Doktrinal nga Kahanas: Juan 17:3

Pagkaila sa Langitnong Amahan ug kang Jesukristo

Sa miaging leksiyon, “Juan 17,” inyong nakat-onan nga kita mouswag paingon sa kinabuhing dayon pinaagi sa pagkaila sa Langitnong Amahan ug kang Jesukristo. Kini nga leksiyon makatabang ninyo sa pagmemorya sa pakisayran sa doktrinal nga kahanas ug sa mahinungdanon nga hugpong sa pakisayran sa kasulatan alang sa Juan 17:3, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Balaang pagtahod sa mga ngalan sa Dios. Tungod kay ang mga ngalan sa Dios nga Amahan ug sa Iyang Anak, nga si Jesukristo, mahinungdanon kaayo, siguroha ang pag-awhag ug pagpakita og balaang pagtahod samtang gigamit ang Ilang mga ngalan (tan-awa sa Doktrina ug Mga Pakigsaad 63:61).

Pagpangandam sa estudyante: Awhaga ang mga estudyante sa pag-ila og tawo nga ilang kaila kinsa tingali nga nakaila kaayo sa Langitnong Amahan ug kang Jesukristo. Dapita ang mga estudyante sa pagpangutana niana nga tawo kon unsay nakatabang niya aron makaila sa Langitnong Amahan ug ni Jesukristo.

Posible nga mga Kalihokan sa Pagkat-on

Kini nga leksiyon sa tudling sa doktrinal nga kahanas gituyo nga itudlo human sa leksiyon sa “Juan 17,” nga mao ang pangkonteksto nga leksiyon para sa tudling sa doktrinal nga kahanas sa Juan 17:3 . Kon kini nga leksiyon sa tudling sa doktrinal nga kahanas kinahanglang ibalhin ngadto sa laing semana, siguroha nga itudlo usab ang tukma nga pangkonteksto nga leksiyon nianang semanaha usab.

Imemorya ug ipasabot

Tabangi ang mga estudyante nga mamemorya ang pakisayran ug ang mahinungdanon nga hugpong sa kasulatan. Ang mosunod nga kalihokan usa ka paagi aron matabangan sila nga mabuhat kini.

Ipa-recite og kusog sa daghang higayon ang pakisayran sa doktrinal nga kahanas Juan 17:3 ug ang mahinungdanon nga hugpong sa kasulatan: “Ug kini mao ang kinabuhing dayon, nga ang mga tawo moila kanimo nga mao ang bugtong matuod nga Dios ug kang Jesukristo.”Sa laing palid sa papel, isulat ang pakisayran nga Juan 17:3 ug ang unang mga letra sa matag pulong sa bersikulo: U k m a k d n a m t m k n m a b m n D u k J. Gamit ang unang mga letra sa bersikulo, sulayi sa pag recite ang kapanguhaan ug mahinungdanon nga hugpong sa kasulatan. Kon kamo magkahimo nang mas masaligon, sulayi sa pag-recite ang pakisayran ug ang hugpong sa pulong gikan sa panumdoman.

Aron matabangan kamo nga mas makasabot sa kahulogan niini nga kasulatan, ipasabot ang mga kamatuoran nga gitudlo sa Juan 17:3 sa kaugalingon ninyong mga pamulong. Ilakip ang mosunod:

1. Ang kahulugan sa hugpong sa pulong nga “kinabuhing dayon.”

2. Ubang mga paagi nga kita “makaila” sa Langitnong Amahan ug kang Jesukristo.

Dapita ang pipila ka estudyante sa pagpakigbahin sa ilang mga pagpasabot diha sa klase. Kon ang mga estudyante nagkinahanglan og tabang sa pagsabot sa kahulogan niini nga tudling, gahini og panahon ang paghisgot niini sa dili pa mopadayon sa leksiyon.

Adunay daghan nga pamahayag diha sa “Komentaryo ug Background nga Impormasyon” nga seksiyon niini nga leksiyon ug sa miagi nga leksiyon, “Juan 17,” nga mahimong gamiton aron matabangan ang mga estudyante kon gikinahanglan.

Pagbansay sa paggamit

Hunahunaa kon unsa kasinati ang mga estudyante sa mga baroganan sa pag-angkon og espirituhanong kahibalo kon magdesisyon kon unsa kataas ang gikinahanglan nga panahon alang sa mosunod nga gisugyot nga pagrebyo.

Rebyoha ang mga parapo [paragraph] 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Hunahunaa kon unsaon kaha ninyo sa pagpasabot kini nga mga baroganan ngadto sa tawo nga wala pa sukad makadungog niini.

Kon makatabang, iparespares ang mga estudyante ug dapita sila nga magbansay sa pagpaambit sa ilang mga pagpasabot niini nga mga baroganan sa makusog.

Basaha ang mosunod nga senaryo:

Human sa miting sa puasa ug pagpamatuod, inyong namatikdan nga ang inyong higala nga si Julia morag naguol. Sa inyong paglakaw pauli kauban siya, miingon siya nga atol sa miting karon iyang naamgohan nga wala diay kaayo siya makaila sa Langitnong Amahan ug kang Jesukristo sigon sa iyang gusto. Iyang gihulagway ang pagbati sa kaguol ug kahidlaw ana nga matang sa relasyon uban Kanila nga iyang namatikdan didto sa pipila adtong mipaambit sa ilang mga pagpamatuod. Mihukom mo nga maghunahuna gayod ug mag-ampo sa mosunod nga mga adlaw kon unsaon sa pagtabang kang Julia.

Gamita ang mga baroganan sa pag-angkon og espirituhanong kahibalo ug ang mosunod nga mga pangutana ug mga kalihokan aron matabangan kamo sa pagkonsiderar kon usa ang inyong isulti ug buhaton aron matabangan si Julia. Basin gusto sab ninyong isulat ang inyong nakat-onan ug ang bisan unsang impresyon nga inyong nadawat samtang kamo nag-andam.

Ikonsiderar ang pagdapit sa mga estudyante sa pag-andam sa ilang mga tubag pinaagi sa pagtinabangay kauban sa kapares. Sultihi sila nga aduna silay higayon sa pagpaambit unsay ilang nakat-onan ngadto sa ubang mga estudyante.

Susihon ang mga konsepto ug mga pangutana inubanan sa mahangturong panglantaw

• Ngano kaha nga ang Langitnong Amahan gusto nga kita makaila Kaniya ug sa Iyang Anak, si Jesukristo?

• Nganong gusto man usab kamo nga makaila Kanila niining kinabuhia?

Tinguhaon ang dugang nga panabot pinaagi sa balaanong gipili nga mga tinubdan

• Sa unsang paagi ang pagtuon sa pag-ampo sa Manluluwas diha sa Juan 17:3 makatabang kang Julia sa iyang mga tinguha?

Paglista og pipila ka maayong mga kapanguhaan nga tingali makatabang kang Julia aron makaila sa Langitnong Amahan ug kang Jesukristo.

• Unsaon ni Julia paggamit sa mga anaa nga mga kapanguhaan aron siya matabangan nga mas makaila sa Langitnong Amahan ug kang Jesukristo? (Pananglitan, unsa ang mahinungdanong mga pulong ang mahimo niyang pangitaon diha sa Giya ngadtto sa mga Kasulatan , diha sa Giya ngadto sa mga Kasulatan , saChurchofJesusChrist.org, o sa Gospel Library nga app?)

Paggahin og pipila ka minutos sa pagtuon sa balaanong gitudlo nga mga tinubdan aron makat-on ug dugang mahitungod sa Langitnong Amahan ug kang Jesukristo ug unsaon nga mas makaila Kanila.

Dapita ang mga estudyante sa pagpaambit unsay ilang nakat-onan ug giunsa nila pagkakita sa maong impormasyon. Kini makatabang sa ubang mga estudyante aron makat-on unsaon nga mas makagamit sa anaa nga mga kapanguhaan.

Lihokon inubanan sa hugot nga pagtuo

Dapita ang mga estudyante kinsa misunod sa sugyot sa pagpangandam sa estudyante sa pagpaambit sa unsay ilang nakat-onan sa ilang pagtubag sa mosunod nga mga pangutana.

• Sa unsang paagi nga ang pagpaningkamot nga makaila sa Langitnong Amahan ug ni Jesukristo usa ka lihok sa hugot nga pagtuo?

• Unsa ang nabuhat ninyo o sa tawo nga inyong kaila aron mas makila sa Langitnong Amahan ug ni Jesukristo nga inyong ikasugyot ngadto ni Julia?

• Unsa nga mga hugpong sa pulong ang inyong makita diha sa mga parapo 5–7 sa “Pag-angkon og Espirituhanong Kahibalo” nga seksiyon sa Mahinungdanong Dokumento sa Doktrinal nga Kahanas (2022) nga makatabang sa uban kinsa nagbuhat sa maayong mga butang apan wala gihapon mobati nga duol sa Dios nga maoy ilang gusto?

Dapita ang matag pares nga motipon ngadto sa ubang magkapares ug ipaambit sa usag usa unsa ang ilang nakita samtang gigamit ang mgabaroganan sa pag-angkon og espirituhanong kahibalo.

Rebyo sa doktrinal nga kahanas

Sa sinugdanan o kataposan sa umaabot nga leksiyon, pagtagana og dili sobra sa 3 hangtod sa 5 ka minuto ang pagrebyo sa tudling sa doktrinal nga kahanas. Ikonsiderar nga isulat ang pakisayran sa kasulatan ug ang mahinungdanon nga hugpong sa kasulatan alang sa Juan 17:3 ngadto sa pisara kauban sa mga pulong nga isayop ang pagkahan-ay. Dayon dapita ang mga estudyante sa paghan-ay og balik sa mga pulong.

Komentaryo ug Background nga Impormasyon

Unsa ang kinabuhing dayon?

Ang Kinabuhing dayon mao ang hugpong sa pulong nga gigamit sa kasulatan sa pagpasabot sa kalidad sa kinabuhi nga gipuy-an sa atong Mahangturon nga Amahan. … Ang kinabuhing dayon, o kahimayaan, mao ang pagpuyo sa presensiya sa Dios ug pagpadayon isip mga pamilya (tan-awa sa Doktrina ug Mga Pakigsaad 131:1–4).

(Mga Hilisgotan sa Ebanghelyo,“Kinabuhing Dayon,” topics.ChurchofJesusChrist.org)

Unsaon nato sa pagkaila sa Amahan ug sa Anak nga kita mismo?

Si Elder Robert D. Hales (1932–2017) sa Korum sa Napulog Duha ka mga Apostoles mitubag niini nga pangutana.

Pinaagi sa personal nga pagpadayag. Ang personal nga pagpadayag maoy paagi sa Langitnong Amahan sa pagtabang kanato nga makaila Kaniya ug sa Iyang Anak, makat-on ug mosunod sa ebanghelyo, molahutay hangt[o]d sa katap[o]san diha sa pagkamatar[o]ng, ug magpakatak[o]s alang sa kinabuhing dayon—aron makabalik ngadto sa Ilang presensiya.

(Robert D. Hales, “(Personal nga Pagpadayag: Ang mga Panudlo ug mga Ehemplo sa mga Propeta,” Liahona, Nob. 2007, 87)

Unsa ang akong buhaton kon ako wala makasiguro nga ako mituo sa Dios?

Si Elder Robert D. Hales (1932–2017) sa Korum sa Napulog Duha ka mga Apostoles miingon:

Kon dili kamo makahinumdom nga nagtuo sa Dios o kon kamo mihunong sa pagtuo o kon kamo mituo apan walay tinuod nga ikapakita nga kamatuoran, dapiton ko kamo sa pagpaningkamot og usa ka pagpamatuod karon sa Dios. …

… Uban sa inyong kaugalingong pagpamatuod sa Dios, makapanalangin kamo sa inyong pamilya, sa inyong mga kaliwatan, sa inyong mga higala, sa inyong kaugalingon nga kinabuhi—sa tanan nga inyong gimahal. Ang inyong personal nga kahibalo sa Dios dili lamang kay mao ang pinakadako nga gasa nga inyong ikahatag sukad, apan makadala kini kaninyo sa pinakadako nga kalipay nga sukad inyong maangkon.

… Ako mosaad nga kon kamo ug ang inyong mga gihigugma mangita Kaniya sa tanang pagpaubos, sa kinasingkasing, ug sa kakugi, kamo masay[o]d uban sa kasigurohan usab. Ang inyong pagsaksi moab[o]t.

(Robert D. Hales, “Nagpangita aron Makaila sa Dios, Atong Langitnong Amahan, ug sa Iyang Anak, si Jesukristo,”o Liahona, Nob. 2009, 32)