យ៉ូហាន ទី១ ២–៤

« ពួកស្ងួនភ្ងាអើយ យើងត្រូវស្រឡាញ់គ្នាទៅវិញទៅមក »

ហេតុអ្វីបានជាពេលខ្លះវាជាការពិបាកក្នុងការបង្ហាញសេចក្ដីស្រឡាញ់ចំពោះអ្នកដទៃ ? តើសេចក្ដីស្រឡាញ់របស់យើងចំពោះព្រះជាប់ទាក់ទងទៅនឹងការស្រឡាញ់អ្នកដទៃដោយរបៀបណា ? សាវកយ៉ូហានបានបង្រៀនពួកបរិសុទ្ធអំពីរបៀបដែលសេចក្តីស្រឡាញ់របស់ព្រះចំពោះពួកគេអាចបំផុសគំនិតពួកគេឲ្យស្រឡាញ់ព្រះ និងអ្នកដទៃ ( សូមមើល យ៉ូហាន ទី១ ៤:១១, ១៩ ) ។ មេរៀននេះអាចជួយអ្នកឲ្យយល់ និងអនុវត្តតាមបទបញ្ញត្តិឲ្យស្រឡាញ់អ្នកដទៃ ដូចដែលអ្នកស្រឡាញ់ព្រះ ។

ការជួយសិស្សឲ្យធ្វើសកម្មភាពសុចរិតប្រកបដោយប្រសិទ្ធភាព ។ នៅពេលសិស្សធ្វើសកម្មភាពដោយសេចក្តីជំនឿ ដើម្បីអនុវត្តតាមគោលការណ៍នៃដំណឹងល្អ នោះព្រះវិញ្ញាណបរិសុទ្ធនឹងធ្វើជាសាក្សីដល់ពួកគេអំពីសេចក្តីពិតទាំងនោះ ( សូមមើល យ៉ូហាន ៧:១៧ ) ។ សូមបង្កើតឱកាសឲ្យសិស្សអនុវត្តតាមគោលការណ៍នានានៅក្នុងថ្នាក់ ដើម្បីឲ្យព្រះវិញ្ញាណបរិសុទ្ធអាចនាំយកសេចក្ដីពិតជ្រាបចូលក្នុងដួងចិត្តរបស់ពួកគេកាន់តែជ្រៅ ។

ការរៀបចំសិស្ស ៖ សូមអញ្ជើញសិស្សឲ្យមករៀនដោយបានត្រៀមខ្លួនដើម្បីចែកចាយបទពិសោធន៍ដែលពួកគេបង្ហាញសេចក្ដីស្រឡាញ់ដល់អ្នកដទៃ ឬអ្នកផ្សេងទៀតបង្ហាញសេចក្ដីស្រឡាញ់ចំពោះពួកគេ និងផលប៉ះពាល់ ដែលវាមាន ។

សកម្មភាពរៀនសូត្រដែលអាចមាន

ការស្រឡាញ់អ្នកដទៃ

សូមគិតពីរបៀបជាច្រើនដែលអ្នកអាចបញ្ចប់ ប្រយោគខាងក្រោម ៖

ការស្រឡាញ់អ្នកដទៃវាងាយស្រួល នៅពេល …

ការស្រលាញ់អ្នកដទៃវាពិបាក នៅពេល …

សូមពិចារណាសរសេរឃ្លាខាងលើនៅលើក្ដារខៀន បន្ទាប់មកអញ្ជើញសិស្សជាច្រើនឲ្យសរសេរពីរបៀបដែលពួកគេអាចបំពេញប្រយោគមួយក្នុងចំណោមប្រយោគទាំងអស់ ។

សូមពិចារណាពីសំណួរខាងក្រោមនេះ ៖

• តើអ្វីជំរុញចិត្តអ្នក ឬធ្វើឲ្យអ្នកពិបាកបង្ហាញសេចក្ដីស្រឡាញ់ចំពោះអ្នកដទៃ ?

ការបង្រៀនរបស់យ៉ូហាន អំពីសេចក្ដីស្រឡាញ់

សាវកយ៉ូហានបានបង្រៀនយ៉ាងក្លាហានអំពីតម្រូវការក្នុងការស្រឡាញ់អ្នកដទៃ ។

សូមអាន យ៉ូហាន ទី១ ៣:១៦–១៧ ; ៤:៧–១១, ១៩–២១ ហើយគូសសម្គាល់សេចក្ដីពិតដែលអ្នកគិតថានឹងមានប្រយោជន៍ចំពោះអ្នក នៅពេលអ្នកពិចារណាអំពីបញ្ហាប្រឈមនៃការស្រឡាញ់អ្នកដទៃ ។ ( សូមកត់ចំណាំថាពាក្យ ទីសន្តោសប្រោស [ យ៉ូហាន ទី១ ៤:១០ ] មានន័យថា ការពលិកម្មដ៏ធួនដែលបំពេញសេចក្ដីយុត្តិធម៌របស់ព្រះ ) ។

• តើអ្នករកឃើញអ្វីខ្លះដែលគួរឲ្យចាប់អារម្មណ៍ ឬមានអត្ថន័យពីការបង្រៀនរបស់យ៉ូហាន ? ហេតុអ្វី ?

សូមស្តាប់សិស្សដោយយកចិត្តទុកដាក់ ។ សូមខិតខំបង្កើតបរិយាកាសដែលសិស្សអាចមានអារម្មណ៍កក់ក្ដៅក្នុងការចែកចាយគំនិតរបស់ពួកគេ ។ សូមពិចារណាសួរថាតើអ្វីដែលពួកគេបានរកឃើញអាចជួយពួកគេឲ្យស្រឡាញ់អ្នកដទៃដោយរបៀបណា ។

សេចក្ដីពិតមួយក្នុងចំណោមសេចក្ដីពិតដែលយ៉ូហានបានបង្រៀននៅក្នុងវគ្គបទគម្ពីរទាំងនេះ គឺថាប្រសិនបើយើងស្រឡាញ់ព្រះ នោះយើងក៏ត្រូវស្រឡាញ់អ្នកដទៃដែរ ។ អ្នកអាចគូសសម្គាល់សេចក្តីពិតនេះនៅក្នុង យ៉ូហាន ទី១ ៤:២១ ។

សូមពិចារណាពីវិធីជួយសិស្សឲ្យយល់ពីសេចក្ដីពិតនេះកាន់តែស៊ីជម្រៅ ។ ការណ៍នេះអាចធ្វើដោយការពិភាក្សាអំពីសំណួរមួយចំនួន ឬទាំងអស់ខាងក្រោម ៖ ហេតុអ្វីបានជាអ្នកគិតថាសេចក្ដីស្រឡាញ់ចំពោះព្រះជាប់ទាក់ទងនឹងសេចក្ដីស្រឡាញ់ចំពោះអ្នកដទៃ ? តើការគិតអំពីសេចក្ដីស្រឡាញ់របស់ព្រះចំពោះអ្នក និងអ្នកដទៃអាចមានឥទ្ធិពលលើទង្វើរបស់អ្នកចំពោះអ្នកដទៃយ៉ាងដូចម្ដេច ? តើជីវិតរបស់យើង និងជីវិតរបស់មនុស្សជុំវិញខ្លួនយើង អាចខុសគ្នា និងប្រសើរជាងនេះដោយរបៀបណា ប្រសិនបើយើងយល់និងអនុវត្តតាមសេចក្ដីពិតនេះ ?

សិស្សក៏អាចទទួលបានអត្ថប្រយោជន៍ពីការបញ្ចប់សកម្មភាពរៀនសូត្រដូចជា ៖

ដើម្បីជួយអ្នកឲ្យសញ្ជឹងគិតអំពីពរជ័យនៃការស្រឡាញ់អ្នកដទៃ សូមជ្រើសរើសគំរូមួយក្នុងចំណោមគំរូខាងក្រោម ហើយឆ្លើយសំណួរដែលមានដូចខាងក្រោម ៖

សូមបង្ហាញជម្រើសខាងក្រោមសម្រាប់សិស្ស និងរំឭកពួកគេអំពីការរៀបចំរបស់ពួកគេសម្រាប់ថ្នាក់ ។ សូមពិចារណាឲ្យសិស្សជ្រើសរើសឧទាហរណ៍មួយ ឬពីរ ជាថ្នាក់ ឬរៀងៗខ្លួន ។

• ក. ឧទាហរណ៍​មួយ​ចេញ​ពី​ជីវិតរបស់​ព្រះអង្គ​សង្គ្រោះ ពេល​ទ្រង់​បាន​បង្ហាញ​សេចក្ដី​ស្រឡាញ់​ចំពោះ​អ្នក​ដទៃ 

• ខ. អ្នក​ស្គាល់​នរណា​ម្នាក់​ដែល​ជាគំរូ​ដ៏​ខ្ជាប់​ខ្ជួន​នៃការ​ស្រឡាញ់​អ្នកដទៃ 

• គ. បទពិសោធន៍​ផ្ទាល់ខ្លួន​របស់អ្នក ដែលព្យាយាម​ស្រឡាញ់​អ្នកដទៃ ឬ​បទពិសោធន៍​ដែល​អ្នកដទៃ​បានបង្ហាញ​សេចក្តីស្រឡាញ់​ចំពោះ​អ្នក ។ 

• ឃ. ឧទាហរណ៍​នៃ​ការ​បង្ហាញ​សេចក្ដី​ស្រឡាញ់​ចំពោះ​អ្នក​ដទៃ​ពី​សុន្ទរកថា​សន្និសីទ​ទូទៅ ឬ​វីដេអូ​សាសនាចក្រ ដូចជា « Taking upon Ourselves the Name of Jesus Christ » ចាប់ពី​លេខ​កូដ​ម៉ោង ៤:៤៣ ដល់ ៦:១៥ ( ដែល​មាន​នៅលើ​គេហទំព័រ ChurchofJesusChrist.org )

• តើបុគ្គលនេះ/អ្នកបានធ្វើអ្វីខ្លះដើម្បីបង្ហាញសេចក្តីស្រឡាញ់ ?

• តើសកម្មភាពរបស់ពួកគេ/របស់អ្នកបង្ហាញសេចក្ដីស្រឡាញ់ចំពោះព្រះយ៉ាងដូចម្តេច ?

• តើលទ្ធផលរបស់ពួកគេ/អ្នកបង្ហាញសេចក្តីស្រឡាញ់អ្វីខ្លះ ?

• តើអ្នកបានរៀនអ្វីខ្លះចេញពីឧទាហរណ៍នេះ ?

ប្រសិនបើសិស្សបានធ្វើសកម្មភាពនេះរៀងៗខ្លួនរួចហើយ សូមពិចារណាអញ្ជើញពួកគេឲ្យចែកចាយចម្លើយរបស់ពួកគេជាក្រុមតូចៗ ឬជាមួយថ្នាក់ ។

ការទទួលបានពរជ័យនៃការស្រឡាញ់អ្នកដទៃ

សូមអាន យ៉ូហាន ទី១ ៣:១៧–១៨ ដើម្បីមើលពីរបៀបដែលយ៉ូហានបានជំរុញយើងឲ្យស្រឡាញ់អ្នកដទៃ ។

• តើអ្នកគិតថាការស្រឡាញ់អ្នកដទៃ « ដោយការប្រព្រឹត្ត និងសេចក្តីពិត » មានន័យយ៉ាងណា ? ( យ៉ូហាន ទី១ ៣:១៨ ) ។

វាក៏អាចមានន័យដែរក្នុងការអានការបង្រៀនរបស់ព្រះអង្គសង្គ្រោះមួយចំនួនអំពីការស្រឡាញ់គ្នាទៅវិញទៅមកដែលបានកត់ត្រានៅក្នុង ម៉ាថាយ ៥:៤៣–៤៤ ; ២២:៣៧–៤០ និង យ៉ូហាន ១៣:៣៤ ដោយរកមើលរបៀបដែលព្រះអង្គសង្គ្រោះបានបង្រៀនយើងថាគួរស្រឡាញ់អ្នកដទៃ ។ ( សូមមើលផងដែរ យ៉ូហាន ១៥:១២, ១៧ ) ។

សូមបង្កើតបញ្ជីនូវរបៀបដែលអ្នកអាចបង្ហាញសេចក្ដីស្រឡាញ់ចំពោះអ្នកដទៃ « ដោយការប្រព្រឹត្តិ និងសេចក្តីពិត » ឬដូចដែលព្រះអង្គសង្គ្រោះបានស្រឡាញ់យើង ។ វាអាចមានប្រយោជន៍ក្នុងការពិចារណាពីវិធីបង្ហាញសេចក្ដីស្រឡាញ់ទៅកាន់មនុស្សផ្សេងគ្នា ដូចជាសមាជិកគ្រួសារ មិត្តភក្តិ ឬមិត្តរួមថ្នាក់ ។

ប្រសិនបើវាអាចជួយឲ្យឃើញឧទាហរណ៍ខ្លះនៃការស្រឡាញ់អ្នកដទៃ « ដោយការប្រព្រឹត្តិ និងសេចក្តីពិត » សូមពិចារណាមើល « Now Serving » ( ២:១៨ ) ដើម្បីមើលឧទាហរណ៍ ។ វីដេអូនេះមាននៅលើគេហទំព័រ ChurchofJesusChrist.org ។

• តើគំនិតណាខ្លះនៃការបង្ហាញសេចក្ដីស្រឡាញ់ ដែលអ្នកចាប់អារម្មណ៍ជាងគេបំផុត ? ហេតុអ្វី ?

• ហេតុអ្វីបានជាវាសំខាន់ដែលទង្វើរបស់យើងត្រូវស្មោះត្រង់ ?

• តើការធ្វើសកម្មភាពដ៏ស្មោះសរដ៏ជាប់លាប់ទាំងនេះអាចជួយយើងឲ្យប្រែក្លាយកាន់តែដូចជាព្រះយេស៊ូវគ្រីស្ទយ៉ាងដូចម្ដេច ?

ការអនុវត្ត

សូមគិតអំពីនរណាម្នាក់ដែលអ្នកដឹងថាព្រះអម្ចាស់ប្រហែលជាចង់ឲ្យអ្នកបង្ហាញសេចក្ដីស្រឡាញ់ចំពោះបន្ថែមទៀត ។ សូមព្យាយាមគិតអំពីសេចក្ដីស្រឡាញ់ដែលព្រះវរបិតាសួគ៌ និងព្រះអង្គសង្គ្រោះមានចំពោះពួកគេ ។ សូមពិចារណាធ្វើការអធិស្ឋានទៅកាន់ព្រះវរបិតាសួគ៌ ។ សូមស្តាប់ហើយមានអារម្មណ៍បំផុសគំនិតអំពីអ្វីដែលទ្រង់ប្រហែលជាចង់ឲ្យអ្នកធ្វើដើម្បីបង្ហាញសេចក្ដីស្រឡាញ់ចំពោះបុគ្គលនេះ ។ អ្នកប្រហែលជាចង់អធិស្ឋានសុំជំនួយក្នុងការខិតខំរបស់អ្នក ។ វាក៏ប្រហែលជាមានប្រយោជន៍ផងដែរក្នុងការចែកចាយអ្វីដែលអ្នកមានគម្រោងធ្វើជាមួយមនុស្សពេញវ័យ ឬមិត្តភក្តិដែលគួរឲ្យទុកចិត្ត ហើយសុំឲ្យពួកគេជួយអ្នក ។

សូមពិចារណាសួរថាតើសិស្សណាម្នាក់ចង់ថ្លែងទីបន្ទាល់អំពីសារៈសំខាន់នៃការស្រឡាញ់អ្នកដទៃ និងរបៀបដែលវាបង្ហាញពីសេចក្ដីស្រឡាញ់របស់យើងចំពោះព្រះ ។ សូមពិចារណាចែកចាយទីបន្ទាល់ផ្ទាល់ខ្លួនរបស់អ្នកផងដែរ ។

វិចារណកថា និង ព័ត៌មានសាច់រឿង

យ៉ូហាន ទី១ ៣:១៨ ។ តើការស្រឡាញ់ « ដោយការប្រព្រឹត្ត និងសេចក្តីពិត » មានន័យយ៉ាងណា ?

អែលឌើរ យ៉ូសែប ប៊ី វ៉ឺតលីន ( ឆ្នាំ ១៩១៧–២០០៨ ) ក្នុងកូរ៉ុមនៃពួកសាវកដប់ពីរនាក់បានពន្យល់ ៖

ជាញឹកញាប់ ការបង្ហាញសេចក្ដីស្រឡាញ់ដ៏អស្ចារ្យបំផុត គឺជាទង្វើដ៏សាមញ្ញនៃសេចក្ដីសប្បុរសនិងការយកចិត្តទុកដាក់ដែលយើងបានផ្ដល់ជូនដល់អ្នកដែលយើងជួបនៅលើផ្លូវនៃជីវិត ។

( យ៉ូសែប ប៊ី វ៉ឺតលីន « The Great Commandment » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ២៩ )

តើការស្រឡាញ់អ្នកដទៃមានពរជ័យអ្វីខ្លះ ?

ប្រធាន ឌៀថើរ អេហ្វ អុជដូហ្វ ដែលពេលនោះជាគណៈប្រធានទីមួយ បានថ្លែងទីបន្ទាល់អំពីពរជ័យដែលអាចបានមកពីការស្រឡាញ់អ្នកដទៃ ។

ដោយសារសេចក្តីស្រឡាញ់គឺជាបទបញ្ញត្តិធំ វាគួរតែស្ថិតនៅចំកណ្តាលនៃអ្វីៗទាំងអស់ និងអ្វីគ្រប់យ៉ាងដែលយើងធ្វើនៅក្នុងគ្រួសាររបស់យើង នៅក្នុងការហៅបម្រើក្នុងសាសនាចក្ររបស់យើង និងក្នុងជីវភាពរស់នៅរបស់យើង ។ សេចក្ដីស្រឡាញ់ជាប្រទាលព្យាបាលដែលជួសជុលភាពប្រេះឆាក្នុងទំនាក់ទំនងផ្ទាល់ខ្លួន និងគ្រួសារ ។ វាគឺជាចំណងដែលបង្រួបបង្រួមគ្រួសារ សហគមន៍ និងប្រជាជាតិ ។ សេចក្ដីស្រឡាញ់គឺជាអានុភាពដែលផ្តួចផ្តើមមិត្តភាព ការអត់ឱន ភាពស៊ីវិល័យ និងការគោរព ។ វាជាប្រភពដែលជម្នះការបែកបាក់គ្នា និងការស្អប់ ។ សេចក្តីស្រឡាញ់គឺជាភ្លើងដែលផ្តល់ភាពកក់ក្តៅដល់ជីវិតរបស់យើងជាមួយនឹងអំណរដែលមិនអាចប្រៀបផ្ទឹមបាន និងក្តីសង្ឃឹមដ៏ទេវភាព ។ សេចក្តីស្រឡាញ់គួរតែនិយាយអ្វី ធ្វើនឹង ។

នៅពេលយើងយល់ច្បាស់អំពីអត្ថន័យនៃសេចក្តីស្រឡាញ់ ដូចជាព្រះយេស៊ូវគ្រីស្ទស្រឡាញ់យើង នោះភាពច្របូកច្របល់នឹងបានយល់ច្បាស់ ហើយអាទិភាពរបស់យើងត្រូវបានដាក់ដោយត្រឹមត្រូវ ។ នោះការដើរក្នុងភាពជាសិស្សរបស់ព្រះគ្រីស្ទកាន់តែមានអំណរ ។ ជីវិតរបស់យើងទទួលយកអត្ថន័យថ្មី ។ ទំនាក់ទំនងរបស់យើងជាមួយព្រះវរបិតាសួគ៌របស់យើងកាន់តែស៊ីជម្រៅ ។

( ឌៀថើរ អេហ្វ អុជដូហ្វ « The Love of God » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ២១ )

យ៉ូហាន ទី១ ៣:១៨ ។ តើយើងអាចបង្ហាញសេចក្ដីស្រឡាញ់ « ដោយការប្រព្រឹត្ត និងសេចក្តីពិត » ក្នុងទំនាក់ទំនងគ្រួសាររបស់យើងយ៉ាងដូចម្ដេច ?

សូមមើល « The Eternal Blessings of Marriage » ចាប់ពីកូដម៉ោង ៦:២៣ ដល់ ៨:៤១ ដើម្បីមើល អែលឌើរ រីឆាដ ជី ស្កត ( ឆ្នាំ ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់ ពិពណ៌នាពីទង្វើសប្បុរសដែលលោក និងភរិយាបានផ្លាស់ប្តូរ ឬមើល « Two Brothers Apart » ( ៦:១២ ) ដែលបង្ហាញបងប្អូនពីរនាក់ឲ្យរៀនយល់ពីគ្នា និងស្រឡាញ់គ្នាទៅវិញទៅមក ។

//media.ldscdn.org/webvtt/general-conference/april-2011-general-conference/2011-04-5010-elder-richard-g-scott-en.vtt

យ៉ូហាន ទី១ ៤:១២ ។ តើយ៉ូហានចង់មានន័យយ៉ាងណា ពេលលោកនិយាយថា « គ្មានអ្នកណាដែលឃើញព្រះឡើយ » ?

« ការបកប្រែដោយយ៉ូសែប ស្ម៊ីធ ពីខគម្ពីរនេះបញ្ជាក់ពីការយល់ខុសដែលថាមនុស្សរមែងមិនអាចមើលឃើញព្រះបានទេ ៖ ‹ គ្មានអ្នកណាដែលឃើញព្រះឡើយ លើកលែងតែពួកអ្នកដែលជឿ › ( នៅក្នុង យ៉ូហាន ទី១ ៤:១២ សូមប្រៀបធៀប យ៉ូហាន ទី១ ៤:១២ ) ។ យ៉ូហានបានបន្តដោយការបង្រៀនថា ៖ ‹ បើយើងស្រឡាញ់គ្នាទៅវិញទៅមក នោះព្រះទ្រង់គង់នៅក្នុងយើង ហើយសេចក្ដីស្រឡាញ់របស់ទ្រង់បានពេញខ្នាតក្នុងយើងដែរ › ( យ៉ូហាន ទី១ ៤:១២ ) ។ យ៉ូហានខ្លួនឯងបានឃើញព្រះជាព្រះវរបិតា ( សូមមើល វិវរណៈ ៥:១ ; គ. និង ស. ៦៧:១១ ) ។ ដើម្បីអានបន្ថែមអំពីជីវិតរមែងស្លាប់អាចមើលឃើញព្រះ សូមមើល យ៉ូហាន ១៤:២៣ ; កិច្ចការ ៧:៥៦ ; គ. និង ស. ៩៣:១ ; យ៉ូសែប ស្ម៊ីធ—ប្រវត្តិ ១:១៦–១៧ » ( New Testament Student Manual [ ឆ្នាំ ២០១៤ ] ទំព័រ ៥១៧ ) ។

យ៉ូហាន ទី១ ៤:២០–២១ ។ តើអ្នកណាជា « បងប្អូន » របស់យើង ?

ប្រធាន រ័សុល អិម ណិលសុន បានពន្យល់ ៖

អាទិភាពខ្ពស់បំផុតរបស់យើងក្នុងជីវិតគឺស្រឡាញ់ព្រះ និងស្រឡាញ់អ្នកជិតខាងរបស់យើង ។ ដែលរាប់បញ្ចូលទាំងអ្នកជិតខាងនៅក្នុងគ្រួសាររបស់យើងផ្ទាល់ សហគមន៍របស់យើង ប្រទេសជាតិរបស់យើង និងពិភពលោករបស់យើង ។

( រ័សុល អិម ណិលសុន « Teach Us Tolerance and Love » Ensign ឬ Liahona ខែ ឧសភា ឆ្នាំ ១៩៩៤ ទំព័រ ៦៩ )

សកម្មភាពរៀនសូត្របន្ថែម

យ៉ូហាន ទី១ ៣:១–៣ ; ៤:១២ ។ យើងអាចប្រែក្លាយដូចជាព្រះវរបិតាសួគ៌តាមរយៈការប្រែក្លាយជាបរិសុទ្ធ

ប្រសិនបើសិស្សនឹងទទួលបានអត្ថប្រយោជន៍ពីការរៀនបន្ថែមអំពីរបៀបដែលពួកគេអាចប្រែក្លាយដូចជាព្រះវរបិតាសួគ៌ សូមអញ្ជើញពួកគេឲ្យសិក្សា យ៉ូហាន ទី១ ៣:១–៣ ហើយដើម្បីចែកចាយអ្វីដែលពួកគេរៀនពីវគ្គបទគម្ពីរនេះ ។ សូមពន្យល់ថា « បុត្រា » នៅក្នុង យ៉ូហាន ទី១ ៣:១ អាចត្រូវបានបកប្រែជា « កូន » ( សូមមើល យ៉ូហាន ទី១ ៣:១ សូមប្រៀបធៀបយ៉ូហាន ទី១ ៣:១ ) ហើយថា កូនរបស់ព្រះក្នុងន័យនេះសំដៅទៅលើអ្នកដែលបានកើតឡើងវិញខាងវិញ្ញាណ ( សូមមើល ម៉ូសាយ ៥:៧ ផងដែរ ) ។

សូមអញ្ជើញសិស្សឲ្យចែកចាយអ្វីដែលពួកគេដឹងអំពីព្រះវរបិតាសួគ៌ « ទ្រង់យ៉ាងនោះឯង » ( យ៉ូហាន ទី១ ៣:២ ) ។ សូមឲ្យពួកគេចែកចាយគំនិតអំពីរបៀបដែលយើងអាច « ជម្រះសម្អាតចិត្តខ្លួន » ( យ៉ូហាន ទី១ ៣:៣ ) ដើម្បីយើងអាចប្រែក្លាយដូចជាព្រះ ។ លទ្ធភាពមួយនឹងត្រូវខិតខំស្រឡាញ់ដូចដែលព្រះស្រឡាញ់ ( សូមមើល យ៉ូហាន ទី១ ៤:១២ ) ។

សូមរំឭកសិស្សថា យើងមិនអាចក្លាយជាមនុស្សបរិសុទ្ធដោយគ្មានព្រះអង្គសង្គ្រោះបានឡើយ ។ សូមអញ្ជើញពួកគេឲ្យសិក្សាសេចក្ដីណែនាំដល់បទគម្ពីរទាំងឡាយដែលមានចំណងជើងថា « ញែកជាបរិសុទ្ធ » ( scriptures.ChurchofJesusChrist.org ) ហើយដើម្បីស្វែងរកការយល់ដឹងអំពីរបៀបដែលយើងអាចប្រែក្លាយកាន់តែបរិសុទ្ធដោយមានជំនួយពីព្រះគ្រីស្ទ ។ សូមអញ្ជើញពួកគេឲ្យរៀបផែនការអំពីរបៀបធ្វើដូច្នេះ ។