Pagtuon sa mga Kasulatan

Madungog ang Tingog sa Ginoo pinaagi sa mga Kasulatan

A row of hands holding scriptures or electronic devices.

Gitudlo ni Jesukristo nga ang mga kasulatan nagpamatuod Kaniya (tan-awa sa Juan 5:39). Matabangan ka niini nga leksiyon sa pagduol ngadto kang Kristo ug mas makaila Kaniya pinaagi sa pagtuon sa pulong sa Diyos pinaagi sa pagtabang kanimo sa pagpalambo og mga kahanas sa pagtuon sa kasulatan ug sa pagtakda og mga tumong sa pagtuon sa kasulatan.

Posible nga mga Kalihokan sa Pagkat-on

Nganong magtuon man sa mga kasulatan?

Ikonsiderar ang pag-awhag sa mga estudyante nga i-role play kini nga eksena nga managpares o isip usa ka klase aron mapalambo ang kasuod.

Hunahunaa nga ang usa sa imong mga higala moingon nga, “Wala akoy panahon aron magtuon sa mga kasulatan tungod sa daghan nakong gibuhat ug gihunahuna. Wala man gani nako kini masabti!”

Unsay imong isulti ngadto sa imong higala?
Unsa ang uban pang mga rason kon nganong ang mga tawo dili magtuon sa mga kasulatan kada adlaw?

Ikonsiderar ang paggamit sa pagsusi gikan sa kalihokan sa pag-andam sa estudyante aron matabangan ang mga estudyante sa pagsusi kon kumusta sila sa ilang kaugalingong pagtuon sa kasulatan.

Buhata ang pagsusi sa pagtuon sa kasulatan. Tan-awon nimo ang imong mga tubag unya sa klase.

Tubaga ang mosunod nga mga pangutana diha sa imong journal sa pagtuon.

Unsay maayong nahitabo sa imong pagtuon sa kasulatan? Unsa man ang may maayo pa nimong mahimo?

Ipakita ang mosunod nga pamahayag ug ang sunod nga mga pangutana. Mahimong makabenepisyo ang mga estudyante gikan sa pagtubag sa mga pangutana diha sa ilang mga journal sa dili pa motubag sa atubangan sa klase. Sundi og pangutana ang mga estudyante nga nagpaambit og mga kasinatian aron sa pagdapit nila nga magpaambit pa og dugang.

Basaha ang mosunod nga pamahayag ni Presidente Russell M. Nelson, nga mangita kon unsay atong makat-onan mahitungod kon nganong angay sa panahon ug paningkamot ang regular nga pagtuon sa kasulatan.

Samtang nagtinguha kita nga mahimong mga disipulo ni Jesukristo, ang atong mga paningkamot sapagpaminaw Kaniyakinahanglan nga mas gitinguha nato. Gikinahanglan ang tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtul[o]n-an, sa Iyang mga kamatuoran. …

…Asamankita makapaminaw Kaniya?

Kita makaadto sa mga kasulatan. Kini nagtudlo nato bahin ni Jesukristo ug sa Iyang ebanghelyo, sa gidak-on sa Iyang Pag-ula, ug mahinungdanong plano sa Amahan sa kalipay ug katubsanan. Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalis[o]d nga wala nato mahunahunai nga atong atubangon. …

Unsay mahitabo kon kamo maminaw pag-ayo, mopatalingh[o]g, ug mamati unsay gisulti sa Manluluwas ug unsay Iyang gisulti pinaagi sa Iyang mga propeta? Ako mosaad nga kamo mapanalanginan og dugang gah[o]m sa pag-atubang sa tintasyon, mga pakigbisog, ug kahuyang. Ako mosaad og mga milagro sa inyong kaminyoon, mga relasyon sa pamilya, ug inadlaw nga trabaho. Ug ako mosaad nga ang inyong kapasidad sa pagbati og hingpit nga kalipay madugangan bisan kon ang unos magkadaghan sa inyong kinabuhi.

Russell M. Nelson, “Paminaw Kaniya,” Liahona, Mayo 2020, 89, 90

Unsa ang imong nakat-onan gikan niini nga pamahayag mahitungod kon sa unsang paagi nga makapanalangin kanimo ang Manluluwas samtang nagtuon ka sa mga kasulatan?
Unsa nga mga panalangin ang imong nasinati samtang regular nimong pagtuon sa mga kasulatan?
Unsa ang nakatabang o makatabang kanimo nga padayon nga makabaton og panahon aron magtuon sa mga kasulatan?

Ikonsiderar ang pagbuhat og kalihokan kauban ang mga estudyante aron tabangan sila nga makabaton og kahanas sa pagtuon sa kasulatan. Ang mosunod nga kalihokan makatabang kanila kon unsaon nga magamit ang mga footnote sa epektibong paagi, pero kon makabenepisyo sila gikan sa laing kahanas, ikonsiderar ang laing kalihokan nga makapalambo sa ilang abilidad sa pagtuon sa mga kasulatan. Makita ang pipila ka ideya sa dugang pang mga materyal sa kataposan sa leksiyon.

Unsaon nako paggamit ang mga footnote sa epektibong paagi?

Ang usa ka paagi nga makabaton ka og mas makadasig nga pagtuon sa kasulatan mao ang paggamit og mga footnote. Makita ang mga footnote sa mga papel nga kasulatan sa ubos sa panid ug sa mga elektronik nga kasulatan pinaagi sa pagpindot sa mga gagmay nga letra tupad sa pipila ka pulong sa mga bersikulo. Kining mubo nga mga sulat adunay mga pakisayran sa uban pang mga bersikulo o dugang pang mga tool nga makatabang kanimo nga mas masabtan kon unsa ang gitudlo.

A portion of a page from the Bible. Line art for seminary manual

Kanunay nimong makita ang mubo nga mga sulat sa Hubad ni Joseph Smith diha sa mga footnote sa Bag-ong Tugon. Ang Hubad ni Joseph Smith usa ka dinasig nga rebisyon o hubad sa Biblia nga gikompleto ni Josep Smith. Gipahiuli niini ang mga kamatuoran nga nawala sa Biblia ug nagdugang og pagkaklaro sa mga pagtulon-an sa bibliya. Ubos sa inspirasyon, gisakto sa Propeta ang labaw sa 3,400 ka bersikulo sa Biblia, ug makita ang kadaghanan niini diha sa mga footnote sa Santos sa Ulahing mga Adlaw nga mga edisyon sa Biblia, pero anaa sa appendix sa Biblia ang pipila sa mas taas nga tudling.

Gihulagway sa Lucas 2 ang istorya ni Jose ug Maria nga nakit-an ang 12 anyos nga si Jesus didto sa templo human sa pagpangita Kaniya sulod sa tulo ka adlaw (tan-awa sa Lucas 2:40–45). Ang Lucas 2:46 usa ka pananglitan diin giklaro sa Hubad ni Joseph Smith kon unsa ang gitudlo sa tudling. Makatabang usab kini sa pagpabiling pareho sa kahulugan sa unsay gitudlo diha sa bersikulo 47 .

Tun-i ang Lucas 2:46 nga walay bisan unsang mga footnote, ug pangitaa ang imong nakat-onan mahitungod kang Jesukristo.

Tun-i pag-usab ang tudling, sa pagkakaron gamita ang mga footnote, lakip ang nagsugod sa “GR.” Ang “GR” nagpasabot nga “Griyego,” nga pinulongan nga orihinal nga gigamit sa pagsulat sa kadaghanan sa mga manuskrito sa Bag-ong Tugon. Makatabang kanato kini nga footnote sa pagsabot sa posibleng kahulugan sa Griyego nga teksto.

Sa unsa nga paagi nga napalambo niini nga mga himan sa pagtuon sa kasulatan ang unsay gitudlo sa bersikulo mahitungod kang Jesukristo?

Mga tumong nga mahimong mas sama ni Jesukristo

Ang usa sa mga nag-unang tinguha sa seminary mao ang pagtabang kanimo sa pagsunod kang Jesukristo ug mahimong Iyang disipulo. Ang padayon nga pagtuon sa mga kasulatan mao ang usa sa mga pinakamaayong paagi nga mahimo kang mas mapahinungoron nga sumusunod ni Jesukristo. Usa sab kini sa mga gikinahanglan aron makadawat og kredito para sa seminary. Mahimo kang mangayo sa imong magtutudlo og impormasyon mahitungod kon unsa ang mga gikinahanglan sa pagtuon sa kasulatan kon ikaw adunay mga pangutana.

Lagmit lisod ang pagpangita og panahon aron personal nga magtuon sa mga kasulatan. Si Elder David A. Bednar sa Korum sa Napulog Duha ka Apostoles mitanyag niini nga tambag:

Ang bise nga dagan sa atong kinabuhi, ang mga maayong intensyon ug sa yano “nagla[o]m” lang nga makakita og panahon alang sa makahuloganong pagtuon sa kasulatan dili igo. Ang akong kasinatian nagsugyot nga ang piho ug ang gi-[e]skedyul nga panahon nga gigahin matag adlaw ug, kutob sa mahimo, usa ka lugar alang sa pagtuon dakong ikatabang sa pagkaepektibo sa atong pagsiksik ug pagtuon sa mga kasulatan.

(David A. Bednar, “Tungod kay Kita Nakakita Kanila,” New Era, Abr. 2006, 6)

Hunahunaa kon unsa ang imong nakat-onan ug gibati karong adlawa, ug ikonsiderar ang pagrebyo pag-usab sa imong mga tubag sa pagsusi sa pagtuon sa kasulatan. Sa imong journal sa pagtuon, paghimo og tumong sa pagtuon sa kasulatan. Mahimo nimo kining buhaton nga espirituhanong tumong para sa programa sa Mga Bata ug Kabatan-onan o maghimo og laing tinguha. Hunahunaa ang mga mosunod nga pangutana samtang naghimo ka sa imong tumong:

Unsa ang imong nahibaloan o gituohan mahitungod sa mga kasulatan? Sa unsang paagi nga ang imong nakat-onan o gituohan mahitungod niini makapalambo sa imong tinguha sa pagtuon niini?
Unsa nga mga hagit ang imong giatubang sa imong pagtuon sa kasulatan? Unsaon man nimo sa pagbuntog niini?
Unsa kadaghan ang imong tun-an? Asa ug kanus-a nimo kini buhaton?

Komentaryo ug Background nga Impormasyon

Unsa ang pipila sa mga panalangin nga moabot pinaagi sa pagtuon sa kasulatan?

Si Elder D. Todd Christofferson sa Korum sa Napulog Duha ka Apostoles mipamatuod bahin sa mga panalangin nga moabot pinaagi sa pagtuon sa kasulatan.

3:3

Unsaon man nako pagtuon ang mga kasulatan sa epektibong paagi?

Si Elder D. Todd Christofferson sa Korum sa Napulog Duha ka Apostoles mipaambit niini nga mga panglantaw:

Kon mosulti ko nga “magtuon,” nagpasabot ko nga labaw pa sa pagbasa lamang. Maayo man na nga usahay mobasa og basahon sa kasulatan sulod sa gitakda nga oras aron makuha ang kinatibuk-ang kahulugan sa mensahe niini, pero sa konbersyon, kinahanglan mas hatagan ninyo og gibug-aton ang kadugayon sa panahon nga inyong gigahin sa mga kasulatan kay sa kadugayon nga nagbasa mo nianang panahona. Naghunahuna ko nga usahay magbasa mo og pipila ka mga bersikulo, mohunong aron mamalandong niini, magbasa og maayo sa mga bersikulo pagbalik, ug samtang naghunahuna mo bahin sa unsay gipasabut niini, mag-ampo para sa panabut, mangutana diha sa inyong hunahuna, maghulat sa espirituhanong mga impresyon, ug mosulat sa mga impresyon ug mga panghunahuna nga moabut aron mo makahinumdom ug makat-on og dugang pa. Sa pagtuon niining paagiha, mahimong dili daghan ang inyong mabasa nga mga kapitulo o mga bersikulo sulod sa tunga sa oras, pero makahatag kamo og luna sa inyong kasingkasing para sa pulong sa Dios, ug Siya makigsulti nganha kaninyo.

(D. Todd Christofferson, “Kon Makabig na Kamo,”EnsignoLiahona, Mayo 2004, 11)

Ang pipila ka himan ug mga kapanguhaan nga makatabang kanimo sa pagtuon sa mga kasulatan sa epektibong paagi naglakip sa:

“Mga Paagi sa Pagtuon sa Mga Kasulatan” ug ang mga materyal sa pasiuna sa Dali, Sunod Kanako—Para sa Mga Indibidwal ug Mga Pamilya nga manwal.
Ang institute nga Manwal sa Estudyante sa Bag-ong Tugon, nga adunay mga makatabang nga hulagway, mga komentaryo, ug mga pagpasabot.

Makita ang mga mosunod nga himan sa seksyon nga “Mga Tabang sa Pagtuon” diha sa imong Gospel Library nga app o sa index sa imong tulo ka kasulatan o Biblia:

Ang Giya ngadto sa mga Kasulatan , Bible Dictionary [Diksyonaryo sa Biblia] , ug Topical Guide [Giya sa Hilisgotan] , nga makatabang kanimo sa pagtuon sigon sa hilisgotan o pinaagi sa pagpangita og mga cross-reference, mga kahulugan, ug mga pagpasabot sigon sa konteksto.
Bible Maps [Mga Mapa sa Biblia] , nga makatabang kanimo nga mas masabtan ang heyograpikong konteksto sa mga asoy sa kasulatan.
Ang tool nga Bible Photographs [Mga Hulagway diha sa Biblia] , nga adunay mga hulagway sa mga lugar sa Balaang Yuta nga makatabang kanimo nga mas mahanduraw ang mga istorya sa Biblia.
The Harmony of the Gospels [Ang Kahan-ay sa mga Ebanghelyo] , nga usa ka index diin makita ang lain-laing mga istorya sa kada usa sa mga asoy sa Ebanghelyo, nga motabang kanimo sa pagpalambo sa imong pagsabot niadto nga mga panghitabo.

Dugang nga Kalihokan sa Pagkat-on

Paghan-ay sa mga asoy sa ebanghelyo

Ikonsiderar ang paggamit niini nga buluhaton agi og dugang o puli sa kalihokan bahin sa mga footnote sa Hubad ni Joseph Smith.

Mahimong makabenepisyo ang mga estudyante sa pagtuon sa parehong asoy sa Bag-ong Tugon gikan sa panglantaw sa daghang mga manunulat. Makatabang kini sa mga estudyante nga makabaton og dugang pang mga panglantaw bahin sa Manluluwas. Ang usa ka asoy nga mahimong gamiton sa pagraktis mao ang pag-antos sa Manluluwas sa Getsemani, nga makita diha sa Mateo 26:36–46 ; Marcos 14:32–42 ; Lucas 22:40–46. Human sa pagtuon sa mga estudyante niini nga mga asoy, mahimo silang magpaambit og mga panglantaw nga ilang nadawat pinaagi sa pagtuon sa mga kasulatan niini nga paagi.