Ngāue 22–28

Vakai Fakalūkufuá

Te ke ako ʻi he ngaahi lēsoni ʻo e uike ní, ʻa e ngaahi talaʻofa naʻe fai ʻe he ʻEikí ki Heʻene kau ʻAposetoló mo e founga naʻe fakahoko ai kinautolu ʻi he moʻui ʻa Paulá. Tatau ai pē pe naʻe haʻi sēini ʻa Paula pe ʻomi ki he ʻao ʻo e kau takí mo e ngaahi tuʻí, ka naʻá ne vahevahe faivelenga ʻene fakamoʻoni mālohi kia Sīsū Kalaisi mo ʻEne ongoongoleleí. ʻI he taimi naʻá ne fetaulaki ai mo ha ngaahi matangi mālohi, tuku vakā, mo ha ngaahi faingataʻa kehé, naʻá ne fai ha faleʻi mo ha ngaahi fakatokanga fakalaumālie ke maluʻi ʻa kinautolu ʻoku nofo mo iá. ʻOku kau ʻi he uiké ni ha lēsoni ke tokoni atu ke ke ako maʻuloto ha ngaahi fakamoʻoni fakafolofola ʻo e fakataukei fakatokāteliné mo ha ngaahi kupuʻi lea mahuʻinga mei he folofolá, kae pehē ki ha faingamālie ke vakaiʻi ai e ngaahi taumuʻa kuó ke fokotuʻú pea mo e ako mo e tupulaki fakataautaha kuó ke aʻusia lolotonga hoʻo ako ʻa e Fuakava Foʻoú.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke tomuʻa teuteuʻi kimuʻa ʻi he lēsoni takitaha.

Ngāue 22–23, 26–28

Taumuʻa ʻo e lēsoní: ʻOku fakataumuʻa e lēsoni ko ʻení ke fakatupulaki ʻa e loto-falala ʻa e kau akó ʻe fakahoko ʻe he Tamai Hēvaní mo Sīsū Kalaisi ʻa ʻEna ngaahi talaʻofá ʻi he feinga ʻa e kau akó ke tauhi kiate Kinauá.

Teuteu ʻa e tokotaha akó: Fakaafeʻi e kau akó ke nau fakalaulauloto ki he ngaahi talaʻofa ‘a e ʻEikí kiate kinautolú. Hangē ko ʻení, te nau lava ʻo fakakaukau ki he ngaahi talaʻofa ʻi he lotu tāpuakiʻi ʻo e sākalamēnití (vakai, Molonai 4:3 ; 5:2) pe ʻi ha ngaahi potufolofola kehe. Ko e kau ako kuo nau maʻu honau tāpuaki fakapēteliaké, te nau lava ʻo lau ia pea kumi e ngaahi talaʻofa mei he ʻEikí.

Saati: Ko ha saati ʻoku ʻasi ai e ngaahi talaʻofa ʻa e ʻEikí mo e founga ʻo ʻEne fakahoko kinautolú

Fokotuʻu ki he ako konifelenisi fakavitioó: Hili hono ako ʻe he kau akó e ngaahi talaʻofa naʻe fai ʻe he ʻEikí ki he kau ʻAposetoló, tuku ke nau fakaʻaongaʻi ʻa e fetalanoaʻakí (chat) ke hiki ha meʻa ʻe taha ne nau ʻiloʻi. Pea ʻi he hoko atu ʻenau akó, fakaafeʻi kinautolu ke nau vahevahe ʻi he feituʻu fetalanoaʻakí ʻa e founga naʻe fakahoko ai ʻe he ʻEikí ʻa e talaʻofa ne nau ʻiló.

Ngāue 22–26

Taumuʻa ‘o e lēsoní: ʻOku fakataumuʻa ʻa e lēsoni ko ʻení ke tokoniʻi koe ke ke fakatupulaki ha holi lahi ange ke muimui ki he sīpinga ʻa Paulá ʻi heʻene fakamoʻoni kia Sīsū Kalaisi mo ʻEne ongoongoleleí ʻi heʻenau moʻui fakaʻahó.

Teuteu ʻa e tokotaha akó: Fakaafeʻi e kau akó ke nau fakalaulauloto pea haʻu mateuteu ke vahevahe ha aʻusia ne uesia ai kinautolu ʻe ha fakamoʻoni ʻa ha taha kehe.

Saati: Ko ha saati ʻoku hā ai ʻa e founga naʻe tali ʻaki ʻe he kakaí e fakamoʻoni ʻa Paulá

Fokotuʻu ki he ako konifelenisi fakavitioó: ʻI he fakaʻosinga ʻo e lēsoní, fakakaukau ke tuku e kau akó ki he ngaahi loki fetalanoaʻaki fakakulupú ke nau talanoa fekauʻaki mo ʻenau ngaahi fakamoʻoní mo ʻenau ngaahi fakakaukau ki he founga ke vahevahe ai ia ʻi ha ngaahi founga angamaheni mo fakanatulá.

Ngāue 27–28

Taumuʻa ʻo e lēsoní: ʻOku fakataumuʻa e lēsoni ko ʻení ke tokoniʻi e kau akó ke nau ongoʻi ʻa e mahuʻinga ʻo e muimui ki he faleʻi ʻa e palōfitá.

Teuteu ʻa e tokotaha akó: Fakaafeʻi e kau akó ke nau ako ha niʻihi ʻo e ngaahi akonaki lolotonga ʻa e kau palōfita ʻo onopōní. Hangē ko ʻení, te nau lava ʻo lau pe mamata ʻi ha lea kimuí ni ʻi he konifelenisi lahí, lau ha fakamatala ʻa ha palōfita pe ʻaposetolo ʻi he makasini Ki Hono Fakamālohia ʻo e Toʻu Tupú, pe lau ha ngaahi tefito ʻi he kiʻi tohi Ki Hono Fakamālohia ʻo e Toʻu Tupú. Fakaafeʻi e kau akó ke nau fakalaulauloto ki he ongo ʻoku nau maʻu fekauʻaki mo e tali ki he faleʻi ʻa e kau palōfitá.

Laʻipepa tufa: “Ko e Folau ʻa Paula ki Lomá”

Fokotuʻu ki he ako konifelenisi fakavitioó: Fakakaukau ke fakaʻaliʻali ha tatau ʻo e laʻipepa tufá ke fealeaʻaki ai e kau akó lolotonga ʻenau fai e ʻekitivitií ʻi heʻenau tohinoa akó. Hili iá, pea fakaʻaongaʻi ʻa e whiteboard feature, vahe ki ha kau ako kehekehe ke nau tā pe taipeʻi ha fakamatala fakanounou ʻo e meʻa naʻe hokó ʻi ha taha ʻo e ngaahi puha ʻe faá. Hili iá pea kole ki he kau akó ke nau fakamatalaʻi ʻa e meʻa naʻa nau tā pe tohí.

Fakamanatu ʻo e Fakataukei Fakatokāteline 16

Taumuʻa ʻo e lēsoní: ʻOku fakataumuʻa e lēsoni ko ʻení ke tokoni ki he kau akó ke nau ako maʻuloto ha niʻihi ʻo e ngaahi fakamoʻoni fakafolofola fakataukei fakatokāteline ʻo e Fuakava Foʻoú mo e ngaahi kupuʻi lea mahuʻingá.

Teuteu ʻa e tokotaha akó: Fakaafeʻi e kau akó ke nau lau ha potufolofola fakataukei fakatokāteline ʻe taha pe ua kuo nau ako. Fakatukupaaʻi kinautolu ke nau ako maʻuloto ʻa e fakamoʻoni fakafolofolá mo e kupuʻi lea mahuʻinga ʻo e folofolá pe, kapau ʻe lava, ako maʻuloto kotoa ʻa e potufolofola fakataukei fakatokāteliné.

Naunau maʻá e kau akó: Pepa ki ha fanga kiʻi kaati fakaʻaliʻali
Saati: Ko e saati fakataukei fakatokāteline ke fakaʻaliʻali ʻi he palakipoé pe tufa

Fokotuʻu ki he ako konifelenisi fakavitioó: Hili hono ako maʻuloto ʻe he kau akó e ngaahi fakamoʻoni fakafolofola ʻo e fakataukei fakatokāteliné mo e ngaahi kupuʻi lea mahuʻingá, fakahaaʻi ha kupuʻi lea mahuʻinga mei he folofolá ki he kalasí pea kole ange ke nau fakaʻaliʻali hake e kaati totonú ʻi muʻa ʻi heʻenau meʻafaitaá ʻi ha taimi fakangatangata (hangē ko ʻení, sekoni ʻe nima).

Siviʻi Hoʻo Akó 7

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi ʻa e ngaahi taumuʻa kuo nau fokotuʻú pea mo e tupulaki fakaako mo e fakataautaha kuo nau aʻusia lolotonga ʻenau ako e Fuakava Foʻoú.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha ngaahi sīpinga mei he tohi Ngāué fekauʻaki mo ha kakai naʻa nau ului kia Sīsū Kalaisí.

Fokotuʻu ki he ako konifelenisi fakavitioó: ʻOange ki he kau akó ha vakai fakalūkufua ʻo e ʻEkitivitī A mo e ʻEkitivitī E, pea ʻave ha tatau ʻo e ongo ʻekitivitií fakatouʻosi ki he kau akó. Hili iá pea tuku leva e kau akó ki he loki fetalanoaʻaki fakakulupú pea tuku ke nau fili pe ko e ʻekitivitī fē te nau fakahoko fakatahá. ʻI heʻenau foki ki he kalasí, ʻai ke nau vahevahe e meʻa ne nau aleaʻi mo akó.