Loma 7–16

Vakai Fakalūkufuá

ʻI ha tohi ki he Kāingalotu ʻi Lomá, naʻe fakamamafaʻi ai ʻe Paula ʻa e mahuʻinga ʻo e uouangatahá ʻi heʻenau hoko ko e kau mēmipa ʻo e Siasi ʻo e Fakamoʻuí. Naʻá ne akonaki foki fekauʻaki mo hono ikunaʻi ʻo e ngaahi ivi tākiekina ʻo e māmaní mo hotau natula hingá, fekauʻaki mo e ʻofa taʻefeliliuaki ʻa e ʻOtuá, pea fekauʻaki mo e ngaahi tāpuaki ʻe lava ke tau maʻu ʻo fakafou ʻia Sīsū Kalaisi ʻi heʻetau muimui faivelenga kiate Ia mo ʻaʻeva ʻi he Laumālié.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Loma 7–12

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ngāue ʻaki ha tui lahi ange kia Sīsū Kalaisi ke ikunaʻi honau ngaahi vaivaiʻangá.

Teuteu ʻa e tokotaha akó: Fakaafeʻi e kau akó ke lau ʻa e Loma 7:14, 18–19, 24–25, fakataha mo e 2 Nīfai 4:17–20, 26–32. Kole ange ke nau omi mateuteu ke vahevahe e founga naʻe tānaki pe fakamahinoʻi ai ʻe he potufolofola ko ʻeni ʻo e Tohi ʻa Molomoná ʻenau mahino ki he meʻa naʻe akoʻi ʻi he Loma 7. Fakamanatu ki he kau akó ke nau omi mo ha tatau ʻo e Tohi ʻa Molomoná ki he kalasí.

Saati: Fakaʻaliʻali ʻa e saati ʻoku maʻu ʻi he lēsoni ʻo e ngaahi potufolofola mei he tohi Lomá mo e Tohi ʻa Molomoná.

Loma 8:1–17

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke fakatupulaki ʻenau holi ke muimui ki he Laumālié pea maʻu ʻa e meʻa kotoa ʻoku maʻu ʻe he Tamai Hēvaní.

Teuteu ʻa e tokotaha akó: Fakaafeʻi e kau akó ke lau ʻa e Tokāteline mo e Ngaahi Fuakava 76:55–70 pea omi mateuteu ke vahevahe ʻa e ʻuhinga te nau fiemaʻu ai ke maʻu e ngaahi tāpuaki ʻoku fakamatalaʻi ʻi he ngaahi veesi ko ʻení.

Fakaʻaliʻali: Teuteu ke fakaʻaliʻalie ngaahi talanoa ʻe tolu ʻi he fakaʻosinga ʻo e lēsoní pea mo e ngaahi fakahinohino ʻoku muimui ʻi he ngaahi talanoá.

Fokotuʻu ki hono akoʻi ʻi he konifelenisi fakavitioó: Fakakaukau ke fakaafeʻi e kau akó ke nau ʻomi ha meʻa pe ko ha fakatātā ʻokú ne fakafofongaʻi ha meʻaʻofa fakatuʻasino pe fakalaumālie ʻoku nau ʻamanaki ke maʻu. Fakaafeʻi kinautolu ke vahevahe ʻa e meʻa ne nau ʻomaí mo e ʻuhinga ʻoku nau fiemaʻu ai ke maʻu ʻa e meʻaʻofa ko iá.

Loma 8:18–39

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó ʻa e ʻamanaki lelei mo e fakafiemālie ʻo fakafou ʻi he ʻofa ʻa e Tamai Hēvaní mo Sīsū Kalaisí ʻi heʻenau fehangahangai mo e ngaahi ʻahiʻahí mo e veiveiua.

Teuteu ʻa e tokotaha akó: Fakaafeʻi e kau akó ke fai ha meʻa maʻa ha mēmipa ʻo e fāmilí te ne fakahaaʻi ʻenau ʻofá ʻi he ngaahi ngāué, kae ʻikai ko e leá, pea ke nau mateuteu ke vahevahe ʻa e meʻa ne nau ako mei he aʻusia ko ʻení.

Naunau maʻá e kau akó: Ko ha laʻipepa siʻisiʻi maʻá e tokotaha ako takitaha
Hiva: “Naʻá Ne Fekau Hono ʻAló” (Tohi Hiva ʻa e Fānaú, 20)

Fokotuʻu ki hono akoʻi ʻi he konifelenisi fakavitioó: Fakakaukau ke huluʻi e fanga kiʻi vitiō ʻo e konifelenisi lahí ʻoku maʻu ʻi he konga ki he “Fakamatala Fakamahino mo e Puipuituʻa” ʻo e lēsoní.

Loma 12–15

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau kumi ha ngaahi founga ke nau toe uouangataha ange ai mo e kau mēmipa ʻo e Siasi ʻo e Fakamoʻuí.

Teuteu ʻa e tokotaha akó: Fakaafeʻi e kau akó ke lau ʻa e Tokāteline mo e Ngaahi Fuakava 38:27 pea fakakaukau ki he ʻuhinga ʻe fiemaʻu ai ʻe he ʻEikí ʻa e kāingalotu ʻo Hono Siasí ke nau uouangatahá.

Fakamanatu ʻo e Fakataukei Fakatokāteliné 18

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau akoako fakaʻaongaʻi ha niʻihi ʻo e ngaahi potufolofola fakataukei tokāteline mei he Fuakava Foʻoú ʻi heʻenau moʻuí.

Fakatokangaʻi ange: Mahalo ʻe fiemaʻu ke akoʻi ha lēsoni potufolofola fakataukei fakatokāteline ke fetongiʻaki e lēsoni fakamanatu ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá lolotonga e fakahoko ʻa e seminelí.

Teuteu ʻa e tokotaha akó: Fakaafeʻi e kau akó ke kole ki hanau kaungāmeʻa ʻe toko ua pe tolu pe kau mēmipa ʻo e fāmilí ke vahevahe mo kinautolu ha potufolofola ʻe taha ʻi he Fuakava Foʻoú ʻoku nau fakaʻamu ke ako mo fakaʻaongaʻi ʻe he toʻutupu kotoa pē ʻi he māmaní, mo fakaʻaongaʻi ʻi heʻenau moʻuí. Fakaafeʻi e kau akó ke nau hiki hifo e ngaahi fakamoʻoni fakafolofola ʻoku vahevahe ʻe honau kaungāmeʻá mo e fāmilí pea mateuteu ke vahevahe e ngaahi fakamoʻoni fakafolofola ko iá ʻi he kalasí.

Fakatātā: Ko ha fanga kiʻi laʻipepa iiki ‘e teau nimangofulu ʻi ha poulu pe foʻi hina
Saati: Fakaʻaliʻali e saati ʻoku kau ‘i he lēsoni ‘o e ngaahi potufolofola fakataukei fakatokāteliné mo honau ngaahi kupuʻi lea mahuʻinga mei he folofolá.

Fokotuʻu ki hono akoʻi ʻi he konifelenisi fakavitioó: Fakaafeʻi e kau akó ke nau fakaʻaongaʻi e polokalama fetalanoaʻakí (chat) ke vahevahe ha potufolofola fakataukei fakatokāteline ʻoku nau ongoʻi te ne lava ʻo fakamālohia honau vā mo e Tamai Hēvaní mo Sīsū Kalaisi. Hili iá pea fili ha niʻihi ʻo e kau akó ke fakamatalaʻi ki he kalasí ʻa e ʻuhinga naʻa nau fili ai ʻa e potufolofola ne nau vahevahé.