Pasiuna sa Doktrinal nga Kahanas

Ang Katuyoan sa Doktrinal nga Kahanas

Kini nga leksiyon magpaila kanimo sa doktrinal nga kahanas ug kon sa unsang paagi kini makapanalangin sa imong kinabuhi ug makatabang kanimo sa pagtukod sa imong espirituhanong pundasyon diha kang Jesukristo.

Dinasig ug tukma sa panahon. Si Presidente M. Russell Ballard sa Korum sa Napulog Duha ka Apostoles mihatag sa mosunod nga pamahayag ngadto sa mga magtutudlo sa seminary ug sa institute: “Ang [Doktrinal nga Kahanas] dinasig ug tukma sa panahon. Kini adunay talagsaong impluwensya sa atong kabatan-onan. Hinoon, ang kalamposan sa Doktrinal nga Kahanas … mag-agad og importante kaayo nganha kaninyo” (M. Russell Ballard, “The Opportunities and Responsibilities of CES Teachers in the 21st Century” [gabii uban sa usa ka Kinatibuk-ang Awtoridad, Peb. 26, 2016], broadcasts.ChurchofJesusChrist.org).

Pag-andam sa estudyante: Dapita ang mga estudyante nga mopili og usa sa mga tudling sa doktrinal nga kahanas nga nakahatag nila og interes, makatabang sa personal nga panginahanglan, o makatubag sa ilang pangutana. Ang lista sa mga tudling anaa sa app sa Doktrinal nga Kahanas o hapit na sa kataposan sa Mahinungdanon nga Dokumento sa Doktrinal nga Kahanas.

Posible nga mga Kalihokan sa Pagkat-on

Motukod og pundasyon diha kang Jesukristo

Tornado, building and power lines in Cordele, Georgia, on April 5. 2017. (vert)

Si Elder Neil L. Andersen sa Korum sa Napulog Duha ka Apostoles mipasidaan bahin sa mga espirituhanong alimpulos:

Dugang pa sa mga gipanagna nga mga linog ug mga gubat [sa ulahing mga adlaw] mao ang mga espirituhanong mga alimpulos nga makaibot kaninyo gikan sa inyong mga espirituhanon nga pundasyon ug mopadpad sa inyong espiritu ngadto sa mga dapit nga wala ninyo dahoma, usahay dili kaayo ninyo mamatngunan nga naalsa na kamo.

(Neil L. Andersen, Mga Espirituhanong Alimpulos,” Liahona, Mayo 2014, 18)

Unsa ang pipila sa mga espirituhanong alimpulos nga nagsulay sa pag-ibot kanato gikan sa atong mga espirituhanong pundasyon?

Hunahunaa ang espirituhanong alimpulos nga lagmit imong giatubang. Basaha ang Helaman 5:12 ug pangita og mga paagi nga makasugakod niini nga alimpulos.

Unsa ang imong namatikdan nga makatabang kanimo nga makasugakod sa espirituhanong mga alimpulos?
Unsa kaha ang buot ipasabot sa pagtukod og pundasyon diha kang Jesukristo?
Sa unsa nga mga paagi nga personal kang makabenepisyo gikan sa pagtukod og lig-on nga pundasyon diha kang Jesukristo?

Ang Akong Espirituhanong Pundasyon

Hunahunaa ang imong espirituhanong pundasyon ug susiha ang imong kaugalingon sa mga mosunod nga pamahayag pinaagi sa “Mouyon,” “Medyo Mouyon,” “Medyo Dili Mouyon,” o “Dili Mouyon.”

Nagtukod ako og lig-on nga pundasyon diha kang Jesukristo ug sa Iyang ebanghelyo.
Gidugangan nako ang akong kahibalo mahitungod kang Jesukristo ug sa Iyang ebanghelyo.
Komportable ako sa paggamit sa mga kasulatan aron ipasabot ang doktrina ni Jesukristo.
Nakakita ako og mga tubag sa akong mga pangutana o sa ubang mga tawo mahitungod sa ebanghelyo.

Doktrinal nga kahanas

Ang seminary makatabang nimo sa pagtukod sa imong pundasyon diha kang Jesukristo samtang magkat-on ka sa Iyang doktrina, moduol ngadto Kaniya, ug mahimong Iyang disipulo (tan-awa sa 3 Nephi 11:39). Basaha ang unang duha ka parapo [paragraph] sa kapitulo nga “Pasiuna sa Doktrinal nga Kahanas” sa Mahinungdanon nga Dokumento sa Doktrinal nga Kahanas (2022), nga mangita og mga paagi nga makatabang kanimo ang seminary sa pagtukod sa imong pundasyon diha kang Jesukristo.

Unsa man ang imong nakit-an?

Adunay duha ka nag-unang sangpotanan para sa doktrinal nga kahanas nga makatabang kanimo sa pagtukod sa imong pundasyon diha kang Jesukristo. Basaha ang duha ka sangpotanan para sa doktrinal nga kahanas sa kapitulo nga “Pasiuna sa Doktrinal nga Kahanas” sa Mahinungdanon nga Dokumento sa Doktrinal nga Kahanas.

Kada semana sa seminary magbuhat ka sa doktrinal nga kahanas. Sa kadaghanan niini nga mga leksiyon, magtuon ka sa usa sa 24 ka tudling sa kasulatan gikan sa Bag-ong Tugon nga nailhan nga mga tudling sa doktrinal nga kahanas. Gipakita sa mosunod nga diagram kon unsa ang imong buhaton sa mga leksiyon sa doktrinal nga kahanas.

Ikonsiderar ang pagpakita sa diagram o pagdrowing niini diha sa pisara. Girepresenta niini nga diagram ang paagi sa pag-organisar sa mga leksiyon sa doktrinal nga kahanas.

Hibaloi ug ipasabot ang doktrina

Pagpabilin nga sensitibo sa espirituhanong kahingkod sa kada estudyante. Mainampoong magtinguha sa giya sa Espiritu Santo samtang nagpahiangay ka sa leksiyon sigon sa mga panginahanglan sa mga estudyante.

Sa unang bahin sa leksiyon, imong susihon ang imong kaugalingon kon unsa kakomportable ang imong gibati sa paggamit sa mga kasulatan aron ipasabot ang doktrina ni Jesukristo. Bisan giunsa pa nimo pagsusi ang imong kaugalingon, ang pagtuon sa doktrinal nga kahanas makapalambo sa imong kahibalo mahitungod sa Manluluwas ug sa Iyang ebanghelyo. Ang imong abilidad sa pagpasabot sa Iyang doktrina molambo gamit ang mga kasulatan.

Tan-awa ang listahan sa mga tudling sa doktrinal nga kahanas sa Bag-ong Tugon ug ang importante niini nga mga hugpong sa mga pulong sa kasulatan. Makita nimo kini nga listahan hapit na sa kataposan sa Mahinungdanon nga Dokumento sa Doktrinal nga Kahanas. Pagpili og usa sa mga tudling nga nakahatag kanimo og interes, makatabang sa personal nga panginahanglan, o makatabang sa imong pangutana.

Ang mga estudyante mahimong makabenepisyo sa paghisgot sa mosunod nga mga pangutana uban sa usa ka kauban.

Unsa nga tudling sa kasulatan ang imong gipili?
Unsay gitudlo kanimo niini nga tudling mahitungod kang Jesukristo ug sa Iyang doktrina?
Sa unsa nga mga paagi nga makapanalangin sa imong kinabuhi ang kahibalo sa pagpasabot sa doktrina gikan niini nga tudling?

Pag-angkon og espirituhanong kahibalo

Makabaton ang mga estudyante og lain-laing kasinatian sa mga baroganan sa pag-angkon og espirituhanong kahibalo. Gamita kini nga bahin sa leksiyon sigon sa mga panginahanglan ug mga abilidad sa mga estudyante. Adunay managlahi nga mga leksiyon sa sunod nga bahin sa kurikulum para sa kada usa sa tulo ka baroganan sa pag-angkon og espirituhanong kahibalo. Kon ang kadaghanan sa mga estudyante adunay gamay nga kasinatian o walay kasinatian sa paggamit sa mga baroganan sa pag-angkon og espirituhanong kahibalo, ikonsiderar ang pagtudlo sa “Pag-angkon og Espirituhanong Kahibalo” mga bahin 1, 2, ug 3 nga mga leksiyon sa dili pa itudlo ang unang leksiyon sa tudling sa doktrinal nga kahanas.

Sa mga leksiyon sa doktrinal nga kahanas, makabaton ka og oportunidad nga makahibalo og dugang mahitungod niini ug mabansay ang paggamit sa mga baroganan sa pag-angkon og espirituhanong kahibalo aron matabangan ka sa pagtubag sa personal ug katilingbanong mga pangutana ingon man sa mga pangutana mahitungod sa doktrina, mga buluhaton, o kasaysayan sa Simbahan. Ang pagkahibalo niini ug paggamit niini nga mga baroganan makatabang kanimo sa pagtukod sa imong pundasyon diha sa Manluluwas ug sa pagdangop ngadto Kaniya kon ikaw adunay mga pangutana. Ang tulo sa mga baroganan sa pag-angkon og espirituhanong kahibalo nga bansayon nimo sa paggamit diha sa seminaryo mao ang:

Molihok inubanan sa hugot nga pagtuo.
Mosusi sa mga konsepto ug mga pangutana inubanan sa mahangturong panglantaw.
Motinguha og dugang nga panabot pinaagi sa balaanong gitudlo nga mga tinubdan.

Kon dili ka pamilyar niini nga mga baroganan, mahimo kang mobasa sa mga parapo 5–12 sa kapitulo nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas.

Unsa ang imong nahibaloan mahitungod niini nga mga baroganan?
Unsa ang imong mga kasinatian niini nga mga baroganan?
Sa unsang mga paagi sa imong hunahuna nga mahimong makatabang kanimo kini nga mga baroganan sa pagtukod sa imong pundasyon diha kang Kristo ug sa pagsugakod sa espirituhanong mga alimpulos?

Mga tudling sa kasulatan sa doktrinal nga kahanas

Kada tuig sa seminary, awhagon ka nga imemorya ang mahinungdanong hugpong sa mga pulong sa kasulatan para sa 24 ka tudling sa kasulatan sa doktrinal nga kahanas.

Si Elder Richard G. Scott (1928–2015) sa Korum sa Napulog Duha ka Apostoles mitudlo mahitungod sa pagmemorya sa mga kasulatan.

2:3

Talagsaong gah[o]m moabut gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama sa pagdiskobre og bag-ong tawo nga makatabang panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban.

(Richard G. Scott, “Ang Gahum sa Kasulatan,” Liahona, Nob. 2011, 6)

Sa imong hunahuna nganong makatabang man ang pagmemorya og lain-laing mga tudling sa kasulatan?
Sa imong hunahuna sa unsang paagi nga mahimong makatabang kanimo ang pagmemorya sa mga kasulatan sa pagtukod sa imong pundasyon diha kang Jesukristo ug sa pagsugakod sa espirituhanong mga alimpulos?

Gahini og pipila ka minuto ang pagrebyo sa 24 ka tudling sa doktrinal nga kahanas ug ang mga mahinungdanon nga hugpong sa mga pulong sa kasulatan para sa kurso sa Bag-ong Tugon. Magamit nimo ang app sa Doktrinal nga Kahanas o ang Mahinungdanon nga Dokumento sa Doktrinal nga Kahanas. Mahimo nimong sugdan ang pagmemorya sa pakisayran ug mga mahinungdanong hugpong sa mga pulong sa kasulatan para sa tudling nga imong gipili bag-o lang.

Komentaryo ug Background nga Impormasyon

Nganong importante man ang doktrinal nga kahanas?

Si Presidente M. Russell Ballard sa Korum sa Napulog Duha ka Apostoles mitudlo:

Ang [Doktrinal nga Kahanas] magtutok sa atong mga estudyante sa [pagpalambo] ug pagpalig-on sa ilang [hugot nga] pagtuo kang Jesukristo ug madugangan ang ilang abilidad nga masunod ug ma-apply ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-[o]nan nila unsaon sa paglihok uban sa pagtuo kang Kristo sa pag-angkon og espirituhanong kahibalo ug panab[o]t sa Iyang ebanghelyo. Ug may oportunidad sila sa pagkat-on unsaon sa pag-apply ang doktrina ni Kristo ug mga bar[o]ganan sa ebanghelyo diha sa mga pangutana ug mga hagit nga ilang madungog ug makita kada adlaw sa ilang mga higala ug sa social media.

(M. Russell Ballard, “Ang Mga Oportunidad ug Responsibilidad sa Mga Magtutudlo sa CES sa ika 21 nga Siglo” [gabii kauban sa usa ka Kinatibuk-ang Awtoridad, Peb. 26, 2016], ChurchofJesusChrist.org)

Dugang nga mga Kalihokan sa Pagkat-on

Kalihokan sa pagmarka sa kasulatan sa doktrinal nga kahanas

Aron matabangan ang mga estudyante sa pagmarka sa mga tudling sa kasulatan sa doktrinal nga kahanas, ikonsiderar ang paggamit niini nga kalihokan. Tinoa ang gidaghanon sa mga tudling nga gamiton niini nga kalihokan, ug sangoni ang kada estudyante og tudling (mahimong mosangon og parehong tudling sa daghang mga estudyante).

Hatagi og panahon ang mga estudyante sa pag-andam, unya dapita sila nga buhaton ang mosunod: (1) bisitahon ang laing miyembro sa klase, (2) ipaambit ang ilang mga tudling sa kasulatan sa doktrinal nga kahanas sa usag usa, ug (3) markahan ang mga tudling. Balik-balika kini nga kalihokan sa pipila ka higayon.

Sa pagdugang og lainlaing paagi sa kalihokan, ikonsiderar ang pagdapit sa mga estudyante nga tubagan ang pangutana aron tabangan silang mapamilyar sa usag usa, o mopaambit og sitwasyon nga sa ilang hunahuna nga ang pagkahibalo niini nga kasulatan makatabang.

App sa Doktrinal nga Kahanas

Tabangi ang mga estudyante nga i-download ang app sa Doktrinal nga Kahanas sa mobile device. Gamita ang oras sa klase aron tabangan ang mga estudyante nga mahimong pamilyar sa app ug magbuhat sa pipila sa mga kalihokan. Awhaga ang mga estudyante sa paggamit sa app sa gawas sa klase.

Pagmemorya sa mga kasulatan

Awhaga ang mga estudyante sa paghunahuna sa ilang mga kaugalingon isip usa ka misyonaryo, usa ka ginikanan, o nagtubag sa mga pangutana sa higala mahitungod sa ebanghelyo. Hangyoa ang mga estudyante nga magpaambit og mga paagi nga makatabang kanila ang pagmemorya sa mga kasulatan niadto nga mga sitwasyon.