻakí ke aleaʻi ʻe he kau akó e founga naʻa nau fakaʻaongaʻi ai e ngaahi taukei kehekehe ʻo e ako folofolá ke fakatupulaki ʻenau mahino ki he ngaahi potufolofola fakataukei fakatokāteliné.

Paaki