ការរំឭកចំណេះចំណានខាងគោលលទ្ធិ ៤

អនុវត្តតាមវគ្គបទគម្ពីរចំណេះចំណានខាងគោលលទ្ធិ

គោលបំណងមួយនៃចំណេះចំណានខាងគោលលទ្ធិគឺ ដើម្បីជួយអ្នកឲ្យរៀនពីរបៀបអនុវត្តនៅក្នុងជីវិតតាមគោលលទ្ធិ ដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិ ។ មេរៀននេះនឹងផ្តល់ឱកាសឲ្យអ្នករៀនអនុវត្តតាមវគ្គបទគម្ពីរចំណេះចំណានខាងគោលលទ្ធិ ទៅនឹងសាច់រឿងដែលស្រដៀងនឹងអ្វី ដែលអ្នកអាចជួបប្រទះនៅក្នុងជីវិតរបស់អ្នកផ្ទាល់បាន ។

ការរៀបចំរបស់សិស្ស ៖ សូមអញ្ជើញសិស្សឲ្យសញ្ជឹងគិតអំពីវិធីដែលពួកគេបានអនុវត្តនៅក្នុងជីវិតរបស់ពួកគេ នូវសេចក្តីពិតណាមួយដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិ ដែលពួកគេបានសិក្សារហូតមកនៅក្នុងឆ្នាំនេះ ។

សកម្មភាពរៀនសូត្រដែលអាចមាន

មេរៀនវគ្គបទគម្ពីរចំណេះចំណានខាងគោលលទ្ធិ ប្រហែលជាត្រូវបង្រៀនជំនួសឲ្យមេរៀនរំឭកឡើងវិញនេះ ។ សូមមើលកាលវិភាគល្បឿនមេរៀនដែលផ្តល់ដោយនាយកតំបន់ ឬអ្នកសម្របសម្រួលតំបន់ ដើម្បីធានាថា មេរៀនវគ្គបទគម្ពីរចំណេះចំណានខាងគោលលទ្ធិនីមួយៗនឹងត្រូវបានបង្រៀនអំឡុងវគ្គសិក្សារបស់ថ្នាក់សិក្ខាសាលា ។

តើបទគម្ពីរទាក់ទងនឹងជីវិតខ្ញុំយ៉ាងដូចម្តេច ?

យុវជនម្នាក់ឈ្មោះ នីកូ បានចំណាយពេលជាច្រើនដើម្បីសិក្សាព្រះគម្ពីរ ។ គាត់ស្គាល់ដំណើររឿងព្រះគម្ពីរជាច្រើន ហើយបានទន្ទេញចាំខគម្ពីរជាច្រើន ។ ថ្វីបើគាត់មានការខិតខំប្រឹងប្រែងយ៉ាងណាក៏ដោយ ក៏នីកូ មានការលំបាកក្នុងការមើលឃើញពីរបៀបដែលបទគម្ពីរទាក់ទងនឹងកាលៈទេសៈ និងសំណួរផ្ទាល់ខ្លួនរបស់គាត់ដែរ ។

• តើអ្នកអាចនិយាយអ្វីខ្លះទៅកាន់ នីកូ ដើម្បីជួយគាត់ឲ្យមើលឃើញពីរបៀបដែលបទគម្ពីរអនុវត្តចំពោះជីវិតរបស់គាត់ ?

• តើនៅពេលណាដែលអ្នកបានអនុវត្តសេចក្តីពិតមួយចេញពីព្រះគម្ពីរទៅក្នុងជីវិតរបស់អ្នក ?

មេរៀននេះនឹងជួយអ្នកឲ្យអនុវត្តសេចក្តីពិតទាំងឡាយ ដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិទៅនឹងស្ថានភាពជីវិតពិត ។

សូមបង្ហាញតារាងខាងក្រោមនេះ ដើម្បីឲ្យសិស្សអាចយោងទៅវាពេញមួយមេរៀន ។ សូមកំណត់ថា តើវគ្គបទគម្ពីរមួយណាដែលនឹងមានអត្ថប្រយោជន៍បំផុតដើម្បីគូសបញ្ជាក់ និងពិនិត្យមើលឡើងវិញ ។

សេចក្តីយោងបទគម្ពីរ និងឃ្លាបទគម្ពីរគន្លឹះ

ខាងក្រោមនេះគឺជាសេចក្តីយោងបទគម្ពីរ និងឃ្លាបទគម្ពីរគន្លឹះសម្រាប់វគ្គបទគម្ពីរចំណេះចំណានខាងគោលលទ្ធិ ពីពាក់កណ្តាលដំបូងនៃព្រះគម្ពីរសញ្ញាថ្មី ។ សូមពិនិត្យមើលតារាងនេះឡើងវិញ ហើយប្រសិនបើអ្នកមិនទាន់បានធ្វើទេ សូមពិចារណាគូសចំណាំវគ្គបទគម្ពីរទាំងនេះនៅក្នុងព្រះគម្ពីររបស់អ្នក ។

សេចក្ដីយោងបទគម្ពីរ	ឃ្លាបទគម្ពីរគន្លឹះ
លូកា ២:១០–១២	« ដ្បិតនៅថ្ងៃនេះ មានព្រះអង្គសង្គ្រោះ ១ អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់ » ។
យ៉ូហាន ៣:៥	« បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ។
យ៉ូហាន ៣:១៦	« ដ្បិតព្រះទ្រង់ស្រឡាញ់មនុស្សលោកដល់ម្ល៉េះ បានជាទ្រង់ប្រទានព្រះរាជបុត្រាទ្រង់តែ១ » ។
ម៉ាថាយ ៥:១៤–១៦	« ចូរឲ្យពន្លឺរបស់អ្នករាល់គ្នាបានភ្លឺនៅមុខមនុស្សលោក » ។
ម៉ាថាយ ១១:២៨–៣០	« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក » ។
ម៉ាថាយ ១៦:១៥–១៩	ព្រះយេស៊ូវបានមានបន្ទូលថា « ខ្ញុំនឹងឲ្យកូនសោនៃនគរស្ថានសួគ៌ដល់អ្នក » ។
យ៉ូហាន ៧:១៧	« បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងជាសេចក្តីបង្រៀននេះមកពីព្រះ » ។
ម៉ាថាយ ២២:៣៦–៣៩	« ត្រូវឲ្យស្រឡាញ់ព្រះអម្ចាស់ ជាព្រះនៃឯង ។ … ត្រូវឲ្យស្រឡាញ់អ្នកជិតខាងដូចខ្លួនឯង » ។
លូកា ២២:១៩–២០	ព្រះយេស៊ូវគ្រីស្ទបានបង្គាប់ថា ចូរទទួលទានសាក្រាម៉ង់ « ដើម្បីរំឭកពីខ្ញុំចុះ » ។
យ៉ូហាន ១៧:៣	« នេះជាជីវិតដ៏អស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ និងព្រះយេស៊ូវគ្រីស្ទ » ។
លូកា ២៤:៣៦–៣៩	« ដ្បិតខ្មោចគ្មានសាច់ឬឆ្អឹង ដូចជាឃើញខ្ញុំនេះទេ » ។

• តើមានវិធីអ្វីខ្លះដែលអ្នកបានអនុវត្ត ឬអាចអនុវត្តបាននៅក្នុងជីវិតរបស់អ្នក តាមសេចក្តីពិតមួយចំនួនដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិទាំងនេះ ?

ការអនុវត្តគោលលទ្ធិទៅនឹងស្ថានភាពជីវិតពិត

សូមជួយសិស្សឲ្យហាត់អនុវត្តវគ្គបទគម្ពីរចំណេះចំណានខាងគោលលទ្ធិទៅនឹងស្ថានភាពជីវិតពិត ។ វិធីមួយដើម្បីធ្វើដូចនេះ គឺការចែកចាយសាច់រឿងនីមួយៗខាងក្រោមនេះ ហើយឲ្យសិស្សជ្រើសរើសវគ្គបទគម្ពីរចំណេះចំណានខាងគោលលទ្ធិមួយ ដែលអាចជួយបុគ្គលនោះក្នុងស្ថានភាពនោះបាន ។

សូមពិចារណាបន្ថែមភាពខុសគ្នាទៅនឹងសកម្មភាពនេះ តាមរយៈការបិទក្រដាសដែលមានសរសេរសេចក្តីយោងបទគម្ពីរនៅលើនោះ ដាក់បង្ហាញនៅជុំវិញថ្នាក់រៀន ( សេចក្ដីយោងមួយនៅលើក្រដាសមួយ ) ។ សូមបង្ហាញសាច់រឿងមួយដល់សិស្សក្នុងថ្នាក់ បន្ទាប់មក សូមអញ្ជើញសិស្សឲ្យឈរនៅក្បែរក្រដាសដែលមានសេចក្តីយោងបទគម្ពីរ ដែលពួកគេយល់ថាល្អបំផុតដើម្បីដោះស្រាយសាច់រឿងនេះ ។ បន្ទាប់មក សូមអញ្ជើញសិស្សឲ្យពន្យល់ពីមូលហេតុ ដែលពួកគេបានជ្រើសរើសសេចក្តីយោងនោះ ។ បន្ទាប់មក អ្នកអាចសូមឲ្យសិស្សផ្សេងទៀតចែកចាយមូលហេតុបន្ថែមទៀតដែលពួកគេមានអារម្មណ៍ថា វគ្គបទគម្ពីរនោះនឹងមានគុណប្រយោជន៍នៅក្នុងសាច់រឿងនោះ ។

ខាងក្រោមនេះគឺជាឧទាហរណ៍ពីរនៃសាច់រឿង ដែលអាចប្រើសម្រាប់សកម្មភាពនេះបាន ។ ប្រសិនបើចង់បាន សូមបង្កើតសាច់រឿងផ្សេងទៀតដែលទាក់ទងនឹងវគ្គបទគម្ពីរចំណេះចំណានខាងគោលលទ្ធិផ្សេងទៀត ដែលមានក្នុងតារាងនេះ ។

• មិត្តរបស់អ្នកសួរអ្នកថា « តើអ្វីទៅដែលសំខាន់ខ្លាំងអំពីព្រះយេស៊ូវគ្រីស្ទ ? »

• នៅពេលមិត្តម្នាក់ចាប់ផ្តើមរៀនអំពីដំណឹងល្អ ពួកគេសួរថា « ហេតុអ្វីខ្ញុំត្រូវទទួលពិធីបុណ្យជ្រមុជទឹក ? តើខ្ញុំមិនអាចធ្វើជាមនុស្សល្អបានទេឬ ? »

សម្រាប់សាច់រឿងពីរបន្ទាប់ទៀត សូមពិចារណាបែងចែកសិស្សក្នុងថ្នាក់ជាដៃគូ ឬជាក្រុមតូចៗ ។ សូមចាត់តាំងសាច់រឿងមួយឲ្យក្រុមមួយ ឬដៃគូនីមួយៗ ។ សូមអញ្ជើញសិស្សឲ្យពិភាក្សាអំពីសំណួរ ដែលមានបន្ទាប់ពីសាច់រឿងនានា ។

• អ្នកកំពុងមានអារម្មណ៍សន្ធប់ដោយបញ្ហាជីវិត ហើយឆ្ងល់ថាតើអ្នកអាចងាកទៅរកភាពធូរស្បើយនៅឯណា ។

• ឪពុកម្តាយរបស់អ្នកសង្កត់ធ្ងន់ថា វាសំខាន់ប៉ុណ្ណាដែលអ្នកត្រូវធ្វើជាគំរូដល់អ្នកដទៃ ។

• តើវគ្គបទគម្ពីរចំណេះចំណានខាងគោលលទ្ធិមួយណា ដែលអ្នកគិតថាទាក់ទងនឹងសាច់រឿងនេះ ?

• តើពាក្យ ឬឃ្លាជាក់លាក់អ្វីខ្លះ ចេញពីវគ្គបទគម្ពីរចំណេះចំណានខាងគោលលទ្ធិនេះ ដែលនឹងមានគុណប្រយោជន៍ជាពិសេសនៅក្នុងស្ថានភាពនេះ ?

សូមផ្តល់ពេលឲ្យសិស្សបង្កើតសាច់រឿងមួយ ឬច្រើនដែលទាក់ទងនឹងវគ្គបទគម្ពីរចំណេះចំណានខាងគោលលទ្ធិ ដែលមានចែងនៅក្នុងមេរៀននេះ ។ នៅពេលសិស្សបានបញ្ចប់ហើយ សូមអញ្ជើញសិស្សដែលស្ម័គ្រចិត្តពីរបីនាក់ឲ្យចែកចាយចម្លើយរបស់ពួកគេជាមួយនឹងសិស្សក្នុងថ្នាក់ ។ បន្ទាប់ពីសិស្សម្នាក់បានចែកចាយសាច់រឿងរបស់គាត់ ឬនាងហើយ នោះសិស្សផ្សេងទៀតអាចត្រូវបានអញ្ជើញឲ្យជ្រើសរើសវគ្គបទគម្ពីរចំណេះចំណានខាងគោលលទ្ធិមួយ ដែលពួកគេគិតថាល្អបំផុតទាក់ទងនឹងសាច់រឿងនោះ ។

សូមលើកទឹកចិត្តសិស្សឲ្យបន្តស្វែងរកវិធីអនុវត្តតាមគោលលទ្ធិទាំងឡាយ ដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិនេះនៅក្នុងជីវិតរបស់ពួកគេ ។