ការរំឭកចំណេះចំណានខាងគោលលទ្ធិ ២៣

ស្វែងយល់ និងពន្យល់

គោលបំណងមួយនៃចំណេះចំណានខាងគោលលទ្ធិ គឺដើម្បីជួយអ្នកឲ្យយល់ពីការបង្រៀនរបស់ព្រះអង្គសង្គ្រោះ ដែលមាននៅក្នុងវគ្គចំណេះចំណានខាងគោលលទ្ធិ ហើយអាចពន្យល់វាជាពាក្យសម្ដីផ្ទាល់របស់អ្នក ។ មេរៀននេះនឹងផ្តល់ឲ្យអ្នកនូវឱកាសមួយក្នុងការធ្វើឲ្យការយល់ដឹងរបស់អ្នកកាន់តែស៊ីជម្រៅ និងពន្យល់ពីសេចក្តីពិតដែលមាននៅក្នុងវគ្គចំណេះចំណានខាងគោលលទ្ធិទាំង ១៣ ពីពាក់កណ្តាលទីពីរនៃព្រះគម្ពីរសញ្ញាថ្មី ។

ការលើកទឹកចិត្តឲ្យមានការសិក្សាជាប្រចាំ និងការរំឭកឡើងវិញនូវវគ្គចំណេះចំណានខាងគោលលទ្ធិទាំងឡាយ ។ ការទន្ទេញ ការយល់ដឹង ការពន្យល់ និងការអនុវត្តន៍វគ្គចំណេះចំណានខាងគោលលទ្ធិ ទាមទារនូវការសិក្សា និងការអនុវត្តន៍ ។ សូមបង្រៀនមេរៀនចំណេះចំណានខាងគោលលទ្ធិរៀងរាល់សប្តាហ៍ ហើយលើកទឹកចិត្តសិស្សឲ្យរំឭកឡើងវិញជាទៀងទាត់នូវអ្វីដែលពួកគេបានរៀន ។ សូមចងចាំថា កម្មវិធីចំណេះចំណានខាងគោលលទ្ធិគឺជាធនធានដ៏មានតម្លៃមួយ ដែលអាចជួយសិស្សឲ្យបន្ដសិក្សាវគ្គចំណេះចំណានខាងគោលលទ្ធិ ។

ការរៀបចំសិស្ស ៖ សូមអញ្ជើញសិស្សឲ្យពិនិត្យមើលវគ្គចំណេះចំណានខាងគោលលទ្ធិទាំង ១៣ យ៉ាងខ្លីពីពាក់កណ្តាលទីពីរនៃព្រះគម្ពីរសញ្ញាថ្មី ហើយបន្ទាប់មកជ្រើសរើសវគ្គមួយដែលពួកគេចង់យល់កាន់តែប្រសើរជាងមុន ។

សកម្មភាពរៀនសូត្រដែលអាចមាន

មេរៀនវគ្គបទគម្ពីរចំណេះចំណានខាងគោលលទ្ធិ អាចចាំបាច់ត្រូវបង្រៀនជំនួសឲ្យមេរៀនរំឭកឡើងវិញនេះបាន ។ សូមមើលកាលវិភាគមេរៀនដែលផ្តល់ដោយតំបន់ ឬនាយក ឬអ្នកសម្របសម្រួលប្រចាំភូមិភាគ ដើម្បីធានាថា មេរៀនវគ្គចំណេះចំណានខាងគោលលទ្ធិនីមួយៗនឹងត្រូវបានបង្រៀនអំឡុងវគ្គសិក្សារបស់ថ្នាក់សិក្ខាសាលា ។

ការសួរសំណួរ

• តើនៅពេលណាដែលអ្នកមានអារម្មណ៍មានអំណរគុណដែលអ្នកបានសួរសំណួរដល់នរណាម្នាក់ ? ( ឧទាហរណ៍ ប្រហែលជាអ្នកបានរៀនអ្វីមួយដោយការសួរសំណួរ ឬប្រហែលជាអ្នកបានទទួលការប្រឹក្សាដ៏មានតម្លៃ បន្ទាប់ពីស្វែងរកដំបូន្មានពីមិត្តភក្តិ ឬឪពុកម្តាយ ) ។

សូមពិចារណាចែកចាយបទពិសោធន៍ផ្ទាល់ខ្លួន ដើម្បីជួយសិស្សឲ្យគិតអំពីបទពិសោធន៍ផ្ទាល់ខ្លួនរបស់ពួកគេ ។

• តើមានមូលហេតុអ្វីខ្លះដែលវាសំខាន់ដើម្បីសួរសំណួរនៅពេលរៀនអំពីដំណឹងល្អនៃព្រះយេស៊ូវគ្រីស្ទ ?

ប្រធាន ហិនរី ប៊ី អាវរិង នៃគណៈប្រធានទីមួយបានថ្លែងថា « ការសួរ និងការឆ្លើយសំណួរ គឺជាចំណុចសំខាន់បំផុតក្នុងការរៀនសូត្រទាំងអស់ និងការបង្រៀនទាំងអស់ » ( « The Lord Will Multiply the Harvest » [ ជំនួបពេលល្ងាចជាមួយនឹងអ្នកមានសិទ្ធិអំណាចទូទៅ ថ្ងៃទី ៦ ខែ កុម្ភៈ ឆ្នាំ ១៩៩៨ ] ទំព័រ ៥–៦ នៅក្នុង Teaching Seminary: Preservice Readings [ ២០០៤ ] ទំព័រ ៩៨ ) ។

ការសួរសំណួរអំពីវគ្គចំណេះចំណានខាងគោលលទ្ធិអាចជួយយើងឲ្យយល់កាន់តែច្បាស់អំពីវា ហើយអញ្ជើញជំនួយរបស់ព្រះអង្គសង្គ្រោះឲ្យកាន់តែពេញលេញមកក្នុងជីវិតរបស់យើង ។

សូមពិចារណាអំពីការបង្ហាញសេចក្ដីយោងបទគម្ពីរចំណេះចំណានខាងគោលលទ្ធិទាំង ១៣ ឬបង្ហាញសិស្សនូវកន្លែងដែលពួកគេអាចមើលឃើញសេចក្ដីយោងទាំងនោះ ។ ប្រសិនបើចង់បាន សូមប្រើវគ្គចំណេះចំណានខាងគោលលទ្ធិព្រះគម្ពីរសញ្ញាថ្មីទាំង ២៤ សម្រាប់ការរំឭកឡើងវិញនេះ ឬជ្រើសរើសតែពីរបីប៉ុណ្ណោះ អាស្រ័យលើតម្រូវការរបស់ថ្នាក់ ។

ចំណេះចំណានខាងគោលលទ្ធិនៃព្រះគម្ពីរសញ្ញាថ្មី ៖ កូរិនថូស ទី១–វិវរណៈ

កូរិនថូស ទី១ ៦:១៩–២០	« រូបកាយអ្នករាល់គ្នាជាវិហារនៃព្រះវិញ្ញាណបរិសុទ្ធ » ។
កូរិនថូស ទី១ ១១:១១	« ក្នុងព្រះអម្ចាស់ នោះបុរសមិនមែនជាឥតពឹងអាស្រ័យដល់ស្ត្រីឡើយ ហើយស្ត្រីក៏មិនមែនជាឥតពឹងអាស្រ័យដល់បុរសដែរ » ។
កូរិនថូស ទី១ ១៥:២០–២២	« ព្រោះដូចជាគ្រប់មនុស្សទាំងអស់បានត្រូវស្លាប់ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ក្នុងព្រះគ្រីស្ទយ៉ាងនោះដែរ » ។
កូរិនថូស ទី១ ១៥:៤០–៤២	នៅក្នុងដំណើររស់ឡើងវិញ នោះមាននគរនៃសិរីល្អចំនួនបី ។
អេភេសូរ ១:១០	« សម្រាប់ការកាន់កាប់ត្រួតត្រា ក្នុងកាលដែលពេលពេញកំណត់បានមកដល់ ដើម្បីនឹងបំព្រួមគ្រប់ទាំងអស់ក្នុងព្រះគ្រីស្ទ ទាំងរបស់នៅស្ថានសួគ៌ និងរបស់នៅផែនដីផង » ។
អេភេសូរ ២:១៩–២០	សាសនាចក្រត្រូវបាន « ស្អាងឡើងលើជើងជញ្ជាំងនៃពួកសាវក និងពួកហោរា ហើយព្រះយេស៊ូវគ្រីស្ទនោះឯង ទ្រង់ជាថ្មជ្រុងយ៉ាងឯក » ។
ថែស្សាឡូនីច ទី២ ២:១–៣	« ថ្ងៃនៃព្រះអម្ចាស់ … មិនមកឡើយ ទាល់តែមានសេចក្ដីក្បត់សាសនាមកជាមុនសិន » ។
ធីម៉ូថេ ទី២ ៣:១៥–១៧	« បទគម្ពីរទាំងប៉ុន្មាន … អាចនឹងនាំឲ្យអ្នកមានប្រាជ្ញាដល់ទីសង្គ្រោះ » ។
ហេព្រើរ ១២:៩	ព្រះវរបិតាសួគ៌គឺជា « ព្រះវរបិតាខាងវិញ្ញាណ » ។
យ៉ាកុប ១:៥–៦	« តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ » ។
យ៉ាកុប ២:១៧–១៨	« សេចក្ដីជំនឿ បើគ្មានការប្រព្រឹត្តតាមទេ នោះក៏ស្លាប់ » ។
ពេត្រុស ទី១ ៤:៦	« ហេតុនោះ [ បានជា ] ផ្សាយដំណឹងល្អ ទៅមនុស្សដែលស្លាប់ហើយដែរ » ។
វិវរណៈ ២០:១២	« រួចមនុស្សស្លាប់ទាំងអស់ត្រូវជំនុំជម្រះ … តាមអំពើដែលគេបានប្រព្រឹត្តរៀងខ្លួន » ។

សូមពិចារណាធ្វើសកម្មភាពខាងក្រោមជាថ្នាក់ដោយប្រើវគ្គចំណេះចំណានខាងគោលលទ្ធិមួយ បន្ទាប់មកអញ្ជើញសិស្សឲ្យធ្វើសកម្មភាពឡើងវិញដោយប្រើវគ្គចំណេះចំណានខាងគោលលទ្ធិផ្សេងពីការជ្រើសរើសរបស់ពួកគេ ។ សិស្សអាចធ្វើការជាក្រុម ជាគូ ឬជាបុគ្គល អាស្រ័យលើតម្រូវការរបស់ថ្នាក់ ។

ដើម្បីមើលឧទាហរណ៍នៃសកម្មភាពស្រដៀងគ្នានេះ មុនពេលថ្នាក់សូមពិចារណាមើលវីដេអូ « ២.៧ Analyzing a Passage » ( ៨.១១ ) នៅលើគេហទំព័រ ChurchofJesusChrist.org ។

សូមជ្រើសរើសវគ្គចំណេះចំណានខាងគោលលទ្ធិមួយក្នុងចំណោមវគ្គចំណេះចំណានខាងគោលលទ្ធិទាំង ១៣ ដែលអ្នកចង់យល់កាន់តែច្បាស់ ។ សូមអានវាដោយយកចិត្តទុកដាក់ ។ សូមវិភាគពាក្យ និងឃ្លានៃវគ្គចំណេះចំណានខាងគោលលទ្ធិ ដោយកត់សម្គាល់អ្វីដែលអ្នកយល់អំពីវគ្គបទគម្ពីរ និងសំណួរអ្វីដែលអ្នក ឬនរណាម្នាក់អាចសួរអំពីវគ្គបទគម្ពីរនោះ ។ ឧទាហរណ៍ អ្វីមួយដែលអ្នកអាចនឹងសួរអំពី អេភេសូរ ២:១៩–២០ គឺ « តើអ្វីទៅជាថ្មជ្រុងយ៉ាងឯក ហើយហេតុអ្វីបានជាព្រះយេស៊ូវគ្រីស្ទត្រូវបានប្រៀបធៀបទៅនឹងថ្មមួយនោះ ? ឬអ្នកប្រហែលជាឆ្ងល់ថាតើឃ្លា « សេចក្ដីក្បត់សាសនា » នៅក្នុង ថែស្សាឡូនីច ទី ២ ២:១–៣ មានន័យដូចម្តេច ។

សូមសរសេរសំណួរឲ្យបានច្រើនតាមដែលអ្នកអាចធ្វើបាន ។

សិស្សអាចសរសេរវគ្គចំណេះចំណានខាងគោលលទ្ធិដែលពួកគេបានជ្រើសរើសនៅក្នុងសៀវភៅកំណត់ហេតុការសិក្សារបស់ពួកគេ ឬនៅលើក្រដាសមួយ រួចសរសេរសំណួររបស់ពួកគេជុំវិញវា ។

ពេលអ្នកបានសរសេរសំណួរច្រើនតាមដែលអ្នកអាចធ្វើបាន សូមជ្រើសរើសសំណួរមួយចំនួនដែលអ្នកគិតថាសំខាន់បំផុតដើម្បីយល់ ហើយឆ្លើយសំណួរទាំងនោះដោយប្រើឧបករណ៍សិក្សាព្រះគម្ពីរដែលមាន ។ ឧបករណ៍ទាំងនេះរួមមាន សេចក្ដីណែនាំដល់បទគម្ពីរទាំងឡាយ លេខយោងព្រះគម្ពីរ កម្មវិធីបណ្ណាល័យដំណឹងល្អ ឬសុន្ទរកថានានានៃសន្និសីទទូទៅ ។ អ្នកក៏អាចជ្រើសរើសប្រើយុទ្ធសាស្ត្រសិក្សាព្រះគម្ពីរមួយចំនួនដែលអ្នកបានរៀនក្នុងឆ្នាំនេះផងដែរ ដូចជាការអានខគម្ពីរដែលនៅជុំវិញ ឬព្យាយាមយល់ពីបរិបទនៃបទគម្ពីរ ។ សូមកត់ត្រាចម្លើយរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។

សូមចាំថា មិនមែនគ្រប់សំណួរទាំងអស់អាចឆ្លើយបានយ៉ាងងាយនោះទេ ហើយសំណួរខ្លះអាចត្រូវការពេលវេលាបន្ថែមទៀត និងការសិក្សា និងការសញ្ជឹងគិតដោយការអធិស្ឋាន ។

ដើម្បីចូលរួមជាមួយសិស្សបន្ថែមទៀត និងបង្កើតភាពចម្រុះបន្ថែមទៀត សូមពិចារណាស្នើសុំពួកគេឲ្យសរសេរវគ្គចំណេះចំណានខាងគោលលទ្ធិ ដែលពួកគេបានជ្រើសរើស និងសំណួររបស់ពួកគេនៅលើក្រដាសខុសៗគ្នា ដែលមានឈ្មោះរបស់ពួកគេនៅលើនោះ ។ បន្ទាប់មក សូមអញ្ជើញសិស្សឲ្យផ្លាស់ប្តូរក្រដាសរបស់ពួកគេជាមួយសិស្សម្នាក់ទៀត ។ ម៉្យាងទៀត សូមអញ្ជើញសិស្សឲ្យហុចក្រដាសរបស់ពួកគេមកខាងមុខ ដើម្បីច្របល់ក្រដាសចូលគ្នា និងចែកព្រាវៗដល់សិស្សផ្សេងទៀត ។

សូមផ្តល់ពេលវេលាដល់សិស្សដើម្បីប្រើឧបករណ៍ និងយុទ្ធសាស្ត្រសិក្សាព្រះគម្ពីរដែលមាន ដើម្បីស្វែងរកចម្លើយចំពោះសំណួរនៅលើក្រដាសដែលពួកគេបានទទួល និងកត់ត្រាចម្លើយទាំងនោះនៅលើក្រដាស ។ បន្ទាប់ពីមានពេលគ្រប់គ្រាន់ហើយ សូមអញ្ជើញសិស្សឲ្យប្រគល់ក្រដាសត្រឡប់ទៅសិស្សដែលមានឈ្មោះនៅលើក្រដាសនោះ ។

សូមអញ្ជើញសិស្សជាច្រើននាក់ឲ្យចែកចាយវគ្គចំណេះចំណានខាងគោលលទ្ធិដែលពួកគេបានជ្រើសរើស សំណួរមួយចំនួនដែលពួកគេបានសរសេរ និងចម្លើយដែលពួកគេ ឬមិត្តរួមថ្នាក់របស់ពួកគេបានរកឃើញ ។ អ្នកក៏អាចសួរពួកគេអំពីអ្វីដែលវគ្គបទគម្ពីរជួយពួកគេឲ្យយល់អំពីព្រះអង្គសង្គ្រោះ ឬដំណឹងល្អរបស់ទ្រង់ផងដែរ ។

ប្រសិនបើមានពេល ( ឬនៅថ្ងៃផ្សេង ) សូមពិចារណាអញ្ជើញសិស្សឲ្យធ្វើសកម្មភាពឡើងវិញដោយប្រើវគ្គចំណេះចំណានខាងគោលលទ្ធិផ្សេងទៀត ។