សេចក្ដីណែនាំស្ដីពីព្រះគម្ពីរសញ្ញាថ្មី

ព្រះគម្ពីរសញ្ញាថ្មីជួយយើងឲ្យមករកព្រះគ្រីស្ទ

ព្រះគម្ពីរសញ្ញាថ្មីគឺជាកំណត់ត្រានៃជីវិតរមែងស្លាប់ និងការងារបម្រើរបស់ព្រះយេស៊ូវគ្រីស្ទ និងពួកសាវករបស់ទ្រង់ ។ មេរៀននេះនឹងជួយរៀបចំអ្នកឲ្យមករកព្រះយេស៊ូវគ្រីស្ទ ហើយធ្វើតាមទ្រង់នៅពេលអ្នកសិក្សាព្រះគម្ពីរសញ្ញាថ្មី ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីមូលហេតុដែលការសិក្សាព្រះគម្ពីរសញ្ញាថ្មីនៅឆ្នាំនេះមានសារៈសំខាន់ ។ វាអាចមានគុណប្រយោជន៏ក្នុងការអញ្ជើញពួកគេ ឲ្យសួរសមាជិកគ្រួសាររបស់ពួកគេពីរបីនាក់ពីមូលហេតុដែលពួកគាត់គិតថា វាមានសារៈសំខាន់ ។

សកម្មភាពការរៀនសូត្រដែលអាចមាន

សូមអញ្ជើញសិស្សឲ្យគិតអំពីចម្លើយរបស់ពួកគេចំពោះសំណួរទាំងបីខាងក្រោម ។ បន្ទាប់មក សូមពិភាក្សាសំណួរដែលមានជាចំណុចទាំងអស់គ្នាជាថ្នាក់ ។

សូមគិតអំពីចម្លើយរបស់អ្នកចំពោះសំណួរខាងក្រោមនេះ ៖

1. តើអ្នកធ្វើអ្វីខ្លះ នៅពេលអ្នកមានអារម្មណ៍នឿយហត់ខាងផ្លូវកាយ ឬផ្លូវចិត្តនោះ ?

2. តើអ្នកធ្វើអ្វីខ្លះ នៅពេលអ្នកមានអារម្មណ៍ថាខ្លាច ?

3. តើអ្នកទៅរកនរណា នៅពេលអ្នកត្រូវការជំនួយ ?

• តើសកម្មភាព ឬមនុស្សដែលអ្នកគិតដល់នោះ ជួយអ្នកក្នុងស្ថានភាពលំបាកទាំងឡាយយ៉ាងដូចម្តេច ?

• តើអ្នកធ្លាប់មានតម្រូវការមួយដែលគ្មានសកម្មភាពណាមួយ ឬមនុស្សណាម្នាក់អាចជួយអ្នកដោះស្រាយបានដែរឬទេ?

ប្រធាន ជីន ប៊ី ប៊ីងហាំ អតីតប្រធានសមាគមសង្គ្រោះទូទៅ បានបង្រៀនពីរបៀបដែលយើងអាចបំពេញសេចក្តីត្រូវការដ៏សំខាន់បំផុតរបស់យើងបាន ។

អំណរជានិរន្តរអាចរកឃើញដោយផ្ដោតលើព្រះយេស៊ូវគ្រីស្ទ ហើយរស់នៅតាមដំណឹងល្អដូចទ្រង់បានបង្ហាញ ហើយបង្រៀន ។ កាលណាយើង រៀន មានជំនឿ ហើយ ធ្វើតាម ព្រះយេស៊ូវគ្រីស្ទកាន់តែច្រើន នោះយើងបានយល់ដឹងថា ទ្រង់គឺជាប្រភពនៃរាល់ការព្យាបាល ក្ដីសុខ និងដំណើរការដ៏អស់កល្ប ។

( ជីន ប៊ី ប៊ីងហាំ « That Your Joy Might Be Ful » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៨៥ )

• យោងទៅតាមសេចក្តីថ្លែងការណ៍នេះ តើយើងអាចទទួលបានពរជ័យអ្វីខ្លះដោយសារតែព្រះយេស៊ូវគ្រីស្ទ ?

• តើពរជ័យមួយណាដែលសំខាន់បំផុតសម្រាប់អ្នកនាពេលបច្ចុប្បន្ននេះ ? ហេតុអ្វី ?

ការសិក្សាអំពីព្រះជន្មរបស់ព្រះយេស៊ូវគ្រីស្ទនៅក្នុងព្រះគម្ពីរសញ្ញាថ្មី

នៅឆ្នាំនេះ យើងត្រូវបានអញ្ជើញឲ្យសិក្សាព្រះគម្ពីរសញ្ញាថ្មីនៅឯផ្ទះ ព្រះវិហារ និងថ្នាក់សិក្ខាសាលា ។ នៅពេលយើងខិតខំសិក្សាព្រះគម្ពីរសញ្ញាថ្មី ហើយរៀនដោយព្រះវិញ្ញាណបរិសុទ្ធ នោះការយល់ដឹង និងទីបន្ទាល់របស់យើងថាតើព្រះយេស៊ូវគ្រីស្ទជានរណា និងអ្វីដែលទ្រង់បានប្រទានដល់យើងនឹងកើនឡើង ។ យើងនឹងរៀនពីអ្វីដែលយើងអាចធ្វើបានដើម្បីទទួលបានអំណរ ការព្យាបាល និងសេចក្ដី សុខសាន្តដែលទ្រង់នឹងប្រទាន ។

មុនពេលសួរសំណួរខាងក្រោម សូមពិចារណាអញ្ជើញសិស្សឲ្យបើកព្រះគម្ពីរសញ្ញាថ្មី ហើយរកមើលទំព័រ ឬជំពូករបស់វា ។ សូមសួរពួកគេពីអ្វីដែលពួកគេកត់ចំណាំ និងអ្វីដែលពួកគេដឹងអំពីរបៀបដែលវាត្រូវបានរៀបចំ ។

• តើអ្នកដឹងអ្វីខ្លះអំពីព្រះគម្ពីរសញ្ញាថ្មី ?

• តើរឿងមួយចំនួនដែលអ្នកចូលចិត្តពីព្រះគម្ពីរសញ្ញាថ្មីមានអ្វីខ្លះ? ហេតុអ្វី ?

• ហេតុអ្វីអ្នកគិតថា វាមានប្រយោជន៍ដើម្បីសិក្សាព្រះគម្ពីរសញ្ញាថ្មីនៅឆ្នាំនេះ ?

គម្ពីរបួនដំបូងនៃព្រះគម្ពីរសញ្ញាថ្មីមានដំណើររឿងបួនអំពីព្រះជន្មរបស់ព្រះអង្គសង្គ្រោះ ។ គម្ពីរទាំងនេះត្រូវបានគេស្គាល់ថាជាដំណឹងល្អ ។ គម្ពីរទាំងប៉ុន្មានទៀតក្នុងព្រះគម្ពីរសញ្ញាថ្មីមានការងារបម្រើ និងការបង្រៀនរបស់សាវកមួយចំនួនរបស់ព្រះអង្គសង្គ្រោះ និងថ្នាក់ដឹកនាំផ្សេងទៀតនៃសាសនាចក្រកាលពីបុរាណ ។

សម្រាប់ព័ត៌មានបន្ថែម សូមមើល « តើព្រះគម្ពីរសញ្ញាថ្មីត្រូវបានរៀបចំយ៉ាងដូចម្តេច ? » នៅក្នុងផ្នែក « វិចារណកថា និង ព័ត៌មានសាច់រឿង »នៅចុងបញ្ចប់នៃមេរៀននេះ ។

នៅក្នុងព្រះគម្ពីរសញ្ញាថ្មី ព្រះអង្គសង្គ្រោះប្រទានការអញ្ជើញមួយដែលយើងអាចទទួលយក ដើម្បីទទួលបានជំនួយដែលទ្រង់មានព្រះរាជបំណងចង់ប្រទានដល់យើង ។

សូមអាន ម៉ាថាយ ១១:២៨ ដោយរកមើលការអញ្ជើញរបស់ព្រះអង្គសង្គ្រោះ ។

• តើអ្នកគិតថាការ « មកឯ [ ព្រះគ្រីស្ទ ] » មានន័យដូចម្ដេច ?

• តើអ្នកគិតថា ការសម្រាកបែបណាដែលព្រះអង្គសង្គ្រោះអាចប្រទានដល់យើង នៅពេលយើងមករកទ្រង់ ?

• តើអ្នកបានទទួលពរជ័យអ្វីខ្លះនៅក្នុងជីវិតរបស់អ្នក នៅពេលអ្នកបានមករកព្រះយេស៊ូវគ្រីស្ទ ?

ការពង្រឹងភាពជាសិស្សរបស់អ្នក នៅពេលអ្នកសិក្សាព្រះគម្ពីរសញ្ញាថ្មី

បទពិសោធន៍របស់អ្នកក្នុងការសិក្សាព្រះគម្ពីរសញ្ញាថ្មីនៅឆ្នាំនេះ នឹងផ្តល់ឲ្យអ្នកនូវឱកាសជាច្រើនដើម្បីមករកព្រះយេស៊ូវគ្រីស្ទ ហើយធ្វើជាសិស្ស ឬអ្នកដើរតាមរបស់ទ្រង់ ។

នៅក្នុងការសិក្សារបស់អ្នក សូមយកចិត្តទុកដាក់មិនត្រឹមតែចំពោះអ្វីដែលអ្នកបានអាន និង ឮអំពីព្រះយេស៊ូវគ្រីស្ទប៉ុណ្ណោះទេ ប៉ុន្តែថែមទាំងចំពោះអ្វីដែលព្រះវិញ្ញាណកំពុងបង្រៀនអ្នកអំពីទ្រង់ផងដែរ ។ សូមពិចារណាទុកពីរបីទំព័រនៅក្នុងសៀវភៅកំណត់ហេតុការសិក្សារបស់អ្នក ដើម្បីកត់ត្រាអ្វីដែលអ្នកកំពុងរៀន និងអារម្មណ៍របស់អ្នកអំពីទ្រង់ និងអ្វីដែលអ្នកកំពុងធ្វើដើម្បីដើរតាមទ្រង់ ។ នៅក្នុងឆ្នាំនេះ សូមបន្ថែមការធ្វើបច្ចុប្បន្នភាពលើទំព័រទាំងនេះ និងពិនិត្យមើលការរីកចម្រើនរបស់អ្នក ។

សូមអញ្ជើញសិស្សឲ្យគិតអំពីបទពិសោធន៍ ដែលពួកគេនឹងមានក្នុងការសិក្សាព្រះគម្ពីរសញ្ញាថ្មីនៅឆ្នាំនេះ ដោយឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។

• តើអ្វីខ្លះដែលអ្នកសង្ឃឹមថានឹងរៀន ឬដកបទពិសោធន៍ នៅពេលអ្នកសិក្សាពីព្រះជន្ម និងការបង្រៀនរបស់ព្រះយេស៊ូវគ្រីស្ទនៅឆ្នាំនេះ ?

• តើមានវិធីជាក់លាក់អ្វីខ្លះ ដែលអ្នកសង្ឃឹមថានឹងធ្វើឲ្យប្រសើរឡើងក្នុងនាមជាអ្នកដើរតាមព្រះយេស៊ូវគ្រីស្ទ ?

សូមពិចារណាថ្លែងទីបន្ទាល់អំពីព្រះអង្គសង្គ្រោះ ។ ការអញ្ជើញសិស្សពីរបីនាក់ឲ្យចែកចាយទីបន្ទាល់របស់ពួកគេអំពីព្រះអង្គសង្គ្រោះ ក៏មានអត្ថប្រយោជន៍ផងដែរ ។ សូមលើកទឹកចិត្តសិស្សឲ្យពិចារណាពីវិធីដែលពួកគេនឹងពង្រឹងការប្តេជ្ញាចិត្តរបស់ពួកគេដើម្បីមករកទ្រង់ ហើយក្លាយជាសិស្សរបស់ទ្រង់ នៅពេលពួកគេចាប់ផ្តើមសិក្សាព្រះគម្ពីរសញ្ញាថ្មី ។

វិចារណកថា និង ព័ត៌មានសាច់រឿង

តើព្រះគម្ពីរសញ្ញាថ្មីត្រូវបានរៀបចំយ៉ាងដូចម្តេច ?

គម្ពីរ ៤ ដំបូងនៃព្រះគម្ពីរសញ្ញាថ្មី ( ម៉ាថាយ ម៉ាកុស លូកា និង យ៉ូហាន ) ត្រូវបានគេស្គាល់ថាជាដំណឹងល្អ ។ ដំណឹងល្អគឺជាទីបន្ទាល់បួនអំពីព្រះជន្មរមែងស្លាប់ និងការងារបម្រើរបស់ព្រះយេស៊ូវ ។ នៅក្នុងភាសាក្រិកពាក្យ ដំណឹងល្អ មានន័យថា « សេចក្ដីល្អ » ។ សម្រាប់ព័ត៌មានបន្ថែមអំពីដំណឹងល្អទាំងបួន សូមមើលសេចក្តីណែនាំដល់បទគម្ពីរទាំងឡាយ « ដំណឹងល្អ » នៅលើគេហទំព័រ scriptures.ChurchofJesusChrist.org ។

ព្រះគម្ពីរសញ្ញាថ្មីដែលនៅសល់ ( គម្ពីរកិច្ចការដល់គម្ពីរវិវរណៈ ) មានសំណេរ និងការងារបម្រើនានារបស់អ្នកដឹកនាំសំខាន់ៗនៅក្នុងសាសនាចក្ររបស់ព្រះអង្គសង្រ្គោះ ។ គម្ពីរកិច្ចការកត់ត្រាសកម្មភាពផ្សព្វផ្សាយសាសនា និងអព្ភូតហេតុរបស់ពួកសាវក ។ ចាប់ពីគម្ពីររ៉ូមរហូតដល់គម្ពីរយូដាសគឺជាសំបុត្រ ឬលិខិតដែលប៉ុល និងពួកអ្នកដឹកនាំផ្សេងទៀតរបស់សាសនាចក្របានសរសេរដើម្បីណែនាំ ហើយស្អាងពួកបរិសុទ្ធ ។ គម្ពីរវិវរណៈមានវិវរណៈមួយដែលយ៉ូហានបានទទួលអំពីថ្ងៃចុងក្រោយ ។

តើសេចក្តីជំនឿរបស់ខ្ញុំលើព្រះយេស៊ូវគ្រីស្ទអាចត្រូវបានពង្រឹងតាមរបៀបណា នៅពេលខ្ញុំសិក្សាព្រះគម្ពីរសញ្ញាថ្មី ?

ប្រធាន ជីន ប៊ី ប៊ីងហាំ អតីតប្រធានសមាគមសង្គ្រោះទូទៅ បានចែករំលែកវិធីខ្លះៗដែលសេចក្ដីជំនឿរបស់យើងអាចត្រូវបានពង្រឹង នៅពេលយើងសិក្សាពីព្រះជន្ម និងការបង្រៀនរបស់ព្រះអង្គសង្គ្រោះ ។

ពេលបងប្អូនសិក្សាអំពីព្រះជន្ម និងការបង្រៀនរបស់ព្រះគ្រីស្ទតាមរបៀបជាច្រើន សេចក្ដីជំនឿរបស់បងប្អូនលើទ្រង់នឹងកើនឡើង ។ បងប្អូននឹងដឹងថា ទ្រង់ស្រឡាញ់បងប្អូន ហើយយល់ចិត្តបងប្អូនយ៉ាងល្អឥតខ្ចោះ ។ ក្នុងរយៈពេល ៣៣ ឆ្នាំនៃព្រះជន្មរមែងស្លាប់របស់ទ្រង់ ទ្រង់បានរងការបដិសេធ ការបៀតបៀន ការស្រេកឃ្លាន និងការនឿយហត់ ភាពឯកោ ការរំលោភបំពានខាងពាក្យសម្ដី និងខាងរូបកាយ ហើយទីបំផុត បានសុគតក្រោមដៃមនុស្សមានបាប ។ ក្នុងសួនច្បារគែតសេម៉ានី និងលើឈើឆ្កាងត្រង់កាលវ៉ារី ទ្រង់ជ្រាបនូវរាល់ការឈឺចាប់ ការរងទុក្ខ ការល្បួង ការឈឺ និងជំងឺ របស់យើង ។

មិនថាយើងបានរងទុក្ខអ្វីនោះទេ ទ្រង់គឺជាប្រភពនៃ ការព្យាបាល ។ អស់អ្នកដែលធ្លាប់ជួបការការរំលោភបំពាន ការបាត់បង់ដ៏ធំ ជំងឺរ៉ាំរៃ ឬពិការភាព ការចោទប្រកាន់មិនពិត ការបៀតបៀនដ៏សាហាវ ឬការបំផ្លិចបំផ្លាញខាងវិញ្ញាណដោយសារអំពើបាប ឬការយល់ខុសអាចបានជាសះស្បើយដោយសារព្រះដ៏ប្រោសលោះនៃពិភពលោក ។ ប៉ុន្តែ ទ្រង់នឹងពុំយាងចូលដោយគ្មានការអញ្ជើញឡើយ ។ យើងត្រូវមករកទ្រង់ ហើយឲ្យទ្រង់ធ្វើនូវអព្ភូតហេតុរបស់ទ្រង់ ។

( ជីន ប៊ី ប៊ីងហាំ « That Your Joy Might Be Full » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៨៦ )

អែលឌើរ អិល ថម ភែរី ( ឆ្នាំ ១៩២២–២០១៥ ) នៃកូរ៉ុមនៃពួកសាវកដប់ពីរនាក់បានថ្លែងទីបន្ទាល់ពីសារៈសំខាន់នៃការសិក្សាព្រះគម្ពីរសញ្ញាថ្មី ។

ពិភពលោកសព្វថ្ងៃនេះពេញទៅដោយគោលលទ្ធិរបស់មនុស្សដែលវាងាយនឹងភ្លេច ហើយបាត់បង់សេចក្ដីជំនឿលើដំណើររឿងសំខាន់ៗទាំងអស់អំពីព្រះជន្ម និងការងារបម្រើរបស់ព្រះអង្គសង្រ្គោះ—ព្រះគម្ពីរសញ្ញាថ្មី ។ ដំណើររឿងដ៏ពិសិដ្ឋនេះគឺជាផ្នែកសំខាន់បំផុតនៃប្រវត្តិសាស្ត្ររបស់ព្រះគម្ពីរ ប្រៀបដូចជាព្រះអង្គសង្រ្គោះផ្ទាល់គួរតែជាចំណុចសំខាន់នៃជីវិតរបស់យើងដែរ ។ យើងត្រូវប្តេជ្ញាចិត្តខ្លួនឯង ដើម្បីសិក្សា ហើយទុកវាជារតនសម្បត្តិ !

( អិល ថម ភែរី « The Sabbath and the Sacrament » Ensign ឬ Liahona ខែ ឧសភា ឆ្នាំ ២០១១ ទំព័រ ៦ )

សកម្មភាពរៀនសូត្របន្ថែម

តើព្រះយេស៊ូវគ្រីស្ទជានរណាចំពោះអ្នក ?

សូមបង្ហាញរូបភាពរបស់ព្រះយេស៊ូវគ្រីស្ទ ដូចជារូបភាពមួយដែលមាននៅដើមមេរៀន ។ សូមអញ្ជើញសិស្សឲ្យកត់ត្រាចម្លើយរបស់ពួកគេចំពោះសំណួរដូចតទៅនេះ ចូលក្នុងសៀវភៅកំណត់ហេតុសិក្សារបស់ពួកគេ ។ បន្ទាប់មក សូមអញ្ជើញអ្នកស្ម័គ្រចិត្តពីរបីនាក់ឲ្យចែកចាយចម្លើយរបស់ពួកគេជាមួយសិស្សក្នុងថ្នាក់ ។

• តើព្រះយេស៊ូវគ្រីស្ទជានរណាចំពោះអ្នក ?

សូមលើកទឹកចិត្តសិស្សឲ្យកត់សម្គាល់ថា តើចម្លើយរបស់ពួកគេចំពោះសំណួរនេះវិវឌ្ឍយ៉ាងណា នៅពេលពួកគេសិក្សាពីព្រះជន្មរបស់ព្រះគ្រីស្ទនៅក្នុងព្រះគម្ពីរសញ្ញាថ្មីនៅឆ្នាំនេះ ។

ការសិក្សាព្រះគម្ពីរសញ្ញាថ្មីអាចពង្រឹងទីបន្ទាល់របស់យើងថា ព្រះយេស៊ូវគឺជាព្រះគ្រីស្ទ

សូមអញ្ជើញសិស្សឲ្យសិក្សា យ៉ូហាន ២០:៣០–៣១ ដោយរកមូលហេតុមួយ ដែលយ៉ូហានបានសរសេរពីដំណើរជីវិតរបស់ព្រះអង្គសង្រ្គោះ ។ សូមពន្យល់ថា ពាក្យរបស់យ៉ូហាននៅក្នុងខគម្ពីរទាំងនេះក៏អាចអនុវត្តបាននៅព្រះគម្ពីរសញ្ញាថ្មីដែរ ។

វាអាចផ្តល់ជាអត្ថប្រយោជន៍ដើម្បីពិនិត្យមើលឡើងវិញនូវដំណើររឿងនៅក្នុងព្រះគម្ពីរសញ្ញាថ្មី ដែលពង្រឹងជំនឿរបស់យើងថា ព្រះយេស៊ូវគឺជាព្រះគ្រីស្ទ និងព្រះរាជបុត្រានៃព្រះ ។ សិស្សអាចស្វែងរកដំណើររឿងដោយខ្លួនពួកគេ ឬអ្នកអាចផ្តល់ជម្រើសខ្លះដល់ពួកគេក្នុងការជ្រើសរើស រួមមានបទគម្ពីរមួយចំនួនដូចខាងក្រោម ៖

ម៉ាថាយ ៨:២៣–២៧ ; ម៉ាថាយ ១៤:១៥–២១ ; លូកា ២២:៣៩–៤៤ ; យ៉ូហាន ១១:៣២–៤៥ ; កិច្ចការ ៣:១–៨

នៅពេលសិស្សសិក្សា សូមអញ្ជើញពួកគេឲ្យពិចារណាអំពីអ្វីដែលពួកគេបានរៀន ដែលអាចពង្រឹងទីបន្ទាល់របស់នរណាម្នាក់ថា ព្រះយេស៊ូវគឺជាព្រះគ្រីស្ទ ។

ព្រះនាម និងព្រះបរមងាររបស់ព្រះយេស៊ូវគ្រីស្ទ

នៅពេលសិស្សសិក្សា សូមអញ្ជើញពួកគេឲ្យពិចារណាអំពីអ្វីដែលពួកគេបានរៀន ដែលអាចពង្រឹងទីបន្ទាល់របស់នរណាម្នាក់ថា ព្រះយេស៊ូវគឺជាព្រះគ្រីស្ទ ។ សូមអញ្ជើញសិស្សឲ្យសិក្សាខគម្ពីរមួយចំនួនខាងក្រោម ដោយរកមើលព្រះនាម ឬព្រះបរមងារដែលត្រូវបានប្រើ ដើម្បីពិពណ៌នាអំពីព្រះយេស៊ូវគ្រីស្ទ ។ សូមអញ្ជើញសិស្សឲ្យពិចារណាអំពីអ្វីដែលព្រះនាម និងព្រះបរមងារទាំងនោះបង្រៀនពួកគេអំពីទ្រង់ ។

ម៉ាថាយ ១៤:៣៣ ; លូកា ២:១១ ; យ៉ូហាន ១:២៩ ; យ៉ូហាន ៣:២ ; យ៉ូហាន ៤:២៥–២៦