Sēmisi

Vakai Fakalūkufuá

Ko e hā te ke lava ʻo fai ʻi he taimi ʻokú ke fehangahangai ai mo ha fehuʻi faingataʻa? ʻOku mahuʻinga fēfē nai ke ngāue ʻi hoʻo tuí? Ko e hā e founga ʻoku finangalo ʻa e ʻEikí ke ke lea ʻaki mo fakaʻaongaʻi ai hoʻo ngaahi leá? Te ke ako ʻi he ngaahi lēsoni ʻo e uike ní ʻa e ngaahi lea ʻa e ʻAposetolo ko Sēmisí, ʻa ia ʻokú ne tokoni ke tali ʻa e ngaahi fehuʻi ko ʻení mo ha ngaahi meʻa lahi ange.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ‘i he lēsoni takitaha.

Ngaahi Fokotuʻu maʻá e Kau Faiako ʻi he ʻInitanetí

Vahevahe ʻo e monitoa ʻa e kau akó ʻi he konifelenisi vitioó. ʻOku lahi ha ngaahi meʻangāue fakavitiō ʻokú ne fakaʻatā e kau akó ke vahevahe e meʻa ʻi lotó mei heʻenau monitoá. Fakakaukau ke fakaafeʻi e kau akó ke teuteu ha fakamatala nounou kimuʻa he kalasí pea vahevahe ʻenau ngaahi fakamatalá ʻi he monitoá mo e niʻihi kehé. Ko ha founga ʻe taha ko hono fakaʻaongaʻi e polokalama palakipoé ʻi hoʻo meʻangāue fakavitioó ke kau mai ai e kau akó ʻaki ʻenau taipeʻi pe tā fakatātā ʻi he palakipoé ʻi he lolotonga ‘o e kalasí.

Sēmisi 1

Taumuʻa ʻo e lēsoní: ʻOku fakataumuʻa e lēsoni ko ʻení ke fakamālohia e fakamoʻoni ʻa e kau akó ʻe foaki ange ʻe he Tamai Hēvaní ha poto kiate kinautolu ko ha tali ki heʻenau ngaahi lotú.

Teuteu ʻa e tokotaha akó: Fakaafeʻi e kau akó ke nau lau ʻa e Sēmisi 1:5–6 pea fakakaukau ki he ngaahi tafaʻaki ʻi heʻenau moʻuí ʻoku nau fie maʻu ai ʻa e potó pe fakahinohino mei he ʻOtuá.

Fokotuʻu ki hono akoʻí ʻi he konifelenisi vitioó: Fakakaukau ke ke kole ki ha niʻihi ʻo e mātuʻa ʻa e kau akó ʻi ha ʻaho ʻe taha pe ua kimuʻa ke nau kau mai ki he kalasí pea vahevahe ha aʻusia kuo nau maʻu mei he ʻOtuá ko ha tali ki haʻanau lotu. ʻE lava foki ke ʻave ʻe he mātuʻa ko ʻení ha lekooti ʻo ʻenau aʻusiá ʻe lava ke huluʻi lolotonga e kalasí.

Fakataukei Fakatokāteliné: Sēmisi 1:5–6

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola fakataukei fakatokāteliné mo e kupuʻi lea fakafolofola mahuʻingá ʻi he Sēmisi 1:5–6 , fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke nau lau ʻa e Siosefa Sāmita—Hisitōlia 1:10–14 , ʻo kumi e founga naʻe fakaʻaongaʻi ai ‘e Siosefa Sāmita ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi heʻene moʻuí.

ʻĪmisi ke fakaʻaliʻalí: Ko ha ʻīmisi ʻo e ‘Uluaki Mata Meʻa-Hā-Mai ʻa Siosefa Sāmitá.

Sēmisi 2

Taumuʻa ʻo e lēsoní: ʻE fakaʻatā ʻe he lēsoni ko ʻení ʻa e kau akó ke nau vakaiʻi ʻa e founga te nau lava ai ʻo ngāue kakato ange ʻaki ʻenau tui kia Sīsū Kalaisí ʻo fakafou ʻi he ngaahi ngāue māʻoniʻoní.

Teuteu ʻa e tokotaha akó: Fakaafeʻi e kau akó ke nau fakakaukau ki ha taha ʻoku ofi ange kiate kinautolu ʻokú ne maʻu ha tui mālohi kia Sīsū Kalaisi. Kapau ʻe lava, fakaafeʻi e kau akó ke ʻeke ki he tokotaha ko ʻení ha ngaahi fehuʻi hangē ko ʻení: “ʻOku tākiekina fēfē nai ʻe hoʻo tui kia Sīsū Kalaisí hoʻo ngaahi ngāué mo e ʻulungāngá? Ko e hā ha meʻa ʻokú ke fakahoko makehe koeʻuhí ko hoʻo tui kia Sīsū Kalaisí?” Fakaafeʻi ke nau omi mateuteu ke vahevahe ʻenau ngaahi sīpingá.

ʻĪmisi ke fakaʻaliʻalí: Fakakaukau ke tā pe fakaʻaliʻali ʻi he palakipoé ha fakatātā ʻo ha afi.

Fokotuʻu ki hono akoʻí ʻi he konifelenisi vitioó: Fakaafeʻi e kau akó ke hiki ʻenau ngaahi tali fekauʻaki mo e ngaahi sīpinga ʻo e tuí ʻi ha laʻipepa ʻe ua, ʻo hangē ko hono fakamatalaʻi ʻi he lēsoní. Hili iá, ʻoua ʻe fakaafeʻi e kau akó ke nau hiki holo ʻi he lokí, ʻai ke nau tauhoa pe ʻi ha fanga kiʻi kulupu iiki. Fakahinohino e kau akó ke puke ha laʻipepa ʻe taha ʻi honau nimá takitaha. ʻE lava leva ke fili ʻe he kau akó ʻi honau ngaahi loki fealēleaʻakí ʻa e nima toʻomataʻu pe nima toʻohema ʻo ha tokotaha ako ʻe taha ke fanongo ki heʻenau ngaahi talí. ʻE lava ke toe fai ʻe he kau akó ʻa e ʻekitivitī ko ʻení ʻi ha loki fealēleaʻaki ʻe taha mo ha kulupu foʻou ʻo e kau akó.

Fakataukei Fakatokāteliné: Sēmisi 2:17–18

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola fakataukei fakatokāteliné mo e kupuʻi lea fakafolofola mahuʻinga ʻi he Sēmisi 2:17–18 , fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke nau fakakaukau ki ha tefitoʻi moʻoni ʻo e ongoongoleleí ʻoku nau tui ki ai ka ʻe ala faingataʻa ke nau ngāueʻi. Kole ki he kau akó ke fakalaulauloto ki he meʻa te ne lava ʻo taʻofi kinautolu mei hono ngāueʻi e tefitoʻi moʻoni ko iá.

Naunau maʻá e kau akó: Pepa mo e helekosi.

Fokotuʻu ki hono akoʻí ʻi he konifelenisi vitioó: Ki he konga akoako fakahoko ʻo e lēsoní, fakakaukau ke fakaafeʻi e kau akó ke fili ha tūkunga ke aleaʻi fakataha. Fakaafeʻi ha tokotaha ako ʻe taha ke ne vahevahe ʻa e founga te nau fakaʻaongaʻi ai ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié ke tokoni ki he tokotaha ʻi he tūkunga ko ʻení. Kole ki ha tokotaha ako ʻe taha ke ne vahevahe ha toe ngaahi fakakaukau fekauʻaki mo e tefitoʻi moʻoni ko iá. Kapau ʻoku faingataʻa ki he kau akó ke fakaʻaongaʻi ha taha ʻo e ngaahi tefitoʻi moʻoni ʻo hono maʻu ʻo e ʻilo fakalaumālié, te ke lava ʻo fokotuʻu ha niʻihi ʻo e ngaahi fehuʻi kehe ʻoku hiki atu ʻi lalo ʻi he ngaahi ʻuluʻi tohi ʻoku ʻoatu ʻi he hili ʻa e tūkungá ofi ki he fakaʻosinga ʻo e lēsoní ki he fetalanoaʻakí pea fakaafeʻi e kau akó ke vahevahe ʻenau ngaahi fakakaukaú.

Sēmisi 3

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau fakafuofuaʻi ʻa e ngaahi lea ʻoku nau lea ʻakí mo e founga ʻoku uesia ai ʻe heʻenau ngaahi leá ʻenau feinga ke hoko ʻo hangē ange ko e Fakamoʻuí.

Teuteu ʻa e tokotaha akó: Fakaafeʻi e kau akó ke nau fakatokangaʻi e founga ʻoku uesia ai kitautolu mo e niʻihi kehé ʻe he lea ʻoku tau fakaʻaongaʻí. Fakaafeʻi kinautolu ke nau omi mateuteu ke vahevahe e meʻa naʻa nau fakatokangaʻí.

Ngaahi ʻīmisi ke fakaʻaliʻalí: Fakakaukau ke fakaʻaliʻali ha ngaahi fakatātā ʻo ha niʻihi fakafoʻituitui ʻoku kehekehe ʻenau ngaahi fepōtalanoaʻakí.
Laʻipepa Tufa: Teuteuʻi ha ngaahi tatau feʻunga ʻo e laʻipepa tufá maʻá e kau akó kotoa.

Fokotuʻu ki hono akoʻí ʻi he konifelenisi vitioó: Fakatatau ki he founga ʻe fekumi ai e kau akó ʻi he Sēmisi 3:2–12 ki he fakafehoanaki ʻoku fai ʻe Sēmisí, ʻe lava ke tokoni ha palakipoe fakaʻilekitulōnika ki he kau akó ke nau kau mo feakoʻiʻaki. Hangē ko ʻení, kapau ʻoku kole ki he kau akó ke nau kumi ha ngaahi fakataipe mei he Sēmisi 3:2–12 , te nau lava ʻo hiki pe tā fakanounou ʻi ha palakipoe fakaʻilekitulōnika ʻa e ngaahi fakataipe naʻe fakaʻaongaʻi ʻe Sēmisí ʻi heʻenau maʻu kinautolú. Pe, kapau ʻoku vahevahe ha ngaahi fakataipe mo e kau akó kimuʻa pea nau ako ʻenau ngaahi vēsí, ʻe lava ke hiki ʻe he kau akó ʻi ha palakipoe fakaʻilekitulōnika ʻa e ngaahi founga kehekehe ʻoku tatau ai ʻa e ʻeleló mo e ngaahi meʻa takitaha ʻi he fakafehoanaki ʻa Sēmisí.