Төгс эзэмших сургаалын давтлага 18

Төгс эзэмших сургаалын судрын хэсгүүдийг ашиглах

Төгс эзэмших сургаалын зорилгын нэг бол төгс эзэмших сургаалын судрын хэсгүүдэд заасан сургаалыг бодит амьдралд ашиглахад тань туслах явдал юм. Энэ хичээл нь Шинэ Гэрээний төгс эзэмших сургаалын судрын зарим хэсгийг амьдралдаа ашиглах дадлага хийх боломжийг танд өгөх болно.

Суралцагчийн бэлтгэл: Суралцагчдыг хоёр, гурван найз эсвэл гэр бүлийн гишүүнээсээ энэ дэлхий дээрх бүх өсвөр үеийнхнээс судалж, амьдралдаа хэрэгжүүлээсэй гэж хүсэж буй Шинэ Гэрээний судрын нэг хэсгээ хуваалцахыг хүсэхэд урих талаар бодож үз. Суралцагчдыг найз нөхөд, гэр бүлийнхнийхээ хуваалцсан эшлэлүүдийг жагсаан бичээд, дараа нь тэдгээр эшлэлийг хичээл дээр хуваалцах бэлтгэлтэй ирэхэд урь.

Боломжит суралцах үйл ажиллагаа

Төгс эзэмших сургаалын судрын хэсгүүд

Төгс эзэмших сургаалын судрын хэсгийн талаарх хичээлийг энэ давтлага хичээлийн оронд зааж болох юм. Төгс эзэмших сургаалын судрын хэсгийн талаарх хичээл бүрийг семинарын үеэр заахын тулд орон нутгийн эсвэл бүсийн захирал, зохицуулагчийн өгсөн цагийн хуваарийг үзнэ үү.

Хөл бөмбөгийн спортын тухай дараах зүйрлэлд өөр нэг хувилбар болгож, тавган дээр 150 ширхэг жижиг цаас тавь. Цааснуудын нэг дээр “төгс эзэмших сургаал” гэж бич. Цөөн суралцагчийг тавгаас нэг цаас сугалаад, энэ нь “төгс эзэмших сургаал” гэсэн бичигтэй цаас мөн эсэхийг харахад урь.

https://pixabay.com/photos/soccer-goalie-goal-tender-game-1501546/https://pixabay.com/photos/soccer-football-soccer-player-1477569/

Дэлхийн 150 шилдэг тамирчин хөл бөмбөгийн элит багийн хамгаалагч болохоор өрсөлдөж байна гэж төсөөл. Дасгалжуулагчдад зөвхөн ганц тамирчныг сонгох нь хэчнээн хэцүү байхыг та төсөөлж байна уу?

• Дасгалжуулагчид сонгох хүмүүсийнхээ тоог цөөлөхийн тулд ямар шалгуур ашиглах байх гэж та бодож байна вэ?

Шинэ Гэрээнд бараг 8000 шүлэг байдаг. Эдгээр шүлгийн зөвхөн 53 нь (150 шүлэг бүрээс ойролцоогоор 1 нь) Шинэ Гэрээний төгс эзэмших сургаалын судрын 24 хэсэгт багтжээ. Шинэ Гэрээний судрын аль хэсгийг нь төгс эзэмших сургаалын судрын хэсэг болгож судлахаар сонгох нь хэр хэцүү болохыг төсөөл.

Суралцагчийн бэлтгэх ажиллагааг хийж гүйцэтгэсэн суралцагчдыг найз нөхөд эсвэл гэр бүлийн гишүүдийнхээ сонгосон эшлэлүүдийг самбар дээр бичихэд урь. Самбарт бичсэн судрын хэсгүүд янз бүр бөгөөд судрын өөр олон хэсгийг өсвөр үеийнхний хувьд судалж, амьдралдаа хэрэгжүүлэх нь үнэ цэнтэй болохыг онцол. Дараа нь дараах асуултыг тавь.

• Хэрэв танаас төгс эзэмших сургаалын судрын хэсгээс сонголт хийхэд туслахыг хүссэн бол та ямар шалгуур ашиглан аль аль хэсгийг сонгох байсан бэ?

Та төгс эзэмших сургаалын судрын дараах хэсгүүдээс өөрийнхөө сайн мэдэхгүй хоёрыг нь сонгоорой. Судрынхаа энэ хэсгийг бүхэлд нь уншаад, тэдгээр хэсгийг дэлхий даяарх өсвөр үеийнхний төвлөрч унших төгс эзэмших сургаалын судрын хэсгүүд болгож сонгосон шалтгаануудыг тодорхойл.

Шинэ Гэрээний төгс эзэмших сургаал: 1 Коринт–Илчлэл

1 Коринт 6:19–20	“Та нарын бие бол Ариун Сүнсний сүм.”
1 Коринт 11:11	“Эзэн дотор эр хүнгүйгээр эм хүн гэж үгүй бөгөөд эм хүнгүйгээр эр хүн гэж үгүй юм.”
1 Коринт 15:20–22	“Адам дотор бүгд үхдэгчлэн Христ дотор бүгд амьд болгогдоно.”
1 Коринт 15:40–42	Амилалтад гурван түвшний алдар суу байдаг.
Ефес 1:10	“Цагийн дүүрлийг гүйцэлдүүлэхийн тулд … бүх юмсыг Христ дотор нэгтгэх зорилго байжээ.”
Ефес 2:19–20	Сүм нь “элч нар болон эш үзүүлэгчдийн суурин дээр босгогдож байгаа бөгөөд Христ Есүс Өөрөө булангийн чулуу нь ажээ.”
2 Тесалоник 2:1–3	“Эхлээд урвалт гарахаас нааш Христийн өдөр ирэхгүй.”
2 Тимот 3:15–17	“Авралд чамайг мэргэн болгох чадалтай ариун судар бичгүүд.”
Еврей 12:9	Тэнгэрлэг Эцэг бол “сүнсний Эцэг.”
Иаков 1:5–6	“Харин та нарын хэн нэг нь мэргэн ухаанаар дутвал, Бурханаас гуйг.”
Иаков 2:17–18	“Итгэл нь хэрэв үйлсгүй бол өөрөө үхмэл юм.”
1 Петр 4:6	“Сайн мэдээ нь үхэгсдэд ч хүртэл тунхаглагдсан.”
Илчлэл 20:12	“Үхэгсэд үйлсийнхээ дагуу … шүүгдэв.”

Суралцагчдаас өрөөн дотуур яваад, өөрсдийн сонгосон судрын хэсгүүдийнхээ нэгийг бусад цөөн хэдэн суралцагчтай хуваалцахыг хүсэх талаар бодож үз. Тэдгээрийг өөрсдөөс нь өөр судрын хэсгүүд сонгосон суралцагчидтай хуваалцахад урь.

Таны Бурхантай харилцах харилцаа

Төгс эзэмших сургаалын судрын хэсгүүдийг сонгосон нэг шалтгаан нь тэдгээр нь таны Тэнгэрлэг Эцэг, Есүс Христ хоёртой харилцах харилцааг бэхжүүлэх үнэнүүдийг агуулдагтай холбоотой юм.

• Таны Тэнгэрлэг Эцэг, Есүс Христ хоёртой харилцах харилцааг бэхжүүлэхэд тусалсан төгс эзэмших сургаалын судрын нэг хэсэг юу вэ? Энэ нь танд хэрхэн тусалсан бэ?

• Та судрын энэ хэсгээс Тэдний талаар ямар ямар үнэнийг мэдэж авч байна вэ?

Суралцагчдыг хариултаа хуваалцах үед, өмнөх асуултуудад өгсөн хувийн хариултаа мөн хуваалцах талаар бодож үз.

Судрын хэсгүүдийг ашиглах

Төгс эзэмших сургаалын зорилгын нэг нь танд одоогийн болон ирээдүйн амьдралдаа тулгарч болох нөхцөл байдлуудад төгс эзэмших сургаалын судрын хэсгүүд дээрх үнэнүүдийг ашиглахад тань туслах явдал юм. Жишээлбэл: 1 Петр 4:6 дээрх, сайн мэдээ нь үхэгсдэд ч хүртэл тунхаглагдсан хэмээн заасан сургаал нь хайртай хүнээ алдсан найзыг тань тайвшруулж эсвэл таныг өвөг дээдэстээ зориулж ариун сүм, гэр бүлийн түүхийн ажлыг хийхэд уриалж болох юм.

Суралцагчдаас дараах үйл ажиллагаанд зориулан хос хосоороо ажиллахыг хүсэх талаар бодож үз. Нэг суралцагч нь өнөө үеийн жишээ, нөгөө суралцагч нь ирээдүйн жишээ зохиож болно. Суралцагчдад хангалттай цаг өгсний дараа, тэднийг жишээгээ хамтрагчтайгаа ээлжлэн хуваалцахад урь. Дараа нь тэдний өөрсдийн жишээнд ашиглахаар сонгосон судрын хэсгийг ил болгож, яагаад үүнийг сонгосон болохыг тайлбарлахаас нь өмнө хамтрагчийнхаа жишээнд ашиглахад хамгийн тохиромжтой гэж үзэж буй хэсгүүдээ хуваалцахад урь.

Эсвэл цөөн суралцагч жишээнүүдээ ангийнхантайгаа хуваалцаж болно. Дараа нь ангийнхан тухайн суралцагч сонгосон судрын хэсгээ мөн яагаад сонгосноо илэрхийлэхээс өмнө уг жишээнд хамгийн тохиромжтой гэж үзэж буй хэсгүүдээ хуваалцаж болно.

Өнөө үед ашиглах нь

• Өнөө үед өсвөр насныхан хүснэгт дээр жагсаасан төгс эзэмших сургаалын судрын хэсгүүдийн нэгтэй холбоотой байж болох ямар бодит байдалтай нүүр тулж болох вэ? Та өөрт, өөрийн таньдаг хэн нэгэнд тохиолдсон эсвэл өсвөр үеийнхэнд нийтлэг тохиолдож болох нөхцөл байдлуудын талаар бичиж болно.

• Эдгээр төгс эзэмших сургаалын судрын хэсгийн аль нь таны бичсэн нөхцөл байдалд ашиглахад хамгийн тохиромжтой байна вэ? Тухайн судрын хэсэг дээрх үнэнийг уг нөхцөл байдалд хэрхэн ашиглах вэ?

Ирээдүйд ашиглах нь

• Та нас ахисан хойноо төгс эзэмших сургаалын судрын аль нэг хэсэг өөрт тань тусалж эсвэл чиглүүлж чадах ямар нөхцөл байдалтай тулгарч болох вэ?

• Эдгээр төгс эзэмших сургаалын судрын хэсгийн аль нь уг нөхцөл байдалд ашиглахад хамгийн тохиромжтой байна вэ? Тухайн судрын хэсэг дээрх үнэнийг уг нөхцөл байдалд хэрхэн ашиглах вэ?

Суралцагчдыг судрын нэг хэсгийг сонгоод, үүний зааж буй үнэнүүдийг өөрсдийн амьдралд хэрхэн ашиглах талаараа судлах тэмдэглэлдээ бичиж тэмдэглэхэд урь.