Hepelū 7–13

Vakai Fakalūkufuá

ʻI he konga hono ua ʻo e tohi ʻa Paula ki he kakai Hepeluú, naʻá ne fakamamafaʻi ai e mahuʻinga ʻo e tui kia Sīsū Kalaisí. Naʻá ne lea ʻaki ha ngaahi sīpinga fakafolofola lahi ʻo ha niʻihi fakafoʻituitui naʻa nau ngāue ʻi he tui kia Kalaisí pea naʻe tāpuekina kinautolu. Naʻá ne akoʻi foki fekauʻaki mo e ʻulungaanga ʻo e ʻOtuá, ʻo ʻuhinga ki he totongi ʻe he ʻOtuá “kiate kinautolu ʻoku kumi lahi kiate iá” (Hepelū 11:6) pea mo e “Tamai ʻo e ngaahi laumālié” (Hepelū 12:9). Naʻá ne poupouʻi kitautolu ke “ʻoua naʻá ke taʻe tokangaʻi ʻa e tautea mei he ʻEikí, … he ko ia ʻoku ʻofa ki ai ʻa e ʻEikí ʻokú ne tautea” (Hepelū 12:5–6).

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ʻi he lēsoni takitaha:

Hepelū 11, Konga 1

Taumuʻa ʻo e lēsoní: ʻE tokoni ʻa e lēsoni ko ʻení ke mahino ki he kau akó ʻa e tui kia Sīsū Kalaisí pea mo e ʻuhinga ʻoku mahuʻinga ai ʻi heʻenau moʻui fakatāutahá.

• Teuteu ʻa e tokotaha akó: Fakaafeʻi e kau akó ke nau fakakakato ʻa e sētesí “Ko e tuí ko e __________” pea mateuteu ke vahevahe ʻenau ngaahi talí ʻi he kalasí. 

• Meʻa ke fakaʻaliʻalí: Teuteu ke fakaʻaliʻali ʻa e ngaahi maʻuʻanga tokoni mo e ngaahi fehuʻi ki he ʻekitivitī ako ʻa e tokotaha akó ʻi he fakaʻosinga ʻo e lēsoní.

• Fokotuʻu ki hono akoʻí ʻi he konifelenisi vitioó: Fakaʻaongaʻi ʻa e palakipoé ʻi hoʻo polokalama konifelenisi vitioó ke lava ʻa e kau akó ʻo hiki ʻenau fakaʻuhingaʻi ʻo e tuí ke sio ki ai e kalasí pe hiki ʻe he kalasí ha fakaʻuhinga pē ʻe taha. ʻE lava ke poupouʻi ʻa e kau akó ʻi he kotoa ʻo e lēsoní ke liliu ʻenau ngaahi fakaʻuhingá pe ko e fakaʻuhinga ʻoku nau tohi fakatahá.

Hepelū 11, Konga 2

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke fakatupulaki ʻenau holi ke moʻui ʻaki e tui kia Sīsū Kalaisí mo ʻiloʻi e ngaahi tāpuaki ʻoku foaki ange ʻe he ʻOtuá koeʻuhí ko ʻenau tuí.

• Teuteu ʻa e tokotaha akó: Fakaafeʻi e kau akó ke nau fakakaukau ki he founga kuo tāpuekina ai kinautolu pe ko ha taha ʻoku nau ʻiloʻi ʻe he ʻOtuá koeʻuhí ko ʻenau ngāue ʻi he tuí. Poupouʻi kinautolu ke teuteu ke vahevahe ʻenau ngaahi aʻusiá mo e kalasí.

• Ngaahi ʻAtá: Teuteu ke fakaʻaliʻali ha ngaahi fakatātā ʻo ha niʻihi fakafoʻituitui ʻi he folofolá pe mei he hisitōlia ʻo e Siasí naʻa nau fakahaaʻi ʻa e tui kia Sīsū Kalaisí.

•  

• Fokotuʻu ki hono akoʻí ʻi he konifelenisi vitioó: Fakakaukau ke vahe ki he kau akó ke nau ako ha ngaahi veesi kehekehe mei he Hepelū 11 fekauʻaki mo e ngaahi sīpinga ʻo e tuí. ʻE lava leva ke tuku ʻa e kau akó ki ha ngaahi loki fealēleaʻaki mo e kau ako kehe naʻa nau ako ha ngaahi veesi kehé, pea te nau lava kotoa ʻo vahevahe ʻa e meʻa naʻa nau ako mei he ngaahi veesi naʻa nau akó.

Hepelū 12

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako ʻe he kau akó ʻa e founga ʻe lava ke tokoniʻi ai kinautolu ʻe he fakavaivai ʻi he loto fakatōkilalo ki he fakatonutonu mei he Tamai Hēvaní ke nau maʻu ʻa e melinó pea hoko ʻo hangē ange ko Iá.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi taimi ne nau houngaʻia ai ʻi hano fakatonutonu kinautolu, ʻo tatau ai pē pe ko e ʻOtuá pe ko ha taha kehe.

• Ngaahi ʻAtá: Teuteu ke fakaʻaliʻali ha ngaahi ʻīmisi ʻo ha tokotaha lele ʻoku ngali helaʻia mo ha malaʻe lova.

•  

• Fokotuʻu ki hono akoʻí ʻi he konifelenisi vitioó: Ke kamata e kalasí, fakakaukau ke faʻu ha savea ʻi he ʻinitanetí pea fakaafeʻi e kau akó ke nau vahevahe ha ngaahi founga ʻoku hangē ʻenau moʻuí he taimí ni ko ha lova mamaʻó.

Hepelū 12:9

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ʻiloʻi lelei ange ʻa e Tamai Hēvaní pea mahino kiate kinautolu ʻa e founga ʻe lava ke tokoniʻi lelei ai ʻenau moʻuí ʻe heʻenau ʻilo Iá mo honau vā fetuʻutaki mo Iá.

• Teuteu ʻa e tokotaha akó: Fakaafeʻi e kau akó ke nau lau ʻa e fakalea ʻo e “Fānau Au ʻa e ʻOtuá” (Ngaahi Himi, fika 193) pea fakakaukau ki he founga ʻoku tākiekina ai ʻenau moʻuí ʻe he ʻilo ko ʻeni ki honau tuʻungá.

• Vitiō: “Ko ha Tuʻunga Fakaʻeiʻeiki” (7:13; mamata mei he taimi 1:22 ki he 3:25)

• Fokotuʻu ki hono akoʻí ʻi he konifelenisi vitioó: Fakakaukau ke vahevahe ha faʻahinga ongo fakatāutaha mo ha ngaahi fakakaukau ʻokú ke maʻu fekauʻaki mo e talanoa fakatātā naʻe vahevahe ʻe Sisitā Keleitoni ʻa ia ʻoku fakakau ʻi he kamataʻanga ʻo e lēsoni ko ʻení. Fakamoʻoni ki he founga ʻe lava ke liliu ai ʻe heʻetau ʻiloʻi ʻa e ʻOtuá mo hotau vā fetuʻutaki fakalangi mo Iáʻa hotau ʻulungāngá mo e tōʻongá.

Fakataukei Fakatokāteliné: Hepelū 12:9

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e folofola fakataukei fakatokāteliné mo e kupuʻi lea fakafolofola mahuʻinga ʻi he Hepelū 12:9 , fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi tūkunga ʻoku fehangahangai mo e toʻu tupú ʻi he taimi ʻe tokoni ai ke mahino kiate kinautolu pe manatuʻi ko e fānau kinautolu ʻa e Tamai Hēvaní.

• Fokotuʻu ki hono akoʻí ʻi he konifelenisi vitioó: Fakakaukau ke tuku ʻa e kau akó ki he fanga kiʻi loki fealēleaʻakí ʻa ia te nau lava ai ʻo ngāue tautau toko ua pe fakakulupu iiki ke nau aleaʻi fakataha ha ngaahi founga ʻe lava ke nau fakafonu ai ʻa e ngaahi feituʻu ʻatā ʻi he ʻekitivitī akoako fakahoko ʻo e fokotuʻutuʻú. Tuku ke vahevahe ʻe he kau akó mo e kalasí ʻa e ngaahi tūkunga ne nau omi mo iá.