Juan 14:1–6; 15:1–11

“Ako ang Dalan, ang Kamatuoran, ug ang Kinabuhi”

Panahon sa Iyang kataposang gabii kauban ang Iyang mga disipulo, si Jesukristo mitudlo kanila mahitungod sa Iyang kinaiyahan ug misyon. Iyang gitudlo nga Siya ang dalan pabalik sa Langitnong Amahan, ug Iyang gitandi ang Iyang relasyon ngadto sa Iyang mga disipulo ngadto sa mga sanga sa punoan sa ubas. Kini nga leksiyon makatabang ninyo sa pagpamalandong sa inyong relasyon kang Jesukristo ug kon unsaon ninyo sa pagsunod Kaniya ug pagdawat sa Iyang kalig-on ug suporta.

Pagtabang sa mga estudyante nga makatudlo. Kon ang mga estudyante hatagan og mga kahigayonan nga makatudlo sa ebanghelyo ngadto sa uban, ang ilang kaugalingong kahibalo ug pagpamatuod malig-on. Pangita og mga kahigayonan aron madapit ang mga estudyante nga makatudlo sa usag usa sa pormal o dili pormal nga mga paagi.

Pagpangandam sa estudyante: Dapita ang mga estudyante sa pagpangita o pagkuha og hulagway sa usa ka agianan o sa usa ka punoan sa ubas o kahoy nga adunay mga sanga. Hangyoa ang mga estudyante sa paghunahuna og mga paagi nga ang ilang hulagway nakapahinumdom nila kang Jesukristo ug dalhon ang ilang hulagway ngadto sa klase.

Posible nga mga Kalihokan sa Pagkat-on

Ikonsiderar ang mosunod nga mga opsiyon sa pagsugod sa leksiyon:

• Dapita ang mga estudyante sa pagpaambit sa mga hulagway nga ilang gikuha isip kabahin sa pagpangandam sa estudyante.

• Paghimo og usa ka agianan sa klasrom nga kinahanglan subayon sa mga estudyante.

• Ipakita sa mga estudyante ang usa ka sanga nga gamiton sa leksiyon nga magpakita og butang. Hisgoti ang koneksiyon sa maong sanga ngadto sa kahoy o sa punoan sa ubas diin kini gikan, ug pangutan-a unsay mahitabo karon nga ang sanga wala na nagkapot sa kahoy o punoan sa ubas.

• Pagpaambit og personal nga kasinatian nga may kalabotan sa leksiyon.

• Ipakita ang mga hulagway nga ania niini nga leksiyon mahitungod sa agianan o sa punoan sa ubas.

Hisgoti kauban sa mga estudyante kon sa unsang paagi ang agianan mapuslanon ug giunsa sa sanga pagdawat og kalig-on gikan sa punoan. Ikonsiderar ang pagpangutana sa mga estudyante kon sa unsang paagi si Jesukristo nahisama sa agianan o sa punoan.

Ang pipila ka kataposang pagtulon-an sa Manluluwas ngadto sa Iyang mga disipulo gituyo aron makatabang nila nga makasabot sa ilang relasyon ug pagpanginahanglan Kaniya. Ang Manluluwas mitandi sa Iyang Kaugalingon ngadto sa usa ka agianan, ingon man ngadto sa usa ka punoan sa ubas o kahoy nga adunay mga sanga. Paggahin og higayon sa paghunahuna mahitungod sa mga dapit sa inyong kinabuhi diin kamo nanginahanglan og tabang. Tingali mibati kamong nagkinahanglan og tabang samtang kamo naningkamot nga makabalik sa Langitnong Amahan. Lagmit mibati kamo nga nagkinahanglan og tabang alang sa mas dugang pa nga kalig-on sa pag-atobang og mga hagit sa inyong kinabuhi. Sa inyong pagtuon sa mga pagtulon-an sa Manluluwas, pangita og unsay inyong nakat-onan mahitungod Kaniya ug unsaon Niya pagtabang kaninyo.

Hunahunaa ang panginahanglan sa mga estudyante ug mga abilidad kon magdesider unsaon pagpahiangay ang content niini nga leksiyon. Ang mga estudyante makabenipisyo gikan sa pagbaton og personal nga panahon sa pagtuon ug pagpamalandong sa usa o duha sa mosunod nga mga opsiyon.

Makatabang usab ang paghatag sa mga estudyante og kahigayonan nga makapaambit sa ilang mga hunahuna ug mga pagpamatuod sa usag usa. Mahimo kini sa nagkalain-lain nga paagi. Ang mga estudyante mahimong hangyoon sa dili pa ang klase nga mag-andam aron motudlo og usa ka bahin niini nga leksiyon. Lain pang opsiyon mao ang pag-hatag, o pagtugot sa mga estudyante sa pagpili og, usa sa mosunod nga mga opsiyon sa pagtuon ug hangyoon ang mga estudyante sa pag-andam aron motudlo sa lain pang klasmeyt o sa tibuok klase.

Ang mga estudyante mahimong mogamit sa mosunod nga handout aron matun-an ug makaandam sa pagtudlo.

Si Jesukristo mao “ang dalan, ang kamatuoran, ug ang kinabuhi” ( Juan 14:6)

Basaha ang Juan 14:1–6 , nga mangita kon giunsa sa Manluluwas sa pagsaad nga tabangan kadtong mga mosunod Kaniya.

• Unsang mga kamatuoran ang gitudlo sa Manluluwas niini nga mga bersikulo?

• Unsa ang gingalan sa Manluluwas sa Iyang Kaugalingon diha sa bersikulo 6 ?

• Unsa ang gitudlo diha kaninyo sa matag ngalan mahitungod ni Jesukristo ug sa inyong relasyon Kaniya?

Kon naghimo kamo og lista sa daghang mga ngalan [title] ug mga tahas ni Jesukristo sa miagi nga leksiyon, mahimo ninyo kining dugangan sa unsay inyong mga nadiskobrehan sa Juan 14 .

Ang Basahon ni Mormon makapataas sa inyong pagsabot sa unsay inyong gitun-an sa Bag-ong Tugon. Basaha ang Mosiah 3:17 , ug hunahunaa kon sa unsang paagi kini nga bersikulo makatabang nato nga mas makasabot sa Juan 14:6 .

Si Presidente Dieter F. Uchtdorf nga kaniadto sakop sa Unang Kapangulohan mitudlo:

Gusto sa Dios nga makabalik kamo Kaniya, ug ang Manluluwas mao ang dalan [tan-awa sa Juan 14:6 ]. Gusto sa Dios nga makakat-on kamo sa Iyang Anak, si Jesukristo, ug makasinati sa dako nga kalinaw ug kalipay nga moab[o]t gumikan sa pagsunod sa dalan sa balaang pagkadisipulo.

(Dieter F. Uchtdorf, “Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 21)

• Kanus-a kamo o uban nga inyong nailhan nakasinati og halawom nga kalinaw ug kalipay nga miabot gumikan sa pagsunod kang Jesukristo?

• Unsa ang pipila sa paagi nga kita makasunod sa Manluluwas pabalik sa Langitnong Amahan?

• Unsaon nato sa pagkahibalo kon anaa ba kita sa hustong dalan?

Si Jesukristo mao “ang punoan” ( Juan 15:5)

Si Jesukristo migamit og usa ka pagkompara aron sa pagtudlo sa Iyang mga disipulo mahitungod sa ilang relasyon Kaniya. Basaha ang Juan 15:1–11 , nga mangita niini nga pagkompara.

Kon naghimo kamo og lista sa daghang mga ngalan [title] ug mga tahas ni Jesukristo sa miagi nga leksiyon, mahimo ninyo kining dugangan sa unsay inyong mga nadiskobrehan sa Juan 15 .

• Unsa sa inyong hunahuna ang gitudlo ni Jesukristo dinhi niini nga pagkompara?

• Unsa nga mga kamatuoran ang inyong nakat-onan gikan niini nga pagkompara mahitungod sa atong relasyon kang Jesukristo?

Si Elder Jeffrey R. Holland sa Korum sa Napulog Duha ka Apostoles mipasabot nga ang pagdapit sa Manluluwas nga mosunod Kaniya mao ang pagdapit kanato “sa pagpabilin … mopuyo sa kahangt[o]ran” (“Pabilin Kanako.” Liahona, Mayo 2004, 32). Si Elder Holland mipasabot nganong importante alang kanato ang pagdawat sa pagdapit sa Manluluwas nga magpabilin diha Kaniya.

Si Jesus miingon, “Kay kon wala ako, wala kamoy mahimo” [ Juan 15:5 ]. Ako mopamatuod nga mao kana ang kamatuoran sa Dios. Si Kristo mao ang tanan kanato ug kita gay[o]d “magpabilin” diha Kaniya sa kanunay, dili matar[o]g, makanunayon, sa kahangt[o]ran. Kay aron ang bunga sa ebanghelyo molipang ug mopanalangin sa atong mga kinabuhi, kita kinahanglan gy[o]d nga lig-ong magkupot Kaniya, ang Manluluwas natong tanan, ug niining Iyang Simbahan, diin nagdala sa Iyang balaang ngalan. Siya ang tinuod nga tanom nga parras nga mao ang atong tinuod nga tinubdan sa kalig-on ug ang mao lamang nga tinubdan sa kinabuhing dayon. Diha Kaniya dili lamang kita makalah[o]tay apan kita usab mopatigbabaw ug magmadaugon niining balaanong kawsa nga dili gayod mopakyas kanato.

(Jeffrey R. Jeffrey R. Holland, “Pabilin Kanako,” Ensign o Liahona, Mayo 2004, 32)

Ang Basahon ni Mormon makatabang ninyo nga madugangan ang inyong pagsabot sa unsay inyong gitun-an sa Bag-ong Tugon. Basaha ang Alma 26:12 , ug hunahunaa ang mahitungod sa kon unsay kalambigitan niini sa Juan 15:1–11 .

• Unsa ang pipila ka mga bunga (mga resulta o mga panalangin) nga inyong nakita sa inyong kinabuhi dihang naningkamot kamo nga pagpabilin diha kang Jesukristo?

• Unsa ang pipila ka mga aksiyon nga inyong mabuhat aron matabangan kamo nga magpabilin diha kang Jesukristo?

Kon ang mga estudyante nagtudlo sa usag usa, dapita sila nga mopaambit diha sa klase sa mga kamatuoran nga ilang natino, unsa ang ilang nakat-onan gikan sa ilang mga klasmeyt, ug ilang pagpamatuod kang Jesukristo. Dayga ang mga estudyante sa ilang pagtudlo, ug dasiga sila nga mopaambit ngadto sa ilang mga pamilya sa unsa ang ilang gitudlo ug nakat-onan.

Hatagi ang mga estudyante og panahon sa pagpamalandong kon unsa ang ilang gibati mahitungod kon sa unsang paagi ang Manluluwas makatabang nila sa ilang kasamtangan nga mga panginahanglan ug mga kahimtang. Ikonsiderar ang paghatag sa inyong pagpamatuod bahin sa Manluluwas o pagpaambit og personal nga kasinatian.

Komentaryo ug Background nga Impormasyon

Unsa ang ipasabot nga adunay daghang lawak sa balay sa Langitnong Amahan?

Si Propeta Joseph Smith (1805–44) mitudlo:

[Ang pamahayag] nga “Sa balay sa akong Amahan adunay daghang mga lawak” [ Juan 14:2 ] … ingon unta niini—“Sa gingharian sa akong Amahan adunay daghan nga mga gingharian,” aron kamo mahimong manununod sa Dios ug isigka-manununod kanako. … Adunay mga mansyon alang niadtong nagtuman sa celestial nga balaod, ug adunay lain nga mga mansyon alang niadtong wala makatuman sa balaod, ang matag tawo mahiadto asa siya angay.

(Mga Pagtulun-an sa mga Presidente sa Simbahan: Joseph Smith[2007], 262)

Dugang nga mga Kalihokan sa Pagkat-on

Paghimo og usa ka drowing

Ang ubang mga estudyante mopahayag sa ilang kaugalingon pinaagi sa art. Ikonsiderar ang pagdapit sa mga estudyante sa paghimo og usa ka drowing nga nagrepresentar sa unsay ilang nakat-onan mahitungod kang Jesukristo gikan sa Juan 14:1–6 o sa Juan 15:1–11 . Kon ang mga estudyante magtinudloay sa usag usa, kini nga pagdrowing mamahimong kabahin sa ilang leksiyon.

Video

Juan 14:6 . “Ako ang dalan, ang kamatuoran, ug ang kinabuhi”

Dapita ang mga estudyante sa pagpasabot kon sa unsang paagi nga si Jesukristo mao “ang dalan,” “ang kamatuoran” ug “ang kinabuhi.” Makakita sila og mga cross-reference nga nagpasabot niini nga mga tahas. Mahimo usab mopaambit ang mga estudyante og mga kasinatian sa pagtuman ni Jesukristo niining mga papel sa ilang kinabuhi.

Ipha ang pulong nga magpabilin

Tabangi ang mga estudyante nga makita kon sa unsang paagi ang mga kasagarang gigamit nga mga pulong o mga hugpong sa pulong sa kasulatan makapasabot og maayo sa usa ka importanteng mensahe. Ang pulong nga magpabilin gigamit sa makadaghang higayon diha sa Juan 15:4–10 . Dapita ang mga estudyante sa pag-ihap kon pila ka higayon makita kini nga pulong, sa pagmarka o sa paghimo og mugbo nga pahinumdom niini nga pulong diha sa ilang mga kasulatan, ug sa paghunahuna kon unsay tuyo sa pagbalik-balik kanunay og litok niini.

Juan 15:10 . “Kon tumanon ninyo ang akong sugo, magpabilin kamo sa akong gugma”

Pagdrowing og punoan sa ubas sa pisara, ug hangyoa ang mga estudyante sa pagdrowing og mga sanga nga idugtong sa maong punoan sa ubas aron pagrepresentar sa ilang kaugalingon. Dapita ang mga estudyante sa paglista og mga sugo sa pisara palibot sa punoan sa ubas. Hisgoti kon sa unsang paagi ang pagtuman sa mga sugo makatabang nato nga magpabilin diha sa gugma sa Manluluwas ug magpabiling nakadugtong sa punoan sa ubas.