សេចក្តីណែនាំស្ដីពីចំណេះចំណានខាងគោលលទ្ធិ

គោលបំណងនៃចំណេះចំណានខាងគោលលទ្ធិ

មេរៀននេះនឹងណែនាំអ្នកទៅកាន់ចំណេះចំណានខាងគោលលទ្ធិ និងអំពីរបៀបដែលមេរៀននេះអាចផ្តល់ពរជ័យដល់ជីវិតរបស់អ្នក និងជួយអ្នកឲ្យស្ថាបនាមូលដ្ឋានគ្រឹះខាងវិញ្ញាណរបស់អ្នកនៅលើព្រះយេស៊ូវគ្រីស្ទ ។

ការបំផុសគំនិត និងកាលានុវត្តភាព ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានផ្ដល់ការប្រកាសដូចខាងក្រោមនេះដល់គ្រូបង្រៀនរបស់ថ្នាក់សិក្ខាសាលា និងថ្នាក់វិទ្យាស្ថាន ៖ « [ ចំណេះចំណានខាងគោលលទ្ធិ ] គឺជាការបំផុសគំនិត និងមានកាលានុវត្តភាព ។ វានឹងមានឥទ្ធិពលដ៏អស្ចារ្យលើយុវវ័យរបស់យើង ។ ទោះជាយ៉ាងណា ជោគជ័យនៃចំណេះចំណានខាងគោលលទ្ធិ … នឹងពឹងផ្អែកយ៉ាងសំខាន់ខ្លាំងទៅលើអ្នករាល់គ្នា » ( អិមរ័សុល បាឡឺដ « The Opportunities and Responsibilities of CES Teachers in the 21st Century » [ evening with a General Authority នៅថ្ងៃទី ២៦ ខែ កុម្ភៈ ឆ្នាំ ២០១៦ ] នៅលើគេហទំព័រ broadcasts.ChurchofJesusChrist.org ) ។

ការរៀបចំរបស់សិស្ស ៖ សូមអញ្ជើញសិស្សឲ្យធ្វើការជ្រើសរើសវគ្គចំណេះចំណានខាងគោលលទ្ធិដែលពួកគេចាប់អារម្មណ៍ ដែលអាចជួយពួកគេបំពេញតម្រូវការផ្ទាល់ខ្លួន ឬ ឆ្លើយសំណួរដែលពួកគេមាន ។ បញ្ជីវគ្គបទគម្ពីរដែលមាននៅក្នុងកម្មវិធីចំណេះចំណានខាងគោលលទ្ធិ ឬនៅផ្នែកខាងចុងនៃ ឯកសារគោលនៃចំណេះចំណានខាងគោលលទ្ធិ ។

សកម្មភាពការរៀនសូត្រដែលអាចមាន

សង់គ្រឹះនៅលើព្រះយេស៊ូវគ្រីស្ទ

អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានព្រមានអំពីខ្យល់គួចខាងវិញ្ញាណ ៖

កង្វល់ដែលធំជាងការរញ្ជួយដី និងសង្គ្រាមដែលបានព្យាករណ៍ [ នៅថ្ងៃចុងក្រោយ ] ទៅទៀតនោះគឺ ខ្យល់គួចខាងវិញ្ញាណដែលអាចផ្ដាច់អ្នកចេញពីគ្រឹះខាងវិញ្ញាណរបស់អ្នក ហើយដាក់វិញ្ញាណអ្នកនៅទីដែលអ្នកនឹងនឹកស្មានមិនដល់ ពេលខ្លះអ្នកមិនបានទាំងដឹងខ្លួនថា អ្នកត្រូវបានផ្ដាច់ចេញផង ។

( នែល អិល អាន់ឌើរសិន « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ទំព័រ ១៨ )

• តើខ្យល់គួចខាងវិញ្ញាណអ្វីខ្លះ ដែលព្យាយាមកាត់ផ្ដាច់អ្នកចេញពីគ្រឹះខាងវិញ្ញាណរបស់យើង ?

សូមគិតអំពីខ្យល់គួចខាងវិញ្ញាណមួយ ដែលអ្នកកំពុងជួបប្រទះ ។ សូមអាន ហេលេមិន ៥:១២ និងសូមរកមើលវិធីនានាដើម្បីទប់ទល់នឹងខ្យល់គួចនេះ ។

• តើអ្នកបានកត់សម្គាល់ឃើញអ្វីខ្លះ ដែលអាចជួយអ្នកឲ្យទប់ទល់នឹងខ្យល់គួចខាងវិញ្ញាណបាន ?

• តើអ្នកគិតថា វាមានន័យបែបណាដើម្បីសង់គ្រឹះនៅលើព្រះយេស៊ូវគ្រីស្ទ ?

• តើអ្នកអាចទទួលបានអត្ថប្រយោជន៍មកពីការសង់គ្រឹះដ៏រឹងមាំនៅលើព្រះយេស៊ូវគ្រីស្ទតាមរបៀបណាខ្លះ ?

សេចក្តីថ្លែងការណ៍ខាងក្រោមនេះមានគោលបំណងជួយសិស្សឲ្យគិតពិចារណាអំពីអារម្មណ៍របស់ពួកគេចំពោះគ្រឹះខាងវិញ្ញាណរបស់ពួកគេ ។ សេចក្តីថ្លែងការណ៍ទាំងនេះក៏ជួយសិស្សឲ្យមើលឃើញចំណុចផ្សេងៗទៀតពីចំណេះចំណានខាងគោលលទ្ធិ ដែលអាចជួយពួកគេបានផងដែរ ។ សូមពិចារណាដាក់បង្ហាញសេចក្តីថ្លែងការណ៍ ឬសរសេរវានៅលើក្ដារខៀន ។

គ្រឹះខាងវិញ្ញាណរបស់ខ្ញុំ

សូមគិតអំពីគ្រឹះខាងវិញ្ញាណរបស់អ្នក និងវាយតម្លៃខ្លួនអ្នកទៅតាមសេចក្តីថ្លែងការណ៍ខាងក្រោមជាមួយពាក្យ « យល់ស្រប » « យល់ស្របផ្នែកខ្លះ » « មិនយល់ស្របផ្នែកខ្លះ » ឬ « មិនយល់ស្រប » ។

1. ខ្ញុំកំពុងសង់គ្រឹះដ៏រឹងមាំមួយនៅលើព្រះយេស៊ូវគ្រីស្ទ និងលើដំណឹងល្អរបស់ទ្រង់ ។

2. ខ្ញុំកំពុងបង្កើនចំណេះដឹងរបស់ខ្ញុំអំពីព្រះយេស៊ូវគ្រីស្ទ និងគោលលទ្ធិរបស់ទ្រង់ ។

3. ខ្ញុំមានទំនុកចិត្តក្នុងការប្រើព្រះគម្ពីរ ដើម្បីពន្យល់ពីគោលលទ្ធិរបស់ព្រះយេស៊ូវគ្រីស្ទ ។

4. ខ្ញុំអាចរកឃើញចម្លើយចំពោះសំណួរដែលខ្ញុំ ឬអ្នកដទៃមានអំពីដំណឹងល្អ ។

ចំណេះចំណានខាងគោលលទ្ធិ

ថ្នាក់សិក្ខាសាលាអាចជួយអ្នកក្នុងការសង់គ្រឹះរបស់អ្នកនៅលើព្រះយេស៊ូវគ្រីស្ទ កាលណាអ្នករៀនគោលលទ្ធិរបស់ទ្រង់ មករកទ្រង់ ហើយក្លាយជាសិស្សរបស់ទ្រង់ ( សូមមើល នីហ្វៃទី៣ ១១:៣៩ ) ។; សូមអានកថាខណ្ឌពីរដំបូងនៅក្នុងជំពូក « សេចក្តីណែនាំស្ដីពីចំណេះចំណានខាងគោលលទ្ធិ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ដោយរកមើលរបៀបដែលថ្នាក់សិក្ខាសាលាអាចជួយអ្នកឲ្យសង់គ្រឹះរបស់អ្នកនៅលើព្រះយេស៊ូវគ្រីស្ទបាន ។

• តើអ្នកបានរកឃើញអ្វីខ្លះ ?

មានលទ្ធផលសំខាន់ចំនួនពីរអំពីចំណេះចំណានខាងគោលលទ្ធិ ដែលអាចជួយអ្នកឲ្យសង់គ្រឹះរបស់អ្នកនៅលើព្រះយេស៊ូវគ្រីស្ទបាន ។ សូមអានលទ្ធផលទាំងពីរនេះអំពីចំណេះចំណានខាងគោលលទ្ធិនៅក្នុងជំពូក « សេចក្តីណែនាំស្តីពីចំណេះចំណានខាងគោលលទ្ធិ» នៃ ឯកសារគោលនៃចំណេះចំណានខាងគោលលទ្ធិ ។

ជារៀងរាល់សប្តាហ៍នៅក្នុងថ្នាក់សិក្ខាសាលា អ្នកនឹងធ្វើកិច្ចការស្តីពីចំណេះចំណានខាងគោលលទ្ធិ ។ នៅក្នុងមេរៀនភាគច្រើន អ្នកនឹងសិក្សាវគ្គបទគម្ពីរមួយក្នុងចំណោមវគ្គបទគម្ពីរចំនួន ២៤ ចេញពីព្រះគម្ពីរសញ្ញាថ្មីដែលត្រូវបានហៅថា វគ្គបទគម្ពីរចំណេះចំណានខាងគោលលទ្ធិ ។ ដ្យាក្រាមខាងក្រោមបង្ហាញអំពីអ្វី ដែលអ្នកនឹងធ្វើនៅក្នុងមេរៀនចំណេះចំណានខាងគោលលទ្ធិ ។

សូមពិចារណាដាក់បង្ហាញដ្យាក្រាមនេះ ឬគូសវានៅលើក្ដារខៀន ។ ដ្យាក្រាមនេះតំណាងឲ្យរបៀប ដែលមេរៀនចំណេះចំណានខាងគោលលទ្ធិត្រូវបានរៀបចំឡើង ។

ស្គាល់ និងពន្យល់អំពីគោលលទ្ធិ

សូមយកចិត្តទុកដាក់ចំពោះភាពចាស់ទុំខាងវិញ្ញាណរបស់សិស្សម្នាក់ ។ សូមស្វែងរកការដឹកនាំពីព្រះវិញ្ញាណបរិសុទ្ធប្រកបដោយការអធិស្ឋាន នៅពេលអ្នកធ្វើមេរៀនផ្ទាល់ខ្លួនតាមតម្រូវការរបស់សិស្ស ។

នៅដើមមេរៀននេះ អ្នកបានវាយតម្លៃខ្លួនឯងអំពីអារម្មណ៍ស្រណុកចិត្តដែលអ្នកមាននៅក្នុងការប្រើបទគម្ពីរ ដើម្បីពន្យល់អំពីគោលលទ្ធិនៃព្រះយេស៊ូវគ្រីស្ទ ។ មិនថាអ្នកវាយតម្លៃខ្លួនឯងរបៀបណាទេ ការសិក្សាចំណេះចំណានខាងគោលលទ្ធិនឹងបង្កើនចំណេះដឹងរបស់អ្នកអំពីព្រះអង្គសង្គ្រោះ និងគោលលទ្ធិរបស់ទ្រង់ ។ សមត្ថភាពរបស់អ្នកនៅក្នុងការពន្យល់អំពីគោលលទ្ធិរបស់ទ្រង់ដោយប្រើប្រាស់បទគម្ពីរនឹងកើនឡើង ។

សូមរកមើលបញ្ជីនៃវគ្គបទគម្ពីរចំណេះចំណានខាងគោលលទ្ធិក្នុងព្រះគម្ពីរសញ្ញាថ្មី និងឃ្លាបទគម្ពីរគន្លឹះរបស់វា ។ អ្នកអាចរកឃើញបញ្ជីនេះនៅជិតចុងបញ្ចប់នៃ ឯកសារគោលនៃចំណេះចំណានខាងគោលលទ្ធិ ។ សូមជ្រើសរើសវគ្គមួយដែលអ្នកចាប់អារម្មណ៍ ដែលអាចជួយបំពេញតាមតម្រូវការផ្ទាល់ខ្លួន ឬដែលអាចជួយឆ្លើយចំពោះសំណួរដែលអ្នកមាន ។

សិស្សអាចទទួលបានអត្ថប្រយោជន៍ពីការពិភាក្សាសំណួរខាងក្រោមជាមួយនឹងដៃគូ ។

• តើវគ្គបទគម្ពីរមួយណាដែលអ្នកបានជ្រើសរើស ?

• តើវគ្គបទគម្ពីរនេះបង្រៀនអ្នកអ្វីខ្លះអំពីព្រះយេស៊ូវគ្រីស្ទ ឬគោលលទ្ធិរបស់ទ្រង់ ?

• តើការដឹងពីរបៀបពន្យល់គោលលទ្ធិនៅក្នុងវគ្គបទគម្ពីរនេះផ្ដល់ពរជ័យដល់ជីវិតរបស់អ្នកតាមរបៀបណា ?

ការទទួលបានចំណេះដឹងខាងវិញ្ញាណ

សិស្សនឹងមានបទពិសោធន៍ផ្សេងៗជាមួយនឹងគោលការណ៍នៃការទទួលបានចំណេះដឹងខាងវិញ្ញាណ ។ សូមសម្របផ្នែកនេះនៃមេរៀនតាមតម្រូវការ និងសមត្ថភាពរបស់សិស្ស ។ មានមេរៀនដាច់ដោយឡែកនៅពេលក្រោយនៅក្នុងកម្មវិធីសិក្សានេះ សម្រាប់គោលការណ៍នីមួយៗក្នុងចំណោមគោលការណ៍ទាំងបីនៃការទទួលបានចំណេះដឹងខាងវិញ្ញាណ ។ ប្រសិនបើសិស្សភាគច្រើនមានបទពិសោធន៍តិចតួច ឬគ្មានបទពិសោធន៍សោះជាមួយការប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ សូមពិចារណាការបង្រៀនផ្នែក « ការទទួលបានចំណេះដឹងខាងវិញ្ញាណ » នៅក្នុងមេរៀនទី ១, ២ និង ៣ មុនពេលបង្រៀនមេរៀនទីមួយនៃមេរៀនវគ្គបទគម្ពីរចំណេះចំណានខាងគោលលទ្ធិ ។

នៅក្នុងមេរៀនចំណេះចំណានខាងគោលលទ្ធិ អ្នកនឹងមានឱកាសរៀន និងអនុវត្តបន្ថែមទៀត តាមរយៈការប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ ដើម្បីជួយអ្នកឆ្លើយសំណួរផ្ទាល់ខ្លួន និងសំណួរសង្គម រួមទាំងសំណួរអំពីគោលលទ្ធិ ការអនុវត្ត ឬប្រវត្តិសាស្ត្រសាសនាចក្រផងដែរ ។ ការរៀនសូត្រ និងការប្រើប្រាស់គោលការណ៍ទាំងនេះនឹងជួយអ្នកឲ្យសង់គ្រឹះរបស់អ្នកនៅលើព្រះអង្គសង្គ្រោះ ហើយងាកទៅរកទ្រង់ នៅពេលអ្នកប្រឈមនឹងសំំណួរនានា ។ គោលការណ៍ទាំងបីនៃការទទួលបានចំណេះដឹងខាងវិញ្ញាណ ដែលអ្នកនឹងអនុវត្តប្រើនៅក្នុងថ្នាក់សិក្ខាសាលាគឺ ៖

• ធ្វើសកម្មភាពដោយសេចក្ដីជំនឿ ។

• ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ ។

• ស្វែងរកការយល់ដឹងបន្ថែមតាមរយៈប្រភពដែលបានតែងតាំងដោយព្រះ ។

ប្រសិនបើអ្នកមិនដឹងច្បាស់អំពីគោលការណ៍ទាំងនេះ នោះអ្នកគួរតែអានកថាខណ្ឌទី ៥–១២ ក្នុងជំពូក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ។

• តើអ្នកដឹងអ្វីខ្លះអំពីគោលការណ៍នេះ ?

• តើអ្នកមានបទពិសោធន៍អ្វីខ្លះជាមួយគោលការណ៍ទាំងនេះ ?

• តើអ្នកគិតថា គោលការណ៍ទាំងនេះអាចជួយអ្នកឲ្យសង់គ្រឹះរបស់អ្នកនៅលើព្រះគ្រីស្ទ និងប្រឈមជាមួយនឹងខ្យល់គួចខាងវិញ្ញាណយ៉ាងដូចម្ដេច ?

វគ្គបទគម្ពីរចំណេះចំណានខាងគោលលទ្ធិ

ជារៀងរាល់ឆ្នាំនៅក្នុងថ្នាក់សិក្ខាសាលា អ្នកនឹងត្រូវបានលើកទឹកចិត្តឲ្យទន្ទេញចាំឃ្លាបទគម្ពីរគន្លឹះមួយសម្រាប់វគ្គបទគម្ពីរចំណេះចំណានខាងគោលលទ្ធិទាំង ២៤ ។

អែលឌើរ រីឆាដ ជី ស្កត ( ឆ្នាំ ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់បានបង្រៀនអំពីការទន្ទេញចាំបទគម្ពីរ ។

អំណាចដ៏មហិមាអាចកើតចេញមកពីការទន្ទេញចាំបទគម្ពីរ ។ ការទន្ទេញចាំបទគម្ពីរមួយគឺជាការបង្កើតមិត្តភាពមួយថ្មី ។ វាគឺដូចជាការរកឃើញបុគ្គលម្នាក់ថ្មីដែលអាចជួយក្នុងពេលត្រូវការ ផ្ដល់ការបំផុសគំនិត និងការលួងលោមចិត្ត ហើយជាប្រភពនៃការលើកទឹកចិត្តសម្រាប់ការផ្លាស់ប្ដូរដែលចាំបាច់ » ។

( អែលឌើរ រីឆាដ ជី ស្កត « អំណាចនៃបទគម្ពីរ » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ៦ )

• ហេតុអ្វីអ្នកគិតថា វាមានសារៈប្រយោជន៍នៅក្នុងការទន្ទេញចាំវគ្គបទគម្ពីរផ្សេងៗ ?

• តើអ្នកគិតថា ការទន្ទេញចាំអាចជួយអ្នកឲ្យសង់គ្រឹះរបស់អ្នកនៅលើព្រះយេស៊ូវគ្រីស្ទ និងប្រឈមជាមួយនឹងខ្យល់គួចខាងវិញ្ញាណយ៉ាងដូចម្ដេច ?

សូមចំណាយពេលពីរបីនាទីដើម្បីរំឭកឡើងវិញនូវវគ្គចំណេះចំណានខាងគោលលទ្ធិទាំង ២៤ និងឃ្លាបទគម្ពីរគន្លឹះសម្រាប់វគ្គសិក្សាព្រះគម្ពីរសញ្ញាថ្មី ។ អ្នកអាចប្រើកម្មវិធីចំណេះចំណានខាងគោលលទ្ធិ ឬ ឯកសារគោលនៃចំណេះចំណានខាងគោលលទ្ធិ ។ អ្នកគួរចាប់ផ្ដើមទន្ទេញសេចក្ដីយោង និងឃ្លាបទគម្ពីរគន្លឹះសម្រាប់វគ្គដែលអ្នកបានជ្រើសរើសកាលពីមុន ។

វិចារណកថា និង ព័ត៌មានសាច់រឿង

ហេតុអ្វីចំណេះចំណានខាងគោលលទ្ធិមានសារៈសំខាន់ ?

ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានបង្រៀន ៖

[ ចំណេះចំណានខាងគោលលទ្ធិ ] នឹងផ្ដោតទៅលើការស្ថាបនា និងការពង្រឹងសេចក្ដីជំនឿរបស់សិស្សយើងលើព្រះយេស៊ូវគ្រីស្ទ ហើយការពារពួកគេដោយសមត្ថភាពកាន់តែខ្លាំងនៅក្នុងការរស់នៅ និងការអនុវត្តដំណឹងល្អនៅក្នុងជីវិតរបស់ពួកគេ ។ ពេលប្រើបទគម្ពីរ និងពាក្យសម្ដីរបស់ពួកព្យាការី នោះពួកគេនឹងរៀនអំពីរបៀបធ្វើសកម្មភាពដោយសេចក្ដីជំនឿលើព្រះគ្រីស្ទ ដើម្បីទទួលបានចំណេះដឹងខាងវិញ្ញាណ និងការយល់ដឹងអំពីដំណឹងល្អរបស់ទ្រង់ ។ ហើយពួកគេនឹងមានឱកាសដើម្បីរៀនអំពីរបៀបអនុវត្តគោលលទ្ធិនៃព្រះគ្រីស្ទ និងគោលការណ៍ទាំងឡាយនៃដំណឹងល្អចំពោះសំណួរ និងឧបសគ្គនានាដែលពួកគេស្ដាប់ឮ និងមើលឃើញជារៀងរាល់ថ្ងៃនៅក្នុងចំណោមមិត្តភក្ដិ និងនៅលើប្រព័ន្ធផ្សព្វផ្សាយសង្គម ។

( អិម រ័សុល បាឡឺដ « The Opportunities and Responsibilities of CES Teachers in the 21st Century » [ evening with a General Authority ថ្ងៃទី ២៦ ខែ កុម្ភៈ ឆ្នាំ ២០១៦ ] នៅលើគេហទំព័រ ChurchofJesusChrist.org )

សកម្មភាពរៀនសូត្របន្ថែម

សកម្មភាពគូសចំណាំបទគម្ពីរចំណេះចំណានខាងគោលលទ្ធិ

ដើម្បីជួយសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិ សូមពិចារណាប្រើសកម្មភាពនេះ ។ សូមកំណត់ចំនួនវគ្គដើម្បីប្រើនៅក្នុងសកម្មភាពនេះ ហើយចាត់សិស្សម្នាក់ៗឲ្យមានវគ្គមួយ( សិស្សច្រើននាក់អាចទទួលបានវគ្គដូចគ្នា ) ។

សូមទុកពេលឲ្យសិស្សរៀបចំ បន្ទាប់មកសូមអញ្ជើញពួកគេឲ្យធ្វើដូចតទៅនេះ ៖ ( ១ ) ទៅជួបសិស្សម្នាក់ទៀត ( ២ ) ចែកចាយវគ្គបទគម្ពីរចំណេះចំណានខាងគោលលទ្ធិរបស់ពួកគេជាមួយគ្នា និង ( ៣ ) គូសចំណាំវគ្គនោះ ។ សូមធ្វើសកម្មភាពនេះឡើងវិញឲ្យបានច្រើនដង ។

ដើម្បីបន្ថែមភាពចម្រុះទៅនឹងសកម្មភាពនេះ សូមពិចារណាអញ្ជើញសិស្សឲ្យឆ្លើយសំណួរមួយ ដើម្បីជួយពួកគេឲ្យស្គាល់គ្នាទៅវិញទៅមក ឬចែករំលែកស្ថានភាពដែលពួកគេគិតថា ការស្គាល់បទគម្ពីរនេះនឹងមានប្រយោជន៍ ។

កម្មវិធីចំណេះចំណានខាងគោលលទ្ធិ

សូមជួយសិស្សឲ្យទាញយកកម្មវិធីចំណេះចំណានខាងគោលលទ្ធិនៅលើឧបករណ៍ចល័ត ។ សូមប្រើពេលវេលាក្នុងថ្នាក់ដើម្បីជួយសិស្សឲ្យស្គាល់កម្មវិធីនេះ និងធ្វើសកម្មភាពមួយចំនួន ។ សូមលើកទឹកចិត្តសិស្សឲ្យប្រើកម្មវិធីនេះនៅក្រៅថ្នាក់រៀន ។

ការទន្ទេញចាំបទគម្ពីរ

សូមអញ្ជើញសិស្សឲ្យស្រមៃថា ខ្លួនគេគឺជាអ្នកផ្សព្វផ្សាយសាសនា ឪពុក ឬម្តាយ ឬកំពុងឆ្លើយសំណួររបស់មិត្តភក្តិអំពីដំណឹងល្អ ។ សូមឲ្យសិស្សចែករំលែកពីវិធីដែលការទន្ទេញចាំបទគម្ពីរ អាចជួយពួកគេបាននៅក្នុងស្ថានភាពទាំងនោះ ។