Efeso 1

“Tipunin ang Lahat ng mga Bagay kay Cristo”

Naisip mo na ba kung ano ang magiging buhay mo kung wala ang ipinanumbalik na Simbahan ni Jesucristo? Bilang bahagi ng kanyang sulat sa mga taga Efeso, itinuro ni Pablo na mangyayari ang Pagpapanumbalik ng ebanghelyo ni Jesucristo bago ang Ikalawang Pagparito ng Tagapagligtas. Ang layunin ng lesson na ito ay tulungan kang matukoy ang mga pagpapalang matatamo dahil ipinanumbalik ni Jesucristo ang Kanyang ebanghelyo sa mundo sa mga huling araw.

Paggamit ng mga salita ng mga makabagong propeta upang maunawaan ang doktrina. Sabihin sa mga estudyante na saliksikin ang mga salita ng mga makabagong propeta upang mas maunawaan ang doktrina sa Bagong Tipan at humanap ng mga paraan upang maipamuhay ang doktrina. Ang pag-aaral ng mga turo ng mga makabagong propeta ay makapag-aanyaya sa Espiritu Santo na patotohanan sa mga estudyante ang mga katotohanang ito ng doktrina at tulungan ang mga estudyante na madamang mas nakakaugnay sila sa mga propeta ngayon.

Paghahanda ng estudyante: Sabihin sa mga estudyante na maglista ng mga paraan na nadama nilang nakaimpluwensya ang Pagpapanumbalik ng ebanghelyo ni Jesucristo sa kanilang buhay. Sabihin sa kanila na dalhin ang kanilang mga listahan sa klase.

Mga Posibleng Aktibidad sa Pag-aaral

Pagpapalakas sa mga bagong miyembro

Maaari mong pagpartner-partnerin o hatiin sa maliliit na grupo ang mga estudyante upang talakayin ang sumusunod na sitwasyon.

Ipagpalagay na may kaibigan kang kakasapi lang sa Simbahan.

• Ano kaya ang ilan sa mga naiisip at inaalala mo para sa kanya?

• Ano ang magagawa mo upang matulungan ang kaibigan mo na umunlad sa kanyang kaalaman sa ebanghelyo at manatiling tapat sa kanyang mga tipan?

Kung may sinumang estudyante sa klase na nabinyagan kamakailan o may iba pang karanasan na may kaugnayan sa sitwasyong ito, maaari mong ipabahagi sa kanila kung ano ang ilan sa kanilang mga alalahanin o kung ano ang nakatulong sa kanila.

Pagkatapos ay ibahagi o ibuod ang sumusunod na talata upang matulungan ang mga estudyante na maunawaan ang konteksto ng sulat ni Pablo sa mga taga Efeso.

Sa kanyang sulat sa mga taga Efeso, kinausap ni Apostol Pablo ang mga Banal sa Efeso at sa mga karatig na lugar. Ang mithiin niya ay palakasin ang mga dati nang miyembro ng Simbahan at tulungan ang mga bagong miyembro na umunlad sa kanilang espirituwal na kaalaman at manatiling tapat sa kanilang mga tipan. Kabilang sa ilan sa doktrinang itinuro niya sa sulat na ito ang pag-oorden noon pa man (tingnan sa Efeso 1:4–6); ang kapangyarihang magbuklod ng Espiritu Santo (tingnan sa Efeso 1:13–14); ang kahalagahan ng mga propeta at apostol (tingnan sa Efeso 2:19–22); ang ideya ng isang tunay at nagkakaisang Simbahan (tingnan sa Efeso 4:1–7); at ang iba’t ibang katungkulan, tungkulin, at gawain sa loob ng organisasyon ng Simbahan (tingnan sa Efeso 4:11–14).

Ang isa pang doktrinang itinuro ni Pablo upang palakasin ang mga miyembro sa kanyang panahon ay ang tungkol sa Pagpapanumbalik ng ebanghelyo sa mga huling araw.

• Sa iyong palagay, bakit mapapalakas ng pag-aaral tungkol sa Pagpapanumbalik ng ebanghelyo sa mga huling araw ang mga Banal noong panahon ni Pablo?

Habang pinag-aaralan mo sa buong lesson na ito ang itinuro ni Pablo at ng iba pa tungkol sa Pagpapanumbalik, pag-isipan kung paano mapalalakas ng doktrinang ito ang iyong pananampalataya kay Jesucristo.

Ang dispensasyon ng kaganapan ng mga panahon

Ang dispensasyon ay panahon kung kailan inihahayag ng Panginoon ang Kanyang mga katotohanan, awtoridad ng priesthood, at mga ordenansa sa mga tao sa lupa. Nagkaroon ng maraming dispensasyon ng ebanghelyo sa buong kasaysayan ng mundo.

Sa sulat ni Pablo sa mga taga Efeso, nagpropesiya si Pablo tungkol sa isang partikular na dispensasyon. Basahin ang Efeso 1:10, at alamin ang partikular na dispensasyong ipinropesiya ni Pablo at ang mga kaganapang mangyayari sa panahong ito.

Ang Efeso 1:10 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito.

Maaaring makatulong na maglaan ng oras na tulungan ang mga estudyante na maunawaan ang kahulugan ng ilan sa mahahalagang salita at parirala mula sa Efeso 1:10. Magagawa ito sa pagsasabi sa kanila na basahin ang bahaging “Taludtod sa Taludtod” ng Setyembre 2023 na isyu ng magasing Para sa Lakas ng mga Kabataan. Maaaring maging isa pang kapaki-pakinabang na resource ang aktibidad na “Efeso 1:10: Ang Diyos ay ‘[ti]tipunin ang lahat ng mga bagay kay Cristo’” na matatagpuan sa Oktubre 2–8 outline ng Pumarito Ka, Sumunod Ka sa Akin—Para sa mga Indibiduwal at Pamilya: Bagong Tipan 2023.

Ang isa pang opsiyon ay ipabahagi sa mga estudyante kung aling mga salita o parirala mula sa Efeso 1:10 ang kailangan pa nila ng tulong para maunawaan. Maaaring ilista ang mga ito sa pisara. Pagkatapos ay maaaring anyayahan ang mga estudyante na tingnan kung mahahanap nila ang mga sagot gamit ang resources tulad ng mga footnote o talababa ng banal na kasulatan o ang Gospel Library app.

• Anong panahon sa hinaharap ang tinutukoy ni Pablo sa Efeso 1:10?

• Ano ang ipinropesiya ni Pablo na magaganap sa “[dispensasyon] ng kaganapan ng panahon”?

Pamumuhay sa kaganapan ng mga panahon

Sa mga naunang dispensasyon, naghayag ang Panginoon sa Kanyang mga propeta ng maraming katotohanan, banal na kasulatan, tipan, at kapangyarihan. Ang isang katotohanan na matututuhan natin mula sa Efeso 1:10 ay sa dispensasyon ng kaganapan ng mga panahon, ipanunumbalik ang lahat ng bagay mula sa mga naunang dispensasyon.

Maaari kang magdrowing sa pisara ng isang larawan na katulad ng sumusunod.

Ipagpalagay na ang bawat ilog sa sumusunod na larawan ay kumakatawan sa isang dispensasyon ng ebanghelyo.

• Paano maihahalintulad ang dispensasyon ng kaganapan ng mga panahon sa isang malawak na katubigang may mga ilog na dumadaloy patungo rito?

Pinatotohanan ni Elder B.H. Roberts (1857–1933) ng Pitumpu ang mangyayari bilang bahagi ng dispensasyon ng kaganapan ng mga panahon.

Ito ang dispensasyon ng kaganapan ng mga panahon, at nakita natin, tulad ng mga sapa na dumadaloy patungo sa dagat, na tayo at ang lahat ng tao sa mga naunang dispensasyon ay nauugnay sa isa’t isa; at nakita natin na ang Diyos ay may iisang dakilang layunin mula sa simula, at iyan ay ang kaligtasan ng Kanyang mga anak. At ngayon ay dumating na ang huling araw, ang huling dispensasyon, na ang katotohanan at liwanag at kabutihan ay pupuno sa mundo.

(B. H. Roberts, sa Conference Report, Okt. 1904, 73)

• Anong mga katotohanan, banal na kasulatan, tipan, at kapangyarihan mula sa mga naunang dispensasyon ang ipinanumbalik o dinala sa dispensasyon ng kaganapan ng mga panahon?

Maaari kang magpapunta ng mga estudyante sa pisara at palagyan ang drowing na mga ilog ng mga label ng mga katotohanan, banal na kasulatan, tipan, at kapangyarihan mula sa mga naunang dispensasyon na ipinanumbalik o dinala sa dispensasyon ng kaganapan ng mga panahon. (Maaaring kabilang sa mga label ang kapangyarihang magbuklod, mga nakapagliligtas na ordenansa, ang Aklat ni Mormon, at iba pa; maaaring magdrowing ang mga estudyante ng mga karagdagang ilog kung kinakailangan.)

Ang proklamasyon tungkol sa Pagpapanumbalik

Sa makasaysayang pangkalahatang kumperensya noong Abril 2020 na ipinagdiwang ang ika-200 anibersaryo ng simula ng Pagpapanumbalik ng ebanghelyo ni Jesucristo sa mga huling araw, ipinahayag ni Pangulong Russell M. Nelson ang “Ang Pagpapanumbalik ng Kabuuan ng Ebanghelyo ni Jesucristo: Isang Proklamasyon sa Mundo para sa Ika-200 Taong Anibersaryo” (SimbahanniJesucristo.org). Maglaan ng ilang minuto para basahin ang proklamasyong ito, at mag-isip ng mga paraan kung paano napagpala ang iyong buhay dahil sa ipinanumbalik na ebanghelyo ni Jesucristo.

Maaaring makatulong na maghanda ng mga naka-print na kopya ng proklamasyon tungkol sa Pagpapanumbalik para sa mga estudyanteng hindi ito ma-access sa digital device.

• Anong mga bahagi ng proklamasyon tungkol sa Pagpapanumbalik ang mahalaga para sa iyo?

• Ano ang maaari mong ibahagi sa isang miyembro ng Simbahan na hindi sigurado kung naniniwala siya sa Pagpapanumbalik o hindi nadaramang mahalaga ito sa kanya?

Isipin sandali ang lahat ng paraan na napagpala ni Jesucristo ang iyong buhay sa pamamagitan ng Kanyang ipinanumbalik na ebanghelyo.

Kung ginawa ng mga estudyante ang aktibidad sa paghahanda ng estudyante bago magklase, sabihin sa kanila na tingnan ang listahang ginawa nila at pag-isipan kung ano ang maidaragdag nila rito pagkatapos nilang pag-aralan ang Efeso 1.

• Anong mga partikular na aspeto ng Pagpapanumbalik ang lubos mong pinasasalamatan? Paano nakaimpluwesya ang mga ito sa buhay mo?

• Ano sa palagay mo ang nais ng Panginoon na gawin mo para makibahagi ka sa Kanyang patuloy na Pagpapanumbalik upang makatulong sa pagtitipon ng mga tao sa Kanya?

Komentaryo at Pinagmulang Impormasyon

Bakit napakamakabuluhan ng gawain ng Pagpapanumbalik?

Itinuro ni Propetang Joseph Smith (1805–1844):

Narito ito [sa mga huling araw]; upang ating makita ito, maging bahagi nito, at tulungang maisulong ang kaluwalhatian sa mga Huling araw, ang ‘dispensasyon ng kaganapan ng mga panahon, kung kailan titipunin ng Diyos ang lahat ng bagay na nasa langit, at lahat ng bagay na nasa lupa, at pag-iisahin’ [tingnan sa Efeso 1:10]. … [Ito ay] gawaing kinaluguran ng Diyos at ng mga anghel [sa] nakalipas na henerasyon; na nagbigay-inspirasyon sa mga kaluluwa ng sinaunang mga patriarch at propeta; gawaing nakatakdang isakatuparan ang pagwasak sa kapangyarihan ng kadiliman, ang pagpapanibagong muli ng mundo, ang kaluwalhatian ng Diyos, at ang kaligtasan ng sangkatauhan.”

(Joseph Smith, Mga Turo ng mga Pangulo ng Simbahan: Joseph Smith [2007], 601)

Ano ang dispensasyon?

Ipinaliwanag ni Elder David A. Bednar ng Korum ng Labindalawang Apostol ang mga dispensasyon ng ebanghelyo at kung bakit ang huling dispensasyong ito ay natatangi.

Ano ba talaga ang Pagpapanumbalik?

Isang paliwanag tungkol sa pagpapanumbalik ng ebanghelyo.

Paano makakaapekto sa buhay ko ang pagkakaroon ng patotoo tungkol sa Pagpapanumbalik?

Bahagi 2: Ibinahagi ng mga kabataan ang kanilang patotoo tungkol sa Pagpapanumbalik at kung paano ito nakaimpluwensya sa kanilang buhay. Batay sa mensaheng ibinigay ni Elder Craig C. Christensen noong Oktubre 2016.

Ibinahagi ng mga kabataang lalaki at babae kung paano lubos na nakaimpluwensya sa kanilang buhay sa araw-araw ang mga kaganapang nangyari sa Pagpapanumbalik.

Sa pangkalahatang kumperensya noong Oktubre 2019, ibinahagi ni Pangulong Russell M. Nelson ang mga tanong sa interbyu para sa temple recommend, na kinabibilangan ng tanong na “May patotoo ka ba sa Panunumbalik ng ebanghelyo ni Jesucristo?” (tingnan sa “Pangwakas na Mensahe,” Liahona, Nob. 2019, 121).

Isipin kung bakit isasama ang tanong na ito sa mga kinakailangan upang makapasok sa bahay ng Panginoon. Paano nakakaimpluwensya sa iyong ugnayan sa Ama sa Langit at kay Jesucristo ang pag-unawa, paniniwala, at pakikibahagi mo sa patuloy na Pagpapanumbalik?

Ano ang ibig sabihin ng patuloy pa ring nangyayari ang Pagpapanumbalik?

Nagsalita si Pangulong Dieter F. Uchtdorf, na noon ay kabilang sa Unang Panguluhan, tungkol sa patuloy na Pagpapanumbalik.

Kung minsan iniisip natin na ang Panunumbalik ng ebanghelyo ay isang bagay na kumpleto, na tapos na—isinalin ni Joseph Smith ang Aklat ni Mormon, tinanggap niya ang mga susi ng priesthood, inorganisa ang Simbahan. Ang totoo, ang Panunumbalik ay tuluy-tuloy na proseso; nabubuhay tayo rito ngayon mismo. Kasama rito ang “lahat ng [inihayag] ng Diyos, [at] lahat ng Kanyang [inihahayag] ngayon,” at ang “maraming dakila at mahahalagang bagay” na “ihahayag pa Niya” (Mga Saligan ng Pananampalataya 1:9). Mga kapatid, ang kapana-panabik na mga nangyayari ngayon ay bahagi ng matagal nang ipinropesiyang panahon ng paghahanda na magwawakas sa maluwalhating Ikalawang Pagparito ng ating Tagapagligtas na si Jesucristo.

(Dieter F. Uchtdorf, “Kabahagi Ba Kayo sa Gawain ng Panunumbalik?” Liahona, Mayo 2014, 59)

Karagdagang Aktibidad sa Pag-aaral

Ano ang ibig sabihin ng Pagpapanumbalik para sa iyo?

Bilang alternatibong paraan upang simulan ang lesson, maaari mong sabihin sa mga estudyante na magbahagi ng isang bagay na inaasam nila sa hinaharap at ipaliwanag kung bakit. Maaari ding ipabahagi sa mga estudyante kung ano sa palagay nila ang inaasam ng iba tungkol sa hinaharap.

Ang sumusunod na pahayag ni Elder Ronald A. Rasband ng Korum ng Labindalawang Apostol ay maaaring ibahagi pagkatapos magbahagi ng mga estudyante:

Sa banal na plano, ang mga sinaunang propeta ng Diyos, nang mainspirasyunan ng Espiritu Santo, ay nagpropesiya tungkol sa Pagpapanumbalik at sa mga mangyayari sa ating panahon, ang huling dispensasyon at ang kaganapan ng mga panahon. Ang mismong gawaing ito ay “nagbigay-inspirasyon sa mga kaluluwa” ng mga sinaunang tagakita [Mga Turo ng mga Pangulo ng Simbahan: Joseph Smith (2007), 601]. Sa lahat ng mga henerasyon ng panahon, sila ay nagbadya, nanaginip, nakinita [ang], at nagpropesiya tungkol sa hinaharap ng kaharian ng Diyos sa mundo, sa tinawag ni Isaias na “isang kagilagilalas na gawa at kamanghamangha” [ Isaias 29:14 ].

(Ronald A. Rasband, “Katuparan ng Propesiya,” Liahona, Mayo 2020, 75)

Pagkatapos ibahagi ang pahayag na ito, ipabahagi sa mga estudyante kung bakit sa palagay nila ay lubos na inasam ng mga propeta noon ang ating panahon. Maaari ding ipabahagi sa mga estudyante ang kanilang mga saloobin tungkol sa pamumuhay sa panahong narito na sa lupa ang ipinanumbalik na Simbahan ni Jesucristo.

Sabihin sa mga estudyante na maghanap ng mga katotohanan habang pinag-aaralan nila ang Efeso 1 na makatutulong sa kanila na makadama ng higit na pasasalamat sa Diyos para sa Pagpapanumbalik ng Kanyang Simbahan sa mga huling araw.