Juan 14–17

Kinatibuk-ang Pagpasabot

Panahon sa Iyang kataposang gabii kauban sa Iyang mga tinun-an, si Jesukristo mitudlo ug mihupay kanila. Iyang gitudloan sila giunsa nga Siya mao “ang dalan, ang kamatuoran, ug ang kinabuhi” (Juan 14:6) ug unsaon nila pagpakita sa ilang gugma alang Kaniya pinaagi sa pagsunod sa Iyang mga sugo. Ang Manluluwas midapit kanila nga mosunod Kaniya ug gitudloan sila mahitungod sa tahas sa Espiritu Santo. Si Jesukristo nag-ampo alang kanila diha sa Iyang paghalad sa Iyang talagsaon nga Pagpataliwala nga Pag-ampo.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

Juan 14:1–6; 15:1–11

Katuyoan sa leksiyon: Kini nga leksiyon makatabang sa mga estudyante nga makapamalandong sa ilang relasyon kang Jesukristo ug unsaon nila pagsunod Kaniya ug pagdawat sa Iyang kalig-on ug suporta.

Pagpangandam sa estudyante: Dapita ang mga estudyante sa pagpangita o pagkuha og hulagway sa usa ka agianan o sa usa ka punoan sa ubas o kahoy nga adunay mga sanga. Hangyoa ang mga estudyante nga maghunahuna mahitungod sa mga paagi diin ang ilang hulagway makapahinumdom kanila kang Jesukristo ug sa pagdala sa ilang hulagway ngadto sa klase.

Mga kahigayonan sa pagtudlo: Ikonsiderar ang pagdapit sa mga estudyante sa pagtudlo panahon niini nga leksiyon. Mahimong mag-andam daan ang mga estudyante sa pagtudlo sa leksiyon, o mahimo silang mangandam ug pagtudloon panahon sa klase.
Handout: “Si Jesukristo, mao ‘ang Dalan, ang Kamatuoran, ug ang Kinabuhi’ (Juan 14:6)”
Butang: Usa ka sanga o usa ka bahin sa punoan sa ubas

Videosugyot alang sa video conference nga pagtudlo: Ikonsiderar ang pagbahin sa mga estudyante ngadto sa gagmayng breakout nga mga grupo aron itudlo ang ilang giandam nga leksiyon ngadto sa usa ka klasmeyt.

Juan 14:15–31; 15:10–14

Katuyoan sa leksiyon: Kini nga leksiyon makatabang sa mga estudyante nga makapakita sa ilang gugma ngadto sa Langitnong Amahan ug kang Jesukristo pinaagi sa pagsunod sa Ilang mga sugo.

Pagpangandam sa estudyante: Dapita ang mga estudynate sa pagtan-aw sa “Kon Nahigugma Kamo Kanako, Inyong Pagatumanon ang Akong mga Sugo”, sa https://www.churchofjesuschrist.org/study/general-conference/2015/10/if-ye-love-me-keep-my-commandments?lang=ceb sa Oktobre 2015 nga Kinatibuk-ang Komperensiya ni Carole M. Stephens, kanhi sakop sa Kinatibuk-ang Kapangulohan sa Relief Society, gikan sa time code 0:00 hangtod 4:31. Hangyoa ang mga estudyante sa paghunahuna kon unsay ikatudlo niini nga istorya mahitungod sa kon nganong ang Ginoo mihatag kanato niini nga mga sugo.

Personal nga mga sanglitanan: Pangandami ang pagpaambit og sanglitanan diin ang mga sakop sa pamilya o ang uban nagpakita sa ilang paghigugma kaninyo.
Mga Video: “Kon Nahigugma Kamo Kanako, Inyong Pagatumanon ang Akong mga Sugo”; “Pabilin sa Akong Gugma” (15:08; tan-awa gikan sa time code 14:27 hangtod 14:50)

Sugyot alang sa video conference nga pagtudlo: Hangyoa ang mga estudyante sa pagdapit og usa ka ginikanan o laing sakop sa pamilya aron moapil sa panaghisgot mahitungod sa pag-ila kon ang usa ka tawo nahigugma ba sa uban.

Juan 14–16

Katuyoan sa leksiyon: Kini nga leksiyon makatabang sa mga estudyante nga maila kon sa unsang paagi ang Espiritu Santo motuman sa Iyang mga tahas sa ilang kinabuhi.

Pagpangandam sa estudyante: Dapita ang mga estudyante sa pag-andam aron pagtubag sa pangutana nga “Sa unsang paagi ang Espiritu Santo motabang kaninyo”? uban sa mga sanglitanan gikan sa mga kasulatan o personal nga mga kasinatian.

Mga materyal alang sa mga estudyante: Gagmayng piraso sa papel o mga kard sa pahinumdom nga kasulatan sa mga estudyante
Content nga ipasundayag: Ang tsart alang sa mga tahas sa Espiritu Santo

Sugyot alang sa video conference nga pagtudlo: Paghimo og shared nga dokumento nga naglangkob sa maong tsart. Awhaga ang mga estudyante sa pag-type sa ilang mga tubag ngadto sa tsart. Ang mga estudyante mahimong i-assign og piho nga mga dapit. Ipakita ang nakompleto nga tsart nga makita sa tanan.

Juan 17

Katuyoan sa leksiyon: Kini nga leksiyon makaawhag sa mga estudyante nga makaila sa Langitnong Amahan ug niJesukristo sa mas personal nga paagi sa ilang kinabuhi.

Pagpangandam sa estudyante: Awhaga ang mga estudyante nga mobasa sa 3 Nephi 19:16, 26–33 ug sa pagpamalandong unsa’y pagbati kon makadungog sa Manunubos nga nag-ampo sa Langitnong Amahan alang kanila.

Sugyot alang sa video conference nga pagtudlo: Ikonsiderar ang paggamit sa sugyot nga anaa sa “Dugang nga mga Kalihokan sa Pagkat-on” nga seksiyon niini nga leksiyon nga giulohan og “Pagdrowing nga kalihokan—pagkahimong usa” aron matabangan ang mga estudyante nga makasabot nga sa kinaiyanhong paagi mas mahiusa kita sa usa’g usa kon ang matag usa kanato magpaduol kang Jesukristo.

Doktrinal nga Kahanas: Juan 17:3

Katuyoan sa leksiyon: Kini nga leksiyon makatabang sa mga estudyante nga makamemorya sa pakisayran sa doktrinal nga kahanas ug sa mahinungdanongn nga hugpong sa kasulatan alang sa Juan 17:3 , makapasabot sa doktrina, ug makagamit sa mga baroganan sa pag-angkon og espirituhanong kahibalo sa tinuod nga kahimtang sa kinabuhi.

Pagpangandam sa estudyante: Awhaga ang mga estudyante sa pag-ila og tawo nga ilang kaila kinsa tingali nga nakaila kaayo sa Langitnong Amahan ug kang Jesukristo. Dapita ang mga estudyante sa pagpangutana niana nga tawo kon unsay nakatabang niya aron makaila sa Langitnong Amahan ug ni Jesukristo.

Content nga ipakita: Mga panudlo ug mga pangutana ubos sa matag tulo ka mga ulohan nga katugbang sa mga baroganan sa pag-angkon og espirituhanong kahibalo

Sugyot alang sa video conference nga pagtudlo: Ikonsiderar ang paggamit og breakout room nga function aron matugotan ang mga estudyante nga magtrabaho sa ginagmay nga grupo sa paggamit sa mga baroganan sa pag-angkon og espirituhanong kahibalo ngadto sa senaryo niini nga leksiyon. Dayon dalha ang klase balik aron sa paghisgot unsa ang nakat-onan sa matag grupo.