Efesianëve 6:10–24

“Vishni Gjithë Armatimin e Perëndisë”

Ne jemi në një luftë për shpirtrat e njerëzimit. Ati Qiellor e frymëzoi Palin të jepte mësim rreth mënyrës se si ne mund t’u mbijetojmë sulmeve të Satanit. Ky mësim ka për qëllim të të ndihmojë të kuptosh se çfarë Perëndia ka siguruar për të të mbrojtur nga ligësitë e botës, të vlerësosh përgatitjen tënde shpirtërore të tanishme dhe të bësh një plan për të përmirësuar mbrojtjet e tua shpirtërore.

Përgatitja e nxënësve: Ftojini nxënësit ta shqyrtojnë dhe përfundojnë veprimtarinë me titullin “Armatimi i Perëndisë do të më ndihmojë të mbrohem nga e liga” tek Eja, Më Ndiq – Për Individët dhe Familjet dhe të vijnë të përgatitur për të treguar atë që mësuan rreth armatimit të Perëndisë (“2–8 Tetor. Efesianëve: ‘Për Përsosjen e Shenjtorëve’”, Eja, Më Ndiq – Për Individët dhe Familjet: Dhiata e Re 2023).

Veprimtari të Mundshme të të Mësuarit

Satani është sulmues në taktikat e tij

• Cilat mendon se janë ndryshimet më të mëdha ndërmjet asaj që po përjeton ti si adoleshent dhe asaj që prindërit e tu përjetuan kur ata ishin në moshën tënde?

Lexoje thënien vijuese nga Plaku Robert D. Hejls (1932–2017), i Kuorumit të Dymbëdhjetë Apostujve, dhe gjej një ndryshim që ai theksoi:

“Etërit dhe gjyshërit tuaj kurrë nuk i hasën tundimet që ju hasni rregullisht. Ju po jetoni në ditët e fundit. Nëse babai juaj donte të futej në telashe, ai duhej të shkonte t’i kërkonte. Jo më! Tani tundimi ju gjen vetë! Ju lutem, mbajeni mend këtë! Satani dëshiron t’ju ketë ju dhe ‘mëkati shtrihet te pragu’ [ Mosia 5:23 ]. Si do t’u bëni ballë taktikave të tij sulmuese?”

(Robert D. Hejls, “Qëndroni të Paepur në Vende të Shenjta”, Ensign ose Liahona, maj 2013, f. 48–49)

• Cilat janë mënyrat se si tundimi na gjen sot në vend që të na duhet ta kërkojmë atë?

Merreni parasysh t’i paraqitni udhëzimet dhe pyetjet vijuese aty ku nxënësit mund t’i shohin. Ftojini nxënësit të përsiatin në heshtje për përgjigjet e tyre.

Përsiat për pyetjet në vijim ose shkruaji përgjigjet e tua në ditarin tënd të studimit.

• Cilat janë disa mënyra se si Satani po përpiqet të të tundojë ty personalisht?

• Çfarë po bën që të kërkosh ndihmën e Zotit për t’u bërë ballë tundimeve të Satanit? Çfarë ke bërë mirë? Çfarë mund të duhet të bësh që të përmirësohesh?

Ndërsa e studion këtë mësim, kërko udhërrëfimin e Frymës së Shenjtë për të të ndihmuar të dish se si mund ta kërkosh dhe marrësh në mënyrë më të plotë mbrojtjen e Shpëtimtarit në jetën tënde nga sulmet e Satanit.

Mbrojtja e Zotit

Lexo tek Efesianëve 6:10–13 , duke kërkuar se çfarë tha Pali se po luftonin shenjtorët në kohën e tij.

• Çfarë ngjashmërish sheh ndërmjet asaj kundër së cilës shenjtorët në Efes po luftonin në kohën e tyre dhe asaj kundër së cilës ne luftojmë tani?

• Përse do të donin Ati Qiellor dhe Jezu Krishti që ne të jemi të mbrojtur nga ligësia? Çfarë na mëson kjo dëshirë rreth Tyre?

• Çfarë i ftoi Pali efesianët të bënin për të qenë në gjendje t’u bënin ballë këtyre ligësive?

Nga Efesianëve 6:10–13 , ne mësojmë se nëse e veshim të gjithë armatimin e Perëndisë, ne do të jemi në gjendje t’i bëjmë ballë të ligës.

Armatimi i Perëndisë është një metaforë ose simbol i mbrojtjes që Ati Qiellor dhe Jezu Krishti na ofrojnë. Në betejën me të cilën përballemi, armatimi i Perëndisë është krijuar posaçërisht për ty dhe për rreziqet në jetën tënde. Për të të ndihmuar ta kuptosh këtë mbrojtje hyjnore, ti mund të duash ta kopjosh figurën vijuese në ditarin tënd të studimit ose ta shtypësh atë në letër. Mbaj shënim në diagram përgjigjet e tua për veprimtarinë vijuese:

Jepuni nxënësve fletushkën në vijim. Ose nxënësit mund ta rikrijojnë fletushkën në ditarin e tyre të studimit. Paraqitini pyetjet që nxënësit do t’u përgjigjen për secilën pjesë të armatimit.

Lexo tek Efesianëve 6:14–18 për të përcaktuar çdo pjesë të armatimit të Perëndisë. Shkruaj se çfarë përfaqëson secila pjesë e armatimit në diagramin tënd. Mund të jetë e dobishme të dish se “mbathur këmbët” ( Efesianëve 6:15) i referohet veshjes së mbulesave mbrojtëse në këmbë.

Si një alternativë për materialin filmik të sugjeruar më lart, merreni parasysh të shfaqni materialin filmik nga biseda e Plakut Hejls, “Qëndroni të Paepur në Vende të Shenjta” nga kodi kohor 00:40 deri në 02:37, në dispozicion në ChurchofJesusChrist.org.

Merreni parasysh ta ndani klasën në grupe. Caktojini çdo grupi një pjesë të armatimit. Nëse klasa është e vogël, mund t’ju duhet t’u caktoni disa grupeve më shumë se një pjesë të armatimit.

1. Me cilin koncept shpirtëror e lidhi Pali këtë pjesë të armatimit?

2. Çfarë mund të përfaqësojë nga ana shpirtërore pjesa e trupit që mbrohet nga armatimi?

3. Si e veshim këtë pjesë të armatimit të Zotit për të marrë mbrojtjen e Tij kundër së ligës?

Për t’u treguar me shembull nxënësve mënyrën se si ta plotësojnë fletushkën, merreni parasysh të kryeni hapat duke përdorur shembullin vijues të një pjese të armatimit. Vëreni një nxënës të lexojë me zë të lartë tek Efesianëve 6:14 . Diskutojini me klasën përgjigjet e mundshme për secilën pyetje. Nxënësit mund të përgjigjen për pyetjet 2 dhe 3 në një llojshmëri mënyrash.

Për fjalët “në ijë brezin e së vërtetës” ( Efesianëve 6:14), sa vijojnë mund të jenë përgjigje për pyetjet më lart: 1) e vërteta; 2) ajo përfaqëson dëlirësinë ose pastërtinë tonë morale dhe 3) ne mund të mësojmë të vërtetat rreth Atit Qiellor dhe planit të Tij të shpëtimit që mund të na motivojë të qëndrojmë moralisht të pastër.

Pas një kohe të mjaftueshme, ftojeni një përfaqësues nga secili grup të raportojë për pjesën e armatimit që iu caktua. Teksa çdo grup raporton, ftojini nxënësit t’i mbajnë shënim gjetjet e grupit në fletushkat e tyre. Merreni parasysh t’i pyetni nxënësit se çfarë pyetjesh kanë apo çfarë pikëpamjesh kanë fituar rreth mësimeve të Palit për armatimin e Perëndisë.

Veshja e të gjithë armatimit të Shpëtimtarit

Pali dhe Shpëtimtari theksuan veshjen e të gjithë armatimit të Perëndisë (shih tek Efesianëve 6:11, 13 ; Doktrina e Besëlidhje 27:15).

• Çfarë rreziqesh sheh te veshja e vetëm një pjesë të armatimit të Zotit? Përse mendon se Ati Qiellor dhe Jezu Krishti dëshirojnë që ti të jesh plotësisht i mbrojtur?

• Çfarë do të bësh çdo ditë për ta veshur në mënyrë më të plotë të gjithë armatimin e Perëndisë për t’u mbrojtur nga tundimet me të cilat përballesh?

• Në ç’mënyrë është të drejtuarit tek Ati Qiellor dhe Jezu Krishti për ndihmë në këtë mënyrë, një shfaqje e dashurisë tënde për Ta dhe e besimit tek Ata?

Dëshmoni për dëshirën e Atit Qiellor dhe Jezu Krishtit për të na mbrojtur nga tundimi dhe shprehni siguri që nxënësit mund ta marrin këtë forcë dhe mbrojtje prej Tyre ndërsa i ndjekin nxitjet që kanë marrë.

Komente dhe Informacion për Rrethanat

Cila është domethënia e pjesëve të trupit të mbrojtura nga armatimi i Shpëtimtarit?

Presidenti Harold B. Li (1899–1973) shpalli:

“Ne i kemi të katër pjesët e trupit që Apostulli Pal tha se [janë] pjesët më të cenueshme nga fuqitë e errësirës. Ijët, që simbolizojnë virtytin, dëlirësinë. Zemra që simbolizon sjelljen tonë. Këmbët tona, synimet ose objektivat tona në jetë dhe, së fundi, koka jonë, mendimet tona.”

(Harold B. Lee, Feet Shod with the Preparation of the Gospel of Peace, Fjalimi i Vitit në Universitetin “Brigam Jang” [9 nëntor 1955], f. 2)

Çfarë mund të bëj për ta veshur të gjithë armatimin e Perëndisë?

Plaku Nil A. Maksuell (1926–2004), i Kuorumit të Dymbëdhjetë Apostujve, dha mësim:

“Zhveshja e njeriut të natyrshëm e bën të mundur veshjen e të gjithë armatimit të Perëndisë, i cili më parë nuk do të na rrinte plotësisht për shtat (shih tek Efesianëve 6:11, 13)”.

(Neal A. Maxwell, “Plow in Hope”, Ensign, maj 2001, f. 60)

Presidenti M. Rasëll Ballard, i Kuorumit të Dymbëdhjetë Apostujve, dha mësim:

“Më pëlqen të mendoj për këtë armatim shpirtëror jo si një copë metali të ngurtë, të shkrirë për t’iu përshtatur trupit, por më shumë si një parzmore me zinxhirë. Parzmorja me zinxhirë përbëhet nga dhjetëra copëza të vogla hekuri, të lidhura së bashku për t’i lejuar përdoruesit përkulshmëri më të madhe pa e humbur mbrojtjen. E them këtë ngaqë ka qenë përvoja ime se nuk ka vetëm një gjë madhore dhe të madhërishme që ne mund ta bëjmë për ta armatosur veten tonë shpirtërisht. Fuqia e vërtetë shpirtërore qëndron në veprime të shumta më të vogla, që gërshetohen së bashku në cohën e mbrojtjes shpirtërore, e cila na mbron dhe na bëhet mburojë prej gjithë ligësisë.”

(M. Russell Ballard, “Be Strong in the Lord”, Ensign, korrik 2004, f. 8)

Në ç’mënyrë lidhen veshjet e tempullit me armatimin e Perëndisë?

Plaku Karlos E. Asai (1926–1999), i Presidencës së Të Shtatëdhjetëve, shpjegoi:

“Megjithatë, ka një pjesë tjetër të armatimit të denjë për konsideratën tonë. Ajo është veshja e brendshme e veçantë e njohur si veshja e brendshme e tempullit, ose veshja e priftërisë së shenjtë, e veshur nga anëtarët e Kishës së Jezu Krishtit të Shenjtorëve të Ditëve të Mëvonshme, të cilët e kanë marrë dhurimin e tyre në tempull. Kjo veshje, e mbajtur ditë e natë, shërben për tre qëllime të rëndësishme: është kujtesë e besëlidhjeve të shenjta të bëra me Zotin në shtëpinë e Tij të shenjtë, një mbulesë mbrojtëse për trupin dhe një simbol i thjeshtësisë së veshjes dhe të jetuarit, që duhet t’i karakterizojë jetët e të gjithë ndjekësve të përulur të Krishtit.”

(Carlos E. Asay, “The Temple Garment: ‘An Outward Expression of an Inward Commitment’”, Ensign, gusht 1997, f. 20)

Veprimtari Plotësuese të të Mësuarit

Mësime me sende

Më poshtë janë të renditura mënyrat e tjera se si mund të fillohet mësimi:

1. Merreni parasysh të sillni disa pajisje mbrojtëse të përdorura në ngjarje sportive ose veprimtari të tjera dhe të diskutoni se si ato i mbrojnë pjesëmarrësit.

2. Paraqitni figura të disa bimëve (siç është një bimë me gjemba) ose kafshëve (siç janë kafshët me brirë, kthetra, dhëmbë ose mbrojtje) dhe të diskutoni se si ata e mbrojnë veten.

Jezu Krishti si armatim

Mund t’i ftoni nxënësit të studiojnë vargjet vijuese për të mësuar më shumë rreth pjesëve të armatimit që gjenden tek Efesianëve 6:14–17 dhe se si secila pjesë përfaqëson Jezu Krishtin:

• “në ijë brezin e së vërtetës” (shih tek Isaia 11:5 ; Gjoni 14:6)

• “parzmoren e drejtësisë” (shih tek Isaia 59:17 ; Filipianëve 3:9)

• “duke mbathur këmbët me gatishmërinë e ungjillit të paqes” (shih tek Isaia 9:6 ; Mateu 5:9)

• “mburojën e besimit” (shih te Moroni 7:33)

• “përkrenaren e shpëtimit” (shih te Psalmeve 27:1 ; 1 Thesalonikasve 5:8 ; Mosia 3:17 ; Doktrina e Besëlidhje 93:8 ; Hebrenjve 5:9)

• “shpatën e Frymës, që është fjala e Perëndisë” (shih te Doktrina e Besëlidhje 6:2 ; 1 Nefi 15:23–24 ; Helamani 3:29–30)

Kur nxënësit të mbarojnë, vërini ata të japin ndonjë pikëpamje që kanë fituar rreth mënyrës se si Jezu Krishti mund t’i mbrojë ata nga rreziqet shpirtërore me të cilat përballen.