Galacia 5

“Lumakad Kayo Ayon sa Espiritu”

Nahirapan ka na bang pumili kung hahangarin mong magpadaig sa tukso o hahangarin mong sundin ang mga pahiwatig ng Espiritu Santo na mamuhay nang matwid? Inilarawan ni Apostol Pablo ang labanang maaaring mangyari sa pagitan ng mga hangarin sa ating mortal at di-perpektong katawan at ng Espiritu ng Diyos, na humihikayat sa ating gumawa ng mabuti. Ang lesson na ito ay naglalayong tulungan kang maging higit na katulad ni Jesucristo sa pamamagitan ng pagbibigay sa iyo ng mga pagkakataong tumukoy ng mga paraan kung paano ka mas lubos na “[makalalakad] ayon sa Espiritu” ( Galacia 5:16).

Pagkakaroon ng ligtas na kapaligiran sa pag-aaral. Sikaping magtulungan upang magkaroon ng pagmamahal, paggalang, at layunin sa klase. Ang mga pagsisikap mong tulungan ang mga estudyante na madamang sila ay ligtas, iginagalang, at pinahahalagahan sa seminary ay makatutulong sa kanila na mas madama ang Espiritu Santo at magkaroon ng mga makabuluhang karanasan.

Paghahanda ng estudyante: Sabihin sa mga estudyante na pag-aralan ang Mosias 3:19 at tumukoy ng mga turo na makatutulong sa kanila na matanggap ang tulong ng Tagapagligtas upang madaig ang ating nahulog na kalagayan, o pagiging “likas na tao.” Maaari ding makatulong na ipasaulo sa mga estudyante ang doctrinal mastery scripture passage na ito.

Mga Posibleng Aktibidad sa Pag-aaral

Tug-of-war

Ipakita ang sumusunod na larawan o iguhit ito sa pisara. Maaari mo ring anyayahan ang mga estudyante na kumopya sandali ng katulad na larawan sa kanilang study journal.

• Sa anong mga paraan natutulad ang inyong buhay sa tug-of-war?

Sa kanyang sulat sa mga taga Galacia, inilarawan ni Apostol Pablo ang dalawang magkalabang puwersa na makahihila sa atin sa iba’t ibang direksyon. Basahin ang Galacia 5:16–17 , at alamin ang ipinayo ni Pablo tungkol sa mga puwersang ito.

• Anong magkakalabang puwersa ang matutukoy ninyo mula sa mga talatang ito?

Maaari kang gumuhit ng patayong linya sa gitna ng larawan ng tug-of-war. Pagkatapos ay isulat ang Lumakad kayo ayon sa Espiritu sa itaas ng isang panig ng tug-of-war at ang Bigyang-kasiyahan ang mga pagnanasa ng laman sa kabilang panig. Hikayatin ang mga estudyanteng kumopya sa larawan sa kanilang study journal na ilagay din ang mga karagdagang ito.

Ang “mga pagnanasa ng laman” ( talata 16) ay mga tuksong nararanasan natin.

• Ano ang ilan sa mga pisikal na tukso (mga pagnanasa ng laman) na nararanasan ng mga kabataan?

Ihambing ang inyong mga sagot sa listahan ni Pablo sa Galacia 5:19–21 .

• Anong mga salita, kung mayroon man, ang hindi pamilyar sa inyo?

Maghandang tulungan ang mga estudyante na maunawaan ang anumang hindi pamilyar na salita sa talata 19–21 sa pamamagitan ng paggamit ng resources na matatagpuan sa mga talababa ng Biblia o sa isang diksyunaryo.

Maglaan ng ilang sandali upang tahimik na pag-isipan kung paano maaaring nangyayari sa inyong buhay ang tug-of war na ito ng Espiritu laban sa mga pagnanasa ng laman. Sa anong mga paraan mahihirapan kayo na labanan ang mga pagnanasa ng laman? Paano kayo napagpapala kapag sinusunod ninyo ang patnubay ng Espiritu? Habang patuloy kayong nag-aaral, bigyang-pansin ang mga espirituwal na pahiwatig na makatutulong sa inyo na malaman ang anumang pagbabagong magagawa ninyo na makatutulong sa inyo na madaig ang mga tuksong kinakaharap ninyo.

Pag-iwas sa mga gawa ng laman

Ang mga sumusunod na mungkahi sa pagtuturo ay nagbibigay ng isang paraan na magagamit upang matulungan ang mga estudyante na mas maunawaan at maipamuhay ang mga turo ni Pablo sa Galacia 5 .

Kung makikinabang ang mga estudyante sa hindi gaanong nakabalangkas na pamamaraan, maaari mong bigyan ng oras ang bawat isa sa kanila para pag-aralan ang Galacia 5:16–23 , Mosias 3:19 , at Doktrina at mga Tipan 11:12 , pati na ang mensahe ni Elder David A. Bednar sa pangkalahatang kumperensya noong Abril 2013 na pinamagatang “Naniniwala Kami sa Pagiging Malinis” (Liahona, Mayo 2013, 41–44). Maaari ding bigyan ang mga estudyante ng iba pang nauugnay na resources na pag-aaralan nila. Maaari silang anyayahang ibahagi ang kanilang mga nalaman at itala ang anumang espirituwal na pahiwatig na natanggap nila mula sa kanilang pag-aaral at sa kasunod na talakayan.

Sundin ang mga pahiwatig ng Espiritu Santo upang malaman ang pinakamainam na paraan na matutulungan ang mga estudyante na magkaroon ng makabuluhang karanasan.

Basahin ang Galacia 5:21 , at alamin kung bakit mahalagang iwasan ang mga pagnanasa ng laman.

• Ano ang natutuhan ninyo tungkol sa dahilan kung bakit dapat nating iwasan ang mga gawaing ito?

• Ano ang maaaring mga dahilan kung bakit mahirap iwasan ang mga pagnanasa ng laman, kahit na alam nating mali ang mga ito?

Itinuro ni Elder David A. Bednar ng Korum ng Labindalawang Apostol:

Bilang mga anak ng Diyos, nagmana tayo ng mga banal na katangian mula sa Kanya. Ngunit sa ngayon ay nakatira tayo sa makasalanang daigdig. Ang mismong mga elemento kung saan nalikha ang ating katawan ay likas na mahina at madaling matangay ng kasalanan, kasamaan, at kamatayan. Dahil dito, ang Pagkahulog ni Adan at ang espirituwal at temporal na mga bunga nito ay may epekto sa ating pisikal na katawan. …

Dahil napakahalaga ng pisikal na katawan sa plano ng kaligayahan ng Ama at sa ating espirituwal na pag-unlad, hangad ni Lucifer na hadlangan ang ating pag-unlad sa pamamagitan ng pagtukso sa atin na gamitin sa mali ang ating katawan. Isa sa mga kabalintunaan ng kawalang-hanggan ay tayo ay inaakit ng kaaway, na miserable dahil wala siyang pisikal na katawan, upang danasin din ang kanyang abang katayuan sa pamamagitan ng maling paggamit ng ating katawan. Samakatuwid, ang kasangkapang wala sa kanya ang mismong puntirya ng mga pagtatangka niya na akitin tayo tungo sa espirituwal na kapahamakan.

(David A. Bednar, “Naniniwala Kami sa Pagiging Malinis,” Liahona, Mayo 2013, 42–43)

• Anong mga salita o mga parirala ang tila pinakamahalaga sa inyo mula sa pahayag na ito? Bakit?

Pagpiling lumakad ayon sa Espiritu

Basahing muli ang Galacia 5:16 at alamin ang mga turo ni Pablo tungkol sa kung paano natin madaraig ang mga tukso ng laman.

Ang isang alituntunin na matututuhan natin mula sa Galacia 5:16 ay habang lumalakad tayo ayon sa Espiritu, mas madaraig natin ang mga tukso ng laman. 

• Ano sa inyong palagay ang ibig sabihin ng “lumakad kayo ayon sa Espiritu”?

Kung kinakailangan, tulungan ang mga estudyante na maunawaan na kaakibat ng paglakad ayon sa Espiritu ang paghahangad at pagsunod sa patnubay ng Espiritu Santo.

• Sa inyong palagay, paano makatutulong sa inyo ang paglakad ayon sa Espiritu upang madaig ang mga tukso ng laman?

Basahin ang Mosias 3:19 at Doktrina at mga Tipan 11:12 , at alamin ang mga turo na makatutulong sa inyo na mas maunawaan ang kahalagahan ng lumakad ayon sa Espiritu.

• Ano ang mga saloobin o impresyon mo habang pinag-aaralan mo ang mga talatang ito?

• Ano ang natutuhan mo tungkol sa kung paano ka matutulungan ni Jesucristo na madaig ang mga tuksong kinakaharap mo?

• Ano ang ilang partikular na bagay na magagawa mo upang matiyak na mas lubos mong makakasama ang Espiritu?

Maaari kang magbahagi ng isang personal na halimbawa na nauugnay sa sumusunod na tanong bago ito itanong sa klase.

• Ano ang mga naging karanasan ninyo kung saan nakatulong sa inyo ang pagsunod sa Espiritu upang madaig ninyo ang tukso? (Tiyaking huwag magbahagi ng mga detalyeng masyadong personal.)

Mga Bunga ng Espiritu

Tinukoy ni Pablo ang marami sa mga pagpapalang maaaring mangyari sa ating buhay kapag pinapakinggan at sinusunod natin ang Espiritu Santo. Tinukoy niya ang mga pagpapalang ito bilang “bunga ng Espiritu” ( Galacia 5:22).

Basahin ang Galacia 5:22–23 , at alamin ang bunga ng Espiritu na tinukoy ni Pablo.

• Alin sa mga pagpapala o damdaming ito mula sa Espiritu ang naranasan mo sa iyong buhay?

• Ano ang nauunawaan mo tungkol sa Ama sa Langit at kay Jesucristo sa tulong ng mga pagpapalang ito? (Kung kinakailangan, tingnan sa Mga Awit 25:8–10 ; Mosias 2:41 .)

Ipamuhay ng natutuhan mo

Si Jesucristo, na palaging sumusunod sa kalooban ng Ama sa Langit (tingnan sa 3 Nephi 27:13), ang perpektong halimbawa sa pagdaig sa tuksong magkasala. Bagama’t dinanas Niya ang lahat ng uri ng tukso ng laman (tingnan sa Mga Hebreo 4:15 ; Alma 7:11), “hindi siya nagpadaig sa mga ito” ( Doktrina at mga Tipan 20:22).

Isipin sandali kung paano mo sisikaping tularan ang halimbawa ni Jesucristo at ipamuhay ang mga katotohanang napag-aralan mo ngayon. Pag-isipan ang anumang pahiwatig na natanggap mo na, at gumawa ng plano tungkol sa gagawin mo upang mas lubos na makalakad ayon sa Espiritu at madaig ang tukso. Isulat ang plano mo sa iyong study journal.

Komentaryo at Pinagmulang Impormasyon

Paano ako matutulungan ng pagsunod sa Espiritu Santo na mapaglabanan at madaig ang tukso?

Itinuro ni Pangulong Boyd K. Packer (1924–2015) ng Korum ng Labindalawang Apostol:

Hindi inaasahang hindi kayo magkakamali sa buhay, ngunit hindi kayo makagagawa ng malaking kasalanan nang hindi muna nababalaan ng mga paramdam ng Espiritu. Ang pangakong ito ay para sa lahat ng miyembro ng Simbahan. …

Kung nakagawa kayo ng mga bagay na hindi ninyo dapat ginawa, o kung nakikisama kayo sa mga taong humihila sa inyo sa maling direksyon, panahon na para gamitin ang inyong kalayaang pumili. Makinig sa tinig ng Espiritu, at hindi kayo maliligaw ng landas.

Inuulit ko na ang mga kabataan ngayon ay lumalaki sa teritoryo ng kaaway na may pababang pamantayan sa moralidad. Ngunit bilang lingkod ng Panginoon, ipinapangako ko na kayo ay poprotektahan at ipagsasanggalang sa pagsalakay ng kaaway kung pakikinggan ninyo ang mga panghihikayat ng Banal na Espiritu.

(Boyd K. Packer, “Payo sa Kabataan,” Liahona, Nob. 2011, 18)

Mga Karagdagang Aktibidad sa Pag-aaral

Mga turo ni Pablo at ang panaginip ni Lehi

Sa Galacia 5:16–23 , ikinumpara ni Pablo ang mga pagpapala ng paglakad ayon sa Espiritu sa mga ibubunga ng pagbibigay-kasiyahan sa mga pagnanasa ng laman. Maaaring makatulong sa mga estudyante na ilarawan sa isipan ang pagkukumparang ito sa pamamagitan ng pag-iisip kung paano ito ipinakita sa pangitain ni Lehi tungkol sa punungkahoy ng buhay.

Maaari mong ipakita ang kasamang larawan at itanong sa mga estudyante kung aling bahagi ng larawan ang maaaring kumatawan sa mga turo ni Pablo tungkol sa paglakad ayon sa Espiritu, at kung aling mga bahagi ang maaaring kumatawan sa kanyang mga turo tungkol sa pagbibigay-kasiyahan sa mga pagnanasa ng laman. Makatutulong din na ipasaliksik sa mga estudyante ang mga sumusunod na talata upang makita kung paano inilalarawan ang iba’t ibang aspeto ng mga turo ni Pablo sa panaginip ni Lehi: 1 Nephi 8:10–12 , 19–34 .

Galacia 5:22–23 . Ang bunga ng Espiritu

Maaaring magsagawa ng mas detalyadong talakayan tungkol sa mga bunga ng Espiritu na nakalista sa Galacia 5:22–23 . Ang isang paraan upang magawa ito ay gumuhit sa pisara ng isang punungkahoy na may bunga o gumupit ng mga piraso ng papel na kumakatawan sa bunga. Pagkatapos ay maaaring saliksikin ng mga estudyante ang Galacia 5:22–23 at sulatan ang bawat isa sa mga bunga ng isa sa mga bunga ng Espiritu. Pagkatapos ay maaaring magkaroon ng talakayan tungkol sa kahulugan ng mga pariralang ito, mga karanasan ng mga estudyante sa mga damdaming ito mula sa Espiritu, at mga taong kakilala nila na ang buhay ay nagpapakita ng isang partikular na bunga ng Espiritu (hango sa “Setyembre 25–Oktubre 1. Galacia: ‘Lumakad Kayo Ayon sa Espiritu,’” Pumarito Ka, Sumunod Ka sa Akin—Para sa mga Indibiduwal at Pamilya: Bagong Tipan 2023).