Fakamanatu ʻo e Fakataukei Fakatokāteliné 17
Mahino pea Fakamatalaʻi
Ko e taumuʻa ʻe taha ʻo e fakataukei fakatokāteliné ke tokoni ke mahino kiate koe ʻa e ngaahi akonaki ʻa e Fakamoʻuí ʻoku ʻi he ngaahi potufolofola fakataukei fakatokāteliné pea lava ke fakamatalaʻi kinautolu ʻi hoʻo lea pē ʻaʻau. ʻE ʻoatu ʻe he lēsoni ko ʻení ha faingamālie ke fakaloloto hoʻo mahinó mo fakamatalaʻi e ngaahi moʻoni fekauʻaki mo ha potufolofola fakataukei fakatokāteline ʻe taha pe lahi ange mei he Fuakava Foʻoú.
Teuteu ʻa e tokotaha akó: Fakaafeʻi e kau akó ke nau tokanga ki ha faʻahinga veesi, kupuʻi lea, pe foʻi lea ʻi heʻenau ako folofola fakataautaha pe fakafāmili ka hokó pea haʻu mateuteu ke vahevahe kinautolu ki he kalasí.
Ngaahi ʻEkitivitī Ako ʻOku Ala Fakahokó
ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻōtineitá ke fakapapauʻi ʻe akoʻi e lēsoni potufolofola fakataukei fakatokāteline takitaha lolotonga e fakataha ʻa e seminelí.
Ko hono maʻu ha mahino ki he ngaahi folofolá
-
Kuó ke ʻosi lau nai ha potufolofola—mahalo ʻo laka hake he tuʻo tahá—peá ke ʻilo naʻá ke puputuʻu fekauʻaki mo hono ʻuhingá?
-
Ko e hā hono tuʻo lahi hoʻo ongoʻi ʻoku hoko ʻeni ʻi hoʻo ako e folofolá?
-
Ko e hā hoʻo meʻa ʻe fai ʻi he taimi ʻe hoko ai ʻeni kiate koé?
Tokoniʻi e kau akó ke nau ʻilo ʻoku angamaheni pē ʻa e ʻikai mahino ʻa e meʻa kotoa pē ʻi he folofolá. Toe vakaiʻi e teuteu ʻa e tokotaha akó ʻaki hano fakaafeʻi kinautolu ke vahevahe ha ngaahi veesi, kupuʻi lea, pe ngaahi lea mei he folofolá naʻe ʻikai mahino kiate kinautolu mei heʻenau ako folofola kimuʻá. ‘E ala tokoni ke hiki ‘a e ngaahi fehuʻi ko ʻení ʻi he palakipoé.
Kapau ʻoku ʻi ai ha taimi ʻi he fakaʻosinga ʻo e lēsoní, ʻe ala ʻaonga ki he kau akó hono fakafekauʻaki e ngaahi taukei fakafolofola naʻe ako ʻi he lēsoni ko ʻení mo e ngaahi veesi ʻoku hiki he palakipoé.
ʻOku finangalo e Fakamoʻuí ke mahino kiate kitautolu ʻEne folofolá pea te Ne tokoniʻi kitautolu ke tau fai ia ʻo fakafou ʻi he Laumālie Māʻoniʻoní. ʻOku fie maʻu heni ke tau fakahoko ʻetau tafaʻakí. Te ke maʻu ʻa e faingamālie ʻi he lēsoni ko ʻení ke ako e ngaahi taukei ako folofola ʻe lava ʻo tokoni atu ke mahino kiate koe ha ngaahi potufolofola fakataukei fakatokāteline kehekehe.
Ngaahi taukei ako folofolá
Toe fakamanatu nounou e ngaahi potufolofola fakataukei fakatokāteline ko ʻení mo e ngaahi kupuʻi lea mahuʻinga mei he folofolá.
Fakakaukau ke fetongi ha taha ʻo e ngaahi potufolofola ʻoku fakamanatú pe tānaki atu ha ngaahi potufolofola fakataukei fakatokāteline makehe ʻe ʻaonga ke tokanga taha ki ai e kau akó.
ʻE lava ke toe vakaiʻi fakafoʻituitui, tauhoa, pe fakakalasi ʻe he kau akó e ngaahi potufolofola ko ʻení.
|
Potufolofola Fakataukei Fakatokāteliné |
Kupuʻi Lea Mahuʻinga mei he Folofolá |
|
“ʻI he kakato ʻo e ngaahi kuongá naʻá ne tuʻutuʻuni, ke ne fakakātoa fakataha ʻa e meʻa kotoa pē ʻia Kalaisi.” | |
|
ʻOku fokotuʻu ʻa e Siasí “ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.” | |
|
“[Ko] e ʻaho ʻo Kalaisí … ʻe ʻikai hoko [ia], ʻo kapau ʻe ʻikai tomuʻa hoko ʻa e liliu koví.” | |
|
“[Ko] e ngaahi tohi māʻoniʻoní … ʻoku faʻa fakapoto koe ki he fakamoʻuí.” |
Fakakaukau ke vahevahe ʻa e kalasí ki ha ngaahi kulupu tautau toko fā pea fakaafeʻi e tokotaha ako takitaha ke fili ha potufolofola ʻokú ne fakaʻamu ke mahino lelei ange kiate ia. Fakapapauʻi ʻoku fakaʻaongaʻi kotoa e ngaahi potufolofola ʻe faá ʻi he kulupu takitaha. ʻE ala fie maʻu heni ke vahe ki ha niʻihi ʻo e kau akó ke nau fakamanatu ha potufolofola lahi ange he tahá.
Kapau ʻe ʻaonga ki he kau akó ha sīpinga, fakakaukau ke fakaʻaongaʻi e 2 Tīmote 3:15–17 ke akoʻi ki he kau akó e taukei ʻi hono faʻu ha lisí.
Fili ha taha ʻo e ngaahi potufolofola ʻokú ke fie maʻu ke mahino lelei angé. Fili leva ha taha pe lahi ange mei he ngaahi taukei ako folofola ko ʻení ke tokoni ke mahino lelei ange kiate koe e potufolofola ko iá. Mateuteu ke fakamatalaʻi hoʻo veesi folofolá ki he niʻihi kehé.
Kapau ʻoku toe lahi e taimí, feinga ke fakaʻaongaʻi ha taukei kehe ʻi ha taha ʻo e ngaahi potufolofola kehé.
ʻEkitivitī A: Fakafekauʻakí
Fakaʻaongaʻi e ngaahi maʻuʻanga tokoni ʻoku maʻú ke kumi e ngaahi potufolofola kehe ʻe ala tokoni ke fakalahi hoʻo mahino ki he potufolofola fakataukei fakatokāteliné. ʻE lava ke kau ʻi he ngaahi maʻuʻanga tokoni peheé ʻa e Fakahinohino ki he Ngaahi Folofolá. Fakaʻilongaʻi ʻa e ngaahi potufolofola mei he ngaahi maʻuʻanga tokoni ko ʻení, pea lekooti ʻi ha tohinoa ako pe ko e Gospel Library app ʻa e founga ʻoku nau tokoni ai ke fakatupulaki hoʻo mahino ki he potufolofola fakataukei fakatokāteline kuo filí.
ʻEkitivitī E: Fakaʻuhingaʻi e ngaahi foʻi leá mo e kupuʻi leá
Kumi e ngaahi foʻi lea ʻi he potufolofola fakataukei fakatokāteliné ʻoku ʻikai mahino kiate koé. Fekumi ki he ngaahi fakaʻuhinga ʻo e ngaahi foʻi lea pe kupuʻi lea ko iá ʻi he ngaahi maʻuʻanga tokoni ʻoku maʻú, hangē ko e Fakahinohino ki he Ngaahi Folofolá. Lekooti ʻi ha tohinoa ako, tafaʻaki ʻo e folofolá, pe polokalama Gospel Library ʻa e ngaahi fakaʻuhinga naʻá ke maʻú, fakataha mo ha ngaahi fakakaukau foʻou.
ʻEkitivitī F: Mahino e puipuituʻa mo e kakano ʻo e folofolá
Fakakakato ha taha pe lahi ange ʻo e ngaahi meʻa ko ʻení ʻe tokoni ki hoʻo potufolofola fakataukei fakatokāteliné:
-
Lau fekauʻaki mo e ʻipiseli ʻoku maʻu ai ʻa e potufolofola ko ʻení mei he fakamatala “ Ngaahi Tohi ʻa Paulá ” ʻi he Fakahinohino ki he Ngaahi Folofolá.
-
ʻOku fakatupulaki fēfē ʻe he ʻuluʻi fakamatala ʻo e vahé pe ngaahi veesi takatakaí hoʻo mahino ki he potufolofola fakataukei fakatokāteliné?
-
Ko hai naʻe lea ki ai e tokotaha faʻu tohí, pea ko e hā hono ʻuhingá?
-
Ko e hā ʻa e tefitoʻi pōpoaki ʻo e potufolofola ko ʻení?
Hiki ʻa e meʻa ʻoku mahino kiate koe fekauʻaki mo e potufolofolá koeʻuhí ko e meʻa naʻá ke fakalaulauloto ki aí.
Hili ha taimi feʻunga, fakaafeʻi e kau akó ke nau fakamatalaʻi ki heʻenau kulupú ʻenau taukei ako folofolá mo e meʻa ʻoku mahino kiate kinautolu he taimí ni fekauʻaki mo ʻenau potufolofola fakataukei fakatokāteliné koeʻuhí ko ia. ʻE lava ke ke fakaafeʻi ha kau ako ʻe niʻihi ke fakamatalaʻi ʻenau potufolofolá ki he kalasí.
Fakamanatu ki he kau akó ʻe tokoniʻi kinautolu ʻe heʻenau Tamai Hēvaní mo e Fakamoʻuí ke mahino kiate kinautolu ʻa e ngaahi folofolá ʻo fakafou ʻi he Laumālie Māʻoniʻoní. Mahalo ʻe tokoni ke fai ha fakamoʻoni ki he mahuʻinga ʻo e fekumi ki he tokoni ʻa e ʻOtuá ʻi heʻenau akó.