Pasiuna nga mga Materyal

Kinatibuk-ang Pagpasabot

Karong tuiga sa seminary imong tun-an ang Bag-ong Tugon. Ang mga leksiyon niining semanaha makatabang nimo sa pagpangandam sa pagkat-on mahitungod ni Jesukristo pinaagi sa gahom sa Espiritu Santo samtang magtuon ka niining tuiga.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga gikinahanglang andamon daan para sa kada leksiyon.

Pasiuna sa Bag-ong Tugon

Katuyoan sa leksiyon: Matabangan ang mga estudyante nga moduol ngadto ni Jesukristo ug mosunod Kaniya samtang magtuon sila sa Bag-ong Tugon.

Pag-andam sa estudyante: Dapita ang mga estudyante sa paghunahuna kon nganong mapuslanon nga magtuon sa Bag-ong Tugon niining tuiga. Tingali makatabang ang pagdapit nila sa pagpangutana sa pipila ka sakop sa ilang pamilya kon ngano nga sa ilang hunahuna mapuslanon man kini.

Mga materyal alang sa mga estudyante: Siguroa nga ang matag estudyante adunay journal sa pagtuon sa kasulatan ug magamit nga kopya sa Bag-ong Tugon diha sa digital o imprinta nga porma (usa ka Santos sa Ulahing mga Adlaw nga edisyon nga may mga footnote, indeks, ug uban pa, kon anaa na sa inyong pinulongan).

Sugyot sa pagtudlo diha sa videoconference: Ikonsiderar ang paggahin og pipila ka oras sa dili pa sugdan ang leksiyon sa pagpailaila sa imong kaugalingon ngadto sa mga estudyante ug sa pagtabang sa mga estudyante nga mailaila ang usag usa.

Pagtuon sa mga Kasulatan

Katuyoan sa leksiyon: Matabangan ang mga estudyante nga moduol ngadto ni Kristo ug mas makaila Kaniya pinaagi sa ilang pagtuon sa pulong sa Dios pinaagi sa pagpalambo sa mga kahanas sa pagtuon sa kasulatan ug paghimo og mga tumong sa pagtuon sa kasulatan.

Pag-andam sa estudyante: Kon mahimo, ipakompleto sa mga estudyante ang pagtimbang-timbang sa pagtuon sa kasulatan duha ka adlaw sa dili pa ang klase. Ikonsiderar ang paghimo niini diha sa elektronik nga porma o hatagan ang mga estudyante og handout sa pagtimbang-timbang aron sulatan nga dili butangan og ngalan ug ibalik sa dili pa kini nga leksiyon.

Pagkat-on pinaagi sa Espiritu

Katuyoan sa leksiyon: Matabangan ang mga estudyante kon sa unsang paagi nga ang Espiritu Santo motabang nila nga makakat-on sa kamatuoran ug makadawat og personal nga pagpadayag.

Pag-andam sa estudyante: Dapita ang mga estudyante sa pagbasa sa Juan 14:26–27 ug sa paghunahuna og mga kasinatian sa higayon nga sila mibati o nakakat-on og butang gikan sa Espiritu Santo diha sa mga paagi nga gihulagway sa Manluluwas niini nga mga bersikulo.

Sugyot sa pagtudlo diha sa videoconference: Ikonsiderar ang paggamit og whiteboard function aron ang mga estudyante makalista og mga paagi nga ang Espiritu Santo gihulagway diha sa mga kasulatan nga gilista niini nga leksiyon.

Pagkat-on pinaagi sa Hugot nga Pagtuo diha ni Jesukristo

Katuyoan sa leksiyon: Matabangan ang mga estudyante nga makasabot sa kaimportante sa paglihok uban sa hugot nga pagtuo diha ni Jesukristo samtang magkat-on sila sa seminary.

Pag-andam sa estudyante: Dapita ang mga estudyante sa pagpamalandong niini nga pangutana: Unsa ang inyong gihimo nga nakatabang gayod ninyo sa inyong pagkat-on sa ebanghelyo?

Mga materyal alang sa mga estudyante: Alang sa matag estudyante, pagdala og usa ka piraso nga papel nga may igong gidak-on aron mabahin sa tulo ka kolum.

Pasiuna sa Doktrinal nga Kahanas

Katuyoan sa leksiyon: Mapailaila ang mga estudyante ngadto sa doktrinal nga kahanas ug kon sa unsang paagi nga makapanalangin kini sa ilang kinabuhi ug makatabang nila sa pagpalig-on sa ilang espirituhanong pundasyon diha ni Jesukristo.

Pag-andam sa estudyante: Dapita ang mga estudyante sa pagpili og usa ka tudling sa doktrinal nga kahanas nga sa ilang tan-aw makapainteresado, makatabang sa personal nga panginahanglan, o makatubag sa ilang pangutana. Usa ka lista sa mga tudling nga makita diha sa Doktrinal nga Kahanas nga app o sa kataposan sa Mahinungdanon nga Dokumento sa Doktrinal nga Kahanas.
Sugyot sa pagtudlo diha sa videoconference: Ikonsiderar ang paggamit sa mga breakout room aron matabangan ang mga estudyante sa paghisgot og usa o mas daghan pa nga mga pangutana diha sa leksiyon.

Handout: Andama ang handout nga “Akong Espirituhanong Pundasyon” alang sa matag estudyante.
Sulod nga ipakita: Pangandam nga ipakita ang diagram nga naghulagway sa mga elemento sa mga leksiyon sa doktrinal nga kahanas.