Juan 14:15–31; 15:10–14

“Kon Nahigugma Kamo Kanako, Tumana Ninyo ang Akong mga Sugo”

Jesus teaches about forgiveness to Peter.

Sa dihang ang Manluluwas ug ang Iyang Apostoles nagsaulog sa Pagsaylo [Passover] didto sa lawak sa itaas, ang Manluluwas mitudlo sa Iyang Apostoles og importanteng mga kamatuoran. Sa nagsingabot pa ang Iyang pag-antos sa Getsemani ug sa Kalbaryo, gitudloan ni Jesus kining mga tawhana kinsa Iya kaayong gihigugma, “Kon nahigugma kamo kanako, tumana ninyo ang akong mga sugo” (Juan 14:15). Kini nga leksiyon makatabang ninyo nga makapakita sa inyong gugma ngadto sa Langitnong Amahan ug kang Jesukristo pinaagi sa pagsunod sa Ilang mga sugo.

Pagpaniid ug pag-ila. Paggahin og oras sa pagpaniid sa mga estudyante, ug tinguhaa ang panabang sa Espiritu sa pag-ila sa ilang mga gikinahanglan aron ang leksiyon mapahiangay sigon niana nga paagi. Ayaw panubrai ang inyong kabalaka bahin sa pagtudlo sa materyal sa leksiyon o kon unsay sunod nga isulti; kini posibling makaapekto sa panginahanglan sa mga estudyante ug sa mga pag-aghat sa Espiritu Santo.

Posible nga mga Kalihokan sa Pagkat-on

Ikonsiderar ang pagsugod sa klase pinaagi sa pagpaambit og personal nga mga ehemplo sa mga sakop sa pamilya nga nagpakita og paghigugma sa usag usa. Agig puli, dapita ang mga estudyante sa paghisgot sa mosunod nga mga pangutana.

Sa unsang paagi kamo makapakita og gugma?

Unsaon ninyo sa pagkahibalo kon ang usa ka tawo nahigugma kaninyo? Unsa nga mga pulong, mga buhat, o mga kinaiya ang nagpaila sa ilang gugma?
Sa unsang paagi nga kamo makapakita sa inyong gugma alang sa uban?
Unsa kaha kon kamo nahigugma sa usa ka tawo, apan ang inyong kinaiya o mga buhat wala sa kanunay magpakita og gugma? Unsa kaha ang inyong mahimo?

Samtang ang Manluluwas padayon sa pagtudlo sa Iyang Apostoles panahon sa Kataposang Panihapon, Iyang gitudlo ang Iyang gugma alang kanato ug gitudlo unsaon nato pagpakita sa atong gugma alang Kaniya.

Depende sa mga panginahanglanon ug mga abilidad sa mga estudyante, ang matag estudyante mahimong mobasa sa tanang mosunod nga mga bersikulo, o ang klase mahimong tungaon ug ang matag katunga hatagan og usa sa mga tudling.

Tun-i ang Juan 14:15, 21, 23–24 ug ang Juan 15:10–14 , nga mangita sa unsay gisulti sa Manluluwas nga atong mahimo aron makapakita sa atong gugma alang Kaniya ug sa Langitnong Amahan.

Kon makahuman na sa pagbasa ang mga estudyante, awhaga sila sa pagpangutana o sa pagkomentaryo mahitungod sa unsa ang ilang nabasa. Samtang buhaton nila kini, tabangi sila sa pag-ila kon sa unsang paagi kita makapakita sa atong gugma sa Dios, ug usab tabangi sila sa paglista sa mga pulong o mga hugpong sa pulong nga nagpakita sa gugma sa Dios alang kanato.

Unsa ang gipasabot og maayo sa Manluluwas dinhi niini nga mga tudling mahitungod sa unsaon nato pagpakita og gugma alang Kaniya?

Ikonsiderar nga isulat sa pisara ang mosunod o kaparehas nga kamatuoran nga nakita sa mga estudyante: Atong mapakita ang atong gugma alang kang Jesukristo pinaagi sa pagtuman sa Iyang mga sugo.

Unsa ang gitudlo niini nga mga bersikulo mahitungod sa gugma sa Manluluwas alang kaninyo?
Unsa ang pipila ka sitwasyon diin ang mga kamatuoran nga gitudlo sa Manluluwas niini nga mga bersikulo makatabang?

Kon ang mga estudyante gidapit sa pagtan-aw sa video isip kabahin sa ilang pagpangandam sa estudyante, dapita sila sa paghisgot kon unsay ilang nakat-onan mahitungod sa kon nganong ang Dios naghatag kanato og mga sugo, kay sa tan-awon pag-usab ang video diha sa klase. O ang mga estudyante mahimong motan-aw sa video nga “Kon Nahigugma Kamo Kanako, Inyong Pagatumanon ang Akong mga Sugo” gikan sa time code 0:00 hangtod 4:31, nga makita sa https://www.churchofjesuschrist.org/study/general-conference/2015/10/if-ye-love-me-keep-my-commandments?lang=ceb, o basahon ang pamahayag sa ubos.

Si Sister Carole M. Stephens, kanhi Kinatibuk-ang Presidente sa Relief Society, nagtudlo mahitungod sa motibo sa Dios sa Iyang paghatag kanato og mga sugo ug sa atong motibo sa pagsunod niini.

Kon mahimo, tan-awa ang video nga “Kon Nahigugma Kamo Kanako, Inyong Pagatumanon ang Akong mga Sugo” gikan sa time code 0:00 to 4:31, nga anaa sa https://www.churchofjesuschrist.org/study/general-conference/2015/10/if-ye-love-me-keep-my-commandments?lang=ceb.Niini nga video, si Sister Carole M. Stephens, kanhi kinatibuk-ang Presidente sa Relief Society, mipaambit og iyang kasinatian kauban sa iyang anak nga babaye nga si Chloe.

4:2

Kita mobati usahay nga ang mga balaod sa [Dios] nagpugong sa atong personal nga kagawasan, nagkuha gikan kanato sa atong kabubut-on, ug naglimit sa atong pagtubo. Apan samtang kita naninguha og mas dakong pagsab[o]t, samtang kita nagtugot sa atong Amahan sa pagtudlo kanato, magsugod kita sa pagkahibalo nga ang Iyang mga balaod mga timaan sa Iyang gugma alang kanato ug ang pagkamasulundon ngadto sa Iyang mga balaod maoy usa ka pahayag sa atong gugma alang Kaniya.

(Carole M. Stephens, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Nob. 2015, 119)

Ikonsiderar ang paghangyo og pipila ka estudyante sa pagtabang og himo sa mosunod nga lista pinaagi sa pagsulat sa mga tubag sa ilang mga higala diha sa pisara.

Paglista og pipila ka balaod ug mga sugo nga gibati ninyo nga nakapakita sa gugma sa Langitnong Amahan alang kaninyo. Aron matabangan kamo sa paghunahuna og pipila ka sugo, mahimo ninyong irebyo ang Napulo ka Sugo (tan-awa sa Exodo 20:3–17) o sa Alang sa Kalig-on sa mga Kabatan-onan[nga booklet, 2011].

Sa unsang paagi ang mga sugo nga inyong nalista usa ka “pagpadayag sa gugma sa [Dios] alang kanato?
Sa unsang paagi ang inyong kamasulundon niini nga mga sugo nahimo nga usa ka “pagpahayag sa [inyong] gugma alang Kaniya”?

Pagpili og usa sa mga sugo diha sa inyong lista. Posible nga usa kini ka butang nga inyong gipaningkamotan o usa ka butang diin kamo gitintal aron masupak apan gipili ang pagsunod.

I-validate ang mga paningkamot sa mga estudyante sa pagkamasulundon pinaagi sa pag-ila sa pipila ka sugo nga ilang ginatuman, ug tabangi sila nga matimbang-timbang ang ilang tinguha sa pagtuman niadto nga mga sugo.

Ikonsiderar ang pagpakita sa mosunod nga mga pangutana ug paghatag sa mga estudyante og igong oras aron sa mahunahunaong paagi makapamalandong ug makasulat sa ilang mga tubag diha sa ilang mga journal sa pagtuon. Pagmahunahunaon ug pagmabination bahin niini nga mga pangutana.

Ang mosunod nga mga pangutana makatabang ninyo sa pagtimbang-timbang sa inyong mga tinguha sa pagtuman sa mga sugo sa Dios. Samtang maghunahuna kamo mahitungod sa inyong mga tubag, importante nga mahibaloan nga tingali kamo adunay lainlaing mga rason sa pagtuman sa mga sugo. Bisan unsa pay inyong kasamtangan nga mga tinguha, ipadayon ang pagkamasulundon, ug sa igong panahon ang inyong pagpaninguha sa pagsunod tungod sa paghigugma molambo.

Unsa ang nakapadasig kaninyo sa pagtuman niini nga sugo?
Unsa ang inyong gibati mahitungod sa inyong mga rason sa pagtuman sa mga sugo itandi sa ehemplo sa Ginoo bahin sa pagsunod tungod sa gugma?
Ngano kaha nga ang nagpaluyong mga rason sa inyong kamasulundon (sa inyong mga tinguha) importante man?
Unsa nga tambag ang inyong ihatag ngadto sa tawo nga nangandoy nga mosunod sa mga sugo sa Dios tungod sa gugma?

Ang ehemplo sa atong Manluluwas bahin sa gugma

Si Jesukristo naghatag kanato og hingpit nga sanglitanan kon unsaon pagsunod ang mga balaod ug mga sugo sa Dios tungod sa tiunay nga gugma. Human sa Kataposang Panihapon, miingon Siya, “Apan kinahanglan nga mahibalo ang kalibotan nga nahigugma ako sa Amahan. Busa gibuhat ko ang tanan nga iyang gisugo kanako” ( Juan 14:31). Dayon si Jesus miadto aron mag-antos alang sa atong mga sala ug sa atong “mga sakit ug mga kasakit ug mga pagtintal sa matag matang” ( Alma 7:11) didto sa Tanaman sa Getsemani ug usab sa krus.

Nganong ang Manluluwas andam man nga mosunod sa Langitnong Amahan? (Tan-awa sa Juan 15:13 ; Hebreo 12:2 .)

Si Elder D. Todd Christofferson sa Korum sa Napulog Duha ka Apostoles nagdapit kanato sa mainampingong paghunahuna unsa ang idasig sa gugma ni Jesukristo ngari kanato nga buhaton. Mahimo ninyong tan-awon ang video nga “Magpabilin Kamo sa Akong Gugma,” nga anaa sa https://www.churchofjesuschrist.org/study/general-conference/2016/10/abide-in-my-love?lang=ceb, gikan sa time code 14:27 hangtod 14:50, o basahon ang mosunod nga pamahayag:

15:8

Dili ba ninyo higugmaon Siya kinsa nahigugma kaninyo og una? [tan-awa sa 1 Juan 4:19 ]. Dayon tumanon ang Iyang mga sugo [tan-awa sa Juan 14:15 ]. Dili ba ninyo higalaon Siya kinsa mitugyan sa Iyang kinabuhi para sa Iyang mga higala? [tan-awa sa Juan 15:13 ]. Dayon tumana ang Iyang mga sugo [tan-awa sa Juan 15:14 ]. Dili ba kamo magpabilin diha sa Iyang gugma ug modawat sa tanan nga mabination Niyang gitanyag kaninyo? Dayon tumana ang Iyang mga sugo [tan-awa sa Juan 15:10 ].

(D. Todd Christofferson, “Pabilin sa Akong Gugma,” Liahona, Nob. 2016, 51)

Sa unsang paagi ang inyong pasalig alang sa dugang nga kamasulundon, nga gibase sa gugma, maka-impluwensiya sa inyong pakigrelasyon sa Langitnong Amahan ug kang Jesukristo? (Tan-awa sa Mosiah 5:13 .)

Samtang kamo naningkamot sa pagtuman sa mga sugo tungod sa gugma alang sa Langitnong Amahan ug kang Jesukristo, mobati kamo og dugang sa Ilang gugma diha sa inyong kinabuhi (tan-awa sa Juan 14:21). Kon kamo naglisod sa pagkahimong masulundon, o bisan sa pagtinguha nga magmasulundon, ang Langitnong Amahan makatabang kaninyo kon kamo mapaubsanong mohangyo Kaniya og kabag-ohan sa kasingkasing. Hinumdumi, usab, nga usa sa mga sugo mao ang paghinulsol, ug kita makatuman niini nga sugo samtang anaa sa paningkamot sa pagbuntog sa atong mga kahuyang.

Komentaryo ug Background nga Impormasyon

Nganong ang Ginoo nagkinahanglan sa atong pakamsulundon sa Iyang mga sugo?

Si Presidente Dallin H. Oaks sa Unang Kapangulohan mitudlo:

Gikinahanglan sa Dios kanato ang pagtuman sa Iyang mga sugo tungod kay pinaagi lamang nianang pagkamasulundon, lakip sa paghinulsol, kita makabalik sa pagpuyo diha sa Iyang presens[i]ya ug mahimong hingpit sama Kaniya.

(Dallin H. Oaks, “Duha ka Dagkong mga Sugo,” Liahona, Nob. 2019, 74)

Importante ba kon nganong ako misunod sa mga sugo?

Ang matag usa kanato kinahanglan mangutana sa atong mga kaugalingon ngano nga kita mosunod sa mga kasugoan sa Dios. Kini tungod ba kay nahadlok kita og silot? Kini tungod ba kay nagtinguha kita og mga ganti alang sa pagpuyo og usa ka maayo nga kinabuhi? Kini tungod ba kay gihigugma nato ang Dios ug si Jesukristo ug buot moserbisyo Kanila?

Mas maayo nga mosunod sa mga kasugoan tungod kay nahadlok kita og silot kay sa dili gay[o]d mosunod niini. Apan kita mas labaw nga malipayon kon kita mosunod sa Dios tungod kay kita nahigugma Kaniya ug buot mosunod Kaniya. Kon kita mosunod Kaniya sa kinabubut-on, Siya makapanalangin kanato sa walay pagpugong. Siya miingon, “Ako, ang Ginoo, … nahimuot sa pagpasidungog ngadto kinsa nag-alagad kanako sa pagkamatar[o]ng ug diha sa kamatuoran ngadto sa katapusan” [ Doktrina ug Mga Pakigsaad 76:5 ]. Ang pagkamasulundon nagtabang usab kanato sa pag-uswag ug paghimo nga mas mahisama sa atong Langitnong Amahan. Apan kadto nga walay gibuhat hangt[o]d nga sila gimandoan ug dayon mituman sa mga kasugoan sa dili andam nga paagi mawagtangan sa ilang ganti [tan-awa sa Doktrina ug mga Pakigsaad 58:26–29 ].

(Mga Baroganan sa Ebanghelyo [2009], 250–2)

Dugang nga mga Kalihokan sa Pagkat-on

Juan 15:18–25 . “Kon ang Kalib[o]tan Magadumot Kaninyo”

Kon ang mga estudyante maglisod sa pagsunod sa mga sugo tungod sa mga kalibotanong mga impluwensiya o pagpanglutos, kini nga mga tudling makatabang kanila sa pagkamaisogon o pag-angkon og panglantaw.

Awhaga ang mga estudyante sa paghunahuna kon sa unsang paagi dawaton si Jesukristo kon ang Iyang tawhanong kinabuhi nahitabo sa atong panahon karon.

Ang mga estudyante mahimong magtuon sa Juan 15:18–25 , nga mangita kon unsa ang giingon sa Manluluwas bahin sa kalibotan ug ang mga rason nganong ang Iyang katawhan kanunay nga nag-antos sa oposisyon ug paglutos gikan sa kalibotan. Unsa nga kahupayan ug kalig-on sa pagsunod ang atong makita diha sa Iyang mensahe?

Kita makasunod sa mga sugo bisan kon kita wala makasabot nganong gihatag kini

Si Propeta Joseph Smith (1805–44) miingon, “Ako kining gihimo nga lagda: Kon ang Ginoo mosugo, buhata kini” (Mga Pagtulun-an sa mga Presidente sa Simbahan: Joseph Smith [2011], 190). Ang mga kasulatan ug kasaysayan sa Simbahan naglakip og daghan nga asoy sa mga tawo nga mipili pagsunod bisan og sila wala kaayo makasabot nganong gihatag ang maong sugo o tambag. Ang mosunod nga mga tudling naglakip og mga ehemplo sa puno sa hugot nga pagtuo nga pagkamasulundon ug pipila sa mga panalangin nga nadawat niining mga indibidwal tungod kay sila nagmasulundon:

Adan ug Eva: Moises 5:5–12

Si Simeon Pedro ug ang iyang mga kauban: Lucas 5:4–11

Nephi: 1 Nephi 9:5–6

Ang mga estudyante mahimong dapiton sa pagpamalandong niining mga pangutana: Unsa ang pipila ka sugo nga wala ninyo kaayo masabti? Sa unsang paagi ang inyong gugma sa Dios makatabang kaninyo nga mahimong matinud-anon ug masulundon hangtod nga moabot ang dugang pa nga panabot?

Rebyoha ang inyong mga pasalig

Dapita ang mga estudyante sa pagrebyo og bisan unsang mga plano o mga pasalig nga bag-o nilang gibuhat aron mas magmasulondon sa Langitong Amahan ug kang Jesukristo. Tingali nabuhat na nila kini sa milabay nga leksiyon sa seminary o isip kabahin sa ilang mga tumong alang sa Kabataan ug Kabatan-onan nga progama. Kon sila wala pay tumong o plano sa pagkahimong mas masulundon, mahimo silang maghunahuna mahitungod sa usa sa mga sugo nga ilang gilista niini nga leksiyon.